11
Iesu ro kararatoro sapuwo to gitamudiro
1 Ata tau Iesu ata moro ato Godi aboto nato gararatoro, kararatoro owera na-goporeai, taie ata kowasoro dubu nato gou-ro nou aboto. Nou ro ibo, ‘Abera Naramu, Ioane obo to kiwarumiauti dubu nou simara kowasoro urubia kararatoro owera beda sosoro to gitamudiro, ina nimo oro ro idaibo sosoro kararatoro owera ma-ditamudiro-ro.’
2 Ina neio Iesu ro ibo gimowapotai, ‘Nio Godi aboto kararatoro ato ibo gi-araratoro-ri, “Nimo Abera Godi oro masiro sirio urubia ro ba-memowabu-mo mabu oro Godi ie. Ina oro ro kiwaboi tanaro maumo ato, imese sirio urubia ba-mirowomidirotiti.
3 Saiki gabogabo ato, oro ro modobo ie nimo ohona simara modobo ato kimio.
4 Nimo ia ro woki beda sosoro to nimatiti-dumo arua urubia ro ubauba na-isioidiro-dumo nimo aboto, ina nimo ro ubauba na-nisioidiro-dumo oro ro modobo ie nimo idaibo sosoro kimatopeamuti. Koko kiwaibirio tanaro aboudo, oro ro modobo ie nimo kiwagarewado.” ’
Sirio tau Godi aboto aise gi-araratoro-ri
5 Iesu ro kowasoro urubia nedi totomu ro nou gimowauti. ‘Etu umoro ra nio ata, duwo turi ato namutuna moto to na-wou ohona ri nato na-wararatoro ibo, “Namutuna mo modobo ra oro ro netewa didi dokou itaina peteibi to kowarebai?
6 Mabu mo ata namutuna dese to orowateai-die, ata nakomu ata mo abato owamo pua nou emitai na.”
7 Ina oro namutuna ro ibo na-emowameai-die, “Etou ri aramututi-die moto magere ta-nemakoko, mo norou e merebusere mutu, keribua pua.” ’
8 Iesu ro ibo, ‘Nio mo ro a-nimowapotai ibo, oro namutuna nirimagare ri keribua tato, oro edi korowararo ro nu nou ro kowoubua ie, oro beda ubi nakomu ri orowaro nou ro komia ie, mabu oro siripo owamo-ri pua.
9 Ina noudo ie nio mo ro ibo mimowapotai-ro, Auna se dorowaro-mo nio ubi nakomu Godi ro kimia ie. Diosora-mo nio ro nato amadimi-iwia-ri. Magere damo ato kohe to auna se dorowapotaidiro-mo, magere nio aboto nato amadimo-orodobuti-ri.
10 Etio ra auna se na-irowaro-dumo neio ro aise amadimi-imade-ri. Etio ro amadimi-iosora-ri neio ro aise amadimi-iaurititi-ri. Magere ato etio ro ipogutititi-dumo neio aboto magere amadimo-orodobuti-ri.
11 Abeamio nio merebusere nakere ri na-orowaro-dumo, nio ata ro neio bagawe kimia ra?
12 Ibose kakaba iopu ri na-orowaro-dumo nio ro esere kimia ra? E e, nio ro idaibo tanaro isioidiro-ri pua.
13 Nio imese ubauba urubia ie. Kaupoti nio auna umoro ie merebusere aboto meamea nakomu kiaiwo. Ina nio Abera Godi Adiri sabowa ato na-omidiro-die nu mea tanaro dubu e. Nio korowaro ato, nou ro Tarena Urio kemeiriai ie nio aboto.’
Iesu edi pupuwo ro Godi aboudo ie
14 Ata tau Iesu ro ubauba urio ata dubu aboudo nato gemabodorai, iedi ubauba urio ro owera karo pua. Iedi ubauba urio ro na-gosuruwo-ro iedi owera karo tato dubu ro nou aboