48
Iakobo ro korosa gimia-ma Iosepa mere teibo
1 Iosepa umoro ta-goi nou abera temeteme ro na-gorobai-rimo nou durupi ubauba se gowamo. Taie Iosepa mere teibo nato giwaboi-maro nou abera negere aboto, Manase ra Eparaimi ra.
2 Nou ro na-giwaboi-maro ina neibi na-gorowateai-birimo moto to, taie ata dubu ro ibo Iakobo ato, ‘Oro mere Iosepa totoi-die oro owea ri ou-die.’
Isiraere edi tau ro nato nou durupi egea se gowaibitiwado, pupuwo tato ia se gowamo, hio ito kerebua modobo pua keta rido. Taie nou pupuwo kainai na-gowea umodi to mere imese gerebua-ro
3 nou iato gutura Iosepa aboto, ‘Imese pupuwo ia Godi nou ro gorowapotai-ro mo aboto Rusi ato Keineni duriomoro ato na-owamo, mo nou ro korosa iato nomia.
4 Nou ro ibo a-garo mo aboto, “Oro mo ro sirio aramio merebusere anama-omio-ri, ibose oro auna abera to ama-ararapoi-ri sirio erere owera urubia oro aboudo amadimo-orobodorai-ri. Oro aramio merebusere mo ro anama-imasouti-ri nedi Keineni duriomoro ro neio nato ama-irowomidirotiti-ri womu tato womu tato to.”
5 Oro mere teibo Isipi ato gohau-rido mo ido norowateai-ro neito, abora mo ro a-nutura neitiro mo ia simara mere teibo neitiro to anama-iapoi-mari, Rubeni ra Simioni ra beda sosoro ra mo mere teibo ie, Eparaimi ra Manase ra neitiro mo ro abora mo mere teibo to niapoi-ma.
6 Oro arua merebusere ido nama-iwia-ri io oro merebusere ie kaupoti neio aramio merebusere simara goto kere irahidimai-ri pua Keineni duriomoro ato, Manase ra Eparaimi ra neitiro edi aramio merebusere ro neio ro amadimi-imasouti-ri neio goto kere.
7 Mo keba tau ato Mesopotamia duriomoro rudo na-nou-ro Eparata sabowa nemou-ro oro mamu buro ipi ato iato garaburai Keineni duriomoro ato. Nou na-garaburai mo auna kamade tato ta-noi, taie mo ro nou bobo to aise nedea Eparata gabo kakate ato.’ (Eparata ata masiro Beterehema.)
8-10 Iedi tau ro nato Isiraere nou idomari teibo timotimo ta-goi-rido, nou mea se kirarowo modobo pua, nou oromano ia ro ta-gorobai. Nou na-giraroweauti Iosepa mere teibo se giwia-ma, nou ro ibo, ‘Beda mere teibo ra nou?’
Ina Iosepa ro iato giwapotai-ma abera aboto, ‘Mo Isipi duriomoro ato na-nimidirotiti mo Godi ro nato nomia-ro nedi mere teibo ro.’
Abera ro ibo, ‘Neito ma-diwosiomai-maro mo aboto mo ro korosa anama-iwai-mari.’
Taie Iosepa mere teibo nou aboto nato giwosiomai-maro. Abera ro na-giohiai-ma nou ro iato gisome-ma,
11 nou ibo, ‘Mo ibo ta-nimaragoidirotiti oro mo ro ina owea-ri pua. Kaupoti mo Godi ro ta-nowou-ro neito oro sosoro owea ri oro mere teibo mutu.’
12 Taie Iosepa mere teibo egea mere se giwosiomai-maro Isiraere aboudo Iosepa iato a-giroborea sopu to.
13 Nou ro Eparaimi Isiraere edi pere sapuwo ro nato gowotobowa ina Manase Isiraere edi tumodi sapuwo ro nato gowotobowa taie imese giwou-maro aramunegere aboto.
14 Isiraere iato tu teibo gararahodorai-rido nou edi tumodi tu ro Eparaimi eputa to gedea, ina nou pere tu Manase eputa to gedea,
15 taie Isiraere ro Iosepa sapuwo to nou mere teibo korosa iato gimia-ma, ‘Mo aramunegere Aberaham, mo abera Aisaki, neitiro Godi edi ubi tanaro ro ta-isioidirotiti-do. Mo Godi ro ta-nemowotoititi-ro mea mino to mo na-nimidirotiti.
16 Godi nou se ie mo imese ubauba aboudo nou ro nowatateawadotiti-ro. Nedi mere teibo ro nou ro korosa ba-mimia-maro. Mo edi masiro ro neitiro ro ba-mobodorai-do, ibose mo aramunegere Aberaham mo abera Aisaki neitiro edi masiro teibo ro neitiro ro ba-mibodoraititi-mado. Neitiro merebusere sirio ba-miwia-do nedi duriomoro gebari ro nato.’
17 Iosepa ro na-gowea nou abera dubu edi tumodi tu ro Eparaimi eputa to na-gedea nou auna ubi tato goi. Nou abera negere edi tumodi tu ro nou ro na-gorobai nou ubi ie owagare ri Eparaimi eputa rido owatateai-rie Manase eputa to emedea rie,
18 nou ro ibo abera aboto, ‘Oro ro ubauba se osioidiro Idau, Manase mo keba mere nou e. Oro edi tumodi tu ro modobo ie nou eputa to kedea mabu tumodi tu owamo ibo nou pupuwo mutu e, korosa nou ato kiamo ie.’
19 Isiraere ro a-gebeiomai, nou ro nato gutura, ‘Mo mere mo umoro ie mo etou tanaro nosioidiro. Manase ibose nou auna anama-owai-ri mo ro. Nou merebusere sirio nou aboudo amadimo-orobodorai-ri. Kaupoti nou neama dubu ohu ia to nou ro amadi-omidiro-ri, nou aramio merebusere neio sirio erere owera urubia nou aboudo amadimo-orobodorai-ri.’
20 Taie Isiraere edi saiki ro nato neitiro korosa aise gimia-ma ibo, ‘Korosa idaibo kimio ato Isiraere urubia nama-orowomidirotiti-ri neio ibo ba-miarotiti-mo, “Godi ro Eparaimi ra Manase ra korosa na-gimia-ma idaibo sosoro korosa nou ba-momia oro.” ’ Nou idaibo tanaro nou gosioidiro neama a-gewesia nou ro keba to, naramu nou ro saro to gewesia-ro.
21 Taie nou ro iato gutura Iosepa aboto, ‘Mo ma-dowea-ro mo taie mo karaburai aupise ie. Oro Godi mutu ama-imidirotiti-ri, oro nou ro ama-owameai-ri nedi duriomoro neido.
22 Mo ro goto kere ta-napoi oro aboto, oro naramio aboto mo ro idaibo goto kere apoi pua. Oro Sekemi moro Amore urubia edina na-niwasiri-ro boso ato, oro nou nemapoi.’