10
Iesu ro 72 urubia gitiodorai
1 Abera Naramu Iesu ro urubia owera kimowauti na-goporeai taie nou ro iato giaubai arua 72 urubia, taie sabowa gabogabo to nou ro netewa netewa se gitioduti. Iesu ro neio na-gitioduti nu saro rido nato gou nedi sabowa sirio ro iraturio ri nou owera gabo modobo ato tanaro aise gororosioidiro-rimo.
2 Tauo kebase neio nou ro ibo gimowapotai, ‘Duriomoro gabogabo ato sirio urubia ro eremasebidiro-dumo mo kowasoro aboto. Neio pari ohona sosoro ie gumuni ta-goi-dumo kidoho aboto. Kaupoti kidabuti aboto mea owera kimowauti urubia sipu tato ie. Abera Naramu nu pari abera nou se ie. Ina noudo ie nou aboto ba-dararatoro-mo arua woko urubia nou pari to imerio ri.
3 Abora dasiriai-mo! Kimaragoidiro mutu gi-oroho-ri, nio mo ro kakaba sarupo mino to nimeiriai, ikio toroho-dumo neio se ba-diwaruwo-mo.
4 Ibose nio namadimo-ou-ri namabu iwou ate idaibo mani pauso, keta popo, tamaka, nio toutou se ba-dou-mo. Nio gabo ipi ato etio ro kiwotobowa ra neio mutu owera tuturu tau to eremowauti mamo.
5 Nio ata moto rido kimaidodorai ato ibo gi-outura-ri, “Miro Godi aboudo nedi moto ro nato ba-mowamo.”
6 Ibose miro dubu iedi moto ro iato na-omidiro, iedi miro ro iato aise ama-erediai-ri. Kaupoti iedi moto ro nato miro dubu omidiro tato, iedi miro ro neio abato erediai-ri pua, nio aboto korowameai ie.
7 Nio beda urubia ro kimaidodorai ra edi moto ro iato se gi-omidiro-ri, womu tato iedi sabowa ro nio ro namadime-emeserai-ri. Iedi urubia ro beda dokou ra ohona ra imio-dumo nou se gi-iho-ri. Mabu woko urubia ro arua urubia woko kimesioidiro ato, modobo ie neio wisa kimade nedi urubia ro neio aboudo. Nio modobo pua kororosuwo ata moto rido kosuruwo ina ata moto to kodoro, ibo korowati ubauba ie.
8 Ina nio ata sabowa to na-wou-dumo, urubia ro ioudo na-iramairiai-dioumo, edi urubia ro neio ro nio etou ohona kimia ra aise gi-iho-ri, ibeouti mamo.
9 Ina modobo ie edi sabowa ro nato temeteme urubia meana kiwaititi. Ibose nedi urubia ro nio ro aise gi-itomu-ri ibo Godi edi kiwaboi tanaro ro abora nio aboto aupise ta-gosiomai-die.
10 Kaupoti nio kodoro ato ata sabowa to ina urubia ro imaidodorai tato na-ibeiouti-mo ioudo, nio iato orowomidiro mamo, aise gi-osuruwo-ri gabo bara to edi urubia ro orowomidirotiti neio aboto iato gi-outura-ri ibo,
11 “Nimo ro abora sairo panese a-nipiti-dumo nio umoro koi sapuwo to, ibo nio abato towamo ubauba. Kaupoti nio umoro ba-doi-mo Godi edi kiwaboi tanaro ro aupise towamo nio abato.” ’
12 Ina Iesu ro ata owera iato gemoguai, ‘Nio mo ro umoro owera nimia abora morobise owera ie, koto saiki namadi-ou-ri Godi ro nedi sopu duriomoro urubia ro koto nato ama-iwai-ri. Sodom urubia beda sosoro ubauba isioidirotiti-mo io edio ubauba wisa ro neio ro kainai se amadimi-imidai-ri. Kaupoti nio beda sabowa rido amadimi-ibeiouti-ri, neio ro saiki ata auna ubauba wisa amadimi-imidai-ri.’
Kimibiria tato urubia Iesu ro koko owera gimia
13 Iesu ro ibo kowasoro urubia aboto, ‘Korasini sabowa urubia na-worowomidiro neio ro auna ubauba amadimo-owea-ri, ibose Betesaida sabowa urubia neio iasoperai-ri pua neitiro atu se ubauba emesio-do. Keba se neitiro duriomoro ato idaibo pupuwo korosa tanaro na-nisioidiro, mo ro Taia ra Sidoni ra ato idaibo sosoro pupuwo korosa tanaro kisioidiro rasiri ie, io nedi Godi umoro tato urubia ro samo to ba-gerewesegerai-rimo ubauba aboudo. Ina neio kerekere koropukoropu obotama ba-giroiti-rimo panese to durupi ba-garadiriti-rimo. Neio ro nedi tanaro ro paea se nou ba-gowawea-rimo ibo, “Nimo ubauba aboudo ta-nerewesegerai-dumo.”
