12
Tarena Urio ro modobo iwaititi-die tanaro kisioidiro aboto
1 Mo niramio, abora mo ubi ie nio kimowapotai Tarena Urio ro nimo kaokao se modobo na-niwaititi-die erere tanaro kisioidiro aboto, mo ubi tato ie nio nou sapuwo to karadoruti.
2 Nio umoro tiamotiti ibo, nio keba se beda mino to irowomidirotiti, morobise Godi umoro oi tato na-irowomidirotiti. Abora nio etou ro giari nio neio ro edi kiwaboi ro na-giwaboi-rimo kakate gabo ato, ina owera karo tato ota titi neio imowabutiti-mo.
3 Ina noudo ie mo ubi ie nio umoro kiwai, ibo ata dubu ata Tarena Urio ro na-oworohuti nou ro ibo utura-ri pua, ‘Iesu abato ubauba tanaro ba-mororosioidoro-mo.’ Ibose Tarena Urio etu abato omidiro nou ro se karo ie morobise to ibo, ‘Abera Naramu Iesu nou se ie.’
4 Abora nio mo ro a-nimowapotai Tarena Urio ro erere kimibiria urubia modobo tiwaititi-die erere tanaro kisioidiro aboto. Tarena Urio ro se iaiwotiti-die iedi tanaro ro.
5 Nimo ro Abera Naramu woko erere mino to nemesioidirotiti-dumo. Ina nimo Abera Naramu kaupoti nouse ie, nou woko nemesioidirotiti-dumo.
6 Kimibiria urubia ro sirio erere woko isioidirotiti-dumo, Godi kaupoti nou se ie erere kimibiria urubia pupuwo nou ia ro se imowaititi, nou woko nimo ro na-nemesioidirotiti-dumo.
7 Taie erere kimibiria urubia abato Tarena Urio ro paea se orowapotaidirotiti-die neio ro erere tanaro na-isioidiro-dumo kimibiria urubia meana sapuwo to.
8 Idaibo arua kimibiria urubia aboto Tarena Urio ro modobo ta-giwai muro owera Godi aboudo na-woutiti-dioumo imowauti ri. Ina arua kimibiria urubia aboto Tarena Urio ia ro modobo ta-giwai umoro owera Godi aboudo na-woutiti-dioumo imowauti ri.
9 Ina arua kimibiria urubia aboto Tarena Urio ia ro modobo ta-giwai awawo kimibiria iworohuti ri, kimibiria urubia kiwarebai aboto. Ina arua kimibiria urubia modobo ta-giwai Tarena Urio ia ro, neio ro temeteme urubia meana kiwaititi aboto.
10 Ina arua kimibiria urubia nou ro modobo ta-giwai pupuwo korosa tanaro kisioidiro aboto. Ina arua kimibiria urubia Tarena Urio ro modobo ta-giwai Godi edi ipusu owera ro urubia kimowauti aboto. Ina arua kimibiria urubia modobo ta-giwai urio kieibimo aboto, ibo nedi tanaro ro Tarena Urio aboudo ra, o ata urio aboudo ra? Ina arua kimibiria urubia Tarena Urio ro modobo ta-giwai neio ro umoro tato owera to urubia kimowauti. Ina arua kimibiria urubia Tarena Urio ro modobo ta-giwai nedi umoro tato owera ro nou kiwesegere aboto, urubia umoro koi sapuwo to.
11 Nedi tanaro sirio ro neio sapuwo to, Tarena Urio kaupoti nou se ie, ina nedi tanaro sirio ro nou aboudo se outiti-dioumo. Nou nakara ia se simara ubi ato erere urubia modobo tiwaititi-die.
Kaupoti durupi, sirio atemo mutu e
12 Ina nedi owera ro morobise ie, urubia dubu nu sirio atemo mutu sekere ie, neio kaupoti durupi rido irarebidiro-dioumo. Ina idaibo sosoro ie, Iesu edi urubia ro Abera Naramu durupi ie.
13 Mabu nimo atu se Tarena Urio ro ta-niwarumiauti Keriso edi kaupoti durupi ro nouto ararasoro ri. Ata nakomu tato ie nimo beda sosoro urubia ra, nimo arua Iu urubia ra o arua Iu owera karo tato urubia ra. Arua nimo wisa tato woko kisioidiro urubia ie. Nimo arua wisa tato woko kemesioidiro pua, simara ubi woko kisioidiro urubia ie. Kaupoti nimo atu se Godi ro ta-nidabuai, nou ro Tarena Urio nou se gemeiriai-ro, nimo niro turi ato nou ro omidiro rie. Nimo idaibo Abera Naramu edi durupi ro Tarena Urio ro osioidiro, ina abora nimo ro idaibo Tarena Urio obo nou aboudo erere se nidio-dumo.
14 Morobise ie durupi nu sirio atemo mutu e, ibo pua kaupoti atemo mutu.
15 Ata sairo pata modobo koi rasiri ie owera karo aboto, ina nou ro owera kutura ie ibo ‘Mo durupi rido ateidiro pua, mabu mo tu pata pua.’ Io, sairo ro idaibo owera karo rasiri ie, nou durupi rido ateidiro pua ra, a? E e, sairo durupi rido aise tateidiro.
