23
1 Pauro ro iedi urubia ro na-giwia, nu idomari teibo imese neio ato se giwotobowa. Nou ro ibo, ‘Mo borubi Iu urubia, mo Godi sosoro gabo ato mo ro ubauba tanaro isioidirotiti pua, womu tato abora noti notoi.’
2 Ina Ananaiasi nou Godi ra urubia ra turituri eputa dubu e. Nou ro edio owera ro na-girorowai Pauro aboudo, edi dubu teibo ro na-gotoi-rido nou gomo ato, nou ro aise gimowapotai-ma neitiro ata ro Pauro giposo mabu ato iatoia ri.
3 Taie Pauro ro ibo Ananaiasi aboto, ‘Mo idaibo na-niatoia giposo mabu ato oro Godi ro ibose to ama-iatoia-ri! Oro ohu meana ie, maumo ubauba ia ie! Oro beda koto kiauri dubu ra? Oro nakara se sabi ta-wesebea! Mabu mo oro owera to didi poro to niatoia-die edi dubu ro nou ro.’
4 Iedi dubu teibo ro Pauro gomo ato na-gotoi-rido neitiro ro ibo, ‘Ei, ubauba owera aro mamo turituri auna dubu aboto!’
5 Ina Pauro ro ibo, ‘Nirimagare mo borubi Iu urubia, mo ro mea se eibimai pua ibo nou Godi ra urubia ra turituri eputa dubu e. Mo umoro ie ibo Tarena Buka ato owera tiamo “Owera to eputa urubia ubauba iwaititi mamo.” ’
6 Taie nou ro nato giwia Parasi urubia, Sadusi urubia soirio teibo na-gorowomidiro koto kiauri urubia karadabu maumo ato. Nou ro auna ia se nato gutura, ‘Mo borubi Iu urubia, mo Parasi dubu e, ibose mo abera aramio nogenoge mutu neio Parasi urubia ie. Mo kimibiria tiamo ibo, urubia na-orowaburo-dumo, neio pamo rido amadimi-iririburio-ri. Mo koto nou ri nowai-dumo.’
7 Pauro ro edi owera to gimowauti Parasi urubia, Sadusi urubia, neio ro na-girorowai-rimo, neio auna keremaro nato gatamuai-rimo. Iato neio aise gorohodowa-rimo Parasi urubia ata sapuwo rido Sadusi urubia ata sapuwo rido.
8 (Mabu Sadusi urubia neio kimibiria ibo ie, Godi sowake urio tato ie, erere urio tato ie, urubia na-orowaburo-dumo neio pamo rido iririburio-ri pua. Kaupoti nedi tanaro peteibi ro nato Parasi urubia timibiria-dumo.)
9 Nedi topira teibo ro auna serawo owera nato garo-rimo. Ina iato ta-gorowomidiro Parasi topira maumo ato arua Mose sabi kitamudiro urubia, neio owera mutu nato gotobowa-rimo. Neio ro ibo, ‘Nimo ro na-niauri-dumo, nedi dubu ro nou ro ata ubauba tanaro ata osioidiro pua. Etu umoro ra nu Godi sowake urio ro emowapotaidiro-die owera o idaibo ata urio ro.’
10 Ina iedi urubia ro auna ia auna ia keremaro nou gosioidiro-rimo. Modobo pua neio aupise gowamo karado, ina boso eputa dubu ro na-girorowai owera togo, nou ubauba kimaragoidiro ta-giwia ibo etu umoro ra Pauro neio ro amadime-ekekeouti-ri. Taie nou ro boso urubia se gimeiriai Pauro ina orobai ri, nu imese gowou-rimo bariki to.
11 Ina iato ata duwo Abera Naramu ioudo na-godoro-ro Pauro abato aise gotobowa, nou ro ibo, ‘Oro koko se ba-dirimusubuwa! Oro nato Ierusarema sabowa ato mo sapuwo to owera to beda sosoro to irimowotoititi, io idaibo sosoro ba-dirimowotoititi Roma sabowa ato.’
