8
Obo gomiodoi
1 Godi ro woki imati-ibi pua beda urubia ra Noa mutu ota bokose pe goro ato na-gomidiro-bimo, neibi nou ro aise gimaragoidiro-ibi, mabu beda mutu tumu namabu ra, serawo namabu, serawo tato namabu nou ro ta-giwodouti, neio Noa mutu gorowomidiro ota bokose pe goro ato. Godi nou na-gimaragoidiro, iato nou ro auna ia gawia iato gemeiriai-ro, edi gawia ro na-gihudurai-ro, obo nou ro aise gowiodoi.
2 Beda mutu obo sosu ro wiroruwoidirotiti-mo goto goro rudo, imese aise goroputi-rimo, iroruwo pua. Iedi tau ro nato ata daroho bubu tato ie, toboro mea se gowamo.
3 150 saiki na-goroporeai-rimo, duriomoro obo ro a-gomioduti, ibo womiodoititi imese,
4 womu tato 17 saiki ro na-gorobai, 7 sogomi ato, taie ota bokose pe aise garakoko sopu ato. Ata duriomoro masiro Ararata nou nato aise gorotomai.
5 Obo aise womiodoititi imese imese, womu tato keba saiki 10 sogomi ato na-gorobai Noa ro nato giwia podo na-giwaroho-ro.
6-7 Taie Noa 40 saiki ibo wibodorotiti womu tato ti-goroporeai-rimo, nou ro garegare pawa gebari iato gemeiriai pito goro rudo. Iedi garagare pawa gebari ro beda korowameai ra, imese moro to godau.
8-9 Ina ibo wimidiro, dumu pawa iato gemeiriai. Nou ro na-gemeiriai edi pawa ro komi moro egea se giosora, aise gorowameai-ro, obo auna se gomidiro, taie Noa ro aise gorobai.
10 Ina amia saiki ibo gibodoro ti-goroporeai-rimo, ina natara na dumu iato gemeiriai,
11 iedi dumu ro saiki tuturu ta-gorohowado-ro, adimo ia nato gorowameai-ro ota puara se gosumudiro-ro. Noa umoro nato goi ibo obo ta-omiodoi.
12 Ina ibo ina natara na dumu iato gemeiriai, iedi dumu ro imese moro to godau, beda korowameai ra.
13 Omona ia saiki ato Noa ro keba sogomi na-gatamuai, nou iedi tau ro nato 601 kisimisi nato gorobai, nou iato na-giraroweauti pito rido, obo imese ta-gomiodoi duriomoro rido.
14 Taie, nou ibo wimidirotiti ata sogomi ti-gosuwoidiro-ro, ina 27 saiki ato obo imese potoro ia ie, ta-goroporeai, sopu ato ata obo ata omidiro pua.
15 Taie, Godi ro ibo nou aboto,
16 ‘Noa, ba-diwosuruwo-ro oro orobo, mere peteibi, eteamio peteibi,
17 oro iedi namabu ro na-giwodouti idaibo pawa, goto ato koromudidiro namabu, tumu namabu sirio, neio mutu ba-dosuruwo-ro ota bokose pe goro rido. Obo ta-gomiodoi, oro ro ba-ditioduti, neio atu sosoro ba-mararasomai-mo duriomoro ato.’
18 Taie iato Noa a-gosuruwo-ro nou orobo mere peteibi upi mutu.
19 Nou ro beda mutu keremiro nakomu giwodouti, idaibo sairo to na-woroho-dumo, goto ato koromudidiro namabu, pawa mutu, imese keremiro nakomu neio erere se gosuwoduti-rimo ota bokose pe goro rudo.
20 Ina Noa ro Iawe woki emati pua, nou ro nadi aise gitomuti, meamea nakomu nou na-gieributi idaibo pawa, nadi ohu ato nou gimatowo.
21 Iedi nibo mea ro aise gowioro ohu to, Iawe nou ro kamade aise gowai, nibo mea na-gemaseai. Nou nakara se iato geremowagomea ibo, ‘Mo umoro ie neio domere na-gorowomidiro, neio kimaragoidiro ubauba se iamotiti. Kaupoti mo ro idaibo tanaro ina osioidiro-ri pua, duriomoro gebari mo ro opisiamuti-ri pua.
22 Duriomoro ibose to ama-owamotiti-ri, orio pakea kiebuti kibouti ina iato kiho ie. Iato saiki ra duwo ra korosa ra kukamo ra ama-iamotiti-ri, ina ibose gawia ra surama ra neitiro amade-eremohodowautiti-ri.’