Pauro keba peba owera ie Iesu urubia aboto Korini ato na-irowomidirotiti
1
1 Mo masiro Pauro ie, nedi peba titi owera ro neitiro ro nisioidiro-rido nimo ata kimibiria niama Sositeni mutu. Mo Godi ro simara ubi ato kebase nohodowa, Iesu ro kotiodorai dubu to ararasoro ri.
2 Nio Iesu patu urubia Korini sabowa ato na-orowomidiro, nio aboto nisioidiro nedi peba titi owera ro. Nio Godi ro Iesu Keriso aboto ta-gidabuai, ibose nio imese Godi ro ta-giapoi tarena urubia to ararasoro ri.
Erere duriomoro ato na-orowomidiro Iesu aboto na-iraratorotiti-dumo, nou ro ibose nedi atu sosoro tanaro ro nou gisioidiro neio aboto. Iesu neio Abera Naramu e, ibose nimo Abera Naramu e.
3 Nimo Abera Godi, Abera Naramu Iesu Keriso mutu, neitiro aboudo wisa tato kiwarebai, muro mutu nio abato ba-miamotiti.
Pauro eso owera ie Godi aboto
4 Nio sapuwo to mo ro eso owera ti-niarotiti Godi aboto, mabu nu edi wisa tato nirimagare ro nio aboto ta-gaiwai-ro, nio Iesu Keriso ro na-gidabuai.
5 Nio nou ro modobo ta-iwaititi imese tanaro kisioidiro sapuwo to, idaibo Godi edi owera ro erere mino to imowauti ri, ibose auna umoro iworohuti ri.
6 Nedi tanaro ro nio ro na-isioidiro-dumo, paea se iwawuti-dumo ibo nio mo ro na-nimowautiti Iesu sapuwo to io morobise owera ie.
7 Ina noudo ie nimo Abera Naramu Iesu korowameai tau ato nio auna kamade mutu na-emasebidiro-dumo, Tarena Urio ro nio kaokao se modobo tiwaititi-die erere meamea tanaro kisioidiro aboto, ata tanaro ata aseperai pua.
8 Nio Abera Naramu ro pupuwo ama-iwaititi-ri. Ina noudo ie Iesu edi tau ato namadi-orowameai-ri, ubauba tato se ama-orowotoi-ri Abera Godi sosoro gabo ato.
9 Mabu Godi ro beda owera kutura ra nou ro tanaro aise kosioidiro ie. Nio Godi ro ta-gihoduti nou mere Iesu aboto idabuti ri. Nu nimo Abera Naramu e.
Iesu urubia karapeputi modobo pua
10 Mo niramio, nio mo ro binio to a-nimadowerai Abera Naramu Iesu edi pupuwo ro neito, nio karapeputi modobo pua erere patu kisioidiro aboto. Nio modobo ie tanaro kaupoti ubi ato kisioidiro.
11 Mo niramio, urubia orobo masiro Korowe nou moto urubia arua neito na-gou-rimo, neio ro nemowapotai-rimo ibo nio nakara se teremaruti-dumo.
12 Owera mo ro ibo nirowidiro ata dubu ibo kutura ie, ‘Mo Pauro nowasoro.’ Ina ata ro ibo, ‘Mo Aporosi nowasoro.’ Ina ata ro ibo, ‘Mo Pita nowasoro.’ Ina ata ro ibo, ‘Mo Keriso nowasoro.’
13 Keriso urubia nio kaupoti durupi sosoro ie, ina nio ubi ra Iesu durupi kapeputi aboto, a? Nio sapuwo to mo a-nemopoguti-rimo ra? E e! Nio obo to edi tau ato na-giwarumiauti-rimo, nio mo do to nato a-gararapoi-rimo ra? E e! Marasio ia ie imese!
14 Mo eso owera Godi aboto ti-niarotiti mabu nio ata mo ro obo to owarumia pua, Kirisipasi se nowarumia Gaiasi mutu.
15 Ina noudo ie ata ro morobise to utura-ri pua ibo, mo Pauro ro nowarumia obo to ina mo nou do to aise nararapoi.
16 Nu morobise ie mo ro Sitipani moto urubia se niwarumiauti, etu umoro ra arua pua ie.
17 Mabu mo Keriso ro na-notiodorai-ro, ibo pua urubia mo ro obo to kiwarumiauti ubi ato kotiodorai. Kaupoti mo nou ro a-notiodorai-ro urubia mea owera imowauti ri nou ia sapuwo to. Mo ro duriomoro muro to kimowauti rasiri ie, Iesu ota kemowotowa ato beda sosoro gemopoguti-rimo, mo edi owera ro urubia niro turi ato pupuwo se araremuti-ri pua.
Godi muro, urubia muro, erere se iamo-ma
18 Urubia etio ra era paruo na-emou-dumo, neio ibo imaragoidirotiti-dumo, Iesu ota kemowotowa ato na-gemopoguti-rimo nou sapuwo to, dorogara se kimaragoidiro tato owera ie. Kaupoti nimo etio ra Godi ro na-niapopo-die, nimo umoro ie Godi edi pupuwo ro nedi owera ro nato towamo, urubia neito kiapopo aboto.
