27
Iakobo ro a-gematigiai Aisaki
1 Aisaki nou nogere ia ro ta-gorobai ito mena se irarowo pua, idomari teibo ta-goriodoi-rido. Iedi tau ro nato nou ro sowake dubu nato gemeiriai Iso ou-ri Aisaki aboto. Taie Iso imese gou-ro Aisaki aboto, nou ro ibo, ‘Mona mo mere.’
Iso ro ibo nou abera negere aboto, ‘Mo nou e.’
2 Taie Aisaki ro iato gemowapotai nou owera. Nou ro ibo, ‘Mere mo umoro pua mo kimudumia tau, nedi owera ro dirowidiro-ro!
3 Oro tumu to ba-damedei tumu na ba-diosora, iona gari giri kakisa madabu ba-dimidai.
4 Taie ioudo namadi-orowameai-ri otou nakomu owateai-die oro ro ba-demosioidiro mea topo ohona mo ro nou nama-ouho-ri. Iedi tau ro nato mo ido nama-araburai-ri, keba se korosa anama-iwai-ri oro aboto.’
5 Taie Iso iedi owera na-girowai nou iona gari kimidai giri kakisa madabu imese gedei tumu na iosora ri.
Aisaki iedi owera na-garo Iso aboto edi tau ro nato Rebeka piro se gotoi, nou ro ioudo girowidiro edi owera ro.
6 Taie nou ioudo na-gou-ro Iakobo aboto nato gutura, nou ro ibo, ‘Idau ibo aro,
7 “Iso oro ba-dedei tumu to tumu na ba-diosora nama-owea-ri oro ro tumu na ba-dopia ba-dowahau-ro, taie oro ro mea topo ohona nama-emesioidiro-ri, mo ro nou nama-iho-ri edi ohona ro, iato mo ido nama-araburai-ri, Iawe sosoro gabo ato korosa nato aiwai rie oro aboto.”
8 Oro abora mo owera dirowai.
9 Oro dou nanigosi dawade teibo diopia-maro nedi tau ro nato ba-diwou-maro neito. Mo ro mea topo ohona anama-emesioidiro-ri Idau ro beda ubi ohona ihotiti,
10 oro ro nou ama-emowou-ri. Nou ro nama-iho-ri edi ohona ro nou nama-amidimai-ri, oro aboto korosa nato ama-iwai-ri. Nou ido araburaiwiri tau keba se oro korosa ama-omia-ri.’
11-12 Ina Iakobo ro iato gemowameai, ‘Mo takamai didirididiri ie, mo musugamusuga dubu pua. Mo Apau nou musugamusuga dubu e, mo Idau ro anamadi-eibimai-ri. Nou ibo nama-utura-ri, “Oro Iso pua! Oro Iakobo ie!”, mo karasaubuti ato idaibo mo nou ro ubauba anamadi-owai-ri.’
13 Ina Rebeka ro ibo, ‘Edi ubauba ro oro kimaragoidiro tato se. Oro Idau ro ubauba nama-owai-ri iedi ubauba ro mo ro nama-omidai-ri. Mo owera dirorowai-ro ba-dimou-ma nanigosi dawade teibo ba-diopia-maro!’
14 Taie iato Iakobo mamu owera se girowai, nanigosi dawade teibo imese giosora-ma kiopia-ma taie imese giwou-maro.
Taie Rebeka ro ohona mea mino to iato gisioidiro, ibose parawa ta-gisioidiro nou ro.
15 Nou iato aise garatea kiehuti naramu iedi meamea kiroidiro namabu nou ro na-gimidai-ro ioudo taie neama dubu iato gowoiti.
16 Rebeka ro na-gowoiti taie ina iato nanigosi takamai teibo na-gimidai-maro iato gowoiti durupi ato tu ato wagoha womu e.
17 Taie Rebeka ro ibo, ‘Ohona nou e, nou ro idaibo topo ohona nou ihotiti. Oro ro ba-demowou ba-domia!’
18 Iakobo Rebeka ro edi ohona ro na-gemesioidiro mea topo ohona taie nou imese gou abera aboto taie iato gutura, ‘Idau!’
Ina abera dubu ro ibo, ‘Mo mere, oro etu ra?’
