15
Iesu pamo rido na-gowameai-ro
1 Mo niramio, mo ubi ie nio kimaragoidiro ina kiwameai aboto mea owera Iesu sapuwo to nio mo ro na-nimowautiti. Nedi mea owera ro nio ro ta-gimibiria-rimo, pupuwo se nou ato tiwotoi-dumo.
2 Nedi mea owera ro ioudo aise namadimi-irarebidiro-ri, idaibo sosoro ie nio nou ro ubauba aboudo tiapopotiti-die. Nio nou aboudo kirarebidiro tato, nio kimibiria tanaro mutu orowaguwoidiro-dumo.
3 Mabu mo ro beda owera nomidai-ro, imese auna ia owera ie Abera Naramu ia ro mo kebase nemowauti-ro, ina nio aboto aise norowautiti. Mo ro nedi owera ro nou nomidai, nou sapuwo to Tarena Buka ato owera keba ia se ta-gowapotai-rimo ibo, Keriso ta-garaburai nimo ubauba sapuwo to.
4 Nadi bobo to ta-gibiria-rimo ina pamo rido nato gowameai-ro netewa teibo saiki na-goroporeai-rido. Tarena Buka ato owera tiamo nedi tanaro ro kororosioidiro sapuwo to.
5 Keriso kebase Pita aboto gorowapotai-ro, ina nu 12 kowasoro urubia aboto iato gorowapotai.
6 Nou wapo gabo ato, nu ina sosoro 500 kimibiria urubia mako ta-gorohodorai-ro neio aboto gorowapotai-ro. Nedi kowasoro urubia aboto na-gorowapotaidiro-ro, sipu tato ta-gorowaburo-rimo, ina sirio mere se torowomidiro, mo ro nedi peba titi ro nedi tau ro nato nisioidiro.
7 Iesu ibose Iemisi aboto ta-gorowapotai, ina nou saro gabo ato nu ibose imese kitiodorai urubia aboto gorowapotai.
8 Ina mo iana ia dubu e, Iesu mo aboto nato gorowapotai-ro. Bamuai nou morobise tau ato koroto tato, ata tau ato na-oroto, mo urio to idaibo mino to noroto. Iesu kitiodorai urubia neio auna masiro mutu e, mo marasio, masiro tato dubu e.
9 Mo Iesu ro kotiodorai dubu to kararasoro modobo pua, mo imese ubauba ia dubu e. Mabu mo ro Iesu urubia kiado to ubauba ta-niwaititi.
10 Kaupoti Godi edi wisa tato nirimagare ro, mo meana nou ro nowai, mo abora nou e, nu edi wisa tato nirimagare ro mo abato kowamo kawa owamo pua. Mo woko arua kitiodorai urubia sosoro isioidirotiti pua. Neio ro auna woko ta-isioidirotiti-mo. Kaupoti mo ro auna ia woko nisioidirotiti. Nedi woko ro mo ro na-nisioidirotiti, ibo pua mo simara pupuwo to kisioidiro, mabu Godi edi wisa tato nirimagare ro mo abato ta-gowamo, nou ri nisioidiro nedi woko ro.
11 Kaupoti auna tanaro pua, Iesu edi mea owera ro nio mo ro a-nimowauti ra, o arua kitiodorai urubia ro a-imowauti-dumo ra? Auna owera nou e, nimo ro atu se Iesu edi mea owera ro na-nimowautititi-dumo, nio ro ta-gimibiria-rimo.
Iesu Godi ro pamo rido kowameai tato rasiri ie
12 Abora nimo kitiodorai urubia ro ibo na-nimowauti-dumo, Keriso Godi ro pamo rido ta-gowameai-ro. Ina mabu boira nio arua ro ibo na-iaro-dumo pamo urubia Godi ro pamo rido iwame-ri pua?
13 Urubia pamo rido kiwame tato rasiri ie, Keriso pamo rido Godi ro owameai pua, nou pamo a-sorobu.
14 Ibose Keriso pamo rido kowameai tato rasiri ie, nimo ro Iesu sapuwo to urubia edi owera to na-nimowautiti-dumo, ba-norowaguwoidiro-mo. Ina nio edi kimibiria ro na-gimibiria-rimo ba-gorowaguwoidiro-rimo.
15 Ina ata owera kadabuai aboto nou e, pamo urubia bobo rido kiwame tato rasiri ie, nimo kitiodorai urubia paea se ba-norowapotai-rimo ibo nimo Godi sapuwo to karasaubuti owera karo urubia ie. Mabu nimo kitiodorai urubia ro nimowautiti-dumo ibo Keriso Godi ro pamo rido ta-gowameai-ro. Kaupoti pamo urubia Godi ro pamo aboudo kiwame tato rasiri ie, Keriso nou ro pamo rido owameai pua, pamo se ba-sorobu, ina nimo ro karasaubuti owera ba-nimowautiti-mo.