19 Mabu Tarena Buka ato Godi ro kebase nedi owera ro ta-garo, Arua urubia simara sapuwo to ibo timaragoidirotiti-dumo, ‘Nimo mea muro urubia ie’, kaupoti urubia mo ro umoro anama-iwaititi-ri ibo neio mea muro urubia pua, kimaragoidiro tato urubia ie. Ibose neio ro owera to beda gabo kisioidiro ra, neio gabo mo ro kimoputi ie.
20 Nedi tau ro nato urubia na-orowomidiro, Mose sabi keremoputi urubia, ibose awawo kimaragoidiro urubia neio sapuwo to owera beda sosoro ra? Duriomoro muro edi na urubia ro na-iworohuti-dumo, neio edi muro ro Godi ro imese kimaragoidiro tato ta-gimowai.
21 Godi edi muro ro neido neio gabo nou ro imese ta-gimopai, nedi urubia ro neio simara muro to nou aboto orowateai-ri pua. Duriomoro urubia ro nedi owera ro Iesu sapuwo to kimaragoidiro tato owera to asorotiti-dumo, kaupoti Godi ro simara ubi ato gabo ibo gosioidiro-ro, nedi owera ro etio ro imibiria-dumo, neio neito iapopo rie.
22 Iu urubia ubi ie pupuwo korosa tanaro kiauri, ina neio nato imibiria rie ibo nedi owera ro morobise ie. Isana Iu owera karo tato urubia beda owera ra duriomoro urubia ro mea muro owera to na-wasoro-dumo, io neio ubi ie nou kirowidiro.
23 Kaupoti Iesu ota kemowotowa ato na-gemopoguti-rimo, neibi ia ro urubia nou sapuwo to nimowautiti-bimo. Nedi owera ro Iu urubia aboto auna ota sesere sosoro ie, neio ro kemasaudai modobo pua. Ibose nedi owera ro Iu owera karo tato urubia ro kimaragoidiro tato owera to asorotiti-dumo.
24 Kaupoti Godi ro arua urubia ta-girapoi, arua Iu urubia aboudo ie, ina arua Iu owera karo tato urubia aboudo ie. Nedi urubia ro umoro ta-goi-rimo ibo Godi edi pupuwo ro ina nu edi mea muro ro, Iesu abato se iamotiti.
25 Arua urubia ro ibo iarotiti-dumo nedi owera ro Iesu na-gemopoguti-rimo nou sapuwo to kimaragoidiro tato owera ie. Kaupoti Godi edi mea muro gabo ro io nouse ie, idaibo sosoro muro urubia abato iamo pua.
Ina arua urubia ro ibo iarotiti-dumo, Iesu ota kemowotowa ato na-gemopoguti-rimo ata pupuwo tato tanaro ie, urubia ubauba aboudo kiapopo aboto. Kaupoti Godi edi pupuwo ro neito urubia ubauba aboudo kiapopo ie, idaibo sosoro pupuwo, urubia abato iamo pua.
Godi ro dorogora se urubia girapoi
26 Niramio ma-deremaragoidiro-mo, nio Godi ro edi tau ato na-girapoi-ro nio beda sosoro urubia ra? Nio sirio se duriomoro urubia ro mea muro kimaragoidiro urubia to iasorotiti pua. Ina masiro mutu urubia nio abato sipu ro orowomidiro pua. Ibose nio edi abeamio ro nasaio mutu neio sirio se awawo masiro irobidirotiti pua.
27 Kaupoti edi urubia ro duriomoro urubia ro kimaragoidiro tato urubia to na-iasorotiti-mo, neio Godi ro ta-girapoi-ro. Nou ro nedi tanaro ro nou ri gosioidiro muro kimaragoidiro urubia siripo iwai ri. Ina masiro tato urubia Godi ro neio girapoi awawo masiro urubia siripo iwai ri.
28 Ibose Godi ro dorogara se urubia, duriomoro urubia ro sopu to na-iauri-dumo, neio Godi ro ta-giapoi, nou ro nedi tanaro ro nou ri gisioidiro awawo urubia sopu ia to iwororuwo rie.
29 Ina noudo ie ata dubu ata ro Godi sosoro gabo ato keremowabu modobo pua, ata gabo tato ie.
30 Kaupoti nio Godi ia ro ta-gidabuai Iesu Keriso aboto, Godi edi mea muro gabo ro nimo kiapopo aboto Iesu Keriso nouse ie. Iesu ro nimo mea tuputupu urubia to niapoi-ro, ina ibose nimo tarena urubia to niapoi-ro. Ibose Iesu nouse ie nimo ubauba aboudo kiapopo dubu.
31 Mabu Tarena Buka ato owera ibo tiamo, Ina noudo ie ata dubu ata ubi na-iamo keremowabu aboto, Abera Naramu ro edi tanaro ro gisioidiro, nou sapuwo to kemowabu modobo ie.