Pauro Iu urubia ro opia ri gemediai-rimo
12 Ata kowaroho amia Iu urubia nato garadabuai-rimo, neio ubi ie Pauro opia ri. Ina neio idaibo sosoro koko owera nou garo-rimo, ibo ‘Nimo ro ohona iho-ri pua, obo idio-ri pua, womu tato Pauro nimo ro tinamadimo-opia-ri.’
13 Nedi urubia ro neio atu se kidabuai ato, 40 dubu ta-gorohodorai-ro idaibo urubia ie neio ro gosioidiro-rimo nedi owera ro.
14 Taie neio imese gidiai-rimo Godi ra urubia ra turituri eputa urubia aboto, ibose Iu eputa urubia aboto. Neio ro ibo ‘Nimo ro koko owera ta-naro-dumo ibo “Nimo ohona iho-ri pua, obo idio-ri pua, womu tato Pauro nimo ro tinamadimo-opia-ri.”
15 Nio ro koto kiauri urubia mutu modobo ie owera kemeiriai boso eputa dubu aboto, ibo “Pauro ba-dotiodorai-ro nimo aboto, ina nimo ro nato anamadime-emodoruti-ri.” Boso eputa dubu ro namadi-emeiriai-ri nu ibo ama-imaragoidiro-ri Pauro ina mea se emodoruti ri owou-dumo koto kiauri urubia ro. Ina nimo ipi gabo ato anamadima-aratimuti-ri, nu namadi-ou-ri edi tau ro nato aise anamadimo-opia-ri.’
Neio ro edi owera ro nou gisioidiro-rimo Iu eputa urubia mutu.
16 Kaupoti Pauro edi mabira mere ro nedi owera ro nou ro na-girorowai, nou ioudo aise gou-ro bariki to Pauro emowapotai ri. Taie Pauro nou ro iato gemowauti edi owera ro.
17 Pauro ro ata boso dubu aise garamairiai-ro nou aboto ou ri. Nou ro ibo, ‘Nedi orio mere ro ba-dowou boso eputa dubu aboto, nou abato ata owera towamo, nou ro nou ama-emowapotai-ri.’
18 Taie edi orio mere ro boso dubu ro aise gorobai neitiro atu se imese gou-rido boso eputa dubu aboto. Boso dubu ro ibo ‘Iedi dibura dubu ro Pauro mo nou ro nemodowa-die ibo Modobo ra nedi mere ro oro aboto kowou? Nou abato ata auna owera towamo oro nou ro ama-emowauti-ri.’
19 Taie iedi orio mere ro nou ro tu rido aise gorobai, neitiro imese gou-rido nakara moro to. Boso eputa dubu ro ibo, ‘Oro etona owera owou-die, obiri idaibo tau ato ma-demowauti-ro.’
20 Pauro mabira mere ro ibo, ‘Iu koto kiauri urubia ro peba titi owera amadidime-emeiriai-ri oro aboto. Peba titi owera ibo ama-iamo-ri Pauro oro ro owosuruo ri neio karadabu soirio to kowaroho. Ina neio ubi ie oro ibo imaragoidiro ri iedi koto kiauri urubia ro neio ro Pauro koto abato mea se emodoruti rie.
21 Kaupoti neio owera oro ro aise imibiria ate! Mabu Iu urubia ta-gorohodowa-dumo, 40 ta-gorohodorai, nedi urubia ro neio ipi gabo ato amadima-arahiditi-ri nu kopia aboto amadime-emotoi-ri. Neio ro idaibo sosoro koko owera nou garo-dumo ibo, “Nimo ro ohona iho-ri pua obo idio-ri pua womu tato Pauro nimo ro tinamadimo-opia-ri.” Neio oro emasebidiro-dioumo nou emeiriai ri.’
