Tanaro karatamuai mabu
1
Godi ro imese namabu patu gisioidiro
1 Godi nou na-imidirotiti keba ia keba ia tau ato nedi moro ro nou tato ie. Imese namabu sirio nou ro gisioidiro.
2 Keba se obo damo ro imidirotiti duwoduwo ato, goto obo ro ta-gahidimai. Goto mea sosoro ereredea pua. Godi nou simara huhuame ro goworohuti obo ohu ato.
3 Keba saiki ato Godi ro nou gisioidiro. Godi ro iato gutura, ‘Woroworo mereredea!’
4 Woroworo iato aise gereredea. Woroworo Godi ro na-gowea, nou kamade aise goi. Iato nou ro woroworo ra duwoduwo ra aise gihodowa-ma.
5 Woroworo nou ro saiki to gapoi, duwoduwo nou ro duwo to gapoi. Taie, duwo na-garagare iato kowaroho ro gereredea.
6 Ina ata saiki ato Godi ro nou gisioidiro, ina nou ro iato gutura, ‘Ata nakomu modoro-ro obo apepea ri.’
7 Turi bobo iato gereredea obo iato gapepea, sapuwo obo ohu ato gowamo, sapuwo obo sopu ato gowamo.
8 Turi bobo ohu ato Godi ro toboro to gapoi. Taie, duwo na-garagare, iato kowaroho ro gereredea.
9 Ina ata saiki ato Godi ro nou gisioidiro, nou iato gutura, ‘Maumo obo maradabuti kaupoti moro to, goto kereredea sapuwo to.’ Taie, aise gororosioidiro.
10 Goto Godi ro duriomoro to gapoi, obo nou ro buru oromo to gapoi. Iato nou na-giraroweauti, kamade aise goi.
11 Ina nou iato gutura, ‘Ota daro sugamuso simara iopu mutu mosuwoduti-mo!’
12 Taie erere ota aise gosuwoduti-rimo simara iopu mutu. Nou na-giraroweauti, nou kamade aise goi.
13 Taie, duwo na-garagare iato kowaroho ro gereredea.
14-15 Ina Godi ro nou gisioidiro, nou ro iato gutura, ‘Ohu ato pina mereredea-mo, saiki ato imewiti na ina duwo ato imewiti na duriomoro woroworo sapuwo to. Nedi pina ro amadimi-imewiautiti-ri urubia umoro sapuwo to amia saiki na-woroporeai-dumo ina amia saiki kitamuai, tanaro ibo amadimo-ororosioidiro-ri.’ Taie ibose aise gororosioidiro-rimo.
16 Godi ro ibo gisioidiro-ma saiki ra sogomi ra, saiki ato daro duwo ato imewiti na ie, ibose kiboni iato gisioidiro.
17 Godi ro a-giedea nedi pina ro toboro ato duriomoro kemewiti sapuwo to,
18 nou ro saiki na-gedea saiki ato imewiti na ie, sogomi ra kiboni ra duwo ato imewiti na ie. Nou na-giraroweauti, nou kamade aise goi.
19 Taie, duwo na-garagare, kowaroho ro gereredea.
20 Ina ata saiki ato Godi ro nou gisioidiro. Nou ro iato gutura, ‘Obo ato koroho namabu imese mororosioidiro-mo, ina pawa morowadaudiro-mo duriomoro ohu ato.’
21 Nou ro ibose to gisioidiro imese sirio keremiro namabu, idaibo awawo, kainakaina, obo maumo ato na-oroho-dumo, imese sirio tamu ra mutu namabu nou ro gisioidiro. Nou na-giraroweauti, kamade aise goi.
22 Godi ro korosa iato gimia ibo ‘Imese namabu obo ato na-oroho-dumo, tamu mutu namabu duriomoro ohu ato na-oroho-dumo ba-dararasomai-mo sirio ba-doi-mo obo ato ina duriomoro ato.’
23 Taie, duwo na-garagare, iato kowaroho ro gereredea.
24 Ina ata saiki ato nou ro nou gisioidiro. Nou iato gutura, ‘Goto ato koroho erere namabu mororosioidiro-mo, serawo namabu, serawo tato namabu, kainakaina, awawo, ina ba-darasomai-mo atu sosoro.’ Iato aise gororosioidiro-rimo.
25 Godi ro ibo gisioidiro serawo namabu, serawo tato namabu, kainakaina awawo neio kararasomai sapuwo to. Nou na-giraroweauti, kamade aise goi.
26 Ina Godi iato gutura, ‘Urubia misioidiro-birimo neibi ia sosoro, neio ro amadimi-iauri-ri nakere, pawa, serawo tato namabu, kainakaina namabu, awawo namabu daro imese duriomoro.’
27 Godi ro ibo gisioidiro urubia nou ia sosoro, upi dubu.
28 Godi ro korosa iato gimia ibo, ‘Ba-dararasomai-mo sirio ba-doi-mo imese duriomoro ato, iato ba-dirahidimai-mo. Nakere, pawa, imese sirio keremiro namabu goto ato na-woroho-dumo nio ro ba-demeauri-rimo.’
29 Ina Godi ro urubia aboto ibo, ‘Nio mo ro ta-nimesioidiro imese ota iopu sirio ina sugamuso rudo na-wosuduti-dumo iopu sirio idaibo kono araiso kiho sapuwo to, ba-diho-mo!
30 Imese goto ato koroho namabu pawa mutu neio ro kiho sapuwo to, mo ro gigasi puara ta-nimesioidiro.’ Ina ibose aise gororosioidiro-rimo,
31 Godi iato na-giraroweauti nou ro kisioidiro namabu na-giwia, nou auna kamade goi.
Taie 6 saiki na-goroporeai-rimo,