9
Sauro komidiro keremiro na-giwesegerai
1 Sauro Ierusarema sabowa ato kimibiria urubia iato na-irowomidirotiti, nou ro auna se imahuwotiti iopiauti ri. Nou ata tau iato gou Godi ra urubia ra turituri auna dubu aboto,
2 nou ro ibo, ‘Modobo ra umoro owera peba titi oro ro kiatiti ina mo aboto kiaiwai? Mo ia ro nama-imio-ri Iu urubia beda moro ato iradabutiti-dumo Damasikasi sabowa ato.’
Iedi umoro owera peba titi ro nato ibo a-giamo, Iesu gabo etio ro obodoro-dumo upi dubu Damasikasi sabowa ato na-orowomidiro modobo ie neio Sauro ro kirobo ina kiwameai Ierusarema sabowa to dibura to iato iaremo ri.
3 Taie nedi peba ro Sauro ro na-gimidai-ro, nu ioudo aise gasiriai-ro arua urubia mutu Damasikasi sabowa to. Nou ro sabowa aupiaupi na-gemowaititi-ro pina benenio mutu toboro rido nato gerememiai-ro,
4 nou iato aise geretei. Nou ro nedi owera ro nou girorowai simara ia owera to na-gutura-ro, ‘Sauro! Sauro! Mo oro ro temeteme etou mabu ato nomiotiti?’
5 Ina Sauro ro ibo, ‘Auna dubu, oro etu ra?’
Ina nou ro ibo, ‘Mo Iesu e, mo oro ro nomiotiti temeteme.
6 Deribua, ba-dodoro sabowa to oro iato ata dubu ro ama-emowapotai-ri oro ro beda tanaro ama-isioidiro-ri.’
7 Iedi urubia ro Sauro mutu na-gou-rimo neio ro ata dubu ata owea pua, owera kodu se girorowai-rimo neio iato woki ro giopia.
8 Taie Sauro ioudo na-geribua-ro nu idomari teibo modobo pua kimaipotai-ma, imese pogo ia ie. Taie neio ro nou aise gorobai-rimo tu rido imese gowou-rimo Damasikasi sabowa to.
9 Sauro netewa didi saiki ibose to gomidiro, dokou ra ohona ra kiho tato.
10 Ata kimibiria dubu iato ta-gomidiro Damasikasi sabowa ato nou masiro Ananaiasi. Taie Abera Naramu ro ibo nou aboto, ‘Ananaiasi! Ananaiasi!’
Nou ro na-girorowai nedi owera ro nou ro ibo, ‘Abera Naramu, oro owera ma-daro-ro.’
11 Iesu ro ibo, ‘Oro ba-dou gabo masiro neito asoro-dumo Tuputupu Gabo, nou se dowasoro. Iato ata dubu masiro Sauro nou Tasasi sabowa dubu e Iudasi moto ato tomidiro,
12 ina nou ro oro iauri hiwo to oro ro tu itomai ri nou abato, nou idomari mea se kirarowea aboto. Abora nu mo aboto tararatoro-die owarebai ri.’
13 Kaupoti Ananaiasi ro ibo, ‘Abera Naramu, mo ro owera ta-nirowidirotiti nedi dubu ro nou sapuwo to, Ierusarema sabowa ato oro urubia nou ro iadotiti.
14 Ina ibose nu neito nou ri gou-die Godi ra urubia ra turi auna dubu aboudo peba titi ta-gimidai-die oro etio ro emowabutiti-dumo nou ro irobo ri ina dibura to iaremo rie.’
15 Kaupoti Abera Naramu ro nu ibo gemowameai, ‘Oro dou! Nedi dubu ro mo ro narapoi. Mo sapuwo to owera nou ro ama-imowautiti-ri Iu owera karo tato urubia aboto, neio edi gabamani urubia aboto erere duriomoro ato na-orowomidiro, ibose Isiraere urubia aboto.
16 Idaro nedi dubu ro umoro anama-owai-ri ibo nu ubauba beda sosoro ama-iaurititi-ri mo sapuwo to.’
17 Ananaiasi ro edi owera ro na-girorowai nou imese gasiriai. Nou ito na-gorowateai tu teibo Sauro eputa ato aise gitomai-ma. Nou ro ibo ‘Namutuna Sauro! Mo Abera Naramu Iesu, nou ro nemeiriai-die oro aboto, oro aboto edi dubu ro na-gorowapotai-die gabo ipi ato io Iesu e. Oro mo ro meana owai rie, ina Tarena Urio oro abato omidiro rie.’
