49
Iakobo Nou 12 Dubu Mere Korosa Gimia
1 Taie Iakobo dubu mere sirio aboto owera iato gimeriai neio nou aboto ou ri. Neio na-gorowateai-rimo nou aboto, nou ro ibo, ‘Mo aboto aupise neito morowoiriamuti-ro. Beda tanaro ro amadimo-ororosioidiro-ri nio aboto mo ro nou nama-iwauti-ri.
2 Nio imese sirio se dosiomai-rimo aupi se, mo owera gare se demedea-rimo.
3 Rubeni oro mo keba mere ie, mo dubu rido narasomai oro. Oro niramio ro keba to iauri-dumo, imese pupuwo ia oro abato iamo.
4 Oro obo sosoro iadodirotiti-ro, oro irorodiobutiti pua. Niramio oro ro iworohutiti-ri pua mabu oro mo orobo mutu ta-girobu-ma, mo oro ro siripo ta-nowai idaibo ubauba tanaro na-gosioidiro.
5 Simioni ra Riwai ra atu tanaro ie nitiro, serawo sobosobo gipouti-rido giri susura to urubia neito giopiauti-rido.
6 Nitiro piro se namadi-iworohuti-ri owera, mo nitiro aboto aradabu-ri pua. Nitiro serawo na-goi-rido urubia sirio aise giopiauti-rido, ina burumakau sairo sumi dorogora se giwasiouti-rido.
7 Nitiro serawo imese koko ia ie, edi serawo ro nou ro ama-iwai-mari nitiro ubauba. Nitiro aramio merebusere simara duriomoro ato orowomidiro-ri pua, mo ro Isiraere duriomoro gabogabo neito anama-ihoduti-ri.
8 Iuda oro naminiramio ro masiro amadimo-owouburiotiti-ri, oro aboto neio amadimi-iroboreautiti-ri. Oro nasa rubi serawo namadimi-iworohutiti-ri oro aboto, oro ro wagoha to ama-itutiti-ri.
9 Oro serawo tumu na sosoro ie, oro ometa koroho ato oro tumu na kopia ato aise kouho ie, kamidimai ato tama ra dao ra iato kimasiti ie. Ata ro koriomai modobo pua.
10 Oro aboudo amia urubia eputa rubi to neio ro ama-irowomidirotiti-ri, womu tato morobise eputa dubu nama-omi-ri. Imese sirio urubia erere owera to namadimi-iarotiti-ri nou ubi tanaro amadimi-isioidirotiti-ri.
11-12 Iuda, oro aramio merebusere duriomoro ato kiho ota iopu sirio amadimi-isuwodutiti-ri, neio ro nakara se modobo pua kiho aboto, ibose kiwoubua namabu atu se neio mutu amadimi-ihotiti-ri. Tuba sosoro obo imese sirio ia ie oro aramio merebusere nakara se kidio modobo pua, ina urubia obotama neido kiwiouti modobo ie. Neio tuba sosoro obo amadimi-idiotiti-ri womu tato kiamidimawado, ina ibose burumakau nono isi amadimi-idiotiti-ri womu tato neio kiamidimawado.
13 Seburuni oro aramio merebusere buru oromo bara ato ama-irowomidirotiti-ri womu tato Sidoni sabowa kowasomai. Iedi buru oromo bara nato urubia ro sawa pe sirio ibi to amadimi-iairiodirotiti-ri.
14-15 Isaka oro pupuwo doniki sosoro ie. Oro aramio merebusere mibo nakomu amadimi-iworohutiti-ri. Beda moro mea kowea ra neio sebesebe nato aise keremasebidiro ie. Ina ioudo iato kerebua ie mibo nakomu mutu kare rubi sosoro amadimi-iworohutiti-ri.
16 Dani, oro aramio merebusere ro urubia korowomidiro muro mea mino to neio ro amadimi-imotuputititi-ri.
17 Oro gabo bara ato serawo bagawe sosoro ama-orobutiti-ri. Urubia dubu hosi to kou ato, oro ro hosi obo nupu ato kagegeai ato, urubia dubu huru to karakukua ie.
18 Iawe mo ubi ie mo oro ro ubauba aboudo kowatateai.
19 Gadi oro aramio merebusere boso rubi ro kowaroho duwoduwo ato amadimi-imataumotiti-ri, kaupoti neio oro urubia ro amadimi-ibodoidirotiti-ri.
20 Asere oro aramio merebusere neio duriomoro ato meamea ohona amadimi-isuwodutiti-ri, eputa rubi edi ohona ro na-ihotiti-dumo iato ama-iamotiti-ri.
21 Napatari oro orobo dia sosoro ie, tumu ato mea mino to ama-irarioidirotiti-ri, meamea sosoro dia kainakaina nou ama-irotutiti-ri.
22 Iosepa oro ota sere sosoro na-wotoi obo sosu abato kiho ota iopu sirio mutu.
23 Urubia ro oro serawo ri iona gari to amadimo-obotiti-ri.
24-25 Oro Godi ro ama-omiotiti-ri pupuwo, ina nou ri urubia ama-imotoburiotiti-ri iona gari mea se ama-irobidirotiti-ri neio nato ama-ibotiti-ri. Oro pupuwo ia Godi rudo. Nou mo ro nemowabutiti, nou mo pupuwo, nou urubia mea se imototoititi, Isiraere urubia iwasioutiti ubauba aboudo, oro nou ro ama-owarebidirotiti-ri ibo oro daroho amadi-ememeiriotiti-ri, obo sosu amadi-emowosuwodutiti-ri goto rudo, oro orobo merebusere sirio amadi-omiotiti-ri, ibose oro kiwoubua namabu sarupo kainakaina sirio amadimi-irotuti-ri.
26 Ibose oro aramio merebusere idaibo sosoro ama-irowomidirotiti-ri. Godi ro podo gebarigebari korosa ta-giwai, kaupoti mo edi korosa ro na-niaiwai auna ia ie, tagara podo ta-irohodorai-ro. Nedi korosa ro ba-miamo Iosepa abato, naramio keba dubu to nou ro ararasoro.
27 Beniamini oro tumu soka sosoro ie, kowaroho ato ohona binio to kiosora ie nou kiho ie, kiaumotowado ie, sirio adimo ato beda tumu na kiohi ra merebusere nou kimio ie.’
28 Isiraere 12 gu sapuwo to Iakobo ro idaibo sosoro iana owera nou gimowauti, dubu mere gabogabo korosa iato gimio neio simara modobo ato.
Isiraere garaburai
29-32 Isiraere ro iato gimowapotai-ibi neio ibo, ‘Nio kimeserai aupise ie mo ro. Mo nio ro ito ba-dowameai-rimo Keineni duriomoro to, goto masiro Makapera bobo goro iato taidiro, mo pamo durupi iato ba-dedea-rimo. Makapera towamo iato, Mamere sabowa ato saiki beda sapuwo rido idiawadotiti-die. Iedi bobo goro ro pari mutu atu se Eporoni Hiti gu dubu e keba se nou aboudo gimidai Aberaham ro mani to. Aberaham ra Sera ra iato gibiria-marimo, ibose Aisaki ra Rebeka ra neitiro iato gibiria-marimo. Mo orobo Ria ibose ta-nibiria iedi bobo goro ro neito.’
33 Iedi owera ro karo na-goporeai nou aise gutuwa. Tuturu to pua nou giropu gororo na-gutura-rimo iato aise gaimai. Taie.