20
Pauro ro duriomoro teibo ina giraturiomai-ma
1 Iedi mibo tanaro ro na-gororosioidiro karadabu moro ato na-goroporeai, taie Pauro ro kimibiria urubia aise gidabuai-ro. Nou ro neio owera iato gimowauti, kimibiria pupuwo kimowaititi sapuwo to. Iedi tanaro ro nou ro na-goporeai, nirimagare owera kutura, taie neio nou ro aise gimeserai. Nu imese gabu Masedonia duriomoro to,
2 edi sabowa ro na-giamo iato nou ro kimibiria urubia, sirio meamea owera gimowauti neio pupuwo neito gimowaititi. Imese neito gou-ro womu tato Akaia duriomoro to ti-gorowateai-ro,
3 nou iato 3 sogomi to imidirotiti.
Nu ta-geremododiai Siria duriomoro to ioudo orowameai rie, kaupoti arua Iu urubia ro Pauro sowake ta-gemedea-rimo opia ri. Nou ro na-girorowai nedi owera ro nou ro ibo, ‘Mo neido orowameai-ri pua Siria duriomoro to. Mo keba se Masedonia duriomoro to anama-ou-ri, ina ioudo anama-abu-ri Siria duriomoro to.’
4 Nu edi urubia mutu goroho nu neio masiro ie, Sopate Pirasi mere ie nou Berea sabowa dubu e. Arisitaka Sekundasi mutu neitiro Tesaronika sabowa dubu teibo ie. Gaiasi Debe sabowa dubu e, Timoti, ina Tikikasi Toropimasi mutu neitiro Eisia duriomoro dubu teibo ie.
5 Neio keba moro to gou-rimo, ina mo Pauro mutu Torowasi sabowa rido neio ro ioudo nimasebidiro-marimo.
6 Taie neitiro Piripai sabowa ato Patapata Beredi Kiaupai Tato nou soriomu na-gororoporeai, iato neitiro ioudo aise niabu-rido Torowasi sabowa to. Taie 5 saiki na-gororoporeai-rimo, neitiro ro neio Torowasi sabowa ato niatuamo-rido, iato nimo atu se 7 saiki to norowomidiro.
Pauro ro Etiko pamo rido gowoubua
7 Nimo Torowasi sabowa ato atu se naradabuai-rimo Sande saiki ato, Iesu nirimagare ohona ouho rie. Sirio owera Pauro ro urubia neito gimowauti. Nou ubi a-gowamo ata kowaroho ato asiriai ri ata duriomoro to, ina nou ri gimowauti urubia sirio owera. Nou ro owera inaina aise gemoguwado, womu tato duwo turi ti-gorobai.
8-9 Nimo netewa didi ohu ra maumo ra moto ato nato naradabuai-rimo, erempa sirio ta-niwatuti-rimo ibose to giriware-rimo, ibi gugu korosa pina ro aise gowai-rimo. Taie ata orio dubu masiro Etiko aruo ato gomidiro. Pauro owera aise garowado Etiko isana aruo ato norou ro ibo goduwuti, womu tato nu norou ro ti-gowagumaidiro, taie tuturu to owamo pua nou ohu ia rido aise geretei-ro goto to. Urubia ro nu pamo ia goumai-rimo.
10 Taie iato Pauro na-gosuruwo-ro kauhio to na-girimusubua, Etiko nou ro aise gohiai. Nou ro ibo namuturubi aboto, ‘Kimaragoidiro na ie, nu keremiro ie.’
11 Taie Pauro aise gorowameai ohu ia moto to, Iesu nirimagare ohona atu se urubia mutu iato giho-rimo. Pauro ro ina edi owera ro aise goguai, tuturu tau to gorowauti womu tato saiki ro ti-giwaroho. Taie iedi kowaroho ro nu imese gasiriai ata duriomoro to,
12 isana edi mere ro geretidiro aruo rido, namuturubi ro kamade mutu imese gowameai-rimo simara moto to.
