32
Iakobo Iso mutu kororowea gabo gisioidiro
1 Iakobo ina ioudo na-gaimai-ro Giriadi podo duriomoro rudo, ipi ato Godi sowake urio mutu neio iato gororowea-rimo.
2 Taie Iakobo ro nato gutura ibo ‘Nou Godi edi aimara sabowa ro nou e.’
Taie iedi moro ro nou ro masiro a-giduti Mahanaimi, Hiburu owera to owamo ibo ‘Aimara sabowa teibo ie’.
3-5 Iakobo naramu Iso iato imidirotiti iedi duriomoro masiro Sia, iato owamotiti Idomu duriomoro ato. Iakobo ro ibo nou sowake urubia aboto, ‘Nodio owera ro demowou-mo mo eputa dubu Iso ba-demowapotai-mo nio ro ibo, “Oro sowake dubu Iakobo nou ro aro-die ‘Mo ta-nimidirotiti Rebeni abato, womu tato abora nou e. Mo abora burumakau sirio, doniki sirio, sipisipi sirio, nanigosi sirio, sowake urubia upi dubu sirio mo abato toroho-dumo. Mo ro nemeiriai nedi owera ro oro aboto, modobo ie oro mea se kimaragoidiro nimo aboto.’ ” ’
Taie Iakobo nou sowake urubia iato gimeriai Iso owera neio ro gemowou-rimo.
6 Taie tuturu to pua Iakobo iedi sowake urubia ro aise gorowameai-rimo nou aboto. Neio ro ibo, ‘Nimo ta-nou-mo oro naramu Iso aboto. Nou 400 dubu mutu tou-die oro owea-ri.’
7-8 Iakobo ro na-girorowai edi owera ro, nou auna tere ro gorobai, iato kimaragoidiro siriosirio gou-rimo. Nou a-gimaragoidiro, ‘Etu umoro ra neio boso owou-dioumo mo aboto.’
Taie Iakobo urubia iato gihoduti netewa teibo patu to gihodowa-ma, arua urubia ito sapuwo to na-gihodowa arua neito sapuwo to gihodowa-ro. Kiwoubua namabu sirio nou ro ibose iato gihoduti, arua ito na-gihodowa arua neito iato gihodowa-ro. Iakobo ro ibo a-gimaragoidiro, ‘Etu umoro ra Iso serawo mutu namadi-ou-ri nou ro neio ba-miwota iedi keba urubia dubu patu ro, arua kiwoubua namabu mutu neio ba-miopia, ata urubia dubu patu neio korowadau modobo ie arua kiwoubua namabu mutu.’
9 Iakobo iato gutura Godi aboto, ‘Mo aramunegere Aberaham oro do ie, mo abera Aisaki oro do ie. Iawe, mo oro ro nemowapotai-ro mo orowameai-ri simara duriomoro to, mo upi merebusere mutu. Oro ro ta-nemowapotai-ro mo mea se iauri-ri.
10 Mo mea dubu pua, kaupoti mo nirimagare mutu oro ro auna se nemaragoidirotiti-ro. Mo omona tau ato na-nou-ro mo simara duriomoro rudo Iodeni oromoturi na-nabu-ro mo namabu tato nabu-ro. Mo a-nabu-ro gonopu kawakawa mutu nou norobidiro nouto niradiouti-ro. Abora mo namabu imese sirio ia ie, sowake urubia imese sirio ia ie, modobo ie mo aimara sabowa teibo netewa teibo kisioidiro-ma.
11 Mo dowarebai-ro! Mo naramu ipi ato tou-die. Nimo modobo pua ipi ato nou ro kiopia. Mo tere ie nou neito namadi-orowateai-ri mo aboto.
12 Mo oro ro keba se ta-nemowapotai-ro ibo, “Oro mo ro anama-iauri-ri mea se, oro aramio merebusere mo ro sirio anama-emowai-ri koriri beda sosoro ra kioputi modobo pua urubia ro.” ’
13 Iedi duwo ro nato Iakobo nirimagare mutu kiaiwai namabu iato gidabuti, nou simara kiwoubua namabu nou na-gidabuti naramu omia na,
14 nou ro nanigosi iato gemadabuti 200 upi, 20 dubu, ina sipisipi iato gemadabuti 200 upi, 20 dubu,
15 ina 30 upi kemoro neio dawade kainakaina mutu iato gemadabuti, burumakau iato gemadabuti 40 upi, 10 dubu, ina doniki iato gemadabuti 20 upi, 10 dubu.
16 Nou ro sowake urubia gabogabo giasouti iedi erere kiwoubua namabu ro. Taie nou ro ibo, ‘Ba-daimai-mo nio keba se ipi ato bobo isia aise gi-iwamo-ri ina ata mere kiwoubua namabu mutu nato gi-aimai-ri.’
