28
Pauro Marata ura ato gomidiro
1 Nimo na-niairiodiro-rimo iedi koriri ro neito, nimo umoro nato noi-rimo ibo, nedi ura ro masiro Marata ura ie.
2 Iedi urubia iato na-gorowomidiro neio ro nimo mea mino to niwarebai-rimo, mabu edi tau ro nato auna ia daroho ro garo, nimo imese kukamo ro niwati, taie urubia ro auna ia era iato nimaduruti-rimo.
3 Pauro era agagi ioudo na-giwosuruwo-ro aise giatowea. Ina bagawe era korosa tere ri ioudo na-gosuwoidiro-ro Pauro tu ato aise gagegeai,
4-6 iato nou ro aise gepesuai era to.
Sabowa urubia ro Pauro na-gowea-rimo bagawe tu rido na-gororidiro, neio ro ibo, ‘Nou ro ata dubu ata keba se ta-gopia ina nu nou ri agegeai. Obo to kororuwo egea se godobowauti-dumo, abora nu nato aise ama-araburai-ri.’
Urubia egea se geremasebidiro-rimo kikiou erereihuti ri, nu idomari to se gemowotoi-rimo, pamo araburuti ri. Kaupoti nou abato ata tanaro ata ororosioidiro pua, ina urubia ro nato gutura-rimo, ‘Nedi dubu ro orora dubu e, meana nakara se ta-worowai.’
7 Marata ura edi dubu ro na-iaurititi nou masiro Pabiriasi nedi tanaro ro na-gororosioidiro nou goto kere abato gororosioidiro. Nimo nou ro sirio se aise niramairiai-ro nou moto ato iato norowomidiro netewa didi saiki to, nimo nou ro mea se niwarebai.
8 Iedi tau ro nato Pabiriasi abera auna temeteme ro gorobai-rimo nou kabena ro gowati obo neke karima mutu wiritititi, aise orobutititi. Taie Pauro neido na-gou temeteme dubu aboto nou sapuwo to Godi iato gararatoro ina tu teibo iato giedea-ma nou durupi ato. Taie edi dubu ro nou ro meana aise gowai.
9 Nou saro gabo ato urubia umoro na-goi-rimo Pauro ro beda tanaro gosioidiro, temeteme urubia iato goroho-rimo nou aboto, neio meana nou ro aise giwaititi.
10 Iedi sabowa urubia ro nimo neio ro mea mino to niwarebidirotiti-mo, ina kasiriai aupiaupi nimo neio ro namabu to erere se iato niwarebai-rimo.
Pauro aupise ie korowateai Roma sabowa to
11 Nimo Marata ura ato 3 sogomi to norowomidiro, taie ata sawa pe to aise niora-rimo. Iedi sawa pe ro Arekesanidara sabowa rido gabu-ro, Isipi duriomoro ato na-owamo. Awawo bukopu tau na-gorobai iedi sawa pe ro iato gowadaudiro Marata ura ato. Iedi sawa pe ro wamea ato ota titi teibo ta-gisioidiro-marimo, edi ota titi teibo ro edemuai orora dubu teibo ie neitiro masiro ibo iamo-ma Kasita ra Porukisi ra.
12 Taie nimo Marata ura rido na-niora-rimo imese niabu-rimo Serikusi sabowa ti-norobai-rimo, iato netewa didi saiki to norowomidiro.
13 Ina ioudo nasiriai-rimo imese niabu-rimo ata sabowa to masiro Regiam.
Ina ata saiki na-gowaroho gawia kainai mea se giwadudumai-ro taie nimo ioudo imese niabu-rimo womu tato Puteuri sabowa ti-norobai-rimo ata saiki ato.
14 Puteuri sabowa ato kimibiria urubia nimo ro iato niwia-rimo, neio ro aise nidiobo-rimo nimo iato kaupoti woiki to orowomidiro ri.
Ina ioudo sairo to aise nasiriai-rimo Roma sabowa nemou-rimo.
15 Kimibiria namuturubi iato na-gorowomidiro Roma sabowa ato, neio ro na-girorowai-rimo ibo nimo aupise ie korowateai, taie Roma sabowa rido kimibiria urubia sirio ioudo gou-rimo nimo mutu ipi ato ororowea ri. Arua Roma kimibiria urubia neio Apiasi maketo moro ato niwia-rimo. Arua neio ata sabowa ato niwia-rimo apira urubia kirobuti moto peteibi iedi moro ato witoititi-bimo. Neio Pauro ro na-giwia, nu neio ro pupuwo bo gemowai-rimo, ina Godi aboto eso owera iato garo.
Io nimo idaibo sosoro nou-rimo Roma sabowa to.
Pauro ro Roma sabowa ato urubia Iesu sapuwo to gimowauti
16 Nimo ito na-norowateai-rimo Roma sabowa to Pauro nakara moto gemapoi-rimo nato imidirotiti. Kaupoti nu kemotoi dubu ro aise emotoititi.
