6
Arua rubi mutu aise gi-orowarebai-ri
1 Niramio, nio ata kimibiria dubu ata nou ubauba ro na-ohiai nio etio ra Tarena Urio ro na-iwaboi modobo ie nedi dubu ro nio ro mea mino to natara na gabo to kowameai ie. Kaupoti oro modobo ie nakara se keremowotoi aboto, modobo pua oro ubauba ro kowaibia.
2 Modobo ie nio atu se korowarebai mibo patu toutou keremowaititi aboto. Nio ro idaibo tanaro na-isioidiro-dumo Iesu Keriso iedi sabi kaupoti ro nio ro nou obodoro-dumo.
3 Mabu nio abato etu ro kimaragoidiro ra ibo, ‘O, mo meana ie,’ kaupoti nou meana pua, nou nakara se arasaubuti.
4 Arua urubia tanaro kisioidiro mutu eremodobowauti mamo. Nio modobo ie simara tanaro se kimaragoidiro, meana ra o ubauba ra, ina meana sapuwo to kamade ro kiwati.
5 Ina nimo kaokao na-norowomidiro, beda tanaro kisioidiro ra, wisa korowameai ie oro aboto.
6 Nio etio ro itamudiro-dumo Godi edi owera ro nou to, modobo ie iedi urubia ro nio ro mea se kiwarebai.
7 Nio modobo pua nakara se karasaubuti, mabu Godi nio ro asaubuti-ri pua. Mabu nio ro etou tanaro isioidiro-dumo, saiki ata nio ro wisa amadimi-iwia-ri.
8 Nio ro na-isioidiro-dumo durupi ubauba ubi tanaro, nio pamo emou-dumo, saiki ata amadimo-owea-ri. Kaupoti nio ro meamea tanaro na-isioidiro-dumo, Tarena Urio kamade kowaititi aboto, nio ro Tarena Urio aboudo womu tato womu tato keremiro amadimo-owea-ri.
9 Ina neido ie modobo pua nimo masawe ro kirobowado meamea tanaro kisioidiro aboto, modobo ie imese tau aise kisioidiro. Ina nimo ro nedi tanaro ro namadimi-isioidirotiti-ri, mea tau tou-die mea wisa nimo aboto nato amadi-owapotai-ri.
10 Ina neido ie gabo nimo ro kowea ato, modobo ie sirio urubia aboto meamea tanaro aise kisioidiro. Modobo ie nimo ro auna ia se kimibiria borubi kiwarebai.
Pauro iana umoro owera ie
11 Ba-diauri-mo! Nedi iana titi owera ro mo ro simara tu to nisioidiro awawo titi to, nio ro kieibimai sapuwo to ibo mo ia ro nisioidiro.
12 Nio owera neito dirowidiro-rimo! Arua urubia torowomidiro nio abato nio neio ro timediawado-dumo dubu takamai iwasio ri arua Iu urubia kamade kiwaititi sapuwo to. Nedi urubia ro neio Iesu Keriso ota kemowotowa ato na-garaburai nou sapuwo to se korowauti rasiri ie, Iu urubia serawo ba-goi-rimo neio aboto. Ina nou do ie neio idaibo tanaro kisioidiro tato, neio tere ie Iu urubia ro kiado rie.
13 Nedi urubia ro takamai kiwasio mutu neio ro ibose Mose sabi patu mea se ibodoro pua. Neio ubi ie nio dubu takamai kiwasio, ina nou sapuwo to eremowabu rie ibo ‘Nedi urubia ro dubu takamai nimo ro ta-niwasio-rimo.’
14 Modobo ia pua mo ro idaibo sosoro keremowabu tanaro nou kisioidiro. Iesu Keriso ota kemowotowa ato beda sosoro gemopoguti-rimo, io mo ro nou se kemowabu modobo ie. Iesu Keriso ota kemowotowa teibo ato ta-garaburai, ina nou mabu ato ie mo ro imaragoidiro-ri pua duriomoro tanaro patu kisioidiro aboto, ibose duriomoro urubia ro mo emaragoidiro-ri pua.
15 Dubu simara takamai kasiai o kasiai tato io auna tanaro pua. Auna ia tanaro owamo ibo orio keremiro Godi ro ti-nimiotiti-die.
16 Urubia etio ro iworohuti-dumo idaibo sosoro kimaragoidiro, Godi edi morobise urubia to neio ro gararapoi-rimo, ina wisa tato nirimagare miro mutu neio abato ba-miamotiti.
17 Mo iana owera ibo ie, modobo pua mo nio ata ro mibo ina komia, mabu mo durupi ato sirio bomo poro tiamo. Iesu Keriso sowake na-nirohotiti temeteme nou sapuwo to niaurititi.
18 Naminiramio, Iesu Keriso wisa tato nirimagare nio niro turi ato ba-miamotiti.
Nou se ie, ibose ba-mororosioidiro-mo.