18 Nou ro iedi tau ato na-gutura nedi owera ro nou idomari teibo rido nakere kisoi beda sosoro ra ioudo neitiro ro giretei-maro. Nou idomari na-gimapopodorai iato mea se girarowea, iato nu Ananaiasi ro obo to aise gowarumia.
19 Nu kiho tato ta-gomidiro netewa didi saiki duwo neito, nu durupi imese pupuwo tato ta-goi, taie ohona na-giho durupi pupuwo neito gowai.
Sauro ro Iesu gowauti Damasikasi sabowa ato
Sauro meana na-goi Iesu kowasoro urubia mutu nou arua saiki to ta-gomidiro Damasikasi sabowa ato.
20 Taie nou imese irohotiti Iu urubia karadabu moto to urubia sirio nou ro iato imowautititi ibo, ‘Iesu nou Godi mere ie.’
21 Taie urubia sirio ro nedi owera ro na-girorowai-rimo neio aborabora ro girobai. Neio ro ibo, ‘Nio umoro ra nedi dubu ro Ierusarema sabowa nou ro owawodorowadotiti, Iesu kowasoro urubia nou ro iadotiti dibura to iato gi-iaremo-ri. Idaibo tanaro nou isioidiro ri gou-die neito, Iesu kowasoro urubia irobo ri Ierusarema sabowa to iworoho rie Godi ra urubia ra turituri eputa urubia aboto.’
22 Kaupoti nu Godi ro pupuwo bo gemowai, nou ro Tarena Buka rido inaina gorowauti ibo Iesu Godi ro kohodowa dubu kaupoti nou se ie. Neio owera to imese ta-giwamedei ata ata ro owera eremowauti pua, modobo pua neio ro nu owera kemowasiai aboto.
23 Nu iato ta-gomidiro sirio saiki to ina arua Iu urubia nou kopia sapuwo to owera piro se nato gisioidiro-rimo.
24 Sauro kodau rie kodouti moro ato urubia neio ro iato ta-giwotoburio-rimo duwo saiki, magere damo aise emotoititi-mo. Taie ata dubu ro gemowapotai Sauro ibo oro amadimo-opia-ri.
25 Ina ata duwo ato nu kowasoro urubia ro gowarebai-rimo, hodo gatere to gowororuwo-rimo kara pito goro rido.
Sauro ro Iesu gowauti Ierusarema sabowa ato
26 Sauro Ierusarema sabowa to na-gorowateai nou ubi ie Iesu kowasoro urubia mutu aradabuai ri. Kaupoti Iesu kowasoro urubia ro nou tere gemati-rimo. Neio ro mea se imibiria pua ibo nu Iesu kowasoro dubu e.
27 Kaupoti nu Banabasi ro gadabuai Iesu kitiodorai urubia aboto. Taie Banabasi ro ibo, ‘Nedi dubu ro nio ro na-iauri-dioumo, Damasikasi gabo ipi ato Abera Naramu nou ro nato gowea ina owera nou aboudo nato girorowai. Nou ro Damasikasi sabowa ato mea owera Iesu edio pupuwo ro neito urubia tere tato se gimowauti.’
28 Sauro Iesu kowasoro urubia mutu atu moro ato na-gorowomidiro Ierusarema sabowa gebari ato, nou ro mea owera Iesu sapuwo to arua urubia iato gimowauti. Sauro ro auna pupuwo korosa edio owera ro nouto gimowauti.
29 Ina arua Iu urubia Giriki owera to na-iaro-mo, neio iato ta-gorowomidiro nou edio owera ro na-gemororowai-rimo nou neio mutu owera to orowatititi. Taie nou neio ro kopia gabo egea se gemosora-rimo.
30 Ina borubi kimibiria urubia ro kopia owera na-girorowai-rimo, taie nu neido gowodori-rimo Siseria sabowa to. Ina Siseria sabowa rido ioudo gemeiriai-rimo simara koroto sabowa to masiro Tasasi.
