2
1 Mo ubi ie nio kimowapotai ibo mo ro auna woko nisioidirotiti Korosai urubia nio sapuwo to, Raodesia urubia mutu, ibose mo sosoro kiauri tato urubia neio mutu.
2 Mo ro nedi woko ro nou ri nisioidirotiti mabu mo ubi ie nio imese sirio se pupuwo oi rie kimibiria mutu. Ibose mo ubi ie nio imese sirio se nirimagare keremati. Idaibo tanaro nio ro namadimi-isioidiro-ri, nio kaupoti urubia to amadima-ararapoi-ri, taie mea umoro auna se nio aboto Godi ro nato amadi-emagagai-ri. Nou ro piro se na-gowopirowa, mo ubi ie nio imese umoro koi, ibo Keriso nouse ie.
3 Iedi mea umoro ro mea muro mutu Godi ro Iesu Keriso abato giwopirowa, nou abato kowea ie.
4 Nedi peba titi owera ro mo ro nou ri nisioidiro mabu mo ubi tato ie nio arua urubia ro kisaubuti bagea owera to. Neio ro owera meamea to amadimi-itamudiro-ri kaupoti aise imibiria mamo.
5 Mo nio aboudo muso sekere kaupoti mo urio nio mutu e. Nio tanaro mutu mea mino to ou-dumo, ibose nio kimibiria Keriso sapuwo to imese kokoho ta-geremowaititi-rimo. Mo ro idaibo owera na-nirorowai mo imese auna kamade ro nowati.
Orio keremiro Iesu aboudo ou-die
6 Ina noudo ie Iesu Keriso nio ro Abera Naramu to beda sosoro gapoi-rimo, nio nou urubia sosoro gi-orowomidiro-ri.
7 Keriso mea goto sosoro ie, nou ato se sipi koko se diwodoro-mo, ota mea se mosuruwo-rimo. Moto kididi woko beda sosoro ra, nio keremiro idaibo sosoro ie, aise deremari-mo Iesu Keriso edi pupuwo ro neito. Nio edi kimibiria owera ro kebase na-garatamudiro-rimo, nou aboudo koko se ba-dirarebidiro-mo. Ina ibose sirio tau Abera Godi aboto eso owera aise gi-aro-ri.
8 Mea se deremowotoi-mo! Nio modobo pua arua urubia ro kirobo mabu neio edi kitamudiro ro neido ata meana ata osuruwo-ri pua, sopu duriomoro edi kimaragoidiro ro neio ro nouto isioidirotiti-dumo. Neio ro edi tanaro ro na-isioidirotiti-dumo, sopu duriomoro urubia aboudo se gimade-rimo. Ibose nedi sairo rudo koromudidiro kitamudiro ro toboro ato edi ubauba urio ro oroho-dumo neio aboudo gimade-rimo. Nedi kitamudiro sirio ro Iesu Keriso aboudo pua. Nio modobo pua arua urubia ro kisaubuti,
9 mabu Godi edi asaso ro imese Keriso ia durupi maumo ato imidirotiti.
10 Nio Keriso abato kaupoti to na-garadabuai-rimo, morobise keremiro gabo nio abato momuo se towamo. Iesu Keriso nouse ie eputa dubu, imese sirio urio awawo pupuwo mutu neio imese Keriso ro sopu to iauri-die.
11 Nio Iesu Keriso ro na-gidabuai, nio idaibo sosoro ie dubu simara takamai urio to ta-giwasio ina ta-giworiouti. Ibo pua tu to paea dubu ro kosioidiro. Io Iesu Keriso ro urio to gisioidiro nedi tanaro ro. Keriso ro nio simara ubauba ubi kibodoro aboudo imese ta-giwagare-ro.
12 Nio obo to edi tau ato giwarumiauti, io idaibo sosoro ie nio pamo durupi bobo ato girobu Iesu mutu. Ina ibose nio obo maumo rido edi tau ato giwouburio-rimo, nio Iesu mutu bobo rido atu se ibose to giwoubua-ro. Idaibo tanaro neio ro gororosioidiro-rimo nio aboto, mabu nio ro ta-gimibiria-rimo ibo Godi edi pupuwo korosa ro modobo ie idaibo tanaro kisioidiro aboto. Nedi atu pupuwo korosa ro Iesu pamo rido Godi ro neito gowoubua-ro.
13 Nio ia urio kebase pamo urubia sosoro irobutiti, ubauba tanaro sirio na-isioidirotiti-mo, ibose durupi ubauba ubi sirio na-ibodorotiti-mo. Ina nio Godi ro Iesu mutu pamo rido atu se ta-giwoubua-ro orio keremiro ta-gomidai-rimo. Nimo ro ubauba tanaro na-nisioidirotiti-mo, Godi ro imese moro to ta-nimatopeamuti.