17 Taie netewa didi saiki peteibi na-goroporeai-birimo, Pauro ro Iu eputa urubia aboto owera iato gemeiriai nou aboto ou ri. Neio na-gou-rimo nou ro nato gimowauti nedi owera ro. Nou ro ibo, ‘Mo borubi Iu urubia, mo ro ata ubauba tanaro ata osioidiro pua nimo simara urubia aboto, nimo nasa naminami beda tanaro isioidirotiti-mo mo ro neio ubauba iwaititi pua. Kaupoti mo Iu urubia ro Ierusarema sabowa ato norobai-rimo, ina mo Roma gabamani tu to neio ro aise nedea-rimo.
18 Mo Roma gabamani urubia ro na-nemodoruti-rimo mo abato neio ro ata ubauba ata owea pua, ina mo etou mabu rido anamadimo-opia-ri? Mo gabamani dubu ro emeiriai rie sabowa to,
19 kaupoti Iu urubia ubi tato goi-rimo. Ina mo ata gabo tato ie, nou ri nutura mo koto owera modobo ie auna gabamani Sisa nou ro kemewidiro. Kaupoti mo neito na-nou-die ibo pua Iu urubia koto ato iedea ri.
20 Nio mo ro ta-nimowapotai nio mutu eremowauti ri. Mabu mo ro ta-nimibiria Godi ro beda hodo gasaubiai nimo nasa naminami aboudo ibo Godi ro kohodowa dubu nimo aboto amadi-emeiriai-ri. Ina nimo Isiraere urubia nou nemasebidirotiti-dumo. Mo anikapo mutu nou mabu ato nimidirotiti!’
21 Pauro neio ro ibo gemowameai-rimo, ‘Oro sapuwo to nimo ro ata peba titi ata imidai pua Iu urubia aboudo Iudia duriomoro ato na-orowomidiro. Ibose Iu urubia ioudo na-iabudiro-rimo neito, nimo neio ro ata ubauba owera ata oro sapuwo to imowauti pua.
22 Kaupoti oro kimaragoidiro owera nimo ubi ie kirowidiro aboto. Mabu sirio urubia arua duriomoro ato na-orowomidiro nedi owera ro neito eremowagomea-dumo ibo iedi kimibiria patu urubia ro neio bagea gabo obodoro-dumo.’
23 Iedi keremowagomea ro nou saro gabo ato, Pauro Iu eputa urubia mutu ata saiki iato gohodowa-rimo neio ina aradabuai ri Pauro abato. Taie iedi keremowagomea saiki ro na-gorobai Iu urubia sirio ina aise gou-rimo Pauro beda moto ato imidirotiti neio neito garadabuti-rimo. Taie Pauro owera karo iato gatamuai neio kimowauti, imese saiki tuturu ta-gorowomidirowado-ro womu tato duwo ro ti-giatimai-ro. Nou auna se a-gotoi Mose sabi ato beda sosoro owera ro iamo ina Godi ipusu owera urubia ro beda owera ra na-gisioidiro-rimo urubia nou ro edi Tarena Buka owera ro neito gimowauti Iesu sapuwo to. Nou ro neio ibose ta-gimowauti Godi ro kiwaboi tanaro nou sapuwo to.
24 Nedi owera ro Pauro ro na-gimowauti arua urubia ro se gimibiria-rimo, kaupoti arua ro imibiria pua.
25 Ina iedi urubia patu teibo ro owera a-geremowameduti-rimo.
Iedi keremowagomea moro ro na-gemeserai-rimo, Pauro ro nedi iana owera ro nou gimowauti. ‘Tarena Urio morobise owera garo-ro nio nasa naminami aboto. Nedi owera ro Godi ipusu owera dubu Aisaia aboto keba se ta-garo-ro nio nasaio nou ro neito gimowauti,
26 Ba-dou nedi urubia ro neio aboto, ibo ba-daro. Nio ro owera amadimi-irowidiro-ri, amadimi-irowidiro-ri. Kaupoti owera maumo nio ro mea mino to imade-ri pua. Tanaro nio ro amadimi-iauri-ri, amadimi-iauri-ri kaupoti nio ro maumo mea se ieibimo-ri pua.
27 Mabu nio eputa imese koko ia ie. Nio gare tato ie, owera mea se irowidiro-ri pua, idomari kiopai se irowomidiro. Nio idomari mea se kidobura rasiri ie nio ro tanaro mea se umoro ba-goi-rimo. Nio ro simara gare to mea se kemedea rasiri ie, nio ro owera maumo mea se ba-gimade-rimo. Nio ro etu umoro ra kimaragoidiro to mea se ba-gowea-rimo, ina nio mo aboto nato ba-gorowameai-rimo nio mo ro meana nato ba-niwaititi.’
28-29 Ina Pauro ro ata owera iato gadabuai ibo, ‘Nio Iu urubia umoro ba-doi-mo ibo Godi edi kiapopo tanaro ro ta-gowapotai-ro Iu owera karo tato urubia aboto. Neio ia ro amadimi-imade-ri mea se.’
30 Pauro netewa teibo kisimisi teibo ta-giporeai-ma komidiro nakara moto ato. Nou beda urubia ro waraturiotiti-mo neio nou ro kamade mutu iramairititi-ro.
31 Urubia nou ro tere tato se imowautiti Godi ro kiwaboi tanaro sapuwo to. Nou ro ibose Abera Naramu Iesu Keriso sapuwo to ta-itamudirotiti, nu owera karo aboudo ata ro odiobutiti pua.