16 Mabu pamo urubia Godi ro pamo rido kiwame tato rasiri ie, Keriso ia pamo rido nou ro owameai pua.
17 Ina Keriso pamo rido kowameai tato rasiri ie, nou idaibo ie nio ba-gorowaguwo-rimo, ina nio edi ubauba ro Godi ro imatopeamuti pua, nio abato ba-siamo.
18 Ibose etio ra na-gorowaburo-rimo Keriso edi mea owera ro nato na-gimibiria-rimo, neio Godi aboudo imese moro to ba-garatowouti-rimo.
19 Nimo Keriso sapuwo to kimibiria rasiri ie ibo, nedi duriomoro keremiro ro nou sapuwo to se Keriso ro kiwarebai, ina korowaburo ato nimo ata kiwarebai tanaro ata Keriso aboudo owea-ri pua, natonato babio. Io idaibo kimibiria nimo ro kiworohuti rasiri ie, ubauba nimo abato auna ia se ba-siamotiti. Idaibo ubauba, arua urubia abato iamo-ri pua. Nimo neio ro natonato ba-nimati-mo.
Mabu boira Iesu pamo rido kowameai?
20 Kaupoti morobise owera nou e, Keriso morobise to pamo urubia aboudo Godi ro ta-gowameai-ro. Nu keba dubu e nedi tanaro ro Godi ro nou ri gosioidiro nimo umoro niwai-ro ibo, etio ro gorowaburo-rimo kimibiria mutu neio Godi ro pamo rido ama-iwame-ri.
21 Pamo nimo aboto Adam ro gowodoro-ro, nou ro gowasomai ubauba, ibose pamo rido kiwame kaupoti dubu aboudo garatamuai-ro, edi dubu ro Iesu nou se ie.
22 Nimo nedi duriomoro ro nato na-norowomidiro Adam keremiro maumo ato, nimo korowaburo urubia ie. Ina atu sosoro tanaro ie nimo Keriso edi keremiro ro nou maumo ato na-norowomidiro, womu tau ato nimo Godi ro morobise to pamo rido anamadi-iwameai-ri.
23 Kaupoti urubia pamo rido kiwameai ato, simara tau ato amadi-iwameai-ri. Keriso ro gatamuai pamo rido korowame tanaro. Ina nu korowameai tau ato nu simara urubia pamo rido nato amadimo-orowameai-ri.
24 Ina nou saro gabo ato, womu tau nato amadi-ereredea-ri. Edi tau ro nato nou ro keba se duriomoro beda ubauba urio ro egedioutititi-dumo, nou ro ubauba ama-iwai-ri, eputa urio to edi urio ro ararasoro-dumo iato neio ie, Iesu ro neio ubauba ama-iwai-ri. Ubauba urio neio pupuwo na-imadetiti-dumo, Iesu ro neio ubauba ama-iwai-ri. Ina Godi ro kiwaboi tanaro Iesu ro nato ama-iwameai-ri, Abera Godi aboto.
25 Mabu Keriso modobo ie nu eputa dubu to komidiro, womu tato nu nasa urubia sirio neio wagoha to kituti.
26 Iana ia nasa dubu nou masiro ie pamo, Iesu ro imese ubauba ama-owai-ri.
27 Mabu owera keba se Tarena Buka ato ta-gowapotai-ro ibo, Godi ro imese namabu nou sairo mabu ato ta-giedea nou ro iauri ri. Ibo pua Godi nou ro kadabuai Iesu ro iauri ri, e e Godi Iesu ro iauri-ri pua.
28 Abera Godi ro Iesu pupuwo korosa nama-omia-ri, nou ro imese namabu sirio kiauri dubu to kararapoi aboto, iedi tau ro nato nou Godi edi pupuwo korosa ro nou maumo to ama-odoro-ri. Ina imese tanaro sirio Godi ia ro ama-iauri-ri.
Urubia Godi ro pamo rido kiwame tato rasiri ie
29 Korowaburo urubia Godi ro pamo rido kiwame tato rasiri ie, ina amia urubia obo to na-iwarumiauti-dumo, simara sapuwo to iwarumiautiti pua, keba se edi urubia ro gorowaburo-rimo neio sapuwo to imadetiti-dumo. Kaupoti pamo urubia pamo rido kiwame tato rasiri ie, obo to kiwarumiauti pamo urubia sapuwo to, ina mabu boira pamo urubia sapuwo to obo to na-iwarumiauti-dumo? Neio beda sosoro kiwarebai ra?
