Ioane saro peba titi owera ie kimibiria urubia aboto
1
1 Mo Iesu urubia kemeauri dubu e, mo ro nou ri nisioidiro nedi peba owera ro. Gaiasi nirimagare, nedi peba owera ro oro aboto nisioidiro. Oro morobise ia nirimagare nematititi mo ro.
2 Nirimagare, oro urio aramirio ina ibose mo a-nararatoro Abera aboto oro durupi idaibo sosoro karamirio. Mo a-nararatoro Abera aboto ibo oro sirio tau mea se komidiro modobo ie.
3 Amia kimibiria urubia ro nemowauti-mo ibo oro morobise gabo ato irohotiti. Mo auna kamade noi nedi owera ro na-nirowidiro.
4 Ibose mo auna ia kamade ro nowatititi idaibo owera kirowidiro mo kimibiria merebusere sapuwo to.
5 Nirimagare namutuna oro ro meamea kiwarebai tanaro tisioidirotiti amia kimibiria urubia aboto ito na-woroho-dumo oro sabowa to. Nedi daimodaimo urubia ro oro ro na-iwarebidirotiti,
6 neio ro nato gimowauti-rimo Iesu urubia ibo, ‘O nimo Gaiasi ro morobise nirimagare mutu niworohutiti.’ Neio ioudo kaimai ato oro sabowa rido ata sabowa to, Gaiasi oro ro modobo ie neio mea mino to kimeiriai Godi kamade kowaititi sapuwo to.
7 Mabu neio simara sabowa na-imeseretiti-mo Iesu woko emesioidiro ri, kimibiria tato urubia aboudo ata meamea nakomu ata imadetiti pua.
8 Modobo ie idaibo urubia nimo ro aise kiwarebai, ina nimo atu se karadabu nedi morobise woko ro nou kosioidiro aboto.
9 Oro sabowa ato Iesu kowasoro urubia na-orowomidiro mo ro peba owera ta-nemeiriai neio aboto. Kaupoti Dioterepi ro irowidiro pua mo edi owera ro, nou nakara se auna dubu to irarasorotiti.
10 Mo simara durupi to nama-ou-ri, Dioterepi sapuwo to nio mo ro nato anama-imowauti-ri nou ro beda tanaro isioidiro. Nou auna karasaubuti dubu e ibose mo nou ro ta-nasorotiti dorogora mabu ato. Ina nedi ubauba tanaro ro nou kawakawa se isioidiro pua, nou ro ibose kimibiria urubia Iesu woko emesioidiro ri nagirimo-ou-ri nou ro neio ta-ibeioutiti. Ibose ata kimibiria dubu nou ubi na-iamo iedi apira urubia ro neio kiwarebai aboto, edi dubu ro Dioterepi ro kowagare ie kimibiria urubia dubu patu maumo rido.
11 Namutuna nirimagare ubauba etio ro kisioidiro ra neio imatiouti mamo, etio ro kisioidiro ra meamea tanaro io neio gi-imatiouti-ri. Etio ro isioidiro-dumo meamea tanaro io neio Godi urubia ie. Kaupoti etio ro isioidiro-dumo ubauba tanaro neio ata ia umoro tato ie Godi.
12 Sirio urubia ro aro-dumo ibo, ‘O Demetiri mea dubu e, nou ro meamea tanaro isioidirotiti.’ Ibose nou ro edi morobise tanaro na-isioidiro urubia aboto paea se orowawuti-dumo ibo nou mea dubu e. Mo ibose a-naradabuai kutura ibo, ‘Nou mea dubu e.’ Oro umoro ie mo ro edio owera ro na-niarotiti io morobise owera ie.
13 Mo abato sirio owera tiamo oro kemowauti aboto, kaupoti modobo pua mo ro kisioidiro peba to,
14 mo ubi ie nakara se hio to kou durupi to oro emowauti ri. Modobo ie neitiro atu moro ato mea se komi nato keremowauti.
15 Miro oro abato imese ba-mowamotiti. Neitiro edi namuturubi ro na-orowomidiro nato, oro aboto kamade owera neio ro aiwai-dumo. Kimibiria namuturubi na-orowomidiro oro sabowa ato, mo aboudo ie neio kamade owera erere se ba-dimowauti. Nou se ie.