22
1 Nou ro ibo, ‘Mo borubi Iu urubia, nio arua abeamio to na-niasoro, nio owera neito ma-dirowidiro-rimo, mo ro beda sosoro tanaro nisioidirotiti nio mo ro nou anama-imowauti-ri.’
2 Taie Pauro owera na-gatamuai nou ro neio simara Iu owera to gimowauti, urubia sirio ro na-gemororowai-rimo nou edi owera to garo neio ata owera ata aro pua imese gasio se gemowadau.
Nou ro ibo,
3 ‘Mo Iu dubu e, mo mamu ro Tasasi sabowa ato noroto, Tasasi sabowa Sirisia duriomoro ato owamo. Kaupoti Ierusarema mo kororomai sabowa ie, sikuru ato nato nirohotiti, mo Gamariere ro mea mino to natamudirotiti nimo nasa naminami sabi patu beda sosoro iamo. Nio pupuwo beda sosoro iasibowado-dumo Godi edi ubi tanaro nou kisioidiro aboto, ina mo ibose pupuwo ta-nasibawadotiti.
4 Etio ro obodorotiti-mo Iesu edi gabo ro, neio arua mo ro ubauba mino to ta-niadotiti. Arua urubia mo ro ta-niopiautiti, ibose upi dubu ta-nirobotiti-ro, mo ro neio dibura to aise niaremotiti.
5 Io morobise ie nio na-orowomidiro nato Godi ra urubia ra turituri eputa dubu, Iu koto kiauri urubia mutu, neio ro korowauti modobo ie ibo mo ro edi owera ro naro-die io morobise owera ie. Nedi urubia ro neio ro mo aboto peba titi owera ta-giaiwai-rimo, iato mo neido aise nasiriai Damasikasi sabowa to, Iesu kowasoro urubia iato na-gorowomidiro neio irobo rie, ina Ierusarema sabowa ato dibura to nato iaremo rie.
6 Mo Damasikasi sabowa aupiaupi na-nemowaititi, saiki turi ato gotoi. Tuturu to pua auna ia pina benenio mutu toboro rido nato gerememiai-ro.
7 Mo iato aise neretei, sapuwo pamo imese norobu. Ina mo ro owera kodu se nirorowai toboro rido na-gutura-ro “Sauro! Sauro! Mo oro ro temeteme etou mabu ato nomiotiti?”
8 Taie mo ro nu ibo nemowameai “Auna dubu, oro etu ra?”
Ina ata owera kodu iato nirorowai “Mo Iesu e, mo Nasareta sabowa dubu e, mo oro ro nomiotiti temeteme.”
9 Edi urubia ro gou-rimo mo mutu neio ro owera mea se irorowai pua toboro rido na-garo-ro, kaupoti neio ro pina se gowea-rimo.
10 Taie mo ro ibo, “Abera Naramu, ina mo beda sosoro nama-orowati-ri?”
Ina Abera Naramu ro mo owera ibo nemowameai-ro, “Oro deribua! Ito ba-dou Damasikasi sabowa to oro iato urubia ro amadime-emowauti-ri mo ubi tanaro kisioidiro aboto. Keba se oro sapuwo to mo ro gabo ta-nisioidiro.”
11 Mo modobo pua kirarowea aboto, mabu mo idomari teibo pogo auna ia pina ro nemowai. Mo edi urubia mutu na-nou, mo neio ro norobai-rimo nato nowaguo-rimo Damasikasi sabowa to.
12 Taie Damasikasi sabowa ato, ata dubu masiro Ananaiasi nou ro gou-ro mo aboto. Nedi dubu ro Godi nou ro emaragoidirotiti ibose Mose sabi nou ro mea mino to ibodorotiti. Imese Iu urubia Damasikasi sabowa ato na-irowomidirotiti, nou sapuwo to mea owera iarotiti-mo.
13 Taie Ananaiasi ioudo na-gou-ro mo gomo ato aise gotobowa. Nou ro ibo, “Neama Pauro, oro idomari dirarowea!”
Taie mo idomari teibo na-nirarowea nu mo ro mea se nato nowea.
14 Ananaiasi ro ibo, “Nimo abeamio nasaio ro edi na emowabutiti-mo, oro nou ro keba se ta-garapoi-ro nu edi ubi ro oro ro umoro oi ri. Ibose oro nou ro ta-gararapoi-ro Godi edi Tuputupu Dubu ro oro ro owea ri, ina nou owera irowai ri.
15 Oro ro nou sapuwo to imese urubia sirio ama-imowautiti-ri Abera Naramu oro ro beda sosoro gowea ina nu owera kodu beda sosoro gemororowai.
