11
1 Ina nio ro mo kematiouti modobo ie, mo ro Keriso beda sosoro nematioutiti.
Umoro owera ie karadabu ato Godi kemowabu aboto
2 Mo kamade owera ie nio aboto, nio ro beda sosoro imaragoidiro-dumo mo ro edi tanaro to nitamudirotiti. Nio ro abora tirobidiro-dumo mea mino to iedi kitamudiro ro Keriso ro mo aboto na-giaiwai-ro, ina nio aboto nou niaiwai, nio ro ata mino to iwesegerai pua.
3 Ina abora mo ubi ie nio umoro kiwai ibo, Keriso nu keremiro mabu dubu e, imese urubia nou ro gisioidiro. Ina imese dubu sirio Keriso aboudo gou-rimo, orobo nou dubu aboudo gou-ro. Ina Keriso nou Abera Godi aboudo gou-ro.
4 Karadabu maumo ato urubia dubu Godi aboto na-wararatoro, o Godi ipusu owera nou ro urubia na-imowauti, eputa korowasiai ato Keriso nou ro siripo kowai ie.
5 Ibose karadabu maumo ato, urubia orobo Godi aboto na-wararatoro, o Godi ipusu owera urubia nou ro na-imowauti eputa korowasiai tato, nu uramu siripo kowai ie. Ibose nu idaibo sosoro ie nu sobo ata ro na-owarure.
6 Beda orobo ra nu sobo korowasiai tato, nu sobo modobo ie komukomu se kowasio dubu sosoro ba-miworohuti. Kaupoti idaibo tanaro orobo sobo kasio mutu koroho ato, o sobo kowarure koroho ato, auna siripo tanaro ie, nu modobo ie sobo obotama to korowasiai.
7 Urubia dubu sobo obotama to orowasiai mamo nou kararatoro tau ato, ibose Godi ipusu owera kimowauti tau ato. Mabu urubia dubu nu Godi ia sosoro gosioidiro, nu nakara se a-gerematiouti urubia dubu na-gosioidiro. Urubia dubu na-omidiro, Godi edi auna masiro ro nou ro paease kowawuti ie. Urubia orobo na-omidiro, urubia dubu edi auna masiro ro nou ro paease kowawuti ie.
8 Mabu keba urubia dubu Godi ro orobo rido osioidiro pua, keba orobo Godi ro dubu rido gosioidiro.
9 Urubia dubu Godi ro osioidiro pua urubia orobo owarebai na, urubia orobo gosioidiro urubia dubu owarebai na.
10 Ina noudo ie kimibiria orobo ro Godi aboto kararatoro ato, ibose Godi ipusu owera kimowauti ato, nou sobo obotama to korowasiai modobo ie. Ina nou abato edi pupuwo korosa ro kowamo ie Iesu urubia Godi ipusu owera kimowauti ato, ibose Godi kararatoro ato. Ina ata mabu nou e, Godi sowake urio sirio torowotoi-die, nio iauri-dioumo.
11 Ina ata sapuwo rido kiauri ato, nio Iesu ro na-gidabuai noudo to ararasoro ri, orobo nakara se omidiro-ri pua, ina ibose urubia dubu nakara se omidiro-ri pua. Orobo ra dubu ra neitiro modobo ie atu se korowarebai.
12 Mabu urubia orobo keba dubu aboudo gosioidiro, ibose abora imese dubu mamio ro irotuti-dumo. Kaupoti nou se demaragoidiro-mo, imese namabu, imese urubia sirio, Godi nakara se nou se ie nou ro gisioidiro.
13 Nio ro nakara se ma-demeiouti-mo, urubia orobo eputa korowasiai tato Godi aboto nato na-wararatoro, mea tanaro ra?
14 Nio ro nakara se umoro ta-goi-rimo ibo dubu modobo pua tututu sobo mutu koroho, io siripo ie.
15 Ina nio nakara se umoro ta-goi-rimo ibo mamio ro kiworohuti sobo tututu modobo ie, neio kibodiai ie idaibo sosoro koroho. Mabu sobo tututu Godi ro mamio gimesioidiro, neio eputa iwasioidiro na ie.
16 Ata dubu ata nedi owera ro nou sapuwo to, owera keremasio ubi na-owamo, nou umoro koi modobo ie ibo, neibi abato, ibose Iesu urubia beda moro ato iradabutiti-dumo, nimo abato mamio ro idaibo tanaro nou ibodorotiti-dumo.
Abera Naramu soriomu nio ro isioidiro pua
17 Mo ro abora ata owera nama-aro-ri nio aboto, mo ata kamade tato ie, nio mo ro imowabu-ri pua. Mabu nio atu moro to karadabuai ato Godi emowabu ri, nio nakara se ubauba irowaititi-dumo, ibo pua nedi karadabu ro nio nou ro meana kiwaititi.
18 Mo keba owera nou e nio Godi kemowabu aboto karadabu sekere, kaupoti owera mo ro ta-nirorowai arua urubia aboudo ibo, nio atu moro to na-iradabutiti-dumo Godi emowabu ri, nio erere patu to aise karapeputi ie. Nedi owera ro mo ro egea mere se ta-nimibiria.
