6
Merebusere, mamio, abeamio totomu nio sapuwo to ie
1 Merebusere nio mamio abeamio owera aise gi-irowidiro-ri, mabu nio Iesu do ie, ina nou mea tuputupu tanaro ie.
2 Merebusere, mamu ra abera ra mea mino to gi-iauri-mari. Mabu Abera Naramu keba sabi kemasaubiai owera mutu nou e,
3 Nio ro idaibo sosoro tanaro namadimi-isioidiro-ri, nio keremiro modobo ato amadimi-iwaboi-ri, nio duriomoro ato tuturu tau to ama-irowomidirotiti-ri, womu tato abeabe nogenoge namadimo-oititi-ri.
4 Abeamio, nio edi merebusere ro neio tanaro sapuwo to, inaina auna se imadowere mamo. Modobo pua neio niro turi nio ro serawo kimowaititi. Modobo ie neio nio ro Abera Naramu kitamudiro owera to gi-itomu-ri, ibose ubauba tanaro neio ro kisioidiro ato, wisa na ba-dimotuputi-mo, neio edi kimibiria ro mea se kiroromai sapuwo to.
Wisa tato woko urubia, eputa urubia mutu, nio sapuwo to ie
5 Nio etio ra wisa tato woko na-isioidiro-dumo, nio edi eputa urubia ro nedi sopu duriomoro ro nato, neio ubi woko nio ro tere mutu aise gi-isioidiro-ri, woko kamade giropu mutu gi-osioidiro-ri. Nio Keriso ubi tanaro beda sosoro isioidiro-dumo, nio eputa urubia ubi tanaro idaibo sosoro ba-disioidiro-mo.
6 Arua wisa tato woko kimesioidiro urubia neio eputa urubia korowomidiro ato, neio ro woko mea se nato kisioidiro ie, neio kamade kiwaititi aboto. Kaupoti nio idaibo orowati mamo. Nio ro modobo ie sirio tau eputa urubia woko kamade giropu mutu mea se kimesioidiro. Nio Iesu Keriso wisa tato woko urubia ie, Godi ubi tanaro nio ro sirio tau mea se kisioidiro modobo ie.
7 Nio ro edi woko ro na-isioidiro-dumo kamade mutu gi-isioidiro-ri, ibo pua nio ro duriomoro urubia kamade kiwaititi sapuwo to kisioidiro. Kaupoti nio ro Abera Naramu nou kamade owaititi rie. Ina noudo ie iedi woko ro mea se gi-isioidiro-ri.
8 Mabu nio umoro ie saiki ata Abera Naramu ro meamea wisa ama-imio-ri etio ra meamea woko na-isioidirotiti-mo. Wisa tato woko urubia, ibose urubia simara woko na-isioidiro-dumo, neio atu se simara meamea woko sapuwo to meamea wisa amadimi-imade-ri.
9 Ina ata owera ibo ie eputa urubia nio aboto, nio wisa tato woko etio ro imesioidirotiti-dumo, neio ibose nio ro mea se ba-diworohuti-mo. Neio nio ro masawe to irubiautiti mamo nio ubi tanaro se kisioidiro aboto. Eputa urubia, nio simara eputa dubu ro Adiri sabowa rido tiauri-die, ina nio edi wisa tato woko urubia ro, nou ro ibose ioudo tiauri-die. Nedi owera ro ba-demaragoidiro-mo, nou ro urubia atu mino to kiworohuti ie.
Satani beda sosoro kemotobowa ra
10 Ina mo aboudo ie iana owera nio aboto, Abera Naramu edi pupuwo korosa ro nio neito ba-dirimowotoi-mo, ibose nou edi pupuwo ro nio aboto na-gaiwai-ro, iedi erapo ro neito ba-dirimusubuauti-mo.
11 Godi edi urio boso namabu sirio ro, nio nou ro erere se ta-gimio, nouse diroiti-mo. Nio ro namadimi-iroiti-ri, Satani ubi na-iedea karasaubuti tanaro nio aboto isioidiro ri, neio aboudo nio edi boso namabu ro neito amadimi-irimusubuauti-ri.
12 Mabu idaibo sosoro ie, nimo abora urio to boso abato noroho-dumo, kaupoti nedi boso ro nato paea urubia mutu orowati-ri pua, ubauba orora, neio eputa orora sirio, nimo neio mutu norowati-dumo. Nedi duriomoro gebari ro duwoduwo ro ta-gatimai, ina nedi duwoduwo ro neio ro oworohutiti-dumo. Ina neio arua toboro ato irohotiti-dumo. Nedi orora sirio ro erere moro ato na-irowomidiro nimo boso neio mutu e.