Pauro Mireto sabowa to gou
13 Pauro nimo ro aise nemeserai-rimo Torowasi sabowa ato. Nou ro ibo, ‘Mo sairo to anama-ou-ri Asosi sabowa to, ina nio aboto ioudo anama-orora-ri.’
Nimo Torowasi sabowa rido ioudo sawa pe se norobai-rimo, imese niapere-rimo Asosi sabowa to. Pauro isana ioudo sairo to ito gou.
14 Nimo ito na-norowateai-rimo nu nimo ro iato natuamo-rimo. Taie nu ioudo aise nowia-rimo imese niabu-rimo Mitirini sabowa to,
15 ina ata saiki Mitirini sabowa rido nasiriai-rimo imese nou-rimo Kiosi ura to. Ina ata saiki Kiosi ura na-norohodorai-rimo, imese niabu-rimo Samosi ura to. Ina iato ata saiki Samosi ura nimo ro na-nemeserai-rimo, Mireto sabowa to aise norowateai-rimo.
16 Pauro ro keba se kimaragoidiro to owera ta-gisioidiro ibo, nu ubi tato ie mediomedio koroho Epesesi sabowa nou ri gorohodorai, mabu nou ubi tato ie iedi duriomoro ro nato tuturu tau to komidiro. Nou ri noroho-rimo sobosobo to, nou ubi ie samo to korowateai Ierusarema sabowa to, nou modobo ie Ohona Kiwoiriamuti Soriomu ro iato aise katuamo.
Pauro iana owera ie Iesu urubia etio ro emeauri-dumo neio aboito
17 Mireto sabowa rido Pauro ro owera ibo gemeiriai Epesesi sabowa to, Iesu urubia etio ro emeauri-dumo neio ohau ri nou aboto.
18 Neio nou aboto na-gorowateai-rimo, nou ro ibo, ‘Mo keba se neito beda tau ato nou-ro Eisia duriomoro to, mo komidiro keremiro nio ro ta-nemasibai-rimo. Mo beda sosoro nimidirotiti nio mutu nio umoro ta-goi-rimo.
19 Mo Iu urubia ro sowake ta-nemaremotiti-mo ubauba owai ri, ina mo neio ro auna mibo nomiotiti-mo. Kaupoti nio umoro ie Abera Naramu woko na-nemesioidirotiti, keremowabu tato se nemesioidirotiti, ibose nio sapuwo to mo idobi sirio tau to ti-nirototiti.
20 Mo ro nio aboudo ata kiwarebai owera ata owopirowa pua, nio umoro ie mo ro imese momuo se noti nimowautiti nio kiwarebai sapuwo to. Nio umoro ie mo ro nio mea owera paea se nimowautiti, ibose nio simara korowomidiro moto ato iato ta-nimowautiti.
21 Iu urubia, Iu owera karo tato urubia, nio mo ro pupuwo owera ta-nimiotiti atu se, ubauba aboudo erewesegerai ri Godi aboto, modobo ie kimibiria Abera Naramu Iesu sapuwo to.
22 Kaupoti nedi tau ro nato Tarena Urio ubi ie mo Ierusarema sabowa to kou, mo ro modobo ie nou ubi tanaro aise kisioidiro. Mo ito nama-orowateai-ri, mo umoro pua etou tanaro sirio ro amadimo-ororosioidiro-ri mo aboto.
23 Mo umoro ie sirio sabowa to na-nirohotiti Tarena Urio ro mo ta-nemowapotaidirotiti-ro ibo, mo Ierusarema sabowa ato ubauba anamadimo-owaititi-ri, ina dibura to anamadima-aremo-ri.
