3
Godi kamade kowaititi sapuwo to duriomoro ato mea se gi-orowomidiro-ri
1 Nio Keriso mutu urio to Godi ro atu se giwoubua-ro, ina nio abora keremiro mutu e. Ina noudo ie beda meamea tanaro ro iamo-die Abera Godi tumodi sapuwo ato Keriso edi moro ato omidiro-die, nio giropu neio ato se miamo,
2 ibose nio kimaragoidiro patu iato se miamo. Duriomoro tanaro sapuwo to auna se imaragoidiro mamo.
3 Mabu nio neio sapuwo to Iesu mutu ta-gorowaburai-rimo. Nio keremiro Keriso ro Godi aboto ta-gidabuai mea mino to giwopirowa.
4 Keriso edi tau ato namadi-orowapotai-ri, nio orio keremiro edi na aboudo na-imade-dumo, piro se nou abato na-orowomidiro, saiki ata urubia sirio ro nio nato amadimi-iauri-ri mea ia sosoro mutu ata pokiri iopu tato ie.
5 Ina noudo ie ubauba ubi tanaro nio niro turi ato na-iamo ba-diopiauti-mo. Nedi sopu duriomoro ubi tanaro ro nu neio ie, upo tanaro, imese marea ia tanaro kisioidiro. Ina ata ibo ie auna ia ubi ro kowamo ie upo koroho, ina ata nou e arua ubauba tanaro kisioidiro aboto kimaragoidiro, auna ubi ie namabu siriosirio korowomidiro. Namabu sirio sogoi ro kiwati tanaro ibo ie Godi huru kemowou e, ina namabu aboto se kimaragoidiro ie.
6 Nedi ubauba tanaro sirio ro urubia ro na-isioidiro-dumo, ina noudo ie tau tou-die saiki ata Godi edi serawo ro neio ro amadimo-owea-ri.
7 Nio ro idaibo ubauba tanaro kebase nou isioidirotiti-mo.
8 Kaupoti idaibo ubauba tanaro sirio nio ro aise ba-dimeserai-mo. Nedi ubauba tanaro sirio neio idaibo ie, serawo aise koititi, arua urubia masawe kimati, arua urubia sapuwo to ubauba kimaragoidiro kiworohuti, arua urubia owera kimasaubuti. Karo tato owera nio matagoro rido dorogora se osuwoduti mamo arua urubia sapuwo to.
9 Bagea owera eremowauti mamo, mabu nio tagara keremiro simara ubauba tanaro mutu ta-gipuruti-rimo,
10 ina orio keremiro orio obotama beda sosoro ra ibo giroiti-rimo. Iedi orio keremiro ro Abera Naramu Godi nou ro orio aise imowaititi. Nio nou ro imododiai nou sosoro oititi ri, ina noudo ie nio morobise to umoro tiwaititi-die.
11 Nedi orio keremiro ro nou maumo ato dubu simara takamai kasiai o kasiai tato, Iu urubia ra o Iu owera karo tato urubia ra, io auna tanaro pua. Neio daimodaimo urubia ra, tumu urubia ra, wisa tato woko kisioidiro urubia ra, simara woko kisioidiro urubia ra, io auna tanaro pua, nedi duriomoro gebari ro nato Keriso nou se ie neio auna dubu e. Nou ro imidirotiti imese kimibiria urubia niro maumo ato.
Meamea tanaro se gi-isioidiro-ri, auna se nou e nirimagare kimati
12 Nio Godi ro ta-gihoduti nou tarena urubia to ararasoro ri. Ina noudo ie orio obotama nio ro beda sosoro kiroiti ra, meamea tanaro nio ro ibo kiroidiro modobo ie. Nio Godi ro auna nirimagare imatiti-die ina noudo ie nio ro urubia nirimagare ibo kimati modobo ie. Urubia aise gi-iwarebai-ri. Nakara se sopu to aise gi-orowororuoidiro-ri. Urubia aise gi-imaragoidiro-ri. Serawo samo to oititi mamo.
