41
Pero hiwo gorobu
1 Netewa teibo kisimisi teibo na-goroporeai-rido, Pero hiwo nato gorobu. Nou hiwo to Naire oromo bara ato gotoi.
2 Nou ro a-giwia 7 meamea gebarigebari burumakau neio ro gerereihai-rimo oromo rido, iato aise gidiawado-rimo oromo bara to sugamuso iato giho-rimo.
3 Ina iato nou ro hiwo to a-giwia 7 soro kiokio burumakau durupi tato neio ro gerereihai-rimo atu oromo rido gioro-rimo neio iato imese gidiawado-rimo, oromo bara ato aise gorowotoburio-rimo gebarigebari burumakau gomo ato.
4 Ina iedi 7 soro kiokio burumakau neio ro 7 meamea gebarigebari burumakau aise giho-rimo. Pero ro na-giauri hiwo to nou aise gerebidiro-ro norou maumo rido.
5 Ina tuturu to pua edi norou ro nou ro ina aise gowameai, nou ro ata hiwo nato gorobu. Nou ro a-giauri kaupoti woiti itiri na-gosuruwo-ro, neido geremapepe-rimo 7 meamea gebarigebari koko woiti iopu neio ro gosuwoduti-rimo atu itiri rido.
6 Iato nou ro a-giauri ata woiti itiri 7 kainakaina iopu mutu na-geremapepe-rimo surama korosa ro na-gioura,
7 kainakaina iopu ro awawo iopu aise gimodi-rimo. Pero ro a-gimaragoidiro morobise ie, kaupoti nou norou aboudo na-gerebidiro-ro, nou ro ibo ‘O, hiwo norobu.’
8 Kowaroho ato nou na-geribua-ro nou auna ia kimaragoidiro giwia. Taie nou ro ata dubu imese gemeiriai Isipi idomari ramutu urubia aboto, ibose meamea woki tututu urubia ou ri nou aboto, neio ro emowauti-ri hiwo owera maumo beda sosoro ra. Pero hiwo owera teibo na-giwauti-ma neio aboto ina neio ata ro modobo pua hiwo maumo kimabuti-ma aboto.
9 Ina tuba sosoro obo kemeauri dubu ro Pero aboto iato gutura, ‘Mo ubauba ta-nosioidiro keba se. Ata owera ta-nemati woki mo ro,
10 oro ro neitiro keba se serawo na-niwia-ma ina dibura to iato nibiria-ma oro parawa kemito dubu mutu, oro ro neitiro oro moto kemotoi urubia neio eputa dubu nou moto goro ato nimopai-ma.
11-12 Ata Hiburu orio domere ie ta-gomidiro dibura moto goro ato neitiro mutu, nou Potipa sowake dubu e. Neitiro hiwo atu duwo ato nirobu-mado, ina hiwo owera nato norowauti-rido nou aboto, ina neitiro hiwo owera maumo nou ro iato nimamabuti-maro.
13 Nou ro beda sosoro gimabuti tanaro patu ibose ti-gororosioidiro-rimo iato mo oro ro simara woko to aise nowameai ina oro ro ti-gopia oro parawa kemito dubu.’
14 Taie Pero ro ata dubu iato gemeiriai dibura moto to Iosepa ou ri nou aboto hiwo owera maumo ememabuti-ri. Iosepa samo to gowosuruwo-rimo dibura rido nou atata musuga na-gorowarure, dibura obotama na-gipuriti taie orio obotama iato giroiti, imese gou-ro Pero aboto.
15 Taie Pero ro iato gutura nou aboto, ‘Mo hiwo ta-norobu ina ata dubu ata ro modobo pua hiwo maumo kemabuti aboto. Mo ta-nemowapotai-mo urubia ro ibo oro ro hiwo owera mea se kimabuti ie.’
16 Iosepa ro ibo, ‘Auna dubu, mo ro hiwo owera nakara se kimabuti modobo pua, Godi nakara umoro ie, oro hiwo owera nou ro ama-ememabuti-ri.’
17 Pero ro ibo Iosepa aboto, ‘Mo hiwo to Naire oromo bara to notoi.
18 Mo ro ta-niwia 7 meamea gebarigebari burumukau neio ro erereihai-dioumo obo maumo rido, iato aise idiawado-dioumo oromo bara to sugamuso imese iho-dumo.
19 Ina iato mo ro ta-niwia 7 soro kiokio burumukau durupi tato neio ro erereihai-dioumo obo maumo rido, iato aise idiawado-dioumo oromo bara to, taie neio imese orowotoburio oromo bara ato gebarigebari burumukau gomo ato. Kebase idaibo sosoro ubauba burumukau mo ro iauri pua Isipi duriomoro ato,
20 ina iato 7 soro kiokio burumukau ro 7 meamea gebarigebari burumukau neio ro iho-dumo.
21 Neio ro na-iho-dumo gebarigebari burumukau ina neio iroromai pua, atu sosoro ibose to oroho-dumo soro kiokio tokatoka. Ina mo aise nerebua-die norou maumo rido,
22 ina norou aise nowameai.
Iato ata hiwo norobu, mo ro a-niauri kaupoti woiti itiri na-wosuruo ina ioudo eremapepe-dumo 7 meamea koko woiti iopu neio ro osuruwo-dumo atu itiri rido.
23 Iato mo ro ta-niauri ata woiti itiri 7 kainakaina iopu mutu na-eremapepe-dumo surama korosa ro na-gioura,
24 awawo woiti neio ro aise imodi-dumo. Kowaroho ato mo na-neribua-die ata dubu imese nemeiriai Isipi idomari ramutu urubia ou ri mo aboto, mo hiwo teibo maumo mea se ememabuti ri. Mo ro neio aboto iato norowauti hiwo owera ina mo neio ata ro modobo pua hiwo teibo maumo mea se kimamabuti-ma aboto.’
Pero hiwo teibo maumo Iosepa ro gememabuti-ma
25 Iosepa ro ibo Pero ato, ‘Oro edi hiwo teibo ro atu sosoro ie. Oro Godi ro emowawea-die, nou ro etou tanaro ama-isioidiro-ri nedi tau ro nato.
26 7 meamea gebarigebari burumakau ibo nowawea 7 meamea kisimisi ie, ibose 7 meamea woiti gebarigebari iopu 7 meamea kisimisi ie. Nodi hiwo teibo ro neitiro maumo atu se ie.
27 Ibose 7 soro kiokio burumakau durupi tato edina ro na-gerereihai-dioumo obo maumo rido ina 7 ubauba woiti surama korosa ro na-gioura ibo owamo ohona tato sogoi 7 kisimisi ro amadidimo-ou-ri.
28 Oro mo ro beda sosoro nemowauti idaibo sosoro amadimo-ororosioidiro-ri. Oro Godi ro emowauti-die, nou ro etou tanaro ama-isioidiro-ri.
29 Isipi duriomoro ato 7 kisimisi to sirio ohona neio ro ama-iamo-ri, urubia modobo ato ama-orowomidiro-ri.
30-31 Ina iedi 7 meamea kisimisi ro namadimo-oroporeai-ri, 7 sogoi kisimisi tau ro amadi-ereredea-ri, urubia ro woki amadidimi-imati-ri iedi 7 meamea kisimisi ro. Neio sogoi ro auna ia se ama-iwatiti-ri.
32 Nodio hiwo teibo ro maumo teibo atu sosoro ie. Godi ro iaiwai-ma-die nedi netewa teibo hiwo teibo ro oro aboto, mabu tanaro aupise ie nou ro morobise to amadi-iwapotai-ri.
33 Ina abora nedi tau ro nato mea dubu ata ba-daubai kimaragoidiro tututu mutu, nedi Isipi duriomoro ro nou ro ama-iauri-ri.
34 Ina duriomoro gabogabo ohona kiauri urubia ba-diaubuti, 7 meamea kisimisi ato sabowa urubia aboudo ohona neio ro amadimi-idabuti-ri. 5 soirio kidabuti ato, 4 soirio sabowa urubia do ie, kaupoti soirio ohona kiauri dubu ro kimidai ie sogoi tau sapuwo to.
35 Pero owera to urubia ro ohona amadimi-idabuti-ri awawo sabowa to neio ro awawo moto goro to amadimi-iwodouti-ri, kimotoi urubia ro iato amadimi-imotoititi-ri.
36 Ohona tato 7 kisimisi namadidime-ereredea-ri urubia sirio ohona kimio to Isipi duriomoro gabogabo ioudo amadimi-iwarebidirotiti-ri. Idaibo sosoro tanaro neio sogoi se orowomidiro-ri pua ina orowaburo-ri pua.’
Iosepa eputa dubu to Pero ro gowomi
37 Nodi tanaro ro Pero ro mea se gowea Iosepa abato, ibose Pero gabamani urubia imese sirio se ubi aise goi-rimo Iosepa ro beda owera gimowauti.
38 Pero ro ibo, ‘Nimo abato ata dubu ata omidiro pua Godi urio mutu Iosepa nou se ie, kaupoti nou ro omidiro.’
39 Ina nou ro ibo Iosepa aboto, ‘Oro Godi ro emowawea-die nedi tanaro sirio ro. Isipi duriomoro ato ata dubu ata omidiro pua oro sosoro mea kimaragoidiro mutu.
40 Mo moto ato beda woko ro iamo oro ro nama-emeaurititi-ri. Ina mo urubia ro modobo ie oro owera kibodoro, oro beda owera kutura ra neio ro modobo ie aise kisioidiro, kaupoti oro mo saro rido amadi-irarebidiro-ri, mo huru oro ro namadi-emeauri-ri, mo kaupoti mo ro nama-otoi-ri keba to.
41 Oro mo edi duriomoro gebari ro, oro ro nama-emeaurititi-ri. Imese urubia sirio oro ro neio sopu to amadi-iauri-ri.’
42 Taie iato Pero simara tu rido tu reini simara titi mutu iato guriai ina Iosepa tu mopokoi to iato gadebo. Ibose nou ro mea obotama kememidai iato gowori. Iosepa nou ro ina gorodi seni to wagoha to iato gowori.
