5
Abera orobo mutu etu ro orobuti nio soirio rido dowagare-mo
1 Mo a-niwagogorai arua urubia ro na-nemowapotai-rimo ibo, siripo ia tanaro nio ata ro tisioidiro. Idaibo tanaro Godi umoro tato urubia ro kisioidiro pua. Ata dubu nio soirio ato tomidiro, nu karasomai abera nu edi saro orobo ro nou mutu irobuti-ma.
2 Nio a-remowabu-dumo ra nedi ubauba tanaro ro nou sapuwo to? Nio modobo ie idobi kiroto, kamade tato korowomidiro. Ina nedi dubu ro nio soirio rido aise dowagare-mo, nio mutu aradabu ate.
3 Mabu mo nio mutu omidiro pua sekere, kaupoti mo abato kimibiria towamo ibo mo urio to nio mutu ti-nomidiro. Mo iato komidiro tato, kaupoti mo ro owera kebase ta-nisioidiro ibo, nedi dubu ro ubauba wisa komia sapuwo to.
4 Nio atu moro to namadima-aradabuai-ri, ina mo urio to ibose to nama-aradabuai-ri, nimo Abera Naramu Iesu edi pupuwo korosa ro nio abato ama-owamotiti-ri, nedi tanaro ro nou kisioidiro aboto.
5 Nio karadabu tau ato, nedi dubu ro nio ro Satani tu to ba-daremo-mo, nu durupi Satani ro temeteme ba-momiotiti. Ina noudo ie Abera Naramu Iesu korowameai tau ato, nimo koto edi tau ato nama-iwaititi-ri, nu edi urio ro Godi ro ubauba aboudo nato amadi-apopo-ri.
6 Nio auna se keremowabu idaibo, modobo pua. Nio umoro tato ra ibo kainai isiti, parowa to kiedea ato, parawa sirio aise kiaupai ie. Ina idaibo sosoro ie, kaupoti ubauba tanaro dubu nio abato na-omidiro ubauba mutu, nio Iesu patu urubia imese sirio se nou ro aise kimamuai ie.
7 Tagara isiti diwagare-mo, nou pikisa owera ie. Ina noudo ie tagara korowomidiro keremowabu tanaro aise diwagarewado-mo nio aboudo. Ina nio abato ata ubauba ata owamo-ri pua Godi sosoro gabo ato. Nio orio urubia sosoro ama-irowomidiro-ri. Nou mabu ato ie nio kiaupai tato parawa sosoro ie, isiti tato parawa. Nio modobo ie ubauba tato korowomidiro.
8 Ina nimo Kimasaudai Soriomu sipisipi dawade, Godi ro kohodowa dubu Iesu nou se ie, nu ta-gopia-rimo nimo ubauba sapuwo to. Nimo ro kimaragoidiro modobo ie Iesu Keriso ro beda tanaro gosioidiro nimo sapuwo to. Nimo ro modobo ie morobise tanaro kisioidiro, ina modobo pua ata dubu ata gabo kemagerai ubauba tanaro kisioidiro aboto.
9 Mo ro kebase edi peba titi ro nisioidiro nio mo ro ta-nimowapotai ibo, upo tanaro etio ro isioidiro-dumo, modobo pua nio neio mutu kidabuti.
10 Mo ibo aro pua kimibiria tato urubia upo tanaro etio ro isioidiro-dumo, namabu sogoi urubia, piro urubia, ibose arua orora kiroru urubia mutu idabuti mamo. Mo ro idaibo owera to aro pua. Mabu nio ro idaibo tanaro urubia namadimi-imeserai-ri, nedi duriomoro ro nio ro kemeserai kawa amadidime-emeserai-ri.
11 Ina abora mo ro peba titi owera nou ri nisioidiro nio aboto, urubia ro ibo karo ato, ‘Nimo nio kimibiria naminiramio ie,’ kaupoti upo tanaro kisioidiro urubia, namabu sogoi urubia, orora aboto korowaro urubia, ubauba owera karo arua urubia sapuwo to urubia, koko obo kidio urubia, piro tanaro kisioidiro urubia, idaibo karasaubuti kimibiria urubia mutu idabuti mamo, ina ohona neio mutu iho mamo.
12 Kimibiria tato urubia gomo ato na-oroho-dumo, mo woko pua neio kimeiouti aboto. Neio Godi ro ama-imeiouti-ri. Kaupoti kimibiria urubia nio ro kimeiouti modobo ie.
13 Tarena Buka ato idaibo owera tiamo, ubauba tanaro edi dubu ro gisioidiro, nio soirio rido aise ba-dowagare-mo.