14 Auna koto tau namadi-ou-ri Taia ra Sidoni ra urubia beda sosoro ubauba isioidirotiti-mo, io edi ubauba wisa ro neio ro kainai se amadimi-imidai-ri. Kaupoti Korasini urubia Betesaida urubia mutu neio ro saiki ata auna ubauba wisa amadimi-imidai-ri.
15 Ina Kapeniama urubia nio ibo a-imaragoidiro-dumo ra nio Godi ro ama-iwioro-ri ra Adiri sabowa to auna masiro imade ri? Marasio ia ie! Nio pusuru maumo to ama-ioubiri-ri. Nio ata ioudo erereihai-ri pua.
16 Mo kowasoro urubia, nio owera etio ro irowidiro-dumo io mo ia owera irowidiro-dumo. Ina nio etio ro ibeiouti-dumo io neio ro mo nebeiouti-dumo. Ibose mo etio ro nebeiouti-dumo, mo neito etu ro nemeiriai-ro neio ro nou ebeiouti-dumo.’
72 kowasoro urubia Iesu aboto gorowameai-rimo
17 72 Iesu kowasoro urubia sabowa gabogabo to na-goroho-rimo nou aboto kamade mutu gorowameai-rimo. Neio ro beda tanaro gisioidiro-rimo Iesu neio ro iato gemowauti-rimo. Neio ro ibo Iesu aboto, ‘Abera Naramu, oro pupuwo ato ubauba urio nimo owera ta-girowidiro-rimo. Nimo ro karagare owera kutura ato neio aboto, neio urubia aboudo aise kosuruwo ie.’
18 Taie neio Iesu ro ibo gimowameai, ‘Mo ro ibose to nemowotoi-ro Satani Godi ro na-geherai-ro nedi sopu duriomoro ro neito, penenio beda sosoro ra ibo geretei-ro Adiri sabowa rido.
19 Ina owera neito ma-dirowidiro-rimo! Nio pupuwo mo ro mabu ato nimia bagawe nio ro amadimi-ituti-ri, esere mutu. Ibose auna pupuwo korosa nio mo ro ta-nimia nimo nasa dubu Satani edi pupuwo ro kiarumiauti aboto, nio ata nakomu ata ro iari-ri pua.
20 Nio modobo ie auna ia kamade ro kiwati mabu nio masiro Adiri sabowa ato tiamo-die Godi ro ta-gisioidiro nou buka ato. Ina ibose nio owera ubauba urio ro na-irowidiro-dumo nou sapuwo to kamade ro iwati mamo.’
21 Iedi tau ro nato Iesu Tarena Urio ro auna kamade aise gowai, taie nou ro Godi aboto iato garo ibo, ‘Abera, toboro duriomoro gebari mutu imese oro do ie. Mo ro eso owera nutura nedi tanaro ro oro ro modobo ato giwopirowa awawo umoro urubia aboudo. Ina oro ro nedi mea tanaro ro dorogora se urubia aboto giwapotai-ro. Io Abera, oro ro nou ri gisioidiro nedi tanaro ro mabu oro ubi ie nedi tanaro ro kosioidiro aboto.’
22 Ina Iesu kararatoro owera na-goporeai taie nou ro urubia aboto ibo, ‘Mo Abera ro imese umoro, pupuwo korosa mutu mo aboto ta-giaiwai-ro. Urubia umoro pua Godi mere beda sosoro ra, Abera nakara se umoro ie. Ina ibose urubia umoro oi pua Abera Godi beda sosoro ra, Mere nakara se umoro ie. Ina edi urubia aboto nowapotai Abera, io neio umoro ie nu beda sosoro ra.’
23 Taie Iesu na-gerewesegerai kowasoro urubia aboto nakara moro ato owera nou ro iato gimowapotai, ‘Nio dese to meana ta-owea-mo mabu nio simara idomari to tiauri-dumo beda tanaro ro ororosioidiro-dumo.
24 Godi ipusu owera urubia, eputa urubia mutu tagara tau ato na-gorowomidiro neio auna ubi ro ta-iamotiti nedi tanaro ro kiauri aboto, ibose nedi owera ro kirowidiro aboto. Kaupoti nio ro beda tanaro iauri-dumo, neio ro iauri pua. Ibose nio ro beda owera irowidiro-dumo neio ro irowidiro pua.’
Ata dubu Samaria dubu ro gowarebai
25 Ata tau Mose sabi kitamudiro dubu aise gotobowa, nou ubi ie Iesu owaibia ri. Taie nou ro Iesu nato garatoro ibo, ‘Kitamudiro dubu, mo ro womu tato womu tato keremiro beda sosoro nama-owea-ri?’
