20
Aberaham karasaubuti owera garo Abimereki aboto
1 Aberaham Heboroni sabowa na-gemeserai-ro, nou imese gou ata duriomoro to masiro Negebi. Nou egea mere se iato gomidiro Kadesi ra Sua ra neitiro turituri ato.
Taie ioudo gou ata duriomoro to masiro Gera. Ina Aberaham orobo mutu neitiro Gera to na-gorowateai-rido urubia ro iato giwia-marimo.
2 Taie nou ro orobo sapuwo to ibo ‘Nou mo medera ie.’
Taie, Gera urubia ro owera na-girorowai-rimo ibo Aberaham nou medera mutu ou-dioudo, neio eputa dubu Abimereki owera nou aboto na-girarebai, taie nou woko rubi ito aise gimeiriai. Neio na-gou-rimo, Sera neio ro imese gorobai-rimo iato gowou-rimo Abimereki aboto.
3 Taie, nou Abimereki abato na-gomidiro, Godi ro hiwo to ibo garo-ro, ‘Oro pamo dubu e, oro ro iedi tanaro ro na-osioidiro, oro pamo ama-owea-ri. Oro ro edi orobo ro na-gorobai, uramu mutu e.’
4 Taie, edi tau ro nato Sera Abimereki mutu irobu-ma pua, ina nou ro ibo Godi aboto, ‘Auna dubu, mo didi dubu e. Mo oro ro ubauba owai ate. Mo etou mabu rido namadi-owai-ri ubauba,
5 mabu Aberaham ro ibo garo urubia sirio aboto, “Sera mo medera ie.” Ina Sera ia nakara se urubia nou ro iato gimowapotaidiro ibo, “Aberaham mo medera ie.” ’
6 Godi ro owera ina Abimereki aboto hiwo to iato gutura, ‘Mo umoro ta-noi ibo oro nakara se umoro oi pua oro ro otou tanaro osioidiro. Oro gabo nou mabu ato ta-nowasiai. Oro ro iedi orobo ro kowarabu rasiri ie, oro orobo, merebusere, oro sowake urubia neio imese ba-gorowaburo-dumo.
7 Io, iedi orobo ro Aberaham orobo ie, ba-demowameai. Nou mo ipusu owera dubu e, nou ro ama-araratoro-ri mo aboto oro sapuwo to, ina oro araburai-ri pua.’
8 Ata kowaroho ato Abimereki norou aboudo na-geribua-ro, taie ata sowake dubu iato gotiodorai, nou simara gabamani woko urubia nou aboto ou ri.
Neio na-gou-rimo, Godi ro beda owera garo-ro hiwo to nou aboto, nou ro iato gimowauti. Neio ro na-girowai-rimo, auna tere aise goi-rimo.
9 Abimereki ro Aberaham aboto owera iato gemeiriai nou aboto ou ri. Nou na-gou-ro, taie Abimereki ro ibo, ‘Oro ro etou karasaubuti tanaro gisioidiro nimo aboto? Mo ro etou ubauba tanaro nosioidiro oro aboto?
10 Mabu boira oro ro ubauba kowodoro mo duriomoro to? Oro ro modobo pua idaibo sosoro ubauba tanaro na-gisioidiro-die mo aboto. Mabu boira oro ro na-gosioidiro?’
11 Ina Aberaham ro ibo, ‘Mo ibo nimaragoidiro, “Urubia ro Godi emaragoidiro pua nedi duriomoro ro nato, ina nou rie mo urubia ro kopia rie Sera sapuwo to.”
12 Morobise ie nou mo medera ie, mabu neitiro kaupoti abera ie, mamu teibo se erere ie.
13 Mo Godi ro nemowapotai-ro ibo “Oro abera duriomoro ba-demeserai.” Iedi duriomoro ro na-nemeserai, mo Sera aboto ta-naro ibo, “Neitiro beda moro to kou ra, urubia ibo ba-dimowapotaidiro, ‘Nou mo medera ie.’ Oro nirimagare idaibo mino to ba-dowawuti-ro mo aboto.” ’
14 Taie, Abimereki ro Aberaham orobo aise gemowameai. Orobo na-gemowameai taie, Abimereki ro iato gomia sipisipi, burumakau, wisa tato woko urubia.
15 Nou ro ibo, ‘Ba-diraroweauti, nou mo duriomoro ie, oro ubi moro ba-darapoi, nato ba-dimidiro.’
16 Taie, Abimereki ro ibo Sera aboto, ‘Mo ro auna siriba mani ta-niaiwai oro medera aboto. Mo ro nou ri nosioidiro, mabu mo ubi tato ie urubia ubauba kimaragoidiro kiworohuti oro sapuwo to. Oro ro ata ubauba tanaro ata osioidiro pua.’
17 Aberaham ro kararatoro owera iato garo Godi aboto, Abimereki edi moto urubia ro, nou orobo, nou busere ibose nou sowake busere, neio sapuwo to gararatoro.
18 Neio keba se mere kirotuti gabo rido Iawe ro ta-giwatateai, kaupoti nou ro ina aise godobura-ro. Nou ro idaibo temeteme ta-gaiwai Abimereki aboto, mabu nou ro beda tanaro gosioidiro Aberaham orobo sapuwo to.