43 Pero edi boso aboto koroho nakomu ro ata nou gemapoi oroho na, nou neito na-gorora iato girario urubia sirio keba to giwisia Pero ro, nou saro rido koroho nakomu ohu ato amura to gomidiro-ro. Iedi urubia ro na-gou-rimo keba to, nou sosoro gabo ato neio iato kai diamo ro geresebuti, ‘Gabo dematateai-mo! Gabo dematateai-mo!’ Iosepa gabo ato na-irohotiti neio idaibo tanaro nou isioidirotiti-mo. Pero ro nou ri gisioidiro iedi tanaro sirio ro mabu Iosepa auna masiro gomia Isipi duriomoro nou ro ama-emeaurititi-ri.
44 Pero ro ibo Iosepa aboto, ‘Mo ia ro naro, mo Pero kaupoti nou se ie, ata ata ro isioidiro-ri pua simara ubi tanaro, marasio ie keba se oro aboto gi-ou-ri, oro kemowapotai ato nou ro ido kisioidiro ie.’
45 Taie Pero ro nou masiro iato gomia Sapenata Panea. Nou ro ibose Iosepa orobo iato gemapoi nou masiro Asenata Potipera. Oni sabowa ato na-gotoi tarena namabu kiamo moto Potipera iato isioidirotiti woko. Iosepa imidirotiti pua kaupoti moro ato Isipi duriomoro gabogabo irohotiti urubia na-iraturiotiti.
46 Iosepa nou 30 kisimisi ro na-gorobai Isipi eputa dubu woko kemesioidiro nato gatamuai. Iosepa nou Pero moto ato dorogora se imidirotiti pua, nou Isipi duriomoro gabogabo irohotiti urubia na-iraturiotiti.
47-48 Urubia 7 kisimisi to na-irowomidirotiti keremiro mea se giwaboi-rimo ohona sirio pari namabu sirio nato idabutiti-mo. Awawo sabowa ato Iosepa ro idabutiti woiti ohona sirio awawo moto ato iaremotiti. Nou ro awawo sabowa gabogabo idabutititi ohona, awawo moto urubia ro ta-geremari-rimo neito iaremotiti. Urubia ro pari ta-isioidirotiti-mo sabowa gabogabo ina Iosepa ro idabutititi awawo moto to.
49 Ibo pua sipu tato ohona kiaremo duriomoro gabogabo awawo moto to, nou ro imese sirio ia se idabutiti imese ta-girotomuwado-rimo duriomoro gabogabo neio ro se giamo. Modobo pua ata ro kioputi aboto iedi ohona sirio ro, Iosepa ro edina ro gidabuti koriri beda sosoro ra ibo ie.
50 Sogoi tau ido amadi-eredea-ri Iosepa mere teibo nou orobo Asenata Potipera ro nato giroto-ma.
51 Iosepa ro a-gutura ibo, ‘Mo Godi ro mibo ta-nemowagare ibose mo abera urubia woki imese nato nimati.’ Iosepa ro nou ri giduti keba mere Manase, Hiburu owera to ibo owamo ‘Woki kemati’.
52 Ina Iosepa ro ibo, ‘Iedi duriomoro nato mo mibo ato na-nimidiro, Godi ro mo pepea sirio komio ie.’ Iedi saro mere ro nou ro a-giduti Eparaimi to, Hiburu owera to ibo owamo ‘Pepea sirio ie’.
53 Iedi 7 meamea kisimisi ato na-idabutiti-mo ohona Isipi duriomoro ato womu to ti-gereredea-ro.
54 Iosepa ro beda sosoro owera to garo, iato 7 sogoi kisimisi gitamuai-rimo, duriomoro gabogabo sogoi ro giwati, imese duriomoro gabogabo ohona ro ta-girihe kaupoti Isipi ato ohona ta-giamo.
55 Iato Isipi duriomoro ato auna ia sogoi tau na-gereredea urubia sirio sogoi ro giwati. Taie neio auna owera iato garo-rimo Pero aboto, ‘Nimo ohona tato ie sogoi ri orowaburai ate, nimo ohona dimio-ro!’
Pero ro ibo, ‘Ba-dou-mo Iosepa aboto, nou ro beda owera kutura ra nio ro aise gidimo-osioidiro-ri!’
56 Isipi duriomoro ato sogoi na-gorobodorouti ina Iosepa beda moto to giaremo ohona iato gidobuti, Isipi urubia sirio Iosepa aboudo ohona mani to ioudo gimade-rimo, mabu Isipi duriomoro ato sogoi auna ia se iwatititi, ohona ro ta-girihe.
57 Duriomoro gabogabo urubia sirio ibose ta-goroho-rimo Isipi to Iosepa aboudo mani to ohona imade ri, mabu imese duriomoro sirio ato sogoi auna ia se gorobodorouti, neio ohona ro ta-girihe.