26 Ina nou Iesu ro ibo gemowameai, ‘Mose sabi patu ato beda sosoro owera ro iamo? Oro ro beda sosoro eremoputititi?’
27 Taie nedi dubu ro nou ro ibo, ‘Mo ro keremoputi ie Mose sabi owera Tarena Buka ato na-iamo, “Godi nirimagare kemati modobo ie morobise giropu to, morobise ubi to, morobise pupuwo to, morobise kimaragoidiro to, imese nou aboto kiaiwai modobo ie. Ina oro ro modobo ie arua urubia nirimagare kimati oro beda sosoro eremati nirimagare nakara se.” ’
28 Taie Iesu ro ibo, ‘Oro ro morobise owera owameai-die, nedi tanaro ro nama-isioidiro-ri oro ro womu tato womu tato keremiro nato ama-owea-ri.’
29 Kaupoti urubia ibo imaragoidiro rie nu mea muro dubu e, nou ro ibo, ‘Arua urubia nirimagare kimati modobo ie. Ina nirimagare mo ro beda urubia kimati ra?’
30 Taie nedi dubu ro Iesu ro ibo gemowameai, ‘Neito ma-dirowidiro-ro. Ata Iu dubu Ierusarema sabowa rido godori-ro Ieriko sabowa to. Ipi ato piro urubia ro nato gowea-rimo, nou iato aise gohiai-rimo, na-gado-rimo, nou edi namabu ro neio ro aise gowasiti-rimo. Nou iato aise gemeserai-rimo sapuwo pamo karima tititi imese gorobu gabo bara ato.
31 Ina iato tuturu to pua Godi ra urubia ra turituri dubu ro godori-ro, nou ro nato gowea iedi dubu ro na-gorobu gabo ato. Nou ro aise gorohodorai kakate moro ato gemowagegere, imese gou simara ubi gabo ato.
32 Ina iato Tarena Moto woko dubu ro godori-ro atu gabo ato. Nou ro edi dubu ro na-gowea karima titi na-gorobu, nou ro ibose to gemowagegere kakate moro ato imese gou simara ubi gabo ato.
33 Ina iato Samaria duriomoro dubu ro godori-ro. Nedi daimodaimo dubu ro nou ro nato gowea nedi dubu ro na-gorobu karima tititi. Nou ro na-gowea nou auna natonato goi nou aboto,
34 ikoni nou ro meresini obo to na-gemowiouti iato gemauputi obotama to. Iedi dubu ro ioudo na-goumai-ro nou ro aise gowomi nou simara doniki ato, taie imese gowou apira urubia kirobuti moto to, nou ro mea se iato gowarebai.
35 Ata kowaroho Samaria dubu ro ibo moto kiauri dubu aboto, “Mani iopu nou e iedi dubu ro kiauri sapuwo to, nirimagare ie mena se ba-diauri. Mo anama-ou-ri simara ubi gabo ato nama-oroho-ri. Mo ioudo korowameai ato oro ro beda mani eherai nou kiauri sapuwo to, oro wisa ioudo kou ato nato namadi-emowameai-ri.” ’
36 Taie Iesu ro ibo Mose sabi kitamudiro dubu aboto, ‘Edi netewa didi dubu peteibi ro neibi oro ro kiauri-bi ato, beda dubu ro gemati nirimagare edio temeteme dubu ro?’
37 Ina Mose sabi kitamudiro dubu ro ibo, ‘Edi daimodaimo dubu ro saro rido na-godori-ro nirimagare nou ro gemati.’
Taie Iesu ro ibo, ‘Ba-dorowameai idaibo sosoro tanaro nou ba-disioidirotiti imese urubia aboto!’
Iesu ro Mata ra Maria ra giraturiomai-ma
38 Ata tau Iesu kowasoro urubia mutu na-goroho-rimo neio imese gou-rimo ata sabowa to. Iedi sabowa to na-gorowateai-rimo ata orobo masiro Mata neio nou ro gimaidodorai-ro nou moto to ou ri.
39 Mata neama mutu e masiro Maria neitiro ibo imidirotiti-do. Iesu Maria ro na-gowea nou aise gomi nou abato. Iesu totomu na-gorowauti nou owera gare se gemedea.
40 Kaupoti Mata nakara se garasaubuti woko na-gisioidiro ina nou masawe mutu nato girario-ro Iesu aboto, nou ro ibo, ‘Abera Naramu Maria etou ememidiro iato mo nakara se narasaubuti woko kisioidiro mutu. Demowapotai mo owarebai ri.’
41 Abera Naramu ro ibo, ‘Ee Mata, natonato ie oro ohona kito siriosirio kimaragoidiro mutu isioidiro.
42 Auna tanaro kaupoti nou e. Maria ro mea tanaro osioidiro, mo owera kirowidiro aboto ata ro odiobo ri pua.’