Pauro keba peba owera ie Iesu urubia aboto Tesaronika ato na-irowomidirotiti
1
1 Mo masiro Pauro ie, neibi ro nisioidiro-birimo nedi peba owera ro Sairasi ra Timoti ra neitiro mutu, Iesu urubia nio aboto Tesaronika sabowa ato na-orowomidiro. Nio imese Abera Godi urubia ie, ibose Abera Naramu Iesu Keriso nio nou urubia ie. Nio Godi ro wisa tato se ba-miwarebaititi ibose nou edio miro ro nio abato ba-mowamotiti.
Pauro kamade owera ie neio kimibiria tanaro sapuwo to
2 Nio neibi ro sirio tau aise nimaragoidirotiti-bimo neibi kararatoro ato eso owera mutu Abera Godi aboto ti-niarotiti-bimo.
3 Neibi kararatoro tau ato neibi ro nou eso owera komio ie mabu nio morobise kimibiria na-iworohuti-dumo ibose nirimagare tanaro na-iwawuti-dumo urubia aboto, ina morobise kimaragoidiro Iesu Keriso sapuwo to nio ro koko se tirobidirotiti-dumo.
4 Nirimagare niramio nio mo urubia ie. Godi nou auna nirimagare ie nio aboto, ina nio noudo gihodowa nou ro simara urubia to giapoi.
5 Neibi ro edi tau ato na-nimowauti-birimo morobise umoro mutu nimowauti-birimo mea owera Iesu sapuwo to, ibo pua owera kawakawa karo, iedi owera ro korosa mutu e Tarena Urio aboudo gou-ro. Nio umoro ta-goi-rimo ibo neibi ro beda sosoro tanaro nisioidirotiti-bimo nio kiwarebai sapuwo to iato na-nimidirotiti-bimo.
6 Ina nio ro edi tau ato na-gimidai-rimo Iesu edi mea owera ro neibi ro beda tanaro nisioidiro-birimo, ina Iesu ro beda meamea tanaro gisioidiro nio ro ibose to gisioidiro-rimo. Ina nio urubia aboudo ubauba ta-giwia-rimo, kaupoti Tarena Urio ro nio kamade aise giwaititi.
7 Nio ro edi meamea tanaro ro giwawuti-rimo Iesu kowasoro urubia aboto iato na-orowomidiro Masedonia duriomoro ato, ibose nato Akaia duriomoro ato na-orowomidiro, idaibo meamea tanaro neio ro ibo isioidiro rie.
8 Ina nio aboudo gorobodorouti-ro mea owera Iesu sapuwo to edi duriomoro teibo ro neitiro aboto, ina ibose nio kimibiria tanaro sapuwo to owera imese ta-gorobodorouti imese duriomoro gabogabo to. Ina noudo ie nedi tanaro ro nou sapuwo to neibi ro ata owera ata aro-ri pua.
9 Sirio urubia edi owera ro neito imowapotaidiro-dumo neibi nio ro beda sosoro niworohutiti-bimo kamade mutu. Ibose urubia sirio ro neito imowapotaidiro-dumo ibo, nio kebase orora aboto korowapotaidiro tanaro ta-gimeserai-rimo, ina abora nio morobise Godi nou ubi tanaro emesioidiro-dumo, Keremiro Mabu Dubu nouse ie.
10 Ibose neio neito imowapotaidiro-dumo nio beda sosoro eremasebidiro-dumo nou mere namadi-orowameai-ri Adiri sabowa rido. Nou Godi ro pamo rudo ta-gowoubua ina nimo Iesu ro anama-iwasiouti-ri Godi serawo aboudo, wisa kimade saiki namadi-ou-ri nou serawo paeapaea nato ama-oi-ri.