31
Iakobo a-godau Rebeni aboudo
1 Iakobo ro ta-gimororowai-ibi Rebeni iedi mere peteibi ro beda sosoro owera to geremowauti-birimo ibo, ‘Iakobo imese sirio namabu patu neibi abera iedi namabu patu ro nou ro ta-gimade-ro nou imese namabu sirio dubu to ta-garapoi.’
2 Ina Iakobo ta-geremasibai Rebeni nou ata sosoro goroho, nou punugo karauduti se goroho.
3 Taie Iawe ro nato emowapotai-die, ‘Iakobo, oro ba-dorowameai abera duriomoro to, oro nama-orowameai-ri mo oro mutu nato nama-ou-ri.’
4 Iakobo na-gou sipisipi nanigosi kimowotoi moro ato na-gomidiro, owera ioudo gemeiriai-ro Rasere ra Ria ra ou ri nou aboto.
5 Neitiro iato ou-diodo nou aboto, taie Iakobo ro iato gutura neitiro ato, ‘Nitiro abera mo ro ta-nimowea-ma nou punugo karauduti na-oroho, nou ibo pua mea se kirarowo mo aboto, nou keba se modobo ato wirohotiti. Abora nou ata sosoro nowea mo ro, kaupoti Godi ubi tanaro mo abera ro ta-wemesioidirotiti, nou mo mutu nirohotiti-do.
6 Nitiro umoro ie nitiro abera dubu woko ta-nemowatititi korosakorosa.
7 Kaupoti mo nou ro ta-nowakopeamutititi, ibose mo wisa sapuwo to nou ro 10 tau to nasaubutititi, ata tau ata owera kutura ie, ata tau ata owera kutura ie, mo Godi ro ta-nowasiotiti gabo nitiro abera aboudo mo nou ro ubauba kowai sapuwo to.
8 Ata tau nitiro abera ro ta-gutura ibo, “Oro kopoutikopouti nanigosi sirio anama-omio-ri oro woko na-iwatiti nou wisa ie.” Iato upi nanigosi ro imese girotuti-rimo dawade kainakaina kopoutikopouti se sirio.
Ina nitiro abera owera iato giwesegerai, “Oro tititi se nanigosi anama-omio-ri oro woko na-iwatiti nou wisa ie.” Iato upi nanigosi ro imese girotuti-rimo dawade kainakaina tititi se sirio.
9 Ina Godi ro ta-giwatateai nitiro abera aboudo iedio nanigosi kainakaina sirio ro, mo aboto giaiwo-ro.
10 Iedi tau ato nanigosi na-irorohi-mo, mo ro hiwo to ta-niauri dubu nanigosi sirio tititi se kopoutikopouti neio ro giohi-rimo upi nanigosi.
11 Godi sowake urio ro garo-die mo aboto, “Iakobo!”
Mo ro iato nemowameai, “Mo nou e.”
12 Nou ro ibo, “Ma-dirarowea-ro. Oro tititi kopoutikopouti nanigosi neio ro se ororohi-dumo, Rebeni edi garegare nanigosi ro upi nanigosi neio ro iohi pua mabu mo ro ta-niaurititi Rebeni ro edio ubauba tanaro ro na-isioidirotiti oro aboto.
13 Mo Godi ie, oro ro edina emowabutiti. Mo oro aboto keba se ta-norowawea Betere ato, iato oro ro ta-gemasia ata nibonibo dehoro iedi nadi na-gowotobowa nou ohu rudo, iato hodo oro ro ta-gasaubiai mo aboudo. Abora nedi duriomoro ba-demeserai-ro oro ba-dorowameai simara koroto duriomoro to.” ’
14 Taie Rasere ra Ria ra neitiro na-gimowauti-ma nedi owera ro, taie neitiro ro uramu iato gemowameai-rido ibo, ‘Neitiro Idau nama-araburai-ri neitiro nou ro ata nakomu ata imowameserai-ri pua, neitiro nou ro kimeserai-ma kawa anamadime-eserai-mari. Neitiro nou ro ubauba se niworohutiti-ma.
15 Bida sosoro ra neitiro ata sabowa besere teibo sosoro, nou ro irasomai-ma pua, neitiro nou ro idaibo sosoro niworohutiti-ma. Neitiro oro aboto imese niaiwai-maro, neitiro kitohiti-ma wisa nou ro kouho kawa ta-gouho.
