4
Keina ro Eiboro gesuai
1 Uramu ra orobo ra Ideni pari rudo na-garagare-rido, a-wimidiro-do womu tato orobo niro ti-gowea, taie na-goroto dubu mere ie. Ina Ibi ro masiro a-giduti Keina. Nou ro ibo, ‘Iawe korowarebai ato mo ro dubu mere ta-noroto, nou masiro Keina.’
2 Ina ibo gomidiro-rido, ata mere ti-gowea-rido, nou masiro Eiboro. Neitiro edio tau ro nato auna ta-goi-rido. Eiboro nou sipisipi kimowotoi dubu e, Keina nou pari kisioidiro dubu e.
3 Saro rudo Keina ro amia pari ohona na-giwou Iawe aboto iaiwai ri,
4 Eiboro ibose ti-gowou keba koroto sipisipi dao gebari kasawi mutu Iawe aboto iaiwai ri, iato neitiro Iawe aise gemowabu-rido. Iawe auna se a-gimaragoidiro Eiboro aboto nou sipisipi dao mutu,
5 Keina iedi pari ohona ro nou mutu Godi auna se imaragoidiro pua. Saro rudo Keina nou sosoro woidomari ubauba ta-goi-rimo, punugo ta-garauduti serawo ri.
6 Iawe ro a-gutura Keina aboto, ‘Oro etou serawo ri ra, etou ri irarowo ubauba idomari to.
7 Oro ro meana kosioidiro ato, oro mo do ie, kaupoti oro ubauba kimaragoidiro na-iamo eputa ato, oro ro kemowabeouti modobo ie, ibo kutura, “Marasio!” ’
8 Keina ro iato gutura neama aboto, ‘Dou-ro neitiro iodori-ma rie gawagogo to.’ Iato neitiro imese giodori-ma gawagogo to. Taie, Keina na-gapimaidiro neama Eiboro aboto nou ro aise gopia.
9 Iato Iawe ro ibo, ‘Keina, oro neama boira?’
Keina ro iato gutura, ‘O, mo umoro pua, mo woko pua nou kiauri.’
10 Iawe ro a-gutura, ‘Oro ro etou ri opia? Goto ato oro neama karima tiamo. Karima ro aro-die mo aboto, “Mo naramu ro nesuai.”
11-12 Goto oro neama karima ro ta-worobai, nou rie odio goto ro pari namabu mea se isuwoduti-ri pua oro ro kibouti ato. Oro koroho kawa ama-irohotiti-ri ata moro to kou, ina ata moro to kou.’
13 Keina ro a-gutura, ‘Iawe, nedi tanaro ro imese koko ia ie mo aboto.
14 Mo pari kisioidiro woko aboudo oro ro a-nowatateai-die, ina ibose mo oro aboudo a-nowatateai-die. Mo koroho kawa anama-irohotiti-ri, ata moro to ina ata moro to. Mo etu ro kowea ra, nou ro mo kopia ie.’
15 Iawe ro ibo Keina aboto, ‘Ibo pua! Oro etu ro kopia ra, 7 tau to wisa mo ro kowameai ie nou aboto.’
Iato Iawe ro isabuna sosoro aise gemedea Keina durupi ato, urubia umoro sapuwo to ibo nou modobo pua kopia.
16 Keina Iawe aboudo a-garatateai ata moro to, masiro Kororosuwo duriomoro.
Nou a-wimidiro saiki boido idiawado-die.
17 Nou ro dubu mere garasomai nou masiro a-giduti Inoki to. Ina iato nou ro auna sabowa gosioidiro, nou ro sabowa masiro a-giduti keba mere masiro to Inoki.
18 Neibi ibo wimidirotiti-bimo ina Inoki ro mere nato garasomai masiro Iradi. Iradi auna na-goi nou ro a-garasomai Mehudere. Mehudere auna na-goi nou ro a-garasomai Metusere. Metusere na-wimidiro auna na-goi, nou ro a-garasomai Rameke. Keina merebusere aramio mutu neio ibo wirowomidiro iedi duriomoro ro iato.
19-20 Rameke ro netewa teibo orobo teibo giedea-ma, Ada ra Sira ra. Nou ro keba orobo ato netewa teibo dubu mere teibo girasomai-ma. Keba mere masiro Iabara, nou keba dubu e parai moto keremari, ibose keba dubu e sipisipi burumukau mutu kimowotoi ie.
21 Neama masiro Iubara, nou keba mere ie ugeuge kisioidiro, iato kiourio ie.
22 Ina Rameke ro saro orobo ato mere ra besere ra girasomai-ma. Mere masiro Tubara-Keina, nou koko namabu wisioidirotiti idaibo kabi, giri, emowa, turuko. Besere masiro Nama.
23 Neibi na-wimidiro-bimo Rameke ro a-gutura ibo, ‘Ada, Sira, mo owera dirowidiro-rido! Mo ro ta-nopia orio mere, mo keba se nou ro naudurai-die.
24 Keina wisa auna ie, idaibo 7 tau to kowame ie. Mo arua urubia ro kopia ato mo wisa auna ia ie, idaibo 77 tau to kowame ie. Nou se ie.’
25 Adam ra orobo ra na-wimidiro-do, Keina ro Eiboro na-gesuai, ina Adam ro iato garasomai ata dubu mere Eiboro bobo gemodomorea. Ibi ro nedi mere ro masiro a-gomia Seti. Ina Ibi ro iato gutura ibo, ‘Godi ro ta-nomia-ro ata mere Eiboro bobo ato, Keina ro na-gesuai.’
26 Ina Seti auna na-goi nou ro a-garasomai dubu mere masiro Inosi. Inosi na-gomidiro, Iawe masiro kemowabu urubia ro nedi tau ro neido gatamuai-rimo.