Xtiidz Jesucrist ni bzaa
San LUC
1
Lguia ni bzaa Luc guetzy-rieꞌ
1 Nu xtahl meññ ni ba guzlo rzaa lo guehtzy ni guhc dlahd noꞌ, no riuꞌladzy yâme yqueꞌ gyreu merp mod-guhcu; 2 meññ ni bwieꞌ yahcu glo guzlou bluu yâmeu noꞌ, no bieno yâmeu meññ lehdy byraꞌdzu byzaꞌzy. 3 Naa zegahc günabdiidzaꞌ mod-nac nieꞌ xñahzu xtâ glo ru guzlou, par gunnaꞌ gyreu. No zegahc biuꞌdadzyaꞌ bzanu zaꞌgndzi, lehdy cshaalaꞌu loꞌy, Teófil, lii ni modni rsahc ni rnii, 4 lehdy ganniꞌ zaꞌgndzi ni nac ni uli de ni bluu yâme lii.
Psieññ to ángel Sacaríaz de ni guidguiahl Juaṉ
5 Dze-nac Herody ṟeiy lo ṟegioṉ-Judea, güyuꞌ to bahl ni le Sacaríaz, ni rahc cuent lee de lo xigrup Abíaz. Tziahl me le Elisabet, xiiñ bahl ni ziaad de lo xfamily gahc to bahl ni güyuꞌ le Aróṉ. 6 Gyrop yâme meññ-tziaawy lee ñaz-lo Dioz, no di rdzial mbehty ni nahcsy chehsh yâme porni rtzoo yâme gyre ni ne Dioz no ni ne xleiy me. 7 Nehx güdahp xiiñ yâme, porni nehx gudy xiiñ Elisabet dze-miꞌñ ziaꞌ leeyâme, no ba mînguhl gyrop yâme.
8 To dzé ru byleꞌ xigrup Sacaríaz ni nac yahc bahl par ctzoo yâme xtziiñ Dioz leññ idoró, 9 biahbt suert lguia Sacaríaz par tzu me, yquee me gue ni nixye. No ni rtzoo bahl tzcaḻ, dxu guiahb suert lguia la, wé we yquee gue ni nixye leññ xiydoró Dioz. Were güyuꞌ Sacaríaz zictzoo me dziñ-wé. 10 No xtahl meññ-guiedzy biaꞌn stziuꞌ gahc, ganino yâme Dioz, lóni gaquee me gue ni nixye leññ idoo. 11 Tohzy bwieꞌ Sacaríaz to x‑ángel Dioz zu xlad-drech ltar ru rqueꞌ gue ni nixye. 12 Hor-bwieꞌ Sacaríaz ángel‑e naꞌ, lîc biaadz me no modni bydzie me. 13 Were ra ángel leeme:
―Di gydziehbyiꞌ, Sacaríaz. Dioz ba bieññ ni günabiꞌ. Ba guidtap tziahliꞌ Elisabet to mdoñooby, cuy le me Juaṉ. 14 Modni sshihlyiꞌ no zrieñ meññ zegahc dzé ni ba guhl me, 15 porni mpyquie-rsahc‑e gac me no Dioz. Nehx zoo me vin ni zrieñ nistzuuñ. No antzy ni gahl me, ba nu Spirt-Sant leeme. 16 Leeme gacno guibyguiat gyo xtahl meññ-Isṟael Dioz ni rtzoo mdad leeyâme. 17 No ma nier leeme guiaad que Señor; no gac me beeiy mod-guhc gahc profet-Elíaz, porni tohzy ni tzu leññ xguîlmbahñ me no ctzoo me xroꞌ cos, lehdy gactziaawy meññ no guîntzi xiiñ, no lehdy gzobdiidz meññ-nahdy no gac yâme meññ-tziaawy, no mod-wé ctzoo me lehdy cuiahz meññ-Isṟael dze-guiaad Señor.
18 Were ra Sacaríaz ángel:
―¿Bia mód gannaꞌ bâḻ ni uli gayahbyiꞌ naa? Zoꞌ naa, di zaḻu we, porni ba mînguhl naa, zegahcu dtziaalaꞌ.
19 Were ra ángel leeme:
―Naa we ángel-Gabriel ni nu lo xtziiñ Dioz. Dioz pshahl me naa, zidnen lii nirieꞌ ni nac xtidz-mos me ni gutzyaꞌ lii. 20 Per gumm di nlíladzyiꞌ ni ren lii la, ba gaquiꞌ ngop xtâ gahlr mdoo, were guibyguiat gyniiy. No gyre ni ren lii, zdzihñ dzé ni gacu.
21 Gyre meññ zu yahc stziuꞌ gatzunadz, no ganii leññ ihqy yâme: “¿Biahx‑e nacu galee Sacaríaz leññ idoo?” 22 Hor-byruu me leññ idoo no bydzihñ me ru zu meññ-caḻ yahc stziuꞌ, di ñaḻ nnino me lee, pur señ gatzoo me, porni ba di raḻ gynii me. Were gunn yâme nu ni bluu Dioz leeme leññ idoo. No ze biaꞌn me, ba di ñaḻ nniir me.