16 Neitiro abera edi namabu sirio ro Godi ro imese aise giwagare-ro nou aboudo neitiro aboto, neitiro merebusere mutu. Ina nou rie Godi beda owera garo oro aboto, aise ba-dosioidiro!’
17-19 Rebeni sipisipi musuga iwasio ri gou. Iedi tau ro nato Rebeni potoro ie moto ato Rasere nato godoro nou moto to taie nou ro piro to abera iedi ota titi ro na-gisioidiro iato gimidai-ro. Taie iato Iakobo upi merebusere nou ro kaupoti moro to gidabuti, ibose namabu sirio na-gidabuti iato giaremuti nou ro sirio kemoro ohu ato.
Taie nou iato iodi moro ro na-gemeserai nou a-gasiriai-ro Keineni duriomoro to nou abera beda moro ato gomidiro. Nou keba se a-gitiodorai nou beda mutu kiwoubua namabu sirio ra idaibo nanigosi sipisipi kemoro burumakau doniki, imese neio ro gou-rimo. Iato imese beda mutu namabu patu sirio ra sirio se aise giaubai ata nakomu ata nou ro emeserai pua. Iedi namabu sirio ro nou na-imidirotiti Mesopotamia duriomoro ato nato giwia.
20 Taie iedi tau ro nato Iakobo ro nogeredubu a-gasaubuti, nou ro emowapotai pua nou kemeserai aboto. Rebeni nou Arama gu dubu e. Nou aboto Iakobo ro ibo utura pua, ‘Mo anama-ou-ri iedi duriomoro neito,’ nou dorogora se piro se goropirutai-ro ioudo upi merebusere mutu.
21 Taie Iakobo ioudo na-gou-ro Iupereitisi oromo ipi ato nato gowea. Taie neio ro na-giabu-rimo iedi oromo ro noudo, gabo towamo nou gobodoro-rimo neio ro podo sirio duriomoro to, iedi duriomoro ro masiro ararasoro Giriadi.
22 Netewa didi saiki saro gabo ato Rebeni nou umoro nato goi ibo ‘Iakobo ibi ta-wodau-bimo mo aboudo.’
23 Taie nou simara urubia iato gidabuti-ro nato gobodoro-rimo wapo rido. Neio ro Iakobo 7 saiki to na-gobodoro-rimo, ipi ato neio ro nato gowea-rimo Giriadi podo duriomoro ato.
24 Taie iedi saiki ato gowea-rimo nou, iedi duwo ro nato Godi ro orowapotai-die Rebeni aboto hiwo to, nou ro ibo, ‘Oro umoroumoro se ata owera ata ubauba owera utura ate Iakobo aboto.’
25 Iakobo nou urubia mutu parai moto kainakaina ta-geremari Giriadi ato, taie iato Rebeni ro gorowateai-ro nou urubia mutu parai moto iato aise geremari nou abato.
26 Rebeni ro iato gutura Iakobo aboto, ‘Oro etou tanaro gosioidiro mo aboto? Oro auna ia karasaubuti gosioidiro-die! Mo besere teibo oro ro iato iwadau-madie neito beda sosoro ra neitiro oro ro tumu rido kiaubai-ma.
27 Oro etou mabu ato godau-die piro se na-goropirutai-die neito? Mo oro ro auna ia se nasaubuti, oro ubi tato ra mo kemowapotai keba se? Oro mo ro mea se ba-notiodorai-die, oro mea soriomu na ba-nemesioidiro urubia komaro, gama ra pate ra kiado, oro nou mutu ba-notiodorai.
28 Mo aramio isome pua, mo besere teibo aboto iawo utura pua idaibo tanaro mo ro nou ba-nisioidiro. Oro odio tanaro ro na-gisioidiro imese ubauba tanaro gisioidiro.
29 Mo abora pupuwo towamo mo urubia mutu oro ubauba kowai aboto, kaupoti nedi duwo ro nato Godi oro abera Aisaki ro na-emowabutiti hiwo to owera nou ro aro-die mo aboto ibo mo ro ata owera ata kutura modobo pua oro aboto. Mo umoro ie oro duriomoro giropu ro ta-gorobai-ro, nou ri orowameai-die,
30 ina mabu boira mo kisioidiro ota titi oro ro na-giwopirowa-die?’