13 Kimibiria borubi ro nio aboto kimaragoidiro tato tanaro na-isioidiro-dumo, auna se imaragoidiro mamo. Mibo na-iamo arua urubia mutu tuturu tau to iamo mamo, samo to gi-iporeawado-ri ina imiriauti mamo. Nio edi ubauba tanaro sirio ro Abera Naramu ro woki beda sosoro to gimati, nio ro arua urubia ubauba nio aboto na-gisioidiro-rimo woki ibo kimatiti modobo ie.
14 Ina auna tanaro owamo ibo urubia nirimagare aise gi-imati-ri, nou kiroidiro modobo ie. Nio ro idaibo tanaro namadimi-isioidiro-ri nio kaupoti to ama-irowomidiro-ri.
15 Nio Godi ro girapoi-ro kaupoti durupi to ararasoro ri. Keriso ro miro nio abato ta-gedea, ina nou edi miro ro nio nou ro kitowouti modobo ie, eso owera karo mutu.
16 Sirio saiki Keriso edi mea owera ro nio niro turi ato aise ba-miamotiti. Iedi owera ro neito nio ro borubi kimibiria urubia mea muro to ba-ditamudiro-mo ina ba-dituputuwado-mo. Nio ro Godi erere kemowabu ohare to eso owera maumo giropu rido ba-demaboduti-mo.
17 Nio ro etou tanaro kisioidiro ra ibose beda owera karo ra Abera Naramu Iesu ubi to kisioidiro modobo ie. Sirio tau eso owera karo modobo ie nimo Abera Godi aboto. Mabu Iesu ro gabo kebase ta-gosioidiro Godi aboto nimo ro eso owera nou aboto aro ri.
Kimibiria urubia korowomidiro muro ibo ie
18 Uramio mutu mamio owera nio aboto ibo ie, uramio owera se kirowidiro modobo ie. Mabu Abera Naramu kowasoro maumo ato nou mea tanaro ie.
19 Uramio owera nio aboto ibo ie, upi nirimagare aise gi-imati-ri, auna owera to irubiauti mamo.
20 Merebusere owera nio aboto ibo ie, imese sirio tau mamio abeamio owera aise gi-irowidiro-ri. Mabu nio ro idaibo tanaro namadimi-isioidiro-ri, Abera Naramu nio ro kamade amadimo-owaititi-ri.
21 Abeamio owera nio aboto ibo ie, merebusere inaina masawe owera to irubiauti mamo. Ido neio tere amadimo-oi-ri meamea tanaro kisioidiro aboto.
22 Wisa tato woko urubia, owera nio aboto ibo ie. Eputa urubia sopu duriomoro ato na-orowomidiro, imese sirio tau neio owera aise gi-irowidiro-ri. Ibo pua neio sosoro gabo ato se kisioidiro woko mea se, neio kamade kiwaititi sapuwo to. E e, imese sirio tau woko mea se gi-isioidiro-ri morobise giropu mutu, mabu nio ro Abera Naramu auna se emaragoidirotiti-dumo.
23 Nio ro beda woko kisioidiro ra, kamade mutu gi-osioidiro-ri. Nio ro idaibo Abera Naramu woko emesioidiro-dumo, nou idaibo ie nio ro sopu duriomoro urubia woko imesioidiro pua.
24 Dimaragoidiro-mo, saiki ata erere se edina gimohoduti Abera Naramu ro, nio ro nou amadimi-imade-ri. Nio nani ia eputa dubu nou woko na-emesioidiro-dumo Keriso nou se ie.
25 Kaupoti nio ata ro ubauba tanaro ata na-osioidiro, ibose ubauba wisa Godi aboudo nou ro ama-imidai-ri. Mabu Godi ro urubia atu sosoro tanaro to kiworohuti ie.