9
Morobise ie Pauro nou Iesu ro kotiodorai dubu e
1 Nedi woko ro mo ro kosioidiro aboto mo ata nakomu ata ro a-nodiobo ra? Mo Iesu ro kotiodorai dubu pua ra? Nimo Abera Naramu Iesu mo ro simara ia idomari to owea pua ra? Nimo Abera Naramu ro mo ta-nadabuai, mo ro nou woko sirio tau aise na-nemesioidirotiti, nio ia ubauba aboudo a-gerewesegerai-dumo ra Iesu kowasoro aboto? Morobise ra?
2 Mo arua urubia ro a-natidiouti-dumo sekere, kaupoti nio ia umoro ie ibo mo Iesu ro kotiodorai dubu ata nou se ie. Nio kimowauti aboto mo pupuwo korosa Abera Godi aboudo gou-ro, ina nou mabu rido ie nio Iesu kowasoro urubia to ta-gararapoi-rimo.
3 Ina mo etio ro nasorotiti-dumo, nou mo korowairiai owera ie.
4 Neitiro woko sapuwo to nio ro ohona to kiwarebai-ma ubauba ra? A?
5 Ina neibi aboudo sabi ra, simara kimibiria mamio neio mutu kou, Abera woko neio mutu atu se kemesioidiro? Mabu Pita arua kitiodorai urubia mutu, ibose Iesu niramio neio upi mutu idaibo sosoro atu se iroho-dumo.
6 Nio ibo a-imaragoidiro-dumo ra mo Banabasi mutu mani woko neitiro ro se isioidiro-ri, ohona ra obotama ra imade na, ina arua kitiodorai urubia ro ibo isioidiro pua ra, a?
7 Beda ami dubu ata ro gou boso aboto simara mani to? Beda dubu ata ro gomidiro pari ohona kibouti ato, ina kiho tato? Ibose beda urubia ra sipisipi nanigosi na-iworohuti-dumo, neio simara sapuwo to nono isi kiratuti ie.
8 Nedi owera ro mo ro na-naro, urubia kimaragoidiro owera a-naro ra?
9 Mabu idaibo sosoro owera Mose ia ro sabi buka ato ta-gisioidiro ibo Burumukau urubia dubu woko kemesioidiro ato, idaibo woiti iopu na-ituti nu matagoro emosuputi mamo, nou ro arua iopu modobo ato kiho ie.
Morobise ie nimo umoro ta-noi-rimo ibo Godi edi sabi ro na-gosioidiro, burumukau sapuwo to se a-gosioidiro ra? E e.
10 Godi ro nedi atu sabi ro nou woko kemesioidiro urubia neibi sapuwo to ibose to gosioidiro. Ina noudo ie pari ato goto etio ro kioditi ra, ina pari ohona etio ro kidabuti ra, neio ro simara woko na-isioidiro-dumo pari ato, neio kimaragoidiro to kiauri ie ibo pari ohona sapuwo to, ido anamadimi-iho-ri.
11 Urio ota iopu nio abato neibi ro na-nibouti-birimo, ina nio aboudo modobo pua ra neibi wisa namabu to kiwarebai-bi?
12 Arua urubia Godi woko na-emesioidiro-dumo, neio modobo ie nio ro kiwarebai, ina neibi nio ro auna se kiwarebai-bi modobo ia ie.
Pauro imaragoidiro pua wisa imade-ri urubia aboudo
Kaupoti sirio mibo tanaro neibi abato na-irorosioidirotiti-mo, nedi kiwarebai tanaro ro nio neibi ro imowapotai pua isioidiro ri neibi aboto. Mabu neibi ubi tato ie ata tanaro ata neibi ro na-nosioidiro-bimo, Abera Naramu edi mea owera ro nou ro kodiobuti.
13 Nio umoro tato ra ibo Godi edi Tarena Moto ro nato edi urubia ro iwatititi-dumo woko, neio woko kisioidiro maumo ato ohona sapuwo kimade ie? Ina ibose Tarena Moto ato beda urubia ro imatowotiti-dumo patapata ato kiwoubua namabu dao, nedi urubia ro sapuwo dao kimade ie.
14 Ina idaibo sosoro ie Abera Naramu ro nimo kebase ta-nimowapotai-ro idaibo tanaro nimo ro aise isioidiro ri. Ibo mea owera Iesu sapuwo to etio ro imowautiti-dumo, nedi urubia ro modobo ie kirowidiro urubia ro kimio wisa.
15 Modobo ie mo ro mea owera kimowauti woko sapuwo to, kirowidiro urubia aboudo mea wisa kimade. Kaupoti mo wisa komio sapuwo to, ata owera aro pua. Mo nio ro kowarebidiro sapuwo to isioidiro pua nedi titi ro. Nio mo ro imowapotai pua mo owarebai ri, nou sapuwo to a-neremowabu. Modobo pua nedi keremowabu mabu ro mo aboudo karaseperai. Modobo ie mo kebase karaburai!