22 Iedi orio mere ro boso eputa dubu ro ibo gemowameai, ‘Ata dubu ata aboto owera eherai ate ibo mo oro ro nemowauti nedi owera ro!’
Taie, iedi mere ro nou ro aise gotiodorai.
Pauro Siseria sabowa to gowahau-rimo
23 Boso eputa dubu ro netewa teibo boso urubia kiauri dubu teibo na-girumai-ma nou ro ibo, ‘Mo ro arua urubia Siseria sabowa to anama-imeiriai-ri. Nedi duwo ro nato nitiro ro ba-dimododiai-do 200 boso urubia, 70 hosi boso urubia daro 200 girikibi mutu boso urubia. Nedi duwo ro nato 9 koroko ato ba-dasiriai-mo Siseria sabowa to.
24 Ibose Pauro sapuwo to hosi teibo ba-dihodowa-mado, nu edi hosi teibo ro neito ama-ou-ri womu tato auna gabamani dubu Periki aboto mea mino to tamadimo-owateai-ri.’
25 Ibose boso eputa dubu ro ata peba titi owera ta-gisioidiro Gabamani dubu aboto, nedi peba ro owera nato ibo giamo.
26 ‘Mo Karadiasi Risiasi ie, nedi peba titi ro mo ro nisioidiro. Auna ia gabamani dubu Periki, nedi peba titi ro oro aboto ie. Oro aboto mo auna kamade ie.
27 Nedi dubu ro Pauro, Iu urubia ro gorobai-rimo opia ri, kaupoti mo umoro ta-noi ibo nu Roma dubu e. Ina noudo ie mo boso urubia mutu nu nimo ro nowairiai-rimo, nu neio ro aupise kopia.
28 Mo ubi ie umoro koi neio ro etou mabu ato isioidiro-dumo idaibo tanaro Pauro aboto. Ina nou mabu ato nowou Iu koto kiauri urubia neio edi karadabu ro nou aboto.
29 Mo umoro nato noi Iu urubia ro gutura-rimo ibo “Pauro ro nimo simara sabi gisebo.” Kaupoti nou modobo pua dibura to kedea, o kopia iedi sabi ro nou sapuwo to.
30 Mo edi tau ato nemowapotai-rimo ibo nu arua Iu urubia ro emediawado-dumo opia ri, ina nou samo to nou ri nemeiriai-die oro aboto. Ibose mo ro Iu koto kiauri urubia ta-nimowapotai, oro koto ato neio ro ba-memowauti-mo nou ro beda sabi gisebo.’
31 Edio duwo ro nato boso eputa dubu owera to boso urubia ro aise gosioidiro-rimo. Pauro imese gowodori-rimo womu tato Antipatiri sabowa ti-gorobai-rimo.
32 Ata saiki iedi 70 hosi boso urubia ro Pauro neio ro gowaboi-rimo womu tato Siseria sabowa ti-gorobai-rimo. Isana amia boso urubia Antipatiri sabowa rido ioudo aise gorowameai-rimo Ierusarema sabowa to.
33 Hosi to edi urubia ro na-gou-rimo, neio Siseria sabowa to na-gorowateai-rimo Gabamani neio ro peba titi se gemeihai-rimo, ina Pauro neio ro iato gowapotai-rimo nou aboto.
34 Taie gabamani dubu ro peba titi na-gioputi nou ro Pauro iato gemodowa. ‘Oro beda duriomoro dubu ra?’
Taie Pauro ro ibo, ‘Mo Sirisia duriomoro dubu e.’
35 Gabamani ro ibo, ‘Oro koto owera mo ro tau se emerewidiro-ri pua womu tato oro koto to edi urubia ro gedea-rimo neio neito namadidimo-orowateai-ri.’
Taie nou ro boso urubia se gimowapotai Pauro emotoi ri gabamani urubia moto gebari ato.