2
1 nou ro nou gisioidiro idaibo toboro duriomoro imese namabu sirio ibo gisioidiro, taie aise giporeai.
2 Duwo na-garagare, ata kowaroho na-gowaroho nou a-gomidiro, ata nakomu ata nou ro osioidiro pua.
3 Iedi saiki ro Godi ro korosa nato gomia ina tarena to gapoi, mabu nedi saiki ro nou nato gomidiro namabu na-giporeai.
4 Imese sirio namabu patu nou ro na-gisioidiro nou totomu e. Taie.
Iawe Godi ro keba urubia beda sosoro gisioidiro
Iawe Godi ro duriomoro toboro imese namabu sirio na-gisioidiro,
5 ota sugamuso mutu osuwoduti pua goto rido. Goto ia se gowamo daroho nou ro emeiriai pua nedi goto ro nouto, ata dubu tato ie goto odi na.
6 Obo abere madawa sosoro maumo rido na-wiouriotiti-ro duriomoro papamo nou ro owaititi.
7 Iawe Godi ro goto na-gaudai urubia dubu nouto gosioidiro. Nou ro huhuame punugo goro rido iato gemuhudurai. Taie nou keremiro dubu to aise gararapoi.
8 Duriomoro masiro Ideni saiki boido idiawado-die, Iawe Godi ro pari nato gosioidiro. Nou ro urubia dubu na-gosioidiro ina iato gowomi iedi pari ro nou ato.
9 Iawe Godi ro ota ta-gibouti, ina meamea ota iopu iato gisuwoduti-rimo ihona.
Pari turi ato Iawe Godi ro ta-garo ata ota, nedi ota iopu ro keremiro imio nari kiho ato, ibose ata ota ta-garo, nedi ota iopu ro umoro kimio sapuwo to kiho ato, mea na nou beda sosoro ra, ubauba beda sosoro ra.
10 Gowo obo owahautiti-ro Ideni pari ato pari namabu nou ro iwaititi pupuwo kisuwoduti sapuwo to. Nodi gowo ro noudo Ideni pari na-gorohodorai 4 oromo nato giwameuti.
11 Keba oromo masiro Pisoni, Habira duriomoro nou ro gemowagegediro-ro iato edi moro ro nato meamea gorodi tiamo.
12 Iedi gorodi ro meamea agoago nadi sosoro ie. Ina mea nibo dehoro iato tiamo, ibose auna wisa nadi onikisi iato tiamo.
13 Ata oromo masiro Gihoni, Kusi duriomoro nou ro gemowagegeidiro.
14 Ata oromo masiro Tigirisi, Asiria duriomoro rudo ororuwotiti-die saiki boido idiawado-die, ata oromo masiro owamo ibo Iupereitisi.
15 Urubia dubu Iawe Godi ro a-gowomi Ideni ato iedi pari ro mea mino to iauri ri.
16 Iawe Godi ro umoro owera iato garo urubia dubu aboto, ‘Ba-dihotiti beda mutu ota iopu ra na-orowotoi pari ato,
17 kaupoti oro umoro komia ota iopu meana ra ubauba ra sapuwo to oro ro ouho ate! Oro ro nama-ouho-ri oro ama-araburai-ri!’
18 Iawe Godi nou na-gimaragoidiro urubia dubu nou ro na-gosioidiro, nou ro ibo, ‘Nou nakara se komidiro modobo pua. Mo ro komidiro boinana anama-emesioidiro-ri, nou mea se kowarebai sapuwo to.’
19 Taie, nou ro iato ta-gisioidiro amia namabu sirio idaibo pawa, ina tumu namabu mutu. Nou ro iato gemowawuti urubia dubu, nou ro masiro imio ri. Taie, urubia dubu ro iato giasoro masiro to.
20 Nimo abora nouto niasoro-dumo nou ro kimio masiro to. Nou na-gimaragoidiro nou mea se kowarebai boinana potoro ie.
21 Taie, Iawe Godi ro urubia dubu maumo norou iato gowotodai. Nou maumo norou korobu maumo ato dadaru iopu nato gowagare-ro ina takamai iato gematorai,
22 urubia orobo neito gosioidiro.
Nou ro kosioidiro na-goporeai nou ro aise gemowawea urubia dubu. Orobo urubia dubu ro na-gowea, nou kamade aise goi.
23 Nou ro ibo, ‘Nou e! Nou mo boinana ie, nou mo aboudo osioidiro, mo sosoro ie, ina nou rie mo ro orobo to kapoi.’
24 Taie, nou rie nimo abora nou nemodohodai-dumo mere ro orobo na-wedea nou simara mamu ra abera ra kimeserai-ma ie nou orobo mutu karadabuai ie neitiro kaupoti aise koi ie.
25 Dubu ra orobo ra neitiro porose se wimidiro-do, neitiro siripo tato ie.