24 Kaupoti mo simara keremiro eremaragoidirotiti pua. Auna tanaro owamo ibo modobo ie misinare woko Abera Naramu Iesu edi woko ro na-gaiwai-ro mo aboto, mo ro mea se kemoporeai. Nedi woko ro ibo ie, mo ro mea owera Godi edi wisa tato natonato ro nou sapuwo to urubia imowauti ri.
25 Ina neito ma-dirowidiro-rimo, mo nio aboto ta-nirohotiti, Godi edi kiwaboi tanaro ro, nio mo ro nou sapuwo to nitomutiti. Kaupoti mo umoro towamo mo nio buro ro ido owea-ri pua.
26 Ina abora nio nou mabu ato a-nimowapotai, nio ata Godi aboudo imese nama-araraseperai-ri, nio ro mo aboto emowamedei ate!
27 Mabu Godi edi ubi tanaro sirio ro mo ro nio aboto imese ta-niwautititi.
28 Nou ro edi urubia ro na-giahodorai simara keremiro to, neio nio ro mea se ba-dimowotoi-mo, oro ia ibose nakara se mea se ba-deremowotoi. Nio idaibo sosoro ie sipisipi kimowotoi urubia ie, Tarena Urio ro nedi woko ro nou gaiwai-ro nio aboto, Godi edi urubia ro mea mino to emeauri ri.
29 Mo umoro ie, mo neido nama-orowameai-ri, mo saro gabo ato arua urubia amadidimo-ou-ri, ina serawo soka ro sipisipi beda sosoro iaipirio-dumo, neio ro Iesu patu urubia idaibo mino to amadimi-iwaititi-ri ubauba.
30 Mo umoro ie nio mo ro namadi-imeserai-ri arua nio abato amadime-erereihuti-ri, morobise owera neio ia ro amadimi-iwakopeamuti-ri, kimibiria urubia neio aboto iwasaudo rie.
31 Ina noudo ie, ba-deremowotoi-mo! Sirio tau aise gi-imaragoidiro-ri, mo nio mutu 3 kisimisi to na-nimidirotiti, mo ro meamea owera iwopirotiti pua, nio abato sirio tau duwo saiki idobi mutu mo ro nio erere se totomu to nirobidirotiti.
32 Nedi tau ro nato nio mo ro Godi tu to niedea. Nou edi wisa tato nirimagare ro modobo ie nio pupuwo nou ro kimowaititi, ina nou maumo ato anamadi-imeserai-ri. Ina nou ro meamea wisa ama-imio-ri. Iedi meamea wisa ro Godi abato na-iamo-die nio sapuwo to irobidiro-die, etio ra tarena urubia to na-wararasoro-dumo, io nio imese amadi-imio-ri.
33 Mo nio mutu na-nimidirotiti, arua rubi mani, namabu mutu neio aboto imaragoidirotiti pua.
34 Nio umoro ie mo ohona obotama mutu, ina mo edi urubia mutu na-nirohotiti neio ohona obotama mutu, mo ro woko nisioidirotiti, ina edi woko mani ro neio neito niwarebidirotiti.
35 Mo ro sirio tanaro niwapotaidirotiti nio aboto, mo ro binio to nisioidirotiti mani woko, temeteme urubia nedi mani ro neito niwarebidirotiti, ina modobo ie nio ro idaibo tanaro kibodoro. Nio ibose ta-nitamudirotiti nio ro modobo ie kimaragoidiro Abera Naramu Iesu beda owera garo “Kaiwai ato auna meana nato kowea ie, komidai ato auna meana nato kowea pua.” ’
36 Pauro owera karo na-goporeai, Iesu urubia etio ro emeauri-dumo neio atu se kauhio to aise girimusubua-rimo, Godi neio ro iato imese gararatoro-rimo.
37-38 Pauro neio ro idobi se gememai-rimo, mabu nou ro keba se ta-gutura ibo ‘Mo nio buro ro ido owea-ri pua.’ Nou neio ro aise gohiai-rimo atu se imese giodori pe mokuro to, sawa pe to orora ri.