15
Iawe ro hodo nato gasaubiai-ro Abaram aboudo
1 Abaram hiwo sosoro na-gorobu Iawe owera nato garo-ro nou aboto. Nou ro ibo, ‘Oro tere na ie, oro moro anama-owasiouti-ri imese ubauba aboudo, idaibo boso aboudo, beda sosoro tanaro ra oro ro nama-isioidiro-ri, mo keba se anama-oroho-ri oro owasiouti na ie. Oro meana auna se ama-iauri-ri mo aboudo.’
2-3 Abaram ro masawe mutu iato gutura ibo, ‘Iawe, oro mo eputa dubu e, oro umoro pua ra ibo mo mere tato ie? Mo nama-araburai-ri, mo edi namabu sirio ro mo woko mere Eriesa, Damasikasi sabowa dubu, nou ro ama-irahidimai-ri.’
4 Iawe ro ibo, ‘Abaram, oro edi woko mere ro ibo pua nou ro kirahidimai oro edi namabu sirio ro, oro ia simara mere nou ro ama-irahidimai-ri.’
5 Taie Abaram parai moto rido Iawe ro iato gowosuruwo-ro. Nou ro ibo, ‘Toboro ma-demawota ma-diwia beda mutu kiboni ro orowotoi-die, oro ro modobo ra kioputi? Oro edi aramio merebusere ro, kiboni sosoro sipu ibo ama-irowomidiro-ri nedi sopu ro nato.’
6 Nou ro beda owera garo Abaram ro aise gimibiria. Ina noudo ie, Abaram Iawe ro mea tuputupu dubu to gapoi, mabu nou ro Iawe edi owera ro aise gimibiria.
7 Nou ro ina iato gutura Abaram aboto ibo, ‘Mo Iawe ie, nedi goto ro oro anama-omia-ri, oro mo ro nou ri nowou-ro Uri sabowa rido, Babironia duriomoro ato na-owamo.’
8 Taie, Abaram ro ibo ‘Iawe, oro mo eputa dubu e, mo umoro beda sosoro to anama-oi-ri ibo nedi goto ro mo goto to ama-ararapoi-ri?’
9 Iawe ro ibo Abaram aboto, ‘Netewa didi kisimisi namabu peteibi neibi diwoubi-ro mo aboto, idaibo orobo burumakau, orobo nanigosi, dubu sipisipi, dumu pawa teibo mutu.’
10 Abaram ro imese giwou-ro iedi namabu sirio ro. Nou ro turi ato giapepe, burumakau na-gapepea sapusapuwo giedea-ma. Nanigosi na-gapepea, kere teibo sapusapuwo giedea-ma. Sipisipi na-gapepea sapusapuwo giedea-ma. Taie, neio imese giamo. Dumu teibo ta-giwou-maro nou ro iapepea-ma pua, imese giamo-ma momuo se.
11 Taie iato giriai ro edi dao ro na-giwia-rimo, neio aise giroruwo-ro dao iho ri, kaupoti Abaram ro aise gimabodoidiro.
12 Saiki mea se oriodoi pua, Abaram norou nato gutuwa, pamo sosoro gorobu, sisibo ro nato aise gahidimai norou maumo ato.
13 Taie, Iawe ro nato garo-ro Abaram aboto ibo ‘Oro umoro ba-miamo ibo oro merebusere, aramio, neio edi merebusere ro apira urubia sosoro ama-irowomidiro-ri ata duriomoro ato. Neio goto abeamio ro ubauba se amadimi-iworohuti-ri, mibo woko amadimi-isioidiro-ri, ina amadimi-iado-ri, womu tato 400 kisimisi namadimo-oroporeai-ri. Iedi duriomoro urubia ro oro aramio merebusere ubauba se amadimi-iworohuti-ri.
14 Mo Iawe ie, ubauba wisa anama-aiwai-ri neio aboto. Duriomoro urubia ro namadimo-owea-ri nedi ubauba wisa ro, oro aramio merebusere, sirio namabu mutu amadimo-osuruwo-ri.
15 Abaram, oro oromano ia ro nama-orobai-ri, oro mea miro mutu nato ama-araburai-ri.
16 Oro nasaio neio samo to orowameai-ri pua nedi duriomoro ro neito, mabu Amore urubia nedi duriomoro nato na-worowomidiro, neio ro ubauba tanaro egea mere se tisioidiro-dumo. Neio Godi ro womu ta-gimedea ubauba wisa kimidai aboto simara ubauba tanaro sapuwo to. Iedi mako ro neio ro namadime-emasaudai-ri, taie neio nato anama-iwagare-ri nedi duriomoro ro neido.’
17 Saiki na-goriodoi, duwo ta-gereredea. Ina netewa teibo namabu teibo ro gereredea-rido. Ata anaripi ie gahuta ro gioro, ata turupina ie pina mutu, neitiro aise godoro-rido dao turituri to. Nedi tanaro ro Godi ro nou hodo kasaubiai tanaro koko neito gowai.
18 Nedi saiki ro nato Iawe ro hodo nato gasaubiai-ro Abaram aboudo. Nou ro ibo, ‘Sapuwo womu Isipi duriomoro, ina sapuwo womu Iupereitisi oromo, iedi goto gebari ro turi ato na-owamo oro aramio merebusere nou nimapoi. Nedi goto ro abora sirio urubia goto ie,
19 idaibo Ken urubia, Kenisi urubia, Kadimoni urubia,
20 Hiti urubia, Perese urubia, Reha urubia,
21 Amore urubia, Keineni urubia, Girigasi urubia, Iebusi urubia, neio goto ie. Taie.’