30 Ina owera neibi sapuwo to beda sosoro ra? Godi ro korowaburo urubia pamo rido kiwame tato rasiri ie, mabu boira sirio saiki neibi arua kitiodorai urubia mutu temeteme aboto durupi aise na-niaidodorowado-bimo?
31 Mo niramio, sirio tau mo urubia ro opia ri ta-nemahuwotiti-mo, kaupoti mo ata tere tato ie neio ro kopia. Nedi owera ro dese na-niatiti, nou morobise owera ie. Ina atu sosoro morobise owera nou e. Mo kamade ie nio sapuwo to nimo Abera Naramu Iesu Keriso nou keremiro maumo ato na-norowomidiro.
32 Epesesi sabowa ato giro to edi urubia ro ararasorotiti-dumo, mo neio mutu na-niradotiti sopu duriomoro wisa nou ia se komidai sapuwo to rasiri ie, nedi tanaro ro na-nisioidiro mo neio ro owarebai-ri pua. Korowaburo urubia pamo rido kiwame tato rasiri ie, ina kimibiria tato urubia owera se ba-nibodoro-mo, idaibo, ‘Kiho kidio woko se nimo ro misioidiro-rimo, mabu kowaroho nimo imese moro to korowaburo aboto ie.’
33 Nio arua urubia ro kisaubuti modobo pua. Nio ubauba urubia mutu karadabu ato, nio ubauba neio ro amadimi-iwai-ri.
34 Kimaragoidiro tato tanaro dimeserai-mo, mea kimaragoidiro aboto dorowameai-rimo. Mabu nio arua iato na-orowomidiro, Godi umoro tato urubia ie. Mo ro nedi owera ro na-naro, mo ubi ie nio siripo kiwai.
Nimo durupi beda mino to namadimi-iworohuti-ri
35 Etu umoro ra arua urubia nio abato torowomidiro, idaibo kararatoro owera neio abato tiamo, ibo, ‘Pamo urubia Godi ro beda mino to amadi-iwame-ri? Neio durupi beda sosoro to amadimi-iwotoi-ri?’
36 Nedi kararatoro owera ro imese daradara kararatoro owera ie! Mabu nio ro ota iopu goto ato na-iwoumudirio-dumo, iedi ota iopu ro kau keremapusiti ie. Tauo edi ota iopu ro kebase korowaburo ie, kau ido to keremapusiti ie kiroromai sapuwo to. Kaupoti neio goto maumo ato atu sosoro irobu-ri pua, neio ina koroiwauti ie.
37 Nio ro edi kono iopu ro kibouti ra, io dorogora kono iopu e, ido neio kisuwoduti ato, kono to kararapoi ie.
38 Kaupoti Godi ia nakara se simara ubi to, iopu nou ro erere durupi keremiro nato kimio ie.
39 Beda mutu namabu ro oroho-dumo neio durupi atu sosoro pua, erere durupi mutu e. Urubia durupi ata sosoro ie, tu ra sairo ra to koroho nakomu neio durupi ata sosoro ie, pawa ata sosoro ie, nakere ata sosoro ie.
40 Toboro ato edi namabu sirio ro na-iamo, neio simara durupi mutu e. Sopu duriomoro ato edi namabu sirio ro na-iamo, neio ibose simara durupi mutu e. Kaupoti toboro ato neio edi sosoro ro namadimi-iwapotai-ri, ata meana ie. Ibose sopu duriomoro ato neio ibose simara mea erere sosoro amadimi-iwapotaidiro-ri.
41 Saiki sosoro simara mea woroworo owapotaidirotiti-die, ibose sogomi simara mea woroworo owapotaidirotiti-die. Kiboni ibose mea woroworo mutu e, erere kiboni neio erere mea woroworo mutu e.
42 Ina atu sosoro ie urubia pamo rido Godi ro nama-iwameai-ri, beda pamo dubu durupi kibiria ra bobo to, nedi durupi ro kepuse ie. Kaupoti beda durupi ra Godi ro pamo rido namadi-iwameai-ri, neio modobo pua pamo kowea aboto, womu tato womu tato keremiro to ama-irowomidirotiti-ri.
43 Beda pamo durupi kibiria ra bobo to, nou mea sosoro mutu pua, ubauba ie. Kaupoti beda durupi ra Godi ro pamo rido namadi-owameai-ri, nu imese meana ia sosoro to korowapotai ie. Beda durupi ra goto maumo to kowoumudurai ato, ata nakomu ata iwati-ri pua. Kaupoti nou durupi pamo rido Godi ro namadi-owameai-ri auna ia pupuwo komia ie.
