44
Iosepa panikere a-garasoperai
1 Taie Iosepa moto kemeauri dubu iato gemowapotai ibo, ‘Nodi urubia ro ohona baiko to ba-mirotomuwado-rimo ina oro ro neio mani ba-dimowame simara ohona baiko to.
2 Ibose mo siriba panikere ba-dibitidiro neio edi neama ro nou baiko to ina ibose nou mani ba-demebitidiro.’
Iosepa ro iedi owera ro na-garo nou moto kemeauri dubu aboto nou ro ibose to gisioidiro.
3 Taie kowaroho duwoduwo naramio nou ro imese gitiodorai neio simara doniki mutu.
4 Neio sabowa egea mere se gemeserai-rimo ipi ato gou-rimo, taie Iosepa nou nato gutura nou moto kemeauri dubu aboto, ‘Oro abora deribua nedi urubia ro na-wou-dumo saro rudo diwasoro, oro ro nama-imatimai-ri neio oro ro ba-dimaiauti ibo ba-dutura, “Nio meana ubauba to etou ri owameai-dioumo?
5 Ina nibi ro owopirowa-diebimo mo eputa dubu nou panikere obo edina to na-idiotiti. Ibose nou neito kodio ato obo nou hiwo owera tuputupu se irowautitititi. Nio ro imese ata ia ubauba tanaro osioidiro-dioumo.” ’
6 Taie iedi moto kemeauri dubu ro neio nou ro ioudo gaimai-ro. Iosepa naramio nou ro ipi ato na-gimatimai, taie iedi dubu ro nou ro ibo ti-garo Iosepa beda sosoro owera to gemowauti.
7 Ina naramio ro ibo, ‘Auna dubu oro ro etou mabu ato aro-die idaibo owera? Nimo ro idaibo tanaro osioidiro-ri pua mabu nimo umoro ie io, ubauba ie.
8 Kebase nimo ro beda mani niwia-rimo baiko goro ato, Keineni duriomoro rido nimo ro ta-niwameai-diemo. Nimo oro eputa dubu moto rido iwopiro pua mani daro arua meamea namabu,
9 oro ro eputa dubu panikere nimo ata baiko goro ato nama-owea-ri, nou ro se ba-maraburai, nimo arua rubi oro sowake anamadimo-orohotiti-ri.’
10 Taie iedi moto kemeauri dubu nou ro ibo, ‘Nio beda sosoro owera to aro-dioumo aise ba-mororosioidiro. Kaupoti etu abato nowea panikere edi mere ro nou mo sowake ama-irohotiti-ri, nio arua ata ubauba tato se amadimo-orowameai-ri.’
11 Taie neio baiko iato gibeduti-rimo goto ato na-giaremuti-rimo, taie neio baiko iato gimaputi-rimo.
12 Iedi moto kemeauri dubu ro nou ro panikere kosora iato gatamuai. Nou ro naramu dubu aboudo gatamuai-ro iato ata naramu dubu imese neito gorowati womu tato neama baiko to nou ti-gereredea-ro. Beniamini baiko nou ro na-gemapimai panikere nou ro nato gowea nou baiko goro ato gowamo.
13 Taie naramio ro na-gowea-rimo panikere Beniamini baiko goro rido na-geihai-ro neio auna ia ubauba kimaragoidiro gowea-rimo, taie neio namabu iato gerewekekeouti-rimo mabu neio auna ia mibo gowea-rimo. Taie neio ohona baiko ina na-gitahiti-rimo doniki ohu ato gitomo-rimo ina ioudo imese gorowameai-rimo Iosepa bato gomidiro iedi sabowa gebari ro neito.
14 Taie neio Iosepa moto to na-gorowateai-rimo Iosepa ibose ti-gomidiro. Iato neio eputa aise giborea-rimo sopu to mabu Iosepa nou auna dubu e.
15 Taie Iosepa ro ibo, ‘Nio etou tanaro osioidiro-dumo, nio umoro ra ibo mo idaibo dubu e mo keremasibowado ie, mo ibose hiwo owera tuputupu se korowauti ie.’
16 Iuda ro ibo, ‘Auna dubu, nimo beda owera namabimu-utura-ri? Nimo ro beda sosoro to namadime-emowameai-ri oro ibo nimo ubauba ata osioidiro pua? Nimo Godi ro nimowatateai ubauba nou ro ta-nimowawea-ro. Ina nimo imese na-norowotoi oro sowake anamadimi-irohotiti-ri, panikere etu abato owea nou ro se koroho oro sowake modobo pua nimo imese atu se ie koroho modobo ie.’