16 Ina ibose ata gare modobo koi rasiri ie owera karo aboto, ina nou ro owera kutura ie ibo, ‘Mo durupi rido ateidiro pua, mabu mo idomari pua.’ Io, gare ro idaibo owera karo rasiri ie, nou durupi rido ateidiro pua ra, a? E e, gare durupi rido aise tateidiro.
17 Ina ma-dimaragoidiro-mo, durupi ato idomari iopu se ma-mateidiro ata nakomu tato, ina owera etou nakomu to kirowidiro ra? Ina ibose durupi ato gare se ma-mateidiro ata nakomu tato, ina nibo beda nakomu to kimasio ra?
18 Kaupoti auna owera nou e, Godi ro nimo durupi mea se nimesioidiro erere nakomu nimo nou ro simara ubi moro ato mea se nimadebuti.
19 Erere nakomu nimo nou ro durupi ato kimadebuti tato rasiri ie, nou ro kaupoti namo kimadebo rasiri ie, durupi boira? Imese ba-gararaseperai!
20 Kaupoti, durupi ibo owamo pua. Durupi nou sirio atemo mutu e, ina iedi durupi ro kaupoti nouse ie.
21 Ina noudo ie idomari ro modobo pua ibo kutura tu aboto, ‘Mo oro ro owarebai-ri pua. Mo nakara se korowarebai modobo ie.’ Ibose eputa ro modobo pua ibo kutura sairo aboto, ‘Mo oro ro owarebai-ri pua. Mo nakara se korowarebai modobo ie.’
22 E e. Arua atemo durupi ato na-iateidiro nimo pupuwo tato nakomu to na-niasoro-dumo, awawo woko kisioidiro modobo pua. Kaupoti iedi atemo ro dorogora se atemo pua. Urubia dubu ro iedi durupi atemo ro durupi rido kiasio ato, nou morobise to ama-araburai-ri, pamo ie iedi durupi ro.
23 Arua atemo durupi ato na-iateidiro, nimo ro na-niasoro-dumo ibo awawo nakomu pua, nimo ro mea se niaurititi-dumo. Ina arua atemo durupi ato na-iateidiro, urubia ro modobo pua kiauri, nimo ro mea se kiwasiai ie obotama to.
24 Durupi ato edi nakomu ro paease na-iamo, nimo ro auna se imaragoidiro-ri pua. Kaupoti durupi momuo se Godi nakara se ie nou ro nimesioidiro, erere nakomu nou ro nimadebuti durupi ato na-iamo. Beda durupi sapuwo ra nimo ro masiro tato to na-niasoro-dumo, neio masiro Godi ro auna ta-giwai.
25 Godi ro nou mabu ato gisioidiro, modobo pua durupi ato edi na ro orowotoi, neio nakara se karapeputi. Godi ubi ie imese beda mutu kemadebuti nakomu ra, neio atu se nirimagare eremati rie karapeputi tato.
26 Ata durupi nakomu ata ro temeteme na-iwia, iedi durupi rido na-iateidiro, neio imese temeteme ro ibose to kirobai ie. Durupi ato edi erere nakomu ro na-iamo, neio ata ro auna masiro na-omidai, durupi ato edi na iateidiro neio imese kamade aise koi ie.
27 Taie nio mo ro a-nimowapotai nio durupi ato edi na orowotoi, Keriso edi durupi ro neito ararasoro-dumo.
28 Ina Godi edi urubia ro neio abato nou ro kebase neio gimagerai, Iesu ro kitiodorai urubia girapoi. Neio saro gabo ato nou ro Godi ipusu owera urubia girapoi. Ina neio saro ato Godi owera kitamudiro urubia girapoi. Ina neio saro gabo ato pupuwo korosa tanaro kisioidiro urubia girapoi. Ina neio saro gabo ato temeteme urubia meana kiwaititi urubia girapoi. Ina iato arua urubia kiwarebai urubia girapoi. Ibose nou ro Iesu urubia kiwaboi urubia girapoi. Ina nou ro arua urubia girapoi umoro tato owera to kimowauti.
29 Nio umoro ie ibo, nimo sirio se Iesu kitiodorai urubia to ararasoro-ri pua, sipu tato urubia giapoi. Nimo sirio se Godi ipusu owera urubia to ararasoro-ri pua, sipu tato urubia giapoi. Nimo sirio se Godi owera kitamudiro urubia to ararasoro-ri pua, sipu tato urubia giapoi. Pupuwo korosa tanaro imese sirio urubia abato iamo-ri pua, sipu tato urubia abato giamo.
30 Nio imese sirio se temeteme urubia meana kiwaititi urubia to ararasoro-ri pua, sipu tato urubia giapoi. Nio imese sirio se a-giapoi ra umoro tato owera to urubia kimowauti? E e, sirio se iapoi pua. Nio imese sirio se a-giapoi ra umoro tato owera kiwesegere aboto? E e, sirio se iapoi pua.
31 Iedi tanaro ro neio maumo ato kimibiria borubi auna se na-iwarebai-dumo, modobo ie nio abato auna ubi ro kiamo idaibo tanaro kisioidiro aboto. Ina abora nio mo ro anama-imowapotai-ri meana ia gabo boido aidiro-die.