13 Ina nio mo ro nou mabu ato nimowapotai, Godi edi boso namabu sirio ro, boso koroho urubia sosoro diroiti-mo. Nio ro mea se kiroiti ato, nio aboto auna ubauba tau namadi-ou-ri, nio nou ro iwameduti-ri pua. Ibose iedi boso ro womu to kereredea ato nio nou ro beda kiwororuwo pua, nio koko se amadimi-irimowotoi-ri.
14 Boso koroho dubu beda mino to kirimowotoi ra boso urubia kiwamedei sapuwo to, nio ro nedi tanaro ro nou ba-disioidiro-mo. Urio boso namabu ibo ie, nio ro Godi morobise owera koko se ba-diroiti-mo, boso koroho dubu ro obotama bereito koko se beda sosoro karatahirai ra.
Mea tuputupu tanaro ba-diroiti-mo, boso koroho dubu hoko korowasiai namabu beda sosoro kiroiti ra, nasa urubia aboudo neito korowasio ie.
15 Ina mea miro owera Iesu sapuwo to tamaka sosoro ba-diroiti-mo, boso koroho dubu tamaka pikipiki se beda sosoro kiroiti ra nou keremododiai aboto boso sapuwo to.
16 Ina ata owera ibo ie, nio edi kimibiria ro Keriso sapuwo to koko se ba-dirobidiro-mo, boso koroho dubu ro durupi korowasiai nakomu koko se beda sosoro korobidiro ra. Ina boso dubu ro era mio iona kipedu ato, nio ro nouto kiagodo ie, nio takamai neio ro iwasomai-ri pua.
17 Ibose Godi edi kiapopo tanaro ro nio ro nou aboudo koko se ba-dirarebidiro-mo, boso koroho dubu koko hato beda sosoro keremedea ra, eputa neito kowasiai ie.
Godi edi owera ro Tarena Urio edi boso giri ro nio aboto na-gaiwai-ro nouse ie, nou ba-dorobidiro-mo, boso koroho dubu ro boso giri beda sosoro korobidiro ra.
Nedi tanaro sirio ro urio boso sapuwo to nio ro nou se ba-disioidiro-mo.
18 Sirio tau Godi aboto erere muro to aise gi-araratoro-ri. Godi edi Urio ro nio nou ro kimasouti ie kararatoro tau ato. Ina noudo ie nio ba-diraroweauti-mo, modobo ie Godi aboto kararatoro tarena urubia sapuwo to, orodiobuti mamo.
19 Ibose mo sapuwo to sirio tau Godi aise gi-araratoro-ri, mo ro urubia beda owera kimowauti ra, mo ro karo owera nou ia ro kemasouti modobo ie. Mea owera Iesu Keriso sapuwo to mo ro arua urubia modobo pua tere mutu kimowauti. Urubia ro nedi owera ro Iesu sapuwo to kebase umoro koi tato, piro se ta-owamotiti.
20 Mo Iesu Keriso woko dubu e, nou ro nohodowa-ro nou bobo ato urubia mea owera mo ro imowauti rie. Mo dibura ato nou mabu ato noroho sekere, kaupoti urubia mo ro nedi owera ro aise nimowautititi. Ba-dararatoro-mo mo ro urubia kimowauti ato Iesu Keriso sapuwo to, modobo pua tere mutu kimowauti. Abera edi ubi tanaro ro mo ro neito kosioidiro modobo ie.
Iana owera Pauro aboudo ie
21 Mo aboto edi tanaro ro ororosioidiro-dumo, nio umoro koi sapuwo to, nio aboto mo ro nimo kimibiria neama nirimagare na-nemati-dumo a-nemeiriai, nu masiro Tikikasi. Nou ro mo sapuwo to nio umoro ama-iwai-ri. Nedi dubu ro Abera Naramu edi woko ro mea se emesioidirotiti. Nato beda tanaro ro ororosioidiro-dumo mo borubi mutu, nio nou ro ba-mimowauti.
22 Mo ubi ie nedi dubu ro nio nou ro pupuwo ba-mimowaititi. Nedi tanaro teibo ro isioidiro-mari Tikikasi nou mabu ato a-nimeiriai.
23 Mo niramio, nimo Abera Godi, Abera Naramu Iesu Keriso mutu, neitiro edi miro ro nio abato aise ba-miamotiti. Ibose arua urubia nirimagare kimati giropu, kimibiria mutu, neitiro ro nio abato ba-miaremuti-do.
24 Nimo Abera Naramu Iesu Keriso nirimagare etio ro womu tato se na-ematiti-dumo, Godi edi wisa tato kiwarebai ro neio abato ba-miamotiti.