16 Abora oro mo ro a-nemowapotai, mabu boira oro tuturu tau to na-eremasebidiro? Deribua, obo to ba-mowarumia-mo oro Godi ro ubauba nato ama-ematopeamuti-ri. Oro kararatoro owera nama-aro-ri nou aboto, oro nou ro meana nato ama-owai-ri.”
17 Ata tau mo Ierusarema sabowa to neito na-norowameai-ro, mo Tarena Moto ato Godi iato nararatoro. Iedi kararatoro maumo ro nato mo ro hiwo sosoro to nato niauri,
18 Abera Naramu mo aboto owera na-garo-ro. Nou ro ibo, “Deribua! Ierusarema sabowa demeserai-ro! Nato mo sapuwo to oro edi kimowauti owera ro urubia ro amadimi-ibeiouti-ri.”
19 Kaupoti Abera Naramu mo ro ibo nemowameai, “Nedi urubia ro neio umoro tiamo ibo, Iu urubia edi karadabu moto sirio ro na-orowotoi, oro edi kimibiria urubia ro mo ro ubauba mino to ta-niadotiti, taie aise niaremotiti dibura to. Mo ro idaibo tanaro nou nisioidirotiti.
20 Neio ibose umoro ie oro sapuwo to owera edi dubu ro irowautiti Sitibini, edi tau ato na-gopia-rimo mo ro ubi to nomidai. Nou edi moro ato na-gopia-rimo neio mo ro nimotoi obotama mo ro nimiauri.”
21 Kaupoti Abera Naramu ro ibo, “Dou! Oro mo ro anama-otiodorai-ri muso duriomoro to, Iu owera karo tato urubia imowauti ri.” ’
Boso eputa dubu ubi ie Pauro epesuti ri
22 Ina iedi urubia sirio ro na-gorowomidiro neio ro Pauro owera gare se gemedea-rimo, womu tato neio ro na-girorowai-rimo nou iana owera, neio nedi owera ro nou ro gimowai serawo. Neio owera mutu aise giriribua-rimo nou aboto. ‘Nedi dubu ro kopia modobo ie, sogosogo se omidiro nato, etou ememidiro, opia rie!’
23 Neio iato ohu obotama aise giwagarewado-rimo iato giaeauti-rimo mabu neio auna ia serawo ro giwati, ibose arua urubia goto panese na-giwoiriamuti-rimo ohu to iato gihere-rimo.
24 Roma boso eputa dubu ro boso urubia iato gimowapotai Pauro ina orobai ri bariki to owou ri, iato kerei to epesuti rie, womu tato Pauro ro beda ubauba tanaro gisioidiro nou ro kiwapotai. Boso eputa dubu ubi ie umoro koi mabu boira Iu urubia serawo Pauro aboto na-goi-rimo.
25 Nu boso urubia ro na-gemotohiti-rimo epesuti ri, edi boso dubu ro nou abato na-gotoi Pauro ro ibo nou aboto, ‘Nio ro modobo ra Roma dubu kado? Sabi ra Roma dubu keba se kerei to kepesuti, ina saro to koto aboto iato kowou? Io, sabi ie!’
26 Taie edi boso dubu ro na-gotoi Pauro gomo ato, nou ro edi owera ro na-girorowai nou aise gou boso eputa dubu iato gemowapotai, ‘Oro ro etou tanaro ama-osioidiro-ri? Iedi dubu ro ibo aro-die nou Roma dubu e.’
27 Taie boso eputa dubu ro na-girorowai nou imese gou-ro Pauro aboto. Nou ro ibo, ‘Oro Roma dubu ra?’
Pauro ro ibo, ‘Io mo Roma dubu e.’
28 Boso eputa dubu ro ibo, ‘Mo ro gabamani aboto auna mani ta-niaiwai Roma dubu to kararapoi aboto.’
Kaupoti nu Pauro ro ibo gemowameai, ‘Mo ro mani iaiwai pua, mo edi tau ato noroto mo Roma dubu to nararapoi.’
29 Iedi boso urubia ro iato na-gorowotoi neio tere ri Pauro aise gemeserai-rimo, huru to imese goriodoi-rimo ibose boso eputa dubu tere ta-goi, mabu Pauro nou Roma dubu e, ina Pauro nou ro tau se ta-gemotohiti anikapo to.
Pauro ro gimowauti Iu koto kiauri urubia
30 Ata saiki Roma boso eputa dubu auna ubi ro gowamo umoro koi aboto Iu urubia etou na mabu ato oititi-mo serawo Pauro aboto. Taie nou ro owera iato gemeiriai Godi ra urubia ra turituri awawo urubia aboto, ibose Iu koto kiauri urubia aboto atu se aradabuti ri. Neio na-gou-rimo, Pauro nou ro aise gowosuruwo-ro, taie neio sosoro gabo ato iato gowotobowa owera aro ri.