2
Mea owera Iesu sapuwo to mea gabo nou e
1 Niramio, mo ia kebase nio aboto na-nou, Godi edi gabo ro piro se na-owamotiti nio nou imowapotai rie. Nio mo ro na-nimowautiti, ibo pua duriomoro muro to kimowauti, ibose nio mo ro owera to iageawado pua.
2 E e ibo pua. Mo ubi kebase ta-niedea Iesu Keriso na-gemopoguti-rimo ota kemowotowa ato, nio nou sapuwo to se imowauti rie.
3 Mo nio aboto na-nou, mo ta-neremasibai durupi imese pupuwo tato ia se gowamo, ibose mo durupi aise gomuguguti. Mo tere kimaragoidiro ta-niworohutiti, ibo etu umoro ra modobo pua mo ro mea se kimowauti.
4 Nio mo ro edi mea owera ro na-nimowautiti ibo pua duriomoro muro to kitomu, ibose owera meamea to kiageawado. Mo ro edi mea owera ro na-nimowautiti, Tarena Urio ro pupuwo to iwapotaidirotiti-ro, ibo nedi owera ro morobise ie.
5 Mo ro nedi tanaro ro nou ri nisioidiro, nio edi kimibiria ro na-iworohuti-dumo duriomoro muro rido iroromai-ri pua, Godi edi pupuwo ro noudo iroromai rie.
Godi edi muro ro Tarena Urio ro iaiwotiti-die
6 Neibi etio ra mea owera Iesu sapuwo to urubia na-nimowautiti-bimo, neibi ro nio mea muro to nimowautiti-bimo. Etio ra kimibiria mutu modobo na-goititi-rimo, neibi ro nedi mea muro owera ro neio aboto se niwautiti-bimo. Nedi mea muro ro sopu duriomoro awawo urubia aboudo ou pua. Nedi urubia ro saiki ata masiro amadimo-ororoporeawado-ri.
7 Kaupoti Godi edi mea muro gabo ro, piro se na-owamotiti-ro, neibi ro nou nowapotaidirotiti-bimo. Duriomoro ido to gosioidiro Godi ro, nedi mea muro gabo ro kebase ta-gosioidiro, nimo ro awawo masiro irobidiro ri Adiri sabowa ato.
8 Duriomoro awawo urubia ro nedi mea muro ro neio ro eibimai pua. Neio ro keibimai rasiri ie, auna ia pupuwo Abera Naramu neio ro ota kemowotowa ato emopoguti-ri pua.
9 Idaibo sosoro owera Tarena Buka ato tiamo, Godi nirimagare etio ro emati-dumo, beda tanaro ra nou ro na-gimohodowa neio imasogoro-die. Ata dubu ata ro simara idomari to owea pua, ina ata dubu ata ro simara gare to emewidiro pua, ina ibose ata dubu ata ro simara kimaragoidiro to owea pua.
10 Kaupoti nedi tanaro ro Abera Godi ro nimo aboto Tarena Urio to giwapotaidiro-ro. Tarena Urio umoro ie imese sirio tanaro, Godi maumo ia kimaragoidiro mutu nu umoro ie.
11 Urubia dubu abato beda kimaragoidiro ro iamo, ata dubu ata umoro oi-ri pua, nou simara durupi urio nou ro koi ie umoro. Ina ibose Godi abato beda kimaragoidiro ro iamo, ata dubu ata ro umoro oi-ri pua, Tarena Urio nou se ie nou nakara umoro ie.
12 Duriomoro kimaragoidiro Godi ro emeiriai pua nimo aboto, kaupoti Tarena Urio gemeiriai-ro nimo aboto, nimo umoro oititi ri ibo Godi ro nedi tanaro ro wisa tato se iaiwotiti-die nimo aboto.
13 Nedi tanaro ro neibi ro nio nou sapuwo to nimowautiti-bimo. Neibi ro nedi kimowauti owera ro duriomoro muro urubia aboudo iratamudirotiti pua, Tarena Urio ro nitamudirotiti-biro. Tarena Urio etio abato imidirotiti, nou edi kitamudiro owera ro neio neito nitamudirotiti-bimo.
14 Etio ra Godi edi Tarena Urio ro neio abato omidiro tato, nou edi kitamudiro owera ro neio ro ibeiouti-dumo. Mabu Tarena Urio edi kitamudiro owera ro neio ro kimaragoidiro tato owera to iasorotiti-dumo. Ina noudo ie neio ro modobo pua maumo mea se komidai aboto. Mabu Tarena Urio ro se kiwaititi ie urubia umoro, nou edi kitamudiro owera ro mea se kimeiouti aboto.
15 Kaupoti etio ra Tarena Urio ro na-iworohuti, neio ro imese tanaro mea mino to kimeouti ie ibo meana boira o ubauba boira. Ina neio ata dubu ata ro kituputi modobo pua.
16 Idaibo sosoro owera Tarena Buka ato tiamo, Abera Naramu edi kimaragoidiro sirio ro, ata dubu ata ro umoro koi ra? Abera Naramu ata dubu ata ro kotomudiro modobo ra?
Kaupoti Iesu Keriso ro beda sosoro kimaragoidiro iworohutiti, nimo ia ro idaibo sosoro kimaragoidiro nou niworohuti-dumo.