23 Ru ba byzaꞌ dzé we naꞌ ni ptzoo me xtziiñ Dioz leññ idoo, gyzac zia me xiryuꞌ me. 24 Luxu, güyuꞌ gahc Elisabet de xcuidad, no ba nehx ria me mbahty leññ gaay mboo, gaguꞌ ihqy me, ne me: 25 “Gayacno Dioz naa, leewe ptzoo me mod-wé. Ba nehx sshihdzyr meññ naa.”
Psieññ to ángel Maríe de ni guidguiahl Jesúz
26 Ba rahp shoꞌb mboo de ni nu Elisabet de xcuidad me, pshahl Dioz ángel-Gabriel to guiedzy ni le Nasaret ni nu lo ṟegioṉ-Galilea, 27 ru nu to ndzabxtohby ni le Maríe ni nac diidz guidzña no to mpyquie, ni le José. José naꞌ, ziaad me de lo xfamily ṟeiy-Davit ni güyuꞌ ba xtze. 28 Güyuꞌ ángel ru dxie Maríe, günii diux leeme, no ra leeme:
―Dioz ni rtzoo mdad nu no lii. Güle me lii, no ma nu laꞌy lii de gyre lahd meññ-ngünaa.
29 Lîc biaadz Maríe hor-gu ángel leeme mod-wé, no ganii leññ ihqy me bia nacu gu ángel leeme ze. 30 Were ra ángel leeme:
―Di gydziehbyiꞌ, Maríe, porni biuꞌladzy Dioz güluꞌ xlaꞌy me lii. 31 No guidguiady to mdoñooby, no cuy le me JESÚZ. 32 To mpyquie-rsahc‑e gac me, no tzu le me Xiiñ Dioz-nu gybaa. No ctzoo Dioz leeme ṟeiy, mod-guhc gahc Davit, xfamily me ni güyuꞌ ba xtze. 33 Ctzoo me mdad meññ-Isṟael, no nehx ziuꞌ dzé gylux de ni dzictzoo me mdad.
34 Were ra Maríe ángel:
―¿Bia mód gacu ze? Naa nehx dxienon mpyquie; ndzabxtohby‑e naa.
35 Were ra ángel leeme:
―Guiaad Spirt-Sant, no xguîlbyniꞌ Dioz ni nu gybaa gutzu lii mod-to zá. No leewe, mdoo ni dziguiahl gac me nunzy par Dioz, no tzu le me Xiiñ gahc Dioz. 36 Zegahc to lahd xfamilyiꞌ, Elisabet, guidtap to xiiñ, nîcze ba ngünaguhl leeme. Nîcze ne meññ ba nehx zahp xiiñ me, per ba rahp shoꞌb mboo nu de xcuidad me. 37 Porni par Dioz nehx nu mbehty ni ngann.
38 Were ra Maríe:
―Naa nun par ctzon nitisy ne Dioz ni rtzoo mdad. Ctzoo me mod-gayahbyiꞌ naa.
Luxu, byruu ángel za.
Bictixlo Maríe Elisabet
39 Leññ gahc dze-wé, ngueeḻy gahc güya Maríe to guiedzy ni nu chehsh dahñ lo ṟegioṉ-Judea. 40 No bydzihñ me xiryuꞌ Sacaríaz, güyuꞌ me günii me diux Elisabet. 41 Hor-bieññ Elisabet günii me diux, byniꞌby mdoo leññ me, no güyuꞌ gahc Spirt-Sant leeme. 42 No günii me ndip, ra me Maríe:
―Dioz ba güluꞌ xlaꞌy me lii de gyre lahd ngünaa, no ba güluꞌ xlaꞌy me mdoo ni guidtapiꞌ. 43 ¿Dxu we nacaꞌ par guiaad xmam tDiozaꞌ guidtixlo naa? 44 Ren ze, porni hor-bieññaꞌ güniiy diux naa la, byniꞌby gahc mdoo dleññaꞌ de guîlrxihly. 45 Dxu ñahc beeiy lii, porni bylíladzyiꞌ dziguiahc ni gu Dioz lii.
46 Were ne Maríe:
No gyre ni nacaꞌ rguguian Señor ni rtzoo mdad;
47 no leññ dguîlmbahñaꞌ rxilynon Dioz ni guislaa naa de lo guîlnadz ni ziaad.
48 Porni nîcze xmós me naa ni ndruhty nehx nac, per bylaby me naa.
Glohg ngâstoo gyre meññ znii dxu ñahc beeiy naa.
49 Porni Dioz ni beeiyu lee gyreu, ptzoo me xroꞌ cos no naa;
¡nuguia le me!
50 Nehx zluhx ni rioob me meññ ni rzacbeeiy leeme.
51 Modni xroꞌ cos ba ptzoo me;
bniꞌdy me meññ-rguguia leegahc leññ ihqy yâme.