16 Mo auna se eremowabu ri pua mea owera Iesu sapuwo to kimowauti aboto, mabu mo nou ro notiodorai-ro mea owera nou sapuwo to imowauti ri, ina urubia mo ro aise kimowauti modobo ie, io mo woko ie. Ina mo ro imowauti tato mea owera nou sapuwo to, mo ubauba ro ba-mowea-ro.
17 Mo simara ubi ato kou rasiri ie mea owera Iesu sapuwo to imowauti ri, mo ro wisa urubia aboudo ba-nimadetiti. Kaupoti nou mo woko ie, aise mosioidiro-ro, mabu Godi ubi ie mo ro nedi woko ro kosioidiro aboto.
18 Ina noudo ie mo ro beda wisa nimade nedi woko ro nou sapuwo to? Mo wisa ibo ie, mea owera Iesu sapuwo to urubia mo ro na-nimowautiti wisa tato se. Io mo morobise wisa ibo ie. Mo ro urubia wisa tato na-nimowautiti, mo ro neio kiwaro modobo ie wisa komio sapuwo to, kaupoti mo ro idaibo sosoro iwaro-ri pua.
Pauro urubia sirio sowake dubu e
19 Mo ata dubu ata ro emotohiti pua, nou wisa tato woko kemesioidiro aboto. Mo ro mea owera urubia na-nimowautiti urubia kirowidiro sapuwo to, mo ro sirio tau wisa tato woko nisioidirotiti neio sapuwo to, nedi owera ro mea se kimade aboto.
20 Mo Iu urubia mutu na-nimidirotiti, mo neio mino to nimidirotiti neio kiwairio aboto. Mabu mo ubi ie sabi maumo ato edi urubia ro irowomidirotiti, neio kiwairioidiro Iesu aboto. Kaupoti abora mo Iu urubia edi sabi sirio ro neio maumo ato omidiro pua.
21 Etio ra Iu urubia sabi maumo ato korowomidiro tato, mo ibose neio aboto ta-niradabutiti, neio Iesu aboto iwairio ri. Ibo pua Godi edi sabi ro mo ro kibodoro tato. Keriso edi sabi ro nou maumo ato na-nomidiro, noudo osuruwo-ri pua. Ina noudo ie, mo ubi ie sabi maumo ato korowomidiro tato urubia neio iwairioidiro rie Keriso aboto.
22 Pupuwo tato kimibiria urubia aboto mo ta-nidabutiti, neio kimibiria pupuwo kimowaititi sapuwo to. Mo ro erere tanaro sirio, erere urubia sosoro gabo ato, mo neio sosoro komidiro umoro ti-noititi. Mabu mo ubi ie neio amia erere tanaro sirio to mo ro dodio tato se imade rie, ina neio Godi ro ubauba aboudo kiapopo sapuwo to ie.
23 Nedi tanaro sirio ro nou sapuwo to na-niatiti, mo ro durupi to imese nisioidiro. Mabu mo ubi ie mea owera Iesu sapuwo to korobodorouti imese sirio urubia aboto. Ina ata mabu nou e, mo ro Godi edi meana ro atu se anamadimo-owea-ri, arua kimibiria urubia mutu.
Kororodiobuti auna se modobo ie
24 Nio umoro tato ra ata owera na-owamo ibo, hio korowararioidiro urubia sapuwo to? Neio atu se korowarario ie, ina kaupoti mere ro komidai ie wisa. Nio idaibo mino to ba-dorowarario-mo, nio erere se wisa kimade sapuwo to, huru to imetere mamo.
25 Korowarario urubia karatamudiro maumo ato simara durupi mea mino to kimododidiro ie. Mabu neio ubi ie mea wisa kimade, ina nedi wisa ro tuturu tau to iamo-ri pua, womu to samo ito amadime-ereredea-ri. Kaupoti iedi wisa ro nimo ro Iesu Keriso na-nowasoro-dumo nou sapuwo to namadimi-imade-ri, womu to ereredea-ri pua, womu tato womu tato aise ama-iamotiti-ri.
26 Ina noudo ie urubia dubu kirario kawa na-irario koropodai moro kiauri tato, mo idaibo mino to irario-ri pua.
Ina ata pikisa owera ibo ie. Ata dubu karaberemo aboto na-wou, nou tu idaibo na-iwaguwoidiro nasa dubu durupi ato araremo tato, mo idaibo sosoro dubu pua.
27 Mo durupi auna se nowairiawadotiti ubauba tanaro kisioidiro aboudo. Mo sumi tama ra dao ra koko niwaititi, mo edi durupi ro mo wisa tato woko dubu to kararapoi aboto. Ina noudo ie mo ro urubia mea owera Iesu Keriso sapuwo to kimowauti saro gabo ato, modobo pua Godi ro idaibo owera karo mo aboto ibo, ‘Mo woko oro ro mea se emesioidiro pua, ina nou mabu ato ie oro mea wisa omia-ri pua.’