31 Taie Iakobo ro iato gemowameai Rebeni, ‘Oro mo ro na-nemeserai mo ro emowapotai pua, mo tere ie oro besere teibo ina kiapopo-ma ie mo aboudo.
32 Ina oro ro nama-iwia-ri oro kisioidiro ota titi etu ro gimidai nou ro ba-mowea pamo! Abora neibi namabu ba-dimahederewado, oro simara namabu ba-dieibimo neio se ba-dimidai. Oro urubia ro amadimi-iauri-ri oro beda namabu iwameai.’
Ina Iakobo umoro oi pua edio kisioidiro ota titi ro Rasere ro na-giwopirowa-ro, nou abato giamo.
33 Taie Rebeni nou iato gatamuai kiosora, nou ro iato gimahederewado Iakobo iedi parai moto neido gatamuai-ro nou namabu na-gemeauri, iato owea pua ata nakomu ata. Iato a-gemeserai Iakobo moto imese gou-ro Ria iedi moto ro neito nou namabu na-gemeauri, ota titi iwia pua iato.
Taie sowake koroho orobo teibo neitiro moto ato na-giosora neitiro moto ato iwia pua.
34 Iedi tau ro nato Rasere ro ta-gibiria iedi ota titi ro kemoro ohu ato komidiro nakomu nou maumo to giwaumia, nou ro aise giahidimai nou ohu ato gomidiro. Taie Rebeni Rasere iedi moto ro neito na-godoro nato egea se giosora nou ro iwia pua.
35 Taie Rasere ro ibo abera aboto, ‘Idau, oro serawo na ie mo aboto. Mo modobo pua kotobowa aboto oro sosoro gabo ato mabu mo abora sagana mutu nomidiro.’
Taie ina Rebeni imese goroho iedi moro ro neito parai moto na-gorowotoi nou ro ina iato giosora, nou ro ata ota titi ata owea pua.
36 Iato Iakobo auna serawo ro gorobai nou ro iato gutura ibo, ‘Mo etou tanaro nosioidiro, etou sabi nesebea oro ro nou ri a-naipirioi-die neito? Mo namabu oro ro nou ri a-nemahederewado?
37 Oro ro ata nakomu ata owea pua nato neibi abato. Oro ro na-iwia obi ma-diedea-ro nimo sosoro gabo ato, nato ba-niauri-rimo atu se oro urubia ie mo urubia ie. Abora nimo anamadime-eremowauti-ri nedi tau ro nato etu ra morobise etu ra karasaubuti.
38 Oro sapuwo to mo ro awawo woko ta-niwatititi 20 kisimisi to. Oro kiwoubua namabu na-nemeaurititi kainakaina nanigosi sipisipi kainakaina neio orowaburotiti pua mamio ro kirotuti ato. Idaro dubu sipisipi ata mo ro ouho pua.
39 Oro sipisipi nanigosi ata kouho ato tumu na ro ata ro kowopirowa ato ina oro aboto mo ro iwapotaidirotiti pua, kaupoti mo edi nanigosi sirio ro sipisipi ro mo ro bobo neito nimodomotiti.
40 Mo saiki ro auna se nasiaititi oro woko na-nemowatititi mo pupuwo kaseperai ie, duwo ato mo mea norou orobutititi pua, kokamokokamo norobutititi.
41 Mo temeteme ta-niaurititi oro woko na-nemowatititi 20 kisimisi to. Kebase 14 kisimisi to nemowatiti oro besere teibo sapuwo to ie. Ina dutu ata 6 kisimisi to na-niwatititi edi namabu sirio ro na-oroho-dumo nou sapuwo to niwatititi woko. Mo wisa mutu oro ro 10 tau to nasaubutititi, ata tau ata owera kutura ie, ata tau ata owera kutura ie.
42 Godi Aberaham ro na-wemowabutititi, mo abera Aisaki nou ro na-emowabutititi, nou mo mutu komidiro tato rasiri ie mo oro ro kotiodorai kawa ba-notiodorai-ro ata nakomu tato. Kaupoti Godi ro ta-giauri-ro mo odio mibo ato na-nimidiro mo ata wisa tato woko na-niwatititi. Ina oro abora duwo Godi ro ta-wotuputai-ro.’