44 Iedi durupi kowoumudurai ra, sopu duriomoro durupi kowoumudurai ie. Nu Godi ro kowoubua ato, nu urio durupi komia ie. Urubia ro kebase sopu durupi kiwomidiro ie, ina saro to urio durupi kiwomidiro ie.
45 Tarena Buka ato owera ibo ta-gisioidiro-rimo, ‘Keba dubu Adam, Iawe Godi ro gomia keremiro, taie nou keremiro dubu to aise gararapoi.’ Ina iana Adam, Keriso nou se ie, nou keremiro kimio urio to gararapoi.
46 Ba-dimaragoidiro-mo, Iesu edi urio ro Godi ro orio durupi na-gomia, nou kebase omidiro pua nedi duriomoro ro nato. Keba dubu Adam goto rido Godi ro na-gosioidiro, nou kebase ta-gomidiro nedi duriomoro ro nato. Iato nou saro gabo ato, Iesu urio orio durupi mutu gomidiro.
47 Keba dubu nu goto rido gosioidiro, ina nou sopu duriomoro dubu e. Saro dubu nou edi orio durupi ro Godi ro na-gaiwai-ro, Adiri sabowa rido gou-ro.
48 Keba dubu durupi beda muro to gosioidiro goto rido, ina atu sosoro ie, imese sirio urubia nedi sopu duriomoro ro nato na-orowomidiro, neio durupi goto rido gisioidiro. Kaupoti Adiri sabowa ato etio masiro ro iato na-iateidiro, beda dubu ro gou-ro neito Keriso, neio nou sosoro ama-irowomidirotiti-ri.
49 Nimo sopu duriomoro urubia dubu sosoro mutu norowomidiro, saiki ata nimo Adiri sabowa dubu, nimo nou sosoro anama-irowomidiro-ri.
50 Mo niramio, nio mo ro a-nimowapotai nimo durupi saiki ata ama-ipuse-ri. Nou maumo owamo ibo neio ro Godi edi kiwaboi tanaro maumo ro neito odoro-ri pua.
51 Owera neito ma-dirowidiro-rimo! Piro se na-owamotiti nedi owera ro, nio mo ro nou anama-imowapotai-ri, Godi ro na-gowapotai-die nimo aboto. Iana saiki nama-orobai-ri nimo arua ibose to anama-orowomidiro-ri. Nimo arua kimibiria urubia ta-gorowaburo-rimo iedi iana saiki ro namadi-orowateai-ri, kaupoti nimo atu se Godi ro ata sosoro anama-iwesegerai-ri.
52 Nimo ro humuko owera namadimi-irorowai-ri, nedi tanaro ro Godi ro hio ia to se ama-osioidiro-ri. Mabu humuko diamo amadi-utura-ri, taie kimibiria urubia kebase na-gorowaburo-rimo, neio orio keremiro mutu nato amadidimi-ireriburio-ri. Ina neio modobo pua ido pamo kowea aboto, womu tato womu tato keremiro to ama-irowomidirotiti-ri. Ibose nimo etio ra kimibiria urubia sopu duriomoro ato na-norowomidiro, nimo Godi ro ata sosoro to anama-iwesegerai-ri.
53 Nimo abora nedi durupi mutu na-norowomidiro, saiki ata karaburai ato amadimi-ipusiti-ri. Saiki ata kimibiria urubia durupi, Godi ubi ato nou ro ama-iwesegerai-ri, womu tato womu tato keremiro nou anamadimi-imidai-ri.
54 Tarena Buka owera keba se beda mino to giatiti-rimo, morobise to aise ama-ororosioidiro-ri, ibo Pamo, oro pupuwo mo ro ta-nemowagare.
55 Pamo, oro abora pupuwo boira? Pamo, oro edi temeteme ro na-oromio abora boira?
56 Ubauba tanaro urubia ro na-isioidiro-dumo, pamo pupuwo neio aboudo imadetiti. Ibose ubauba tanaro urubia ro na-isioidiro-dumo, neio edi pupuwo ro Godi edi sabi ro na-giaiwai-ro Mose aboto, pupuwo neio aboudo imadetiti-dumo.
57 Godi aboto eso owera se gi-aro-ri, nimo Abera Naramu Iesu Keriso ro pupuwo ti-niwaititi-die, pamo nimo ro boso to kowororuwo aboto.
58 Ina noudo ie, mo niramio, natonato babio, nio modobo pua ata ro kiwesegereamuti, gabo rido araubo mamo, koko se dorowotoi. Nio modobo pua ata nakomu ata ro kimuruwouti. Sirio tau Abera Naramu edi woko ro nou se demesioidiro-mo. Mabu nio ro edi woko ro na-isioidiro-dumo, nio orowaguwoidiro-ri pua, meamea wisa sirio ioudo amadidimo-osuwoduti-ri.