52 No güloo me ṟeiy yahc de ni rtzoo mdad,
no gülesyguia me meññ-nehx rguguia leegahc.
53 Bdee me meññ-rlahn gyre ni riuꞌladzy,
no meññ-rahp medy, nehx bdee me lee mbehty.
54 Gucno me meññ-Isṟael ni nac xmeññ me;
no nehx güyuꞌ dzé psaꞌn me ni rioob me leeyahc,
55 porni mod-wé ra me difamily nó ni güyuꞌ ba xtze,
lee we ni le Braṉ no zrieñ xfamily me ni guidtzur.
56 No biaꞌn Maríe xiryuꞌ Elisabet beeiy tzonn mboo. Luxu gubyguiat me xiryuꞌ me.
Ru guhl Juaṉ ni rchôbnihs meññ
57 Bydzihñ dzé we naꞌ de ni bidtap Elisabet to mdoñooby. 58 Hor-gunn meññ-nuno me gahsh no gyre xfamily me xroꞌ guîlndzi rahp Dioz no leeme, güya yâme bictixlo yâme leeme. 59 Lo shun dzé de ni guhl mdoo, güiyno yâme leeme par güyuꞌ señ lady me, lehdy guieññ xmeññ Dioz‑e leeme, no ne meññ:
―Ñuꞌ le me Sacaríaz, mod-le gahc xtad me.
60 Were ra xmam me:
―Yac. Juaṉ‑e tzu le me.
61 Ra yâme leeme:
―¿Bia nacu? Nehx nu lahd xfamily laꞌd le ze.
62 Were, ptzoo yâme señ Sacaríaz lehdy güieꞌ yâme bia mód riuꞌladzy me tzu le mdoo. 63 Were günab Sacaríaz to tabl, bzaa me lou, ne me: “Juaṉ‑e tzu le me.” Modni rtzunadz gyre yâme. 64 No lohg hor-wé gubyguiat günii Sacaríaz, no guzlo gahc gaguguia me Dioz. 65 Gyre meññ ni nuno me gahsh ptzunadz yâme hor-bwieꞌ yâme günii me sto. No ru yâmeu lo meññ gyre guiedzy ni nu dahñ lo ṟegioṉ-Judea. 66 No gyre meññ ni gayieññ ni ganii yâme, ganii leññ ihqy yâme, no ne yâme:
―¿Dxuhx‑e gac mdo-rieꞌ?
Ne yâme ze, porni neññ ulihbu nu Dioz no leeme.
Ni biiḻy Sacaríaz
67 No güyuꞌ gahc Spirt-Sant xtad mdoo, lee we Sacaríaz, no bisnii Dioz leeme, ne me:
68 Xquix Señor, ni nac xDioz meññ-Isṟael;
biahd me no bislaa me xmeññ me de lo guîlnadz ni ziaad.
69 Dioz gashahl to ni beeiyu lee par guislaa nó de lo guîlnadz ni ziaad,
no ziaad me de lo gahc xfamily Davit ni ptzoo xtziiñ Dioz.
70 Mod-wé günii Dioz ctzoo me dze-bisnii me xprofet me ni güyuꞌ yahc ba xtze,
71 lehdy beeiy gylaa nó de lo ña meññ-rdziadzyno nó, no meññ-néladzy nó.
72 No ne me zioob me gyre dmeññ nó ni güyuꞌ ba xtze,
no nehx ziaaḻladzy me bdee me diidz de ni ziuꞌ sto mod-coby ni ctzoo me no xmeññ me.
73 Niwé we ni togahcs ra Dioz dtad nó Braṉ ni güyuꞌ ba xtze,
ne me gacno me nó,
74 lehdy dze-ba bislaa me nó de lo ña meññ-rdziadzyno nó,
beeiy ctzoo nó ni ne me sinn di gydzie nó,
75 no leññ dze-mbahñ nó, tzu nó ctzoo nó ni nac xñahzû no gac nó meññ-nac nunzy par leeme.
76 No lii, shiꞌñ, tzu ley xprofet Dioz ni nu gybaa,
porni nier lii tza dzicsieññiꞌ meññ guiaad Señor, no were ba guiaad me.
77 No csieññiꞌ meññ-Isṟael beeiy gylaa yâme de lo guîlnadz ni ziaad
porni Dioz beeiy csiaaḻladzy xguîlquie yâme.
78 Porni de ni rioob Dioz nó, xroꞌ we leeu;
leewe cshahl me to ni gac beeiy ncübidz ni cu byniꞌ ru nu nó,
79 lehdy güieꞌ meññ ni nu lo guibcawygüxihñ no meññ-nu yahc lo ña guîlguhty bia gatzoo yâme,
no lehdy gluu me nó to ñaz-mos ru tzu nó dzie tziaawy.
80 No ganiꞌzy ñôbydxuur, no ganiꞌzy ni nu leññ xguîlmbahñ me; no güyuꞌ me lo yu-bihdzy xtâ dzé ni guzlo psieññ me meññ-Isṟael.