19 Karapeputi tanaro erere patu to nio abato modobo ie kiamo, nio umoro nato amadimo-oi-ri ibo beda urubia ra morobise urubia.
20 Nio na-iradabutiti-dumo Abera Naramu soriomu ohona iho ri, nio ro nou ohona iho-ri pua.
21 Mabu nio arua kiho kebase katamuai ato, kimibiria borubi nio ro imasebidiro-ri pua. Ina noudo ie urubia neio ohona mutu modobo ato korowomidiro ie, kaupoti sogoi ro edi kimibiria urubia ro iwati, neio ro imio-ri pua. Ibose nio arua, waini obo auna kidio ie.
22 Nio moto tato urubia ra? A? Ina karadabu moto ato ohona auna se nou mabu ato a-ihotiti-dumo ra, a? Nio ubi ra Godi urubia sopu to kiwororuwoidiro, a? Ibose nio ubi ra namabu tato urubia siripo kiwaititi? Mo ro nio aboto beda owera nama-aro-ri? Nedi tanaro ro nio ro na-isioidiro-dumo, nou sapuwo to mo ro imowabu-ri ra? Marasio, nio mo ro imowabu-ri pua.
Abera Naramu ohona kisioidiro tanaro ibo ie
23 Mabu kitamudiro owera Abera Naramu nou aboudo ta-nomidai-ro, ina mo nio abato na-nimidirotiti, nio mo ro nouto nitamudirotiti. Nedi kitamudiro owera ro nou e, Abera Naramu Iesu nasa rubi aboto Iudasi ro edi duwo ato gapoi, iato boso urubia tu to gedea, iedi tanaro ro ido to gororosioidiro-rimo, tau keba se nou ro beredi gomidai-ro,
24 taie eso owera iato garo Godi aboto. Taie beredi nou ro iato gekekeouti. Nou ro ibo, ‘Nou mo durupi ie, nio sapuwo to naiwai. Nio ro idaibo sosoro tanaro ba-disioidirotiti-mo, mo kemaragoidiro sapuwo to.’
25 Iedi beredi ro kiho na-giporeai-rimo ina atu tanaro Iesu ro iato gosioidiro nou ro waini obo panikere iato gomidai-ro. Nou ro ibo, ‘Nedi waini obo ro na-omidiro, mo ro orio hodo nasaubiai urubia aboudo, mo karima nama-isuputi-ri. Nedi waini obo ro nio ro kidio ato, idaibo sosoro tanaro nou ba-disioidirotiti-mo, mo kemaragoidiro sapuwo to.’
26 Mabu nedi beredi ro nio ro beda tau ato kiho ra, ina waini obo beda tau ato kidio ra, idaibo ie urubia nio ro imowauti-dumo Abera Naramu na-garaburai ota kemowotowa ato, womu tato nou ina neito namadi-orowameai-ri.
Simara keremiro mea se dimeiouti-mo
27 Ina noudo ie Abera Naramu edi beredi ro etio ro iho-dumo kimaragoidiro tato se, ibose nou edi waini obo ro etio ro idio-dumo kimaragoidiro tato se, Iesu edi durupi ro karima mutu neio ro ubauba emowaititi-dumo.
28 Abera Naramu kiho ido to gi-osioidiro-ri, tauo kebase nio erere se modobo ie simara keremiro mea se kimeiouti, taie saro to Abera Naramu edi beredi ro waini obo mutu nato gi-imidai-ri.
29 Mabu etio ro iho-dumo Iesu edi beredi ro, ibose waini obo etio ro idio-dumo, neio ro Iesu durupi mea se eibimai tato, nedi urubia ro ubauba wisa nakara se iosora-dumo.
30 Ina noudo ie nio abato sirio urubia durupi pupuwo neio aboudo imese ta-garagarewado-rimo. Nio arua temeteme ro nou mabu ato iwatiti, ina arua noudo gorowaburo-rimo.
31 Kaupoti namabu nou e, nimo kebase keremiro kimeiouti rasiri ie, idaibo ubauba wisa nimo ro iauri-ri pua.
32 Nimo ro mibo kainakaina na-niaurititi-dumo, Abera Naramu ro a-nimotuputiti-die, nimo umoro oititi ri ibo nimo ro ubauba nisioidirotiti-dumo. Mabu nimo Abera Naramu Iesu nu ubi ie nimo ubauba aboudo iapopo ri, ibose nu ubi tato ie nimo duriomoro tanaro urubia mutu nou ro atu se kibeouti ibo kutura, ‘Nio ubauba tanaro kisioidiro urubia ie. Mo aboudo daragare-mo, era paruo to dou-mo!’
33 Ina noudo ie mo niramio, nio atu moro to karadabu ato Abera Naramu beredi iho ri, ibose waini obo idio ri, samo to iho mamo, amia kimibiria urubia aise gi-imasebidiro-ri.
34 Etio ra sogoi ro na-iwati, kebase simara moto ato simara ohona gi-iho-ri, taie saro to karadabuai ato Abera Naramu ohona nato gi-imade-ri. Nio karadabu ato modobo pua ubauba wisa iosora ri karadabu.
Mo ina nio aboto beda tau ato norowameai-die, arua owera ana-imowauti-ri nio kimaragoidiro tuputupu iwai ri.