6
Kimibiria dubu ro boinana kimibiria dubu koto aboto owou mamo
1 Oro aboto boinana kimibiria dubu ro ubauba tanaro ata na-osioidiro-die, oro siripo tato ra nou oro ro na-owou kimibiria tato koto kiauri dubu aboto? Nedi dubu ro modobo ie Godi edi tarena urubia ro neio aboto kowou, koto owera neio ro emewidiro ri.
2 Nio umoro tato ra ibo, saiki ata sopu duriomoro urubia koto owera Godi edi tarena urubia ro neio ro amadimi-imewidiro-ri? Ina noudo ie nio kimibiria urubia iato na-orowomidiro, nio aboudo modobo pua ra mibo kainakaina nakara se kiporeawado?
3 Nio umoro iamo pua ra ibo, saiki ata Godi edi sowake urio sirio ro koto owera nimo ro anamadimi-imewidiro-ri? Ina noudo ie nio ro sopu duriomoro tanaro sapuwo to mibo kainakaina na-iaurititi-dumo, nio ro nakara se kiporeawado modobo ie.
4 Nio mibo na-iamo borubi kimibiria urubia mutu, neio nio ro modobo pua kimibiria tato koto kiauri urubia aboto kiwou, koto owera imerewidiro ri. Nio Iesu urubia iato na-orowomidiro, nio ro modobo ie dorogora kimibiria urubia kihoduti, mibo kainakaina koto abato kimewidiro aboto.
5 Idaibo owera nio aboto na-niatiti, nio mo ro siripo iwai rie. Nio abato kimibiria urubia mea muro kimaragoidiro mutu orowomidiro pua ra? Ina nio mibo patu modobo pua ra neio ro kiporeawado?
6 Kaupoti nio ata sosoro orowatititi-dumo, kimibiria naminiramio koto aboto aise kiworoho ie kimibiria tato urubia sosoro gabo ato.
7 Nio ro kimibiria naminiramio koto aboto na-iworoho-dumo, nio imese atu se sopu to ta-iroruwo-ro. Nio modobo ra aise kimaria? Nio neio ia ro se miwati-mo, piro tanaro karasaubuti mino to nio aboto misioidiro-mo.
8 Kaupoti nedi urubia ro nio ro na-giwapotai-dumo, nio ro ibose atu sosoro tanaro tisioidiro-dumo kimibiria naminiramio aboto!
9 Nio umoro tato ra ibo, ubauba tanaro kisioidiro urubia ro Godi edi kiwaboi maumo ro, neio ito odouti-ri pua? Ina noudo ie nio modobo pua nakara se karasaubuti. Idaibo upo tanaro kisioidiro urubia, orora kiroru urubia, mau keresebo urubia, ata dubu orobo sosoro ie ina ata dubu ro nato koworohuti, ina ata dubu nou ro orobo sosoro dubu na-oworohuti,
10 namabu piro to kimade urubia, namabu sogoi urubia, koko obo kidio urubia, arua urubia namabu kiwasiti urubia, ubauba owera karo arua urubia sapuwo to, nedi tanaro ro etio ro isioidirotiti-dumo, neio Godi edi kiwaboi maumo ro neito odouti-ri pua.
11 Nio arua keba se ibo gorowomidiro. Kaupoti Godi ro nio marea tato ta-giwai, ina tarena ta-giwai. Ibose nio nou ro mea tuputupu urubia to ta-giapoi. Nedi tanaro peteibi ro Godi ro nio aboto ta-gisioidiro-ibi, Abera Naramu Iesu Keriso nou edi pupuwo ro neito, ibose Tarena Urio edi pupuwo ro neito.
Durupi to Godi masiro auna kowaititi modobo ie
12 Arua urubia nio abato na-orowomidiro ibo iaro-dumo, ‘Ata tanaro ata mo ro kosioidiro aboto, ata sabi tato ie.’ Kaupoti nio mo ro ibo mimowapotai-ro, arua tanaro durupi to nimo ro kisioidiro ato, nimo neio ro iwarebai-ri pua. Ina neio ro ibo, ‘Ata tanaro ata mo ro kosioidiro aboto, ata sabi tato ie.’ Kaupoti nio mo ro ibo mimowapotai-ro, ata ubauba tanaro ata ro mo nou wisa tato woko dubu to ararasoro-ri pua.
13 Nio arua ro ibo iaro-dumo, ‘Ohona Godi ro nimesioidiro nimo ro kiho aboto, ibose niro turi nou ro nimesioidiro ohona iaremo na.’ Kaupoti nio mo ro ibo mimowapotai-ro, ohona ra sopu durupi ra saiki ata Godi ro womu to ama-iedea-mari.
Ina ibo aro mamo, ‘Nimo durupi upo tanaro kisioidiro aboto nimesioidiro. Idaibo sosoro ie durupi ohona sogoi ro na-orobai, ohona aise kiho ie.’
Kaupoti nimo durupi simara ubi to ata mutu koroho aboto, Godi ro nou sapuwo to imesioidiro pua. Abera Naramu ubi tanaro kemesioidiro sapuwo to nimesioidiro. Nimo durupi Abera Naramu ro tiaurititi-die.
14 Godi edi pupuwo korosa ro Abera Naramu pamo rido nouto gowameai-ro. Ina nou edi pupuwo korosa ro nimo nou ro neito anama-iwame-ri.
15 Nio umoro tato ra ibo nio durupi Keriso sapuwo durupi ie? Nedi era gabo tanaro ro nio ro kisioidiro modobo pua. Nio umoro tato ra ibo, nio kaokao se edi durupi na-iworohuti-dumo, Keriso ia durupi atemo ie? Ina kimibiria dubu ro modobo ra Keriso durupi era gabo mamio durupi aboto kowateai? Imese modobo ia pua, tarena ia ie!
16 Nio umoro tato ra ibo, nio ata, durupi beda tau ato owateai era gabo orobo aboto, neitiro durupi teibo kaupoti to imese ararapoi-do? Mabu owera tiamo Tarena Buka ato ibo, Dubu orobo mutu karadabuai ato neitiro kaupoti durupi aise koi ie.
17 Kaupoti Abera Naramu aboto etu ro ateai, neitiro urio kaupoti aise koi ie.
18 Ina noudo ie upo tanaro aboudo ba-daragarewado-mo. Arua ubauba tanaro nio ro na-isioidiro-dumo, nio durupi neio ro ubauba egea mere se kimowaititi ie. Kaupoti etio ra upo tanaro na-isioidiro-dumo neio simara durupi marea nakara se iremowaititi-dumo.
19 Nio umoro tato ra, Tarena Urio Godi ro na-gemeiriai-ro nio aboto, nio durupi nou komidiro moto ie? Kimibiria urubia, nio Godi do ie, nio do pua.
20 Mabu nio nou ro auna wisa to ta-gimidai, Iesu karima na-garawiriti. Ina noudo ie nio ro durupi to beda tanaro isioidiro-dumo, modobo ie sirio tau Godi masiro auna kowaititi.