14 Nou idaibo sosoro ie, nimo ubauba tanaro na-nisioidirotiti-mo ata buka towamo nimo masiro mutu. Nimo ro ubauba wisa Godi aboudo ba-nimadetiti-mo. Ina idaibo sosoro ie, nimo ubauba beda buka ato iamotiti, iedi buka ro Godi ro ta-gemopoguti ota kemowotowa ato.
15 Keriso edi tau ato gemopoguti-rimo, imese pupuwo orora sirio iedi kemowotowa ro neito neio Godi ro ta-giwamedei, imese siripo ta-giwai urubia sirio sosoro gabo ato.
Karasaubuti sabi ibodoro mamo
16 Ina noudo ie nio modobo pua arua urubia owera kirowidiro ibo, ‘Nedi ohona ro iho mamo, idaibo obo idio mamo.’ Neio nio kimeiouti urubia pua ibo na-imowauti-dumo, ‘Iu urubia soriomu tanaro ibo ba-disioidiro-mo, orio sogomi kohau tanaro ibo ba-disioidiro-mo, ina Iu urubia komidiro saiki tanaro ibo ba-disioidiro-mo.’
17 Nedi tanaro sirio ro kowaroho duwoduwo sosoro gorowapotai-ro, kaupoti kowaroho duwoduwo ro gabo gemosowa-ro nani ia dubu saro rido gou-ro. Morobise maumo tanaro edi dubu abato na-iamo Keriso nou se ie.
18 Nio modobo pua arua urubia ro ubauba kiwaititi. Mea se. Ina arua urubia amadidimi-irurubua-ri nio neio ro amadimi-igediouti-ri, ina nio ro iedi mea kimibiria wisa ro nato amadimi-iasoperai-ri. Nedi sabi sirio ro urubia ro nakara se na-isioidiro-dumo, nedi urubia ro bagea to korowororuwo ie sopu to, neio urubia ro imowabu rie. Ina neio ro sowake urio imowabu-dumo. Ibose neio ro urubia auna se kimowauti ie tuturu tau to beda tanaro ra hiwo to na-iaurititi-dumo. Iedi mabu noudo ie neio ohu to korowiourio. Kaupoti neio ro edi tanaro ro na-isioidirotiti-dumo imese ata mabu tato tanaro isioidirotiti-dumo ina neio auna keremowabu e.
19 Idaibo sosoro urubia neio mea se irarebai pua, Iesu urubia eputa dubu Keriso aboudo. Keriso durupi nouse ie, urubia nou pupuwo to iroromowadotiti. Eputa Keriso nou se ie, sumi pupuwo nou aboudo irobu-die, durupi pupuwo nou ro kowaititi ie, woko pupuwo to nato kisioidiro ie. Durupi kororomai sapuwo to edi pupuwo ro Godi aboudo outiti-die.
20 Nio idaibo sosoro ie, Keriso mutu atu se ta-gorowaburai-rimo. Ina nio nou ro nedi sopu duriomoro ro nato edi ubauba orora ro na-woroho-dumo nio Keriso ro neio aboudo ta-giwagare-ro. Ina noudo ie, mabu boira nio duriomoro urubia sosoro korowomidiro? Mabu boira neio ro edi sabi owera ro neito na-itamudiro-dumo, ina nio ro na-ibodoro-dumo?
21 Neio ro ibo na-itamudiro-dumo, ‘Nedi namabu ro nio ro iworohuti mamo, nedi ohona ro iho mamo! Nedi namabu ro iwaseidiro mamo.’
22 Nedi namabu ro sopu duriomoro namabu e, tuturu to iamo-ri pua, neio urubia ro kiworohuti ato amadimo-oroporeawado-ri. Nedi sabi sirio ro sopu urubia ro nakara se gisioidiro-rimo nio ro ibodoro ri.
23 Ina urubia ro ibo imaragoidirotiti-dumo, sabi kibodoro gabo mea muro gabo ie. Kaupoti neio edi kitamudiro ro urubia aboudo gimade-rimo, ibo pua Godi aboudo kimade. Nedi urubia ro koko tanaro isioidiro-dumo Godi kamade kowaititi sapuwo to, ibose bagea to korowororuwoidiro ie sopu to neio urubia ro imowabu rie. Idaibo urubia sabi na-ibodoro-dumo neio durupi nakara se ubauba iworoho-dumo. Mabu nedi sabi sirio ro urubia ro kibodoro ato, durupi ubauba ubi tanaro sirio na-iamo, sabi kibodoro tanaro ro neio kidiobuti modobo pua.