21
Aisaki goroto Sera ro
1 Iawe ro Sera mea se gowarebai nou ro kebase beda owera garo nou aboto, aise gororosioidiro.
2-5 Taie, Sera niro aise gowea. Godi ro beda tau gemapoi, Aberaham nou 100 kisimisi na-gorobai, iedi tau ro Sera ro nato gemowahau Aberaham mere kainai. Iedi mere bamuai ro Aberaham ro masiro a-giduti Aisaki to. Taie, Aisaki bamuai 8 saiki to na-gorobu, Godi ro beda owera garo Aberaham aboto, nou ro aise gobodoro. Aberaham ro Aisaki dubu simara takamai nato gowasiai iato guriai.
6 Sera ro ibo, ‘Mo Godi ro kamade ta-nowai-ro nou ri nirorouti gaga. Etio ro amadimi-irowidiro-ri mo bamuai koroto owera, neio ie mo ie nimo atu se gaga auna se anamadimi-irorouti-ri.
7 Urubia ibo imaragoidiro-mo “Sera modobo pua Aberaham mere kemowahau aboto,” kaupoti Aberaham oromano ro na-gorobai mo ro mere nato nemowahau.’
Isimere mamu mutu gitiodorai-ma Aberaham ro
8 Aisaki buburubabo ro na-gorobai Aberaham ro kotopai ohona auna soriomu iato gosioidiro.
9 Haga wisa tato woko besere na-gorobai-ro Isipi rido, Isimere Aberaham ro nou ato garasomai keba se. Sera ro na-gowea Isimere ro Aisaki na-gosobi,
10 Sera ro ibo Aberaham aboto, ‘Abora nedi wisa tato woko orobo ro mere mutu, neido diwagare-ma! Mo ubi tato ie oro ie mo ie neitiro korowaburai ato Isimere ro kirahidimai neitiro edi namabu sirio ro. Modobo ie neitiro simara ia mere Aisaki nou ro kirahidimai.’
11 Aberaham ro nedi owera ro na-girorowai, nou ubauba kimaragoidiro ro gorobai, mabu Isimere ibose nou mere ie.
12 Taie, Godi ro ibo, ‘Oro ubauba kimaragoidiro na ie, wisa tato woko orobo mere mutu, neitiro sapuwo to. Sera ro beda owera aro-die, nou se dosioidiro. Mo ro beda owera naro keba se oro aboto, Aisaki aramio merebusere nedi duriomoro ro neio ro amadimi-irahidimai-ri. Aramio merebusere, korosa mutu, neio aboto anama-iaiwotiti-ri.
13 Ibose wisa tato woko orobo nou edi mere ro, nou ro sipu ama-iwia-ri, mabu nou oro mere ie.’
14 Saiki na-geredumudiro-ro Aberaham ro neitiro obo kimarate-ma, ohona kimia-ma, taie imese gitiodorai-ma urubia tato moro to, iato irohotiti-do duriomoro masiro Besiba.
15 Neitiro obo na-goroporeai, Haga ro mere aise gowomi ota mabu ato, Isimere iato idobi aise gemai. Haga ro ibo gimaragoidiro, ‘Mo mere ama-araburai-ri, mo ro kiauri modobo pua.’
16 Nou egea mere se na-gosiomai taie imese gomi, iato nou mere idobi gememai.
17 Godi ro ta-gemororowai-ro mere idobi na-giroto, ina Godi sowake urio ro Adiri sabowa rido Haga ioudo gorumai-ro, ‘Oro etou ro ari? Tere na ie, oro Godi ro temewidiro-die mere idobi na-iroto.
18 Dowoubua, tu to dorobai-ro, sipu nou aboudo amadimi-isuruwo-ri.’
19 Taie, Godi ro nou iato gemapoi obo bobo beda moro ato gomidiro. Taie nou imese gou obo iapo ri, mere obo iato godio.
20 Isimere na-ororomaititi, nou Godi ro ta-iaurititi-ro. Nou urubia tato moro ato irohotiti, masiro Parani, nou auna umoro ie moporo to kipedu.
21 Taie, Haga ro Isimere orobo Isipi duriomoro rido gemerebai-ro, nou ro nou gedea.
Abimereki ra Aberaham ra Hodo Geremasaubiai-rido
22 Abimereki, Gera duriomoro eputa dubu e, ata tau ato nou simara boso eputa dubu Pikoro mutu neitiro atu se iato gou-rido Aberaham aboto. Neitiro ro ibo, ‘Imese beda mutu tanaro sirio ra oro ro na-isioidirotiti, oro Godi ro owarebidirotiti-die.
23 Abora Godi sosoro gabo ato oro ro hodo neitiro aboudo ba-demasaubiai-ro, ibo oro ro ama-isioidiro-ri meamea tanaro mo aboto, ibose mo merebusere aramio aboto. Oro ro modobo ie nirimagare tanaro kiwawuti mo aboto, ibose mo duriomoro urubia aboto, oro apira dubu sosoro na-imidirotiti neio abato. Oro mo ro keba se beda sosoro nirimagare nemati, mo oro ro wisa na idaibo sosoro nirimagare ba-demowapotai-ro.’
24 Aberaham ro ibo ‘Mo ro hodo abora a-nebuai nitiro aboudo.’
25 Ina Abimereki mibo owera iato gomia Aberaham ro, obo bobo sapuwo to, ‘Oro edi sowake urubia ro neio ro nowasiai-dumo obo kiaputi moro rido.’
26 Abimereki ro ibo gemowameai, ‘Mo umoro oi pua, mo oro ro keba se emowapotai pua.’
27 Abimereki amia sipisipi burumakau iato gomia Aberaham ro, ina neitiro hodo imese geremasaubiai-rido, sapuwo Abimereki aboudo ie, sapuwo Aberaham aboudo ie.
28 Aberaham ro 7 upi sipisipi kainakaina nou gihodowa Abimereki sosoro gabo ato.
29 Abimereki ro ibo, ‘Mo etou ri nemowou-die nedi 7 sipisipi ro?’
30 Aberaham ro ibo, ‘Dimidai buro nedi sipisipi kainakaina ro, oro urubia mutu umoro nato amadimo-oi-ri ibo morobise ie nedi obo bobo ro mo ro noboba.’
31 Iedi moro ro masiro Hiburu owera to neito asoro-dumo Besiba, maumo owamo ibo, ‘Hodo Kasaubiai Obo Bobo ie’, mabu neitiro hodo to nato geremasaubiai-rido, Besiba ato.
32 Taie, Abimereki imese gorowameai simara duriomoro to, nou simara boso eputa dubu mutu.
33 Aberaham ro ota iato garo, ota masiro tamarisiki. Nedi ota ro Besiba ato gotoi, iato Iawe na-imidirotiti imese imese sirio tau, nou aboto Aberaham ro aise gararatoro.
34 Taie, Aberaham tuturu tau to iato imidirotiti, nou apira dubu e Pirisitia urubia duriomoro ato, iedi duriomoro ro Abimereki ro na-iaurititi.