2
1 Nakere niro goro ato na‑gomidiro, Iawe aboto Iona ro owera iato gutura ibo,
2-9 ‘O Iawe,
Mo oro ro ta‑neherai‑die obo maumo to,
Mo imese nororuo‑die awawo podo mabu to,
Obo maumo ia ato nomidiro, duwoduwo auna ia ie.
Bukopu ro ta‑natarumawado-dumo,
Mo morigiro ro ta‑nemaupotawado‑dumo,
Mo nakara se nimaragoidiro ibo, “Oro aboudo imese ta‑naraseperai‑ro.
Obo maumo dibura rido mo osuruwo‑ri pua.”
Mo gabo tato ie kerereihai, kaupoti gabo oro ro nemowatateai‑die.
Io Iawe,
Mo ubauba ro ta‑norobai,
Pamo karaburai aupise ie,
Pamo aupise nowea, mo kimaragoidiro a‑niwameai‑die oro aboto,
Iawe, oro a‑norumai mo owarebai ri,
oro norumai,
mo kodu oro ro tirowidiro‑die.
Oro Tarena Moto ato na‑omidiro‑die
ioudo oro ro mo edi kararatoro owera ro tirowidiro‑die.
Oro ro nemowameai‑die,
oro ro nowarebai‑die,
Iawe, mo keremiro kaseperai aboudo oro ro nowameai‑die.
Orora na‑irorutiti‑dumo, meana aboudo orowasiotiti‑dumo,
Kaupoti oro ia anama‑emowabutiti‑ri.
Oro Tarena Moto ina anama‑owea‑ri,
karima ohona oro aboto anama‑ematowo‑ri,
Oro aboto beda owera nama‑aro‑ri, mo ro idaibo sosoro anama‑isioidiro‑ri.
Oro nou se ie nimo kiwame dubu.
Nou se ie.’
Iona kararatoro owera ibo garo Iawe aboto, nakere niro goro ato na‑gomidiro.
Iona ro Iawe owera aise gosioidiro
10 Taie netewa didi saiki peteibi na‑goroporeai‑birimo, Iawe ro nakere iato gemowapotai Iona omorowa ri, taie nakere ro nou aise gomorowa koriri to.