3
Sairo ubauba dubu Pita ra Ioane ra ro gowai-rido meana
1 Ata saiki Pita ra Ioane ra Tarena Moto to gidiai-rido. Iedi tau ro nato adimo saiki ro gowamo, neitiro nato godoro-rido Tarena Moto to Godi aboto araratoro rie, saiki gabogabo Iu urubia ibo isioidirotiti-dumo ito nou ri gou-rido.
2 Iedi Tarena Moto ro kodouti moro ato, ata dubu iato gomidiro, iedi dubu ro nou mamu ro ibose to goroto sairo ubauba mutu. Nou sirio tau namuturubi ro Tarena Moto magere damo masiro owamo ibo Mea Sosoro Magere nu neio ro nato owomititi-mo, urubia nagi-irimodouti-ri Tarena Moto to, nou ro urubia mani ri iato gi-iwaro-ri, ‘Ei mo buro mani to kowarebai modobo ra?’
3 Nu sirio tau ibo iwarotiti urubia, taie iato Pita ra Ioane ra na-gou-rido iedi dubu ro neitiro nou ro na-giwia-ma nou ro ibo, ‘Mo buro mani domia-rido!’
4 Kaupoti Pita ra Ioane ra ro idomari nou ato se giwotobowa-rido. Taie neitiro ro ibo, ‘Neitiro oro ro ma-diwia-maro!’
5 Taie iedi dubu ro idomari neitiro ato se giaro, nou ro ibo a-gimaragoidiro, ‘Mo neitiro ro mani anamadido-omia-ri.’
6 Kaupoti Pita ro ibo, ‘Mo mani tato ie, imese potoro ia ie, kaupoti mo abato edi nakomu ro na-owamo oro mo ro nou anama-omia-ri. Iesu Keriso Nasareta dubu edi pupuwo ro neito oro abora dotobowa, doroho!’
7 Pita ro edi dubu ro tumodi tu rido aise gewebidiro. Tuturu to pua edi dubu ro nou sairo mau teibo aise garadoborea-rido,
8 nou nakara se iato a-geremasibai, ‘O mo meana ta-noi.’ Taie nou aise geribidiro-ro, koroho iato gorowaibirio. Pita ra Ioane ra Tarena Moto to na-godoro-rido iedi dubu ro ibose to godoro neitiro mutu. Nou kamade mutu a-gererepedu Godi na-gemowabu
9 iedi tanaro ro na-gororosioidiro,
10 urubia ro na-gowea-rimo neio umoro nato goi-rimo ibo, ‘O nedi dubu ro na-imidirotiti koroho tato Tarena Moto magere damo ato na-owomititi-mo mani ri na-iwarotiti, nedi dubu ro nou se ie.’
Urubia ro na-geibimai-rimo nedi dubu ro, auna ia kimaragoidiro ro giopia. Neio modobo pua umoro koi aboto nedi tanaro ro beda sosoro to gororosioidiro-rimo, abora tanaro ie.
Pita ro gimowauti owera Tarena Moto ato
11 Iedi togiri dubu ro Pita ra Ioane ra aboudo aise girarebidiro. Urubia iato auna kimaragoidiro ro giopia taie neio iato gorowarario-rimo neitiro aboto. Neitiro Soromoni iedi Tarena Moto tamu ro nou maumo ato gotoi-rido.
12 Pita ro ibo, ‘Isiraere urubia, etou mabu ato imaragoidiro-dumo auna se? Neitiro nio ro etou mabu rido niauri-madioumo, nio etou idomari ra? Nio ibo a-imaragoidiro-dumo ra neitiro ro nedi togiri dubu ro koroho aboto simara pupuwo to a-nowotobowa-do ra? Nio ibo a-imaragoidiro-dumo ra nedi tanaro ro na-ororosioidiro mabu neitiro mea dubu teibo ie? Ee!
13 Aberaham, Aisaki, Iakobo, nimo abeamio nasaio ro na-emowabutiti-mo Godi, nou ro nou sowake dubu Iesu masiro auna ta-gowai, nou mabu ato ororosioidiro nedi tanaro ro. Kaupoti nou nio ro ubauba urubia aboto ta-gapoi-rimo opia ri, ibose Paireti ubi ta-goi nou dibura rido owagare ri.
14 Paireti nio ro gemowapotai-rimo ibo, “Nimo ubi tato ie Iesu kosuruwo aboto, urubia kiopiauti dubu ro mosuruwo-ro dibura rido.”
Iesu imese meana ia ie daro morobise ie kaupoti nio ro a-gebeiouti-rimo nou aboto nio ata ubi tato ie.
15 Nio ro noudo ie keremiro kimio dubu kopia, kaupoti nedi dubu ro Godi ro ta-gowameai-ro pamo rido, ina nimo ro ta-niauri-rimo simara idomari to.
16 Iesu Keriso iedi pupuwo korosa ro nedi togiri dubu ro meana nou ro gowai. Nodi tanaro ro neido ororosioidiro mabu neibi kimibiria tiamo Iesu sapuwo to, nio umoro ie nedi dubu ro, abora simara idomari to notiauri-dumo nou imese meana ta-woi mabu nou kimibiria auna ie Iesu sapuwo to.
17 Nirimagare mo borubi Iu urubia, nio ro gisioidiro-rimo nedi tanaro ro Iesu aboto, kaupoti nio umoro oi pua etou tanaro gisioidiro-rimo, ina atu sosoro ie nio kiwaboi urubia ibose umoro oi pua.
18 Godi ro keba se ta-garo nou ipusu owera urubia aboto nedi tanaro ro ororosioidiro ri, idaibo nou edi kohodowa dubu ro temeteme iwia ri ina araburai ri.
19 Nio abora modobo ie mea se kerewesegerai Godi aboto, nio edi ubauba ro nou ro nato imatopeamuti rie. Ina iato nio Abera Naramu ro orio pupuwo
20 amadi-imio-ri, ina Iesu nou ro nio aboto amadi-emeiriai-ri nou ro na-gapoi kohodowa dubu to.
21 Kaupoti Iesu modobo ie Adiri sabowa ato komidiro womu tato tanaro patu Godi ro meana nama-iwai-ri. Godi ro nedi tau ro nou sapuwo to keba se giwauti-ro nou tarena ipusu owera urubia aboto.
22 Mose ro ta-garo keba se, Nimo edi Abera Naramu ro Godi, nou ro amadi-apoi-ri ata ipusu owera dubu mo beda sosoro ra. Nedi dubu ro nio aboudo ama-aubai-ri, nio ro nou owera se ba-dirowidiro-rimo.
23 Etio ra nou owera kirowidiro tato neio modobo ie kiopiauti, Godi edi urubia ro neio aboudo imese amadima-araseperai-ri.
24 Godi ipusu owera urubia Samuere beda tau ato gomidiro womu tato abora neio ro atu se ta-gorowauti-rimo nedi tanaro ro nimo abato na-gororosioidiro-rimo nou sapuwo to.
25 Godi ipusu owera urubia ro edi na gowauti-rimo nimo ro noti nowea-dumo. Nimo ro ta-nowea-rimo Godi ro keba se beda owera garo nio nasaio aboto. Nou ro ibo gutura Aberaham aboto, “Oro merebusere aramio aboudo imese sirio duriomoro urubia nedi sopu goto ro nato meana amadimi-iauri-ri.”
26 Godi sowake dubu Iesu, nou ro na-gapoi-ro nio aboto keba se ta-gemeiriai-ro, nou ro nio imese korosa iwai ri ubauba tanaro kisioidiro aboudo iwesegerai ri.’