17 Taie neio nedi owera ro nou mutu gimeiriai. Keba dubu nou ro na-gemeriai sirio kiwoubua namabu mutu, nou ro a-gutura, ‘Mo naramu namadi-ou-ri oro aboto, oro nou ro ama-emodowa-ri ibo, “Oro etu sowake dubu ra, ina oro boito ama-ou-ri? Io etu do ra iedi kiwoubua namabu sirio ro?”
18 Ina oro ro ba-demowameai ibo, “Neio oro sowake dubu Iakobo, nou do ie. Nou ro emapoi-die oro nirimagare emati-die, imese sirio se oro do ie. Nou ibose tou-die nimo wapo rido.” ’
19 Iakobo ro idaibo sosoro atu owera ibose ti-garo ata dubu aboto, ina ata dubu aboto ibose, ina ata dubu aboto ibose, nou ro atu owera neito gimowauti, ‘Iso kowea ato idaibo sosoro owera to ba-demowauti-mo,
20 “Oro sowake dubu tou-die saro rudo.” ’
Iakobo a-gimaragoidiro, ‘Mo ro nama-imeriai-ri nedi nirimagare kiwoubua namabu ro keba se, etu umoro ra mo edi ubauba tanaro ro na-nosioidiro keba se nou ro woki ama-emati-ri, ina mo nou ro anamadi-emaidodorai-ri.’
21 Taie Iakobo ro imese gimeriai iedi nirimagare kiwoubua namabu sirio ro nou sowake urubia mutu, neio imese gou-rimo Iso aboto.
Taie neio nou ro na-gimeriai, nou edi duwo ro nato aise gomidiro aimara sabowa ato.
Iakobo Godi mutu goroworoho-rido
22-23 Iedi atu duwo ro nato Iakobo ro upi merebusere namabu patu mutu imese giwaboi Iaboko oromo turi to. Taie neio iato gimeriai oromo turi sapuwo to imese giabudiro-rimo kabudiro moro ato. Nou orobo teibo, nou sowake orobo teibo edina giedea-ma ina nou 11 dubu mere neio ro giabu-rimo.
24 Nou abu pua neio mutu nakara se aise geremeserai-ro iato gomidiro.
Iato ata dubu ro gosuwoidiro-ro nou aboto paea dubu sosoro gou-ro. Taie iato nou mutu nato goroworoho-rido duwo tuturu neitiro edi tanaro ro nou gowati-rido koroworoho, womu tato saiki banibani kiwotowa aboto.
25 Iedi dubu ro ta-geremasibai, ‘A Iakobo mo ro kowaburuti modobo pua.’
Taie Iakobo nou ro doto abo na-gowasomai taie nou doto aise gemahudiai.
26 Taie nou ro Iakobo aboto iato gutura, ‘Mo demeserai-ro mabu saiki tidiai-die.’
Ina Iakobo ro ibo, ‘Mo oro ro korosa nama-omia-ri, oro mo ro nato anama-emeserai-ri.’
27 Dubu ro iato gemodowa, ‘Oro masiro etu ra?’
Ina Iakobo ibo, ‘Mo masiro Iakobo ie.’
28 Dubu ibo, ‘Oro Iakobo to abora ararasoro-ri pua. Oro orio masiro a-nomia Isiraere. Mabu owamo ibo oro mo mutu nato ta-noroworohodo, ibose oro keba se ta-goroworoho urubia mutu. Abora oro keba to ta-weresia-ro.’ Iedi masiro ro Isiraere Hiburu owera to ibo owamo ‘Nou Godi mutu oroworoho-do’.
29 Iato Iakobo ro emodowa edi dubu ro, ‘Ina oro masiro etu ra?’
Ina edi dubu ro iato gemowameai ibo, ‘Mo masiro etou mabu ato emodowa-die?’ Iato Iakobo nou ro korosa iato gowai.
30 Taie Iakobo ro ibo, ‘Iedi tau ro nato Godi sosoro woidomari ta-nemowea, kaupoti mo araburai pua.’ Mabu edi moro ro nou ri giduti masiro Peniere, Hiburu owera to ibo owamo ‘Godi sosoro woidomari ie’.
31 Taie saiki ro gidiai-ro Iakobo ro na-gemeserai edi moro ro, nou kimoduhikimoduhi se gou-ro mabu nou doto temeteme se gowamo.
32 Abora nou do ie Isiraere urubia neio doto sumi dao beda mutu kiwoubua namabu patu ra neio ro iho tato mabu Iakobo iedi moro ro nato gowasomai doto mabu ato.