31 Iesu urubia nedi duriomoro peteibi ro nato na-gorowomidiro Iudia, Gariri, Samaria neio abato miro tau aise gereredea. Neio edio tau ro nato Godi ro pupuwo aise giwaititi. Iesu Keriso neio ro mea mino to emododidirotiti-mo, mau esebotiti pua. Neio edio kimibiria tanaro ro Tarena Urio ro imowaitititi pupuwo. Ina iedio tau ro nato orio urubia aise godouti-rimo womu tato Iesu urubia imese sirio ti-goi-rimo.
Enaiasi Pita ro gowai meana
32 Pita duriomoro gabogabo goroho, ata tau nou Rida sabowa to ito gou Iesu edi tarena urubia ro iato na-gorowomidiro neio giraturiomai.
33 Taie Rida sabowa ato ata togiri dubu masiro Enaiasi nou ro iato gowea, iedi togiri dubu ro 8 kisimisi neito orobuti, nakara se eriburiotiti pua.
34 Pita ro na-gowea edi dubu ro nou ro ibo, ‘Godi ro kohodowa dubu Iesu oro nou ro meana towai, deribua! Keta deremetebuti!’ Taie iedi dubu ro aise geribuwa.
35 Urubia sirio ro na-gowea-rimo Enaiasi koroho moro ato, Rida sabowa urubia ina Seroni durio goto ato edi sabowa ro na-giamo, edi urubia sirio ro neio atu se ubauba tanaro aise gimesere-rimo, Abera Naramu edio mea gabo ro nato gotobowa-rimo.
Pita ro Tabita pamo rido gowameai-ro
36 Ata kimibiria orobo nou masiro Tabita Iopa sabowa ato imidirotiti. (Giriki urubia ro Dokasi to asorotiti-mo, maumo owamo ibo mea dia sosoro ie.) Nou ro meamea tanaro isioidirotiti ibose namabu tato urubia nou ro ta-iwarebidirotiti.
37 Ata tau nu auna ia temeteme ro gorobai-rimo, isana Pita Rida sabowa ato gomidiro, Tabita iato aise garaburai. Nou pamo durupi obo to na-gowiouti-rimo imese gowioro-rimo ohu moto to.
38 Iopa muso pua Rida sabowa rido, taie kimibiria urubia ro na-girorowai-rimo ibo Pita tomidiro-die Rida sabowa ato, neio ro netewa teibo kimibiria dubu teibo nato gitiodorai-marimo Pita orobai ri. Taie neitiro neido na-gedei-rido nu nato gemagege-rido ibo, ‘Oro samo to dou-ro neibi atu se anamabimo-ou-ri Iopa sabowa to.’
39 Taie iato neibi atu se ioudo imese gohau-birimo Iopa sabowa to.
Pita edio tau ato na-gorowateai nou aise gowaboi-rimo ohu moto to, iato nou ro garamio mamio se giwia. Pita neio ro ta-gemowaperai-rimo Tabita idobi na-gemerete-rimo. Garamio mamio ro Tabita beda namabu iwaruwoidirotiti, idaibo penikoto, sodo, Pita aboto edi namabu ro idobi mutu nou giwawuti-rimo. Neio ro ibo, ‘Nou na-imidirotiti nedi namabu ro nou ro nimowaruwoidirotiti.’
40 Taie Pita ro urubia iato gimowapotai ibo, ‘Tauo nedi moto ro nio ro ma-demeserai-rimo dosuruwo-mo ito!’
Nou iato kauhio teibo to na-girimusubua Godi imese gararatoro. Taie iato nou ro ibo Tabita aboto, ‘Tabita oro deribua-ro!’
Tuturu to pua Tabita idomari na-gimahitai-ro nato Pita se gowea iato nou aise gomi,
41 Pita ro nou tu rido korobai aise gowoubua-ro. Iedi kimibiria urubia ro garamio mamio mutu nou ro aise giramairiai-ro odoro ri. Neio na-godoro-rimo, Tabita nato keremiro se gowea-rimo.
42 Edio owera ro Iopa sabowa urubia ro na-girorowai-rimo, imese urubia iato aise gerewesegerai-rimo Abera Naramu kobodoro aboto.
43 Pita iato arua saiki to ta-gomidiro ata dubu moto ato, nou masiro Saimoni. Nu burumukau takamai woko dubu e.