2
Pauro beda tanaro gisioidiro Tesaronika sabowa ato
1 Naminiramio nio umoro ie neibi nio aboto na-nou-birimo ibo pua korowaguwo.
2 Nio umoro ta-goi-rimo neibi ido norowateai-birimo nio aboto, kebase Piripai sabowa urubia aboudo ubauba ta-niwia-birimo, ina neibi na-norowateai-birimo nio aboto neibi Godi ro pupuwo ta-nimia-ibi nou edi mea owera ro kimowauti aboto. Urubia sirio ro ubauba egea se giwodouti-rimo kaupoti neio edi ubauba ro Godi woko ubauba emowai pua.
3 Neibi na-nou-birimo nio aboto mea owera imowauti rie, neibi ro nio isaubuti pua, ubauba kimaragoidiro iamo pua neibi abato.
4 Godi kamade ta-goi neibi ro nou edi mea owera ro kobodorouti aboto. Ibo pua urubia kiageawado aboto, Godi kamade kowaititi aboto nimowautiti-bimo, nou umoro ie neibi maumo.
5 Ibose neibi ro bagea owera meamea nio sapuwo to ohu rido itomo pua. Godi umoro ie, neibi namabu sogoi urubia pua.
6 Neibi ro nedi woko ro na-nosioidiro-birimo ibo pua arua rubi mutu nio ro neibi kimowabu-bi aboto.
7 Neibi Keriso ro kitiodorai urubia ie, neibi aboudo modobo ie owera karo aboto nio ro iwarebai-bi ri, kaupoti neibi ro aro pua. Mamio ro bamuai kainakaina beda sosoro kiaudiro ra, nio neibi ro mea mino to idaibo sosoro niworohuti-birimo.
8 Godi edi mea owera ro na-niaiwo-birimo nio aboto, neibi auna nirimagare ie nio aboto ina nou do ie neibi durupi idiobuti pua, nou ri niaidodorawado-birimo.
9 Niramio nirimagare babio neibi ro edi awawo woko ro na-nisioidirotiti-bimo nio ro woki a-gemati-dumo ra? E e nio umoro ie duwo saiki neibi ro woko se nisioidirotiti-bimo ohona kimade sapuwo to, modobo pua nio mibo kimia aboto, Godi edi mea owera ro na-nirowautiti-bimo, neibi nio ro kiwarebai-bi sapuwo to.
10 Godi ie nio ie atu se ta-irarowotiti-mo ibo neibi na-nimidirotiti-bimo nio abato mea se nimidirotiti-bimo, neibi aboudo tarena ie ubauba kisioidiro aboto.
11 Ibose nio umoro ie abera ro merebusere kaokao se beda sosoro kitomu ra neibi ro nio idaibo sosoro tanaro to nitomutiti-bimo.
12 Neibi ro nio kimibiria tanaro pupuwo nimowaititi-bimo nio mibo niwebedetiti-bimo, omuomu se nitomutiti-bimo mea se orowomidiro ri Godi ubi tanaro kisioidiro aboto. Ina nio nou ro iramairititi-die nou mea ia kiwaboi tanaro ibodoro ri.
13 Eso owera ti-niarotiti-bimo Godi aboto mabu nio ro nou edi mea owera ro ta-gimibiria-rimo. Nou aboudo gou-ro edi mea owera ro ata dubu aboudo ou pua, nio ro mea se gimibiria-rimo mabu Godi aboudo gou-ro. Eso owera ibose ti-niarotiti-bimo mabu abora nedi tau ro nato nedi mea owera ro meamea tanaro nou ro tisioidirotiti nio giropu maumo ato.
14 Iesu Keriso kowasoro urubia Iudia duriomoro ato na-orowomidiro neio ro ubauba sirio ta-giauri-rimo simara Iu urubia aboudo, ina niramio nio buro atu sosoro ie, mabu nio simara urubia ro ubauba se giworohuti-rimo.
15 Iedi Iu urubia ro Abera Naramu Iesu neio ro gopia-rimo ibose neio nasaio ro kebase ta-giopiauti-rimo Godi ipusu owera urubia. Neibi ioudo edi Iu urubia ro neio ro se ti-nibeiouti-birimo. Neio ro imese sirio urubia auna se ihoiotiti-dumo, Godi ubi tato ta-goi neio aboto.
16 Neio ro egea se nimediobuti-birimo neibi ro mea owera kobodorouti Iu owera karo tato urubia aboto. Iedi mea owera ro auna pupuwo korosa towamo urubia sirio pamo rudo kiwame aboto. Kaupoti iedi Iu urubia ro idaibo sosoro ubauba ohu rido aise wiromotomo-mo womu tato Godi edi serawo ro neio ro noti iaurititi-dumo.
Pauro auna ubi ie neio kiraturiomai aboito
17 Naminiramio, nio neibi mutu musomuso se nirowomidirotiti kaupoti neibi kimaragoidiro tiamotiti nio aboto, neibi auna ubi ie nio kiraturiomai aboto.
18 Arua tau mo gabo auna se niosoratiti nio aboto ou ri kaupoti mo kou gabo Satani ro nowasioutiti.
19 Neibi auna kamade ro niwatiti-bi nio sapuwo to, mabu nio neibi ro na-nimowautiti-bimo mea owera Iesu sapuwo to, nio ro aise gimibiria-rimo ina mea se tiwasoro-dumo. Iesu korowameai ato nio kowasoro tanaro nama-imowea-ri neibi ro nou woko mea se na-nemesioidirotiti-bimo nou sapuwo to neibi aboto mea wisa amadi-aiwai-ri.
20 Morobise ie nio ia sapuwo to neibi auna ia kamade ro niwatiti-bi.