43 Rebeni iato gutura Iakobo aboto, ‘Iedi besere teibo ro mo besere teibo ie. Neitiro merebusere mo do ie ibose. Ina iedi kiwoubua namabu sirio ro na-woroho-dumo mo do ie ibose. Oro na-iraroweauti imese beda mutu namabu sirio ra mo do ie. Kaupoti mo ata gabo tato ie mo besere teibo aramio mo ro kiwameai ie aboto.
44 Abora neitiro nato owera mea mino to mosioidiro-rido, hodo nato mebuai-rido, nadi soirio atu moro to namadi-iwoiriamuti-ri mea mino to neitiro eremasoro na ie.’
45 Iakobo ro auna nadi gebari tuputupu se iato gowotobowa. Nou ro urubia iato gimowapotai, ‘Nadi didabuti-rimo neito!’
46 Taie nou edi urubia sirio ro neio imese gimou-rimo nadi kidabuti iato giwoiriai-rimo atu moro to.
Taie nadi soirio abato neio komititi kaupoti moro ato iato giho-rimo.
47 Taie iedi moro ro masiro Rebeni ro a-giduti Arama owera to ‘Iegara Sahaduta’, Iakobo ibose ti-gomia Hiburu owera to ‘Gareda’. Masiro teibo iamo-ma ibo ‘Nadi soirio na-iamo eremasoro na ie’.
48 Rebeni iato gutura Iakobo aboto, ‘Nedi nadi soirio ro na-iamo neitiro umoro nou ro nama-iwaititi-mari neitiro abora beda sosoro to neremowauti-do nato hodo na-neremebuai-do, sapuwo oro aboudo ie sapuwo mo aboudo ie.’ Ina nou do ie neitiro ro noudo gomia-rido masiro ‘Nadi soirio na-iamo eremasoro na ie’.
49 Ata masiro asoro-dumo ibo ‘Misipa’, ibo owamo ‘Kiauri’ mabu Rebeni ro iato gutura ibo, ‘Modobo ie neitiro Iawe ro anama-iaurititi-mari neitiro korohodowa to.
50 Mo besere teibo ubauba se nama-iworohuti-mari, oro arua upi nama-iaremo-ri, arua urubia ro kiauri tato, kaupoti ba-dimaragoidirotiti Godi ro ama-iauri-ri, nou umoro koi ie.
51-52 Abora nou e hodo neremasaubiai-do nadi soirio tiamo mo ro edina niaremuti ina auna negere nadi tuputupu se ta-nowotobowa ata sapuwo ato towamo neitiro emaragoidiro na ie. Neitiro nou ro namadi-owaititi-mari umoro abora hodo beda sosoro to neremebuai-do nato. Oro ro modobo pua nedi nadi soirio ro neio kimasaudai. Oro mo sapuwo to iradauri ate mo urubia ubauba kiwaititi aboto. Mo ibose iradauri pua oro sapuwo to oro urubia ubauba kiwaititi aboto.
53 Aberaham iedi na na-emowabutititi, Nahoro edina na-emowabutititi, neitiro nasa Tera edina na-emowabutititi, neitiro ata etu ro iradauriai ata sapuwo to, hodo etu ro asiai, iedi urio ro nou ro nou ubauba ama-owai-ri.’
Taie nedi tau ro nato Iakobo nou hodo iato gemasaubiai Rebeni aboudo. Nou abera ro edina na-emowabutititi nou masiro ato gemasaubiai.
54 Iato Iakobo na-girario kaupoti kiwoubua nakomu nou ro iato gopia ioudo na-gowarario-ro podo ato nato imese gematowea Godi aboto gaiwai.
Taie nou ro iato gidabuti-ro nou iedi urubia ro kaupoti moro ato ohona iho ri, ina iedi duwo ro nato neio aise girobu iedi podo nato.
55 Ata kowaroho na-gowaroho Rebeni nou aramio merebusere atu moro to na-gidabuai-ro, taie nou aramio na-gisome, besere teibo aboto iawo na-gutura, korosa iato gaiwai neio aboto, taie Rebeni imese gorowameai simara duriomoro to. Taie.