19 Iakobo ro gemowameai ibo, ‘Mo oro keba mere ie, Iso. Mo oro ro beda owera to nemowapotai-die mo ro ibose ti-nosioidiro. Oro ma-domi mea se, ohona ba-diho mo ro edi ohona na-nemosora, iato mo korosa ba-domia-ro.’
20 Aisaki ro ina iato gemodowa, ‘Oro tumu na beda sosoro owea hio ito na-orowameai-die?’
21 Iakobo ro ina iato gemowameai nou, ‘Mabu mo Iawe ro nowarebai-die oro edina na-wemowabutiti.’
Aisaki oromano ro ibo, ‘Oro dosiomai-ro neito mo aboto, tau oro anama-owaseidiro-ri mo ro. Mo umoro nato nama-ai-ri mo keba mere Iso oro nou se ra.’
22 Taie Iakobo kosiomai iato gemowaseidiro nou durupi tu mea mino to. Nou ibo, ‘Kaupoti oro kodu mo ro ata sosoro nemerewidiro oro kodu Iakobo kodu sosoro ie, ina oro tu oro durupi Iso durupi sosoro ie musugamusuga.’
23 Aisaki ro eibimai pua ibo nou Iakobo ie, mabu nou tu na-gemowaseidiro naramu sosoro musugamusuga ia ie imese, ina nou rie nou korosa kaiwai aboto iato gatamuai.
24 Aisaki ina iato gemodowa, ‘Oro mo ia mere ra Iso?’
Ina Iakobo ro iato gemowameai, ‘Io mo nou se ie. Mo oro mere ie Iso.’
25 Aisaki ina iato gutura, ‘Mo ohona demowou-ro, mo ro nama-iho-ri iato oro korosa anama-omia-ri.’
Taie ohona edina gemosioidiro, Iakobo ro kememidai imese gemowou-ro, iedi ohona ro nou ro iato giho, ina waini gemowosiomai-ro nou ro komidai taie imese godio.
26 Aisaki ro ibo, ‘Mere, neito dosiomai-ro mo aboto, mo dosomeai-ro.’
27 Iakobo ro kosiomai, abera ro na-gorobai taie Iakobo ro iato gosomeai. Nou ro na-gosomeai abera taie Aisaki oromano ro Iso kiroidiro namabu iato gibowoidiro.
Nou ro na-gibowoidiro taie korosa owera iato gaiwai ibo, ‘Mo mere, oro durupi iwaso nibo mea se iwosuruwo-die nou idaibo tumu nibo sosoro ie, Iawe ro iedi tumu ro korosa neito gaiwai.
28 Ibose oro Godi ro modobo daroho ba-memerio-ro oro duriomoro to, iedi daroho sopu papamo nou ro ba-memowaititi, sopu ato mea nakomu ba-misuwodutiti-mo. Iedi sopu ro nato namadimo-osuruwo-ri kiho namabu sirio ia se ba-miamotiti, waini obo ibose modobo ato ba-miamotiti.
29 Sirio duriomoro urubia oro neio ro keba dubu to ba-masoro-mo oro neio ro woko ba-memesioidirotiti-mo neio sowake urubia ie. Idaro oro edi naramio niramio ro neio ro oro ibose eputa dubu to ba-masoro-mo. Oro ohu ato ba-dimidiro neio sopu ato ba-mirowomidirotiti oro neio ro neido ba-miaurititi-mo. Oro etio ro owai-dumo ubauba, ibose neio Iawe ro ubauba ba-miwaititi. Oro meana etio ro owai-dumo, ibose neio Iawe ro meana ba-miwaititi.’
30 Aisaki ro korosa kaiwai na-goporeai, Iakobo abera negere aise gemeserai imese gorowameai.
Taie nedi tau nato Iso ro apimaidiro-die na-gohau-ro tumu rido.
31 Ibose nou ro ohona ta-gemesioidiro mea mino to topo ohona taie abera negere nou ro imese gemowou-ro.
Taie nou ro ibo abera negere ato, ‘Oro domi mea se. Ohona nou e, diho! Mo ro nemowateai-die ina mo korosa nato ba-domia-ro!’
32 Aisaki ro iato gemodowa, ‘Oro etu ra?’
Ina Iso ro ibo, ‘Oro keba mere mo nou e, Iso mo masiro.’