17 Taie Iosepa ro ibo, ‘Mo ro idaibo tanaro osioidiro-ri pua. Nio imese sirio se mo sowake urubia to ararasoro-ri pua, kaupoti panikere etu ro gomidai nou kawakawa mo sowake nou ro ama-irohotiti-ri. Nio arua rubi ba-dorowameai-mo ata ubauba kimaragoidiro tato se nio simara abera aboto.’
18 Taie Iuda imese gou Iosepa aboto nou ro iato gutura, ‘Auna dubu modobo buro ra mo owera karo keba se oro aboto, mo simara kimaragoidiro owera anama-eheruti-ri oro aboto. Oro serawo oi ate mo aboto. Mo umoro ie oro auna gabamani dubu e, oro auna ia pupuwo dubu e Isipi duriomoro eputa dubu nou pupuwo beda sosoro ra oro idaibo sosoro pupuwo ie.
19 Oro ro ta-nimodoruti nimo ibo, “Nio abera negere a-womidiro ra, ibose nio neama kainai mutu ra?”
20 Ina nimo ro oro kemodowa owera iato nemowameai-rimo, “Nimo abera neama kainai mutu tomidiro-do. Nimo neama kainai edi tau ato gowahau mamu ro nimo abera oromano ro ta-gorobai. Nedi mere kainai ro nou naramu ta-garaburai, kaupoti mamu ro giroto-ma neitiro, ina abora nou nakara ia se geremeserai-ro, nou abera auna ia nirimagare ie nou aboto. Nou kasouti pua ata ata moro to koroho pua.”
21 Oro ro ta-gutura-ro nimo aboto ibo, “Nio neama kaina ba-dowou-rimo, mo ubi ie nou kowea aboto.”
22 Ina nimo oro aboto ta-nutura-rimo ibo “Iedi mere ro nou modobo pua abera nou ro kemeserai aboto, nou ro nama-emeserai-ri abera iedi tau ro nato pamo aise ama-owea-ri.”
23 Ina oro ro ibo ta-gutura-ro nimo aboto, “Nio ro neama aise kowou modobo ie mo aboto, nio ro kowou tato mo ubi tato ie nio sosoro woidomari ina mo ro kimoweai.”
24 Nimo neido na-norowameai-rimo nimo simara abera aboto nimo ro iato nemowauti-rimo oro beda sosoro owera garo nimo aboto.
25 Ohona na-goroporeai nimo abera ro ibo, “Nimo abora ohona potoro ie. Nio ba-dou-mo Isipi duriomoro to ohona ina imade ri.”
26 Ina nimo abera ibo nemowameai-rimo, “Nimo modobo pua nakara se kou neama kainai tato. Nimo nou tato namadimo-ou-ri Isipi gabamani dubu ubi tato ie nimo sosoro woidomari ina nou ro kimoweai.”
27 Ina mo abera ro ibo nimo aboto, “Nio umoro ie mo orobo ro netewa teibo mere kawakawa nimowohau-ma,
28 mo ata mere ro ta-nemeserai-ro. Mo ro ibo nimaragoidirotiti nou durupi tumu na ro ta-gekekeouti. Iedi tau ato gararasoperai nou sosoro woidomari mo aboudo nato giwopirowa.
29 Nio ro ina neama emediowado-dumo owou ri. Etou ubauba ro ororosioidiro nou aboto iedi tau ro nato edi mibo ro mo nou ro anama-owaburai-ri.”
30-31 Nimo ina beda sosoro namadimo-orowati-ri neido namadimo-orowameai-ri nedi mere nou tato, nimo abera pamo ama-owea-ri, nou keremiro nedi mere ro nou ro emerebidiro. Nimo ro namadime-emamuai-ri nou naraburai-ri.
32 Mo abera ta-nemowapotai ibo, “Oro kimaragoidiro tato se, nedi mere ro mo ro mea mino to anama-iauri-ri. Nou mo ro kowameai tato, mo oro ro nato auna owera to ba-demarutiti-ro womu tato mo karaburai.”
33 Auna dubu abora nedi tau ro nato nedi mere ro nou bobo ato mo ro nama-irohotiti-ri oro sowake. Modobo ie nedi mere ro oro ro kadodorai aboto, nou korowameai arua naramio mutu.
34 Mo abera ro nama-owea-ri nou tato korowameai ina nou modobo pua mo sosoro gabo ato kororopia.’