Pauro peba owera ie Iesu urubia aboto Korosai sabowa ato na-irowomidirotiti
1
Kamade owera Pauro aboudo ie Korosai urubia aboto
1 Mo masiro Pauro ie, nedi peba titi owera ro na-iamo mo ro nisioidiro. Nimo ata kimibiria mere neama Timoti nedi peba titi ro nou mutu nisioidiro-rido. Mo Iesu Keriso ro kotiodorai dubu to ararasoro ri, mo ubi Godi ro nemedea-ro nedi woko ro mo ro osioidiro ri.
2 Kimibiria urubia Korosai sabowa ato na-orowomidiro nio Godi tarena urubia ie, kimibiria gabo ato koko se na-orowotoi, nedi peba titi ro nio aboto nimeiriai. Nio Iesu Keriso ro ta-gidabuai abora nio nou abato iateidiro. Wisa tato kiwarebai miro mutu nimo Abera Godi aboudo nio abato aise ba-miamotiti.
Eso owera niarotiti-do Godi aboto
3 Abera Naramu Iesu Keriso nu edi Abera ro Godi nou aboto sirio tau eso owera aise niarotiti-do nio sapuwo to.
4 Mabu neitiro umoro Epapara ro niwai-maro ibo nio Iesu Keriso sapuwo to ta-gimibiria-rimo. Ina ata mabu nou e, nio ro nirimagare tanaro tisioidirotiti-dumo imese sirio tarena kimibiria urubia aboto.
5 Abera Naramu Iesu edi Abera ro Godi, eso owera nou aboto aise niarotiti-do. Mabu nio ro kimibiria tanaro ina nirimagare tanaro nedi tanaro teibo ro na-isioidiro-madumo, abora nio kimibiria tiamo ibo nio Godi ro meamea wisa Adiri sabowa ato timasogoro-die, ina noudo ie nedi tanaro teibo ro nio ro kisioidiro-ma. Keba urubia nio aboto na-gou-rimo Korosai sabowa to, nio neio ro mea owera Iesu Keriso sapuwo to ta-gimowauti-rimo.
6 Nedi morobise owera ro nio ro nato aise gimibiria-rimo. Nedi mea owera ro abora nou ro orobodorouti nedi duriomoro gebari ro nato. Nou erere duriomoro urubia ro na-imibiria-dumo, Godi ubi tanaro neio ro nou ri isioidirotiti-dumo, ina abora kimibiria urubia imese sirio toititi-dumo. Ina nedi atu sosoro tanaro ro nio abato neio ro ororosioidiro-dumo, kebase edi tau ato girorowai-rimo ioudo garatamuai-rimo. Nedi mea owera ro Godi edi wisa tato kiwarebai ro nou sapuwo to
7 nio aboto kebase Epapara ro gowou-ro, nio nou ro gitamudiro. Epapara neitiro nirimagare neama ie, nu Iesu Keriso wisa tato woko dubu e neitiro beda sosoro ra Iesu Keriso wisa tato woko dubu teibo ie. Nou ro neitiro bobo ato Iesu Keriso sowake nio abato mea se irohotiti.
8 Neitiro nou ro nimowauti-ma ibo nio ro Godi urubia nirimagare timati-dumo, nedi nirimagare ro Tarena Urio ro imiotiti-die.
Pauro kararatoro owera ie Korosai urubia sapuwo to
9 Ina noudo ie nio sapuwo to owera neitiro ro edi tau ato na-nirorowai-rido, neitiro kararatoro nio sapuwo to sirio tau noudo outiti-dumo Godi aboto, kidiobuti modobo pua. Godi neitiro ro nou ri nararatorotiti-do, mabu neitiro ubi ie nio ro mea se umoro oi ri Godi ubi tanaro. Ina nou se pua, neitiro ro Godi nou ri nararatorotiti-do nio nou ro muro iwaititi ri. Nio muro Tarena Urio ro ba-mitowoutiti, ibose umoro ba-mimio.
10 Neitiro ro ibose Godi a-nararatorotiti-do nio mea keremiro to orowomidiro rie, Abera Naramu sirio mino to kamade kowaititi sapuwo to, ibose nou masiro auna kowaititi sapuwo to. Ina meamea ota iopu beda sosoro isuwodutiti-dumo, ina nio aboudo meamea tanaro ibo kisuwoduti modobo ie. Ina Godi nio ro umoro mea se koi modobo ie.
11 Abera Naramu Godi neitiro ro a-nararatorotiti-do nio nou ro pupuwo inaina aise imowaititi ri. Nou edi pupuwo korosa ro imese auna ia ie. Ina noudo ie mibo tau ato nio koko se kirimowotoi modobo ie, mea se keremasebidiro mutu,
12 ibose eso owera se karo kamade mutu Abera Godi aboto. Nio Godi ro imese modobomodobo ta-giwaititi, Godi edi tarena urubia ro neio mutu, nou edi woroworo moro ro nato edi meamea tanaro ro na-iamo-die nio ro erere se kirahidimo aboto.
13 Nimo Abera Godi ro Satani edi duwoduwo maumo ro noudo ta-niapopo-ro. Nimo ro ubauba dubu ubi tanaro nou isioidiro-ri pua. Godi edi nirimagare mere ro edi kiwaboi maumo ro neito ta-niwodoro-ro nimo ro nou ubi tanaro se isioidiro rie.
