17
Isabuna dubu simara takamai kasiai kuriai
1 Abaram 99 kisimisi ro na-gorobai, Iawe nato gorowawea-ro nou aboto. Iawe ro ibo, ‘Mo nakara se nou e pupuwo ia Godi. Mo owera se ba-dirowidiro, ibose mea tuputupu tanaro se ba-disioidirotiti,
2 ina oro aramio merebusere sirio anama-omiotiti-ri. Mo ro edi hodo ro oro aboudo na-nebuai, koko a-nowai.’
3 Godi Abaram ro na-gowea, nou sopu to aise garaburuti, sosoro woidomari aise giborea goto to. Godi ro ibo nou aboto,
4 ‘Abora nedi tau ro nato mo ro hodo a-nebuai oro aboudo, oro aramio merebusere anama-omio-ri, sipu ia anama-emowaititi-ri.
5-6 Oro Abaram pua, abora oro orio masiro a-nomia, Aberaham, mabu sirio duriomoro urubia nama-irowomidiro-ri, oro mo ro neio keba abera to a-napoi, sirio duriomoro urubia oro aboudo sipu amadimo-orobodorouti-ri. Oro aramio merebusere imese sirio amadimo-oi-ri, amia eputa urubia to amadima-arasoro-ri.
7 Mo ro nedi hodo ro na-nebuai-ro oro aboudo, mo ro koko a-nowaititi, womu tato womu tato imese ama-owamotiti-ri. Mo oro do ie, ibose oro aramio merebusere mo neio do ie.
8 Nedi Keineni duriomoro ro oro nato na-womidiro abora apira dubu sosoro omidiro, abora oro do ie, oro aramio merebusere neio do ie, neio ro irowomidirotitiwai ri Keineni duriomoro ato, ina ido mo neio do ie.’
9 Godi ro ina ibo Aberaham aboto, ‘Nedi kemasaubiai owera ro mo ro abora na-naro oro aboto, koko se nou se ba-dorobidirotiti. Oro dubu aramio sirio mutu koko se nou ba-mirobidirotiti-mo nedi kemasaubiai owera ro.
10 Abora nedi tau ro nato mo edi kemasaubiai owera ro neito dirowidiro-ro. Oro dubu simara takamai ato isabuna nama-owamo-ri, oro mo do ie, oro hodo imese nemasaubiai mo ro. Imese sirio dubu oro moto ato na-orowomidiro oro ia mutu, nio imese sirio se dubu simara takamai ba-miwasio-mo ba-miworiouti-mo.
11 Oro dubu aramio ido nama-irowomidiro-ri neio ibose ba-miwasio-mo ba-miworiouti-mo.
12 Ibose oro moto urubia abato mere kainai mamu ro koroto ato, 8 saiki ro na-worobai, edi mere kainai ro dubu simara takamai aise gi-emasiai-ri iato gi-emuriai-ri. Imese sirio dubu mere kainakaina oro moto ato na-orowomidiro oro ro ibo ba-diwatiti. Oro wisa tato woko dubu mere oro ro mani to na-gahodorai-ro, nou ibose ba-dowati dubu simara takamai kasiai kuriai.
13 Etio ra durupi ato na-iamo isabuna, neio aboudo mo hodo ta-nebuai-ro. Iedi hodo ro kebuai imese tau ama-owamotiti-ri.
14 Etio ra dubu simara takamai kiasio tato kioriouti tato, io neio aboudo hodo mo ro isaubo pua, mo gu urubia pua, mabu mo hodo neio ro gasiouti-rimo.’
Godi ro gemowapotai Sera mere ama-oroto-ri
15 Godi ro iato gutura ina Aberaham aboto ‘Oro orobo Sarai to asoro ate, Sera to ba-dasoro.
16 Nou korosa mo ro anama-owaititi-ri, ina mo ro nitiro dubu mere anama-imia-mari. Sera keba mamu to amadima-asoro-ri sirio duriomoro urubia ro, neio amia eputa urubia to amadima-ararasoro-ri.’
17 Aberaham ro na-girorowai iedi owera ro, nou woidomari aise giwaposowa sopu to, iato nou gaga girorouti. Nou ro ibo gimaragoidiro, ‘Mo aupise 100 kisimisi ro korobai, mo orobo ibose, 90 kisimisi ie. Nou idaibo tau ato modobo pua mere koroto aboto.’
18 Taie Godi nou ro iato gemodowa ibo, ‘Ina beda sosoro ra Isimere? Isimere ro modobo ie mo namabu sirio nou ro kirahidimai.’
19 Ina nou Godi ro iato gemowameai, ‘Sera ro ama-oroto-ri dubu mere oro sapuwo to, Aisaki to ba-diduti, ina mo ro hodo anama-asaubiai-ri nou aboudo, ibose nou aramio merebusere mutu, ata ro asiai-ri pua, sirio tau ama-owamotiti-ri.
20 Ina Isimere korosa anama-owaititi-ri, nou mo ro aramio merebusere sirio anama-omiotiti-ri. Nou aboudo 12 gu eputa urubia to amadima-ararasoro-ri. Oro owera Isimere sapuwo to mo ro tau kirorowai ie,
21 kaupoti Aisaki nou e hodo nou aboudo anama-ebuai-ri. Abora nou pua nedi kisimisi ro, maumo ato na-owamo-die oro sapuwo to mere Sera ro ama-oroto-ri.’
22 Taie, Godi owera karo na-goporeai, nou ro Aberaham aise gemeserai.
23 Iedi atu saiki ro nato Aberaham ro iedi owera ro na-girorowai, Godi ro beda owera garo-ro nou ro aise gisioidiro. Nou mere Isimere, nou ia daro nou moto ato beda kiaubo dubu ro gorowomidiro, amia kiaubo urubia ro na-girotuti-rumo dubu mere, neio imese Aberaham ro dubu simara takamai kiasio, taie aise giworiouti.
24 Aberaham 99 kisimisi na-gorobai,
25 ibose nou mere Isimere 13 kisimisi na-gorobai,
26 neitiro aboto atu saiki ato aise gororosioidiro nedi tanaro ro, dubu simara takamai kasiai kuriai.
27 Ina ibose Aberaham moto urubia abato beda dubu sirio ro gorowomidiro, ina neio maumo ato dubu mere wisa tato woko mamio ro na-girotuti-rumo, ibose dubu sirio mani to Aberaham ro na-giahodorai-ro, neio aboto nedi tanaro ro nou ro gororosioidiro, dubu simara takamai kiwasio kiworiouti.