33 Iato Aisaki ro na-girorowai nou iato aise godaudiro. Nou ro ibo, ‘Ina keba se etu ro iwou-die ohona mo aboto, beda mere ra io? Nou ohona ta-niho mo ro ina korosa ta-naiwai nou aboto, mo ro modobo pua ina kowameai.’
34 Taie iato Iso ro na-girowai iedi owera ro nou auna ia iamo gutura. Taie nou ro ibo, ‘Idau mo ibose abora korosa domia-ro, oro ro mo woki kemati modobo pua!’
35 Aisaki ro ibo, ‘O oro neama ro ou-die neito mo aboto. Mo nou ro nowai ubauba nou ro nasaubuti nou ro aratigi-die oro to. Oro edi korosa ro oro neama ro tau owasiri.’
36 Taie Iso ro ibo, ‘Iakobo nou ia morobise masiro ie. Nou iedi masiro ro nou e Karasaubuti Dubu. Mo keba se nou ro ta-nasaubuti oro edi namabu ro keba mere masiro to na-giapoi nou ro imese ta-gimidai. Ina abora nou e, nou ro ina nasaubuti-die, mo korosa noti nowasiri. Ata korosa ata kemeserai pua ra mo sapuwo to?’
37 Taie Aisaki ro ibo, ‘O natonato ie mo ro oro neama napoi oro eputa dubu to, nou ro ararasowai-ri. Nou naramio niramio nou woko amadime-emesioidirotiti-ri. Nou pupuwo keba se mo ro ta-nomia nou ohona sirio nou abato sirio se ama-iamo-ri ibose nou waini sirio se ama-iamo-ri. Mo mere, oro ata mea nakomu ata emowameserai pua.’
38 Taie Iso ro ina ibo, ‘Idau kaupoti ata a-wemeserai-ra oro ro mo sapuwo to?’ Iato Iso ro ubauba se gimaragoidiro nou iato auna idobi imese giroto.
39 Aisaki iato gutura nou aboto, ‘Oro odio duriomoro amadi-emeserai-ri oro ama-ou-ri ata muso duriomoro to. Iedi muso duriomoro ro ubauba ie, oro iato ama-imidirotiti-ri, daroho iarotiti-ri pua iato, ina pari namabu mea se isuwoduti-ri pua.
40 Oro giri to ama-iraberemotiti-ri urubia aboudo ohona idaibo sosoro tanaro to ama-iwadaudiro-ri. Oro neama woko masawemasawe ama-emesioidirotiti-ri, oro nama-orowairiai-ri oro simara ubi tanaro ama-isioidirotiti-ri.’
41 Taie iato Iso ro na-girowai Aisaki iedi owera ro, nou ro neama auna se wohoiotiti mabu korosa nou ro gimidai ina nou do ie nou nakara se geremowauti ibo, ‘Mo abera negere nama-araburai-ri mo neama mo ro nato nama-esuai-ri.’ Iedi ubauba kimaragoidiro nou gimaragoidiro.
Iakobo gasiriai Rebeni sabowa to
42-43 Rebeka ro umoro na-goi Iso iodio kimaragoidiro ro, nou ro ata sowake dubu iato gemeiriai Iakobo orobai ri.
Rebeka ro ibo Iakobo ato, ‘Neito ma-dirowidiro-ro ata owera ie, aise ba-dosioidiro! Oro naramu ro esuai-ri emediawado! Ba-dou mo medera Rebeni nou aboto Haran sabowa ato na-omidiro!
44 Iato egea mere se ba-domidiro, womu tato naramu serawo nama-omioduti-ri
45 nou ro woki nama-emati-ri oro ro beda tanaro gosioidiro nou aboto, mo ro ata sowake dubu nato anama-emeiriai-ri oro nou ro amadi-orobai-ri orowameai ri neito. Modobo pua nitiro atu tau ato pamo kowea!’
46 Taie Rebeka imese gou Aisaki aboto owera aro ri. Nou ro ibo Aisaki ato, ‘Mo masawe ta-norobai iedi Hiti orobo teibo kiauri-ma aboto. Iakobo ro ata Hiti orobo ata kedea ato, mo idaibo komidiro modobo pua!’