14 Nimo Iesu ro ta-niapopo-ro, edi ubauba tanaro ro na-nisioidirotiti-mo nou ro imese moro to ta-nimatopeamuti.
Iesu Keriso imese auna ia ie
15 Godi paea urubia ro sosoro kiauri pua, ina Godi edi mere ro nou atu sosoro ie Godi mutu. Imese namabu sirio nou ro iaurititi.
16 Mabu Godi ro Iesu edi tu ro neito gisioidiro imese namabu sirio urubia ro idomari to na-iaurititi-dumo nedi sopu duriomoro ro nato, ibose Adiri sabowa ato kiauri tato namabu na-iamo-die. Ibose imese sirio urio awawo pupuwo mutu, neio imese Godi edi mere ro Iesu nou tu to mea se gisioidiro. Neio imese sirio se Iesu sapuwo to gisioidiro.
17 Imese namabu sirio Godi ro ohu rido tiaurititi-die. Iesu edi pupuwo ro neito imese namabu sirio nato na-iamotiti simara tanaro mutu mea se neido ororosioidiro-dumo.
18 Kimibiria urubia eputa dubu Iesu Keriso ie, nou edi urubia ro nou durupi ie. Iesu nou se ie keremiro mabu dubu. Godi edi mere ro nu keba dubu e pamo rido imese moro to gowameai-ro. Ina noudo ie imese sirio namabu ina imese sirio tanaro mutu nedi sopu duriomoro ro nato na-iamo neio eputa dubu nouse ie.
19 Mabu Godi ubi neito gowamo nou edi kimaragoidiro ro, nou edi ubi ro, ibose nou edi pupuwo korosa ro, Iesu ato iamo rie.
20 Ina ibose Godi ubi neito gowamo nu simara mere neito emeiriai ri, nou durupi rido karima arawiriti ri ota kemowotowa ato nama-araburai-ri miro edea rie. Godi ro nedi gabo ro nou mabu ato gosioidiro nu ubi ie miro kedea nou ia aboudo urubia aboto, daro imese namabu sirio aboto Adiri sabowa ato, ibose sopu duriomoro ato, nou ro boso neito a-godo ri.
21 Kebase nio ro Godi nasa dubu to asorotiti-mo, mabu nio ro nu huru emoworohotiti-mo. Nou sapuwo to nio abato ubauba kimaragoidiro auna se iamotiti, ibose ubauba tanaro auna se isioidirotiti-mo.
22 Kaupoti Godi ro iedi era ro neito gagodo mabu Iesu durupi rido karima na-gosuputi ota kemowotowa ato. Godi ro nedi tanaro ro nou mabu ato gosioidiro, nu ubi ie nio nou sosoro gabo ato imese tarena ia to korowotoi ata marea tato.
23 Ina noudo ie nio koko se aise ba-dorowotoi, Iesu Keriso edi mea owera ro nato, nio sipi imese moro to ba-diwodouti-mo. Godi ro edi na imasogoro-die mea owera to edi na gowapotai-ro, nou aboudo modobo pua nio ata nakomu ata ro kimuruwouti, nio ro kamade mutu nou ba-demotoi-mo. Nedi mea owera ro nou se ie ata tato ie duriomoro gebari ato urubia ro na-orowauti-dumo nou ro orobodorouti. Mo nouse ie mo ata sowake dubu e, nedi mea owera ro urubia aboto mo ro nobodorouti.
Iesu urubia Pauro ro iwarebidirotiti
24 Abora nedi tau ro nato mo ro ubauba temeteme nio sapuwo to niauri. Kaupoti nedi temeteme ro mo ro na-niauri, nou sapuwo to mo kamade noititi. Keriso ro edi temeteme ro na-iaurititi, sapuwo mo ro nedi temeteme ro ti-niauri nou urubia kiwarebai sapuwo to, nedi temeteme ro momuo se koroporeai aboto. Iesu simara urubia neio nou durupi ie.
25 Mo Godi ro ta-narapoi-ro Iesu edi urubia ro neio sowake dubu to ararasoro ri. Mo Godi ro ta-narapoi-ro Iesu edi urubia ro neio sowake dubu to ararasoro ri, Godi edi owera ro momuo se nio imowauti ri.
26 Kebase nedi mea owera ro piro se ta-owamotiti, urubia aboto paease orowapotai pua. Kaupoti Godi ro nedi auna ia mea owera ro nou simara kimibiria urubia aboto abora towapotai-die.
27 Nedi piro owera ro na-gowapotai-ro urubia sirio aboto nou ibo ie, Nio Iu owera karo tato urubia Keriso owera na-imibiria-dumo, Keriso nio niro turi ato abora tomidiro. Ina noudo ie nio morobise kimaragoidiro koko se irobidiro-dumo ibo nio nou mutu Adiri sabowa ato nou edi auna woroworo ro nato ama-irowomidiro-ri.
28-29 Neibi ro Iesu sapuwo to aise norowautiti-bimo urubia aboto, ina neibi ro neio auna se nimadoweretiti-bimo. Ibose neio neibi ro mea muro to nitamudirotiti-bimo. Mabu neibi ubi ie neio kimibiria maumo to kimesebea ina Godi aboto kiwaboi. Mo ro nedi woko ro pupuwo to nou ri nisioidirotiti. Keriso edi auna pupuwo korosa ro mo pupuwo nou ro nowaititi sirio tau bibiri nou ri nasibowadotiti urubia abato. Mabu mo auna ubi ro owamotiti ibo etio ra Keriso gomo ato na-iateidiro, neio imese meana amadimo-oi-ri, saiki ata Godi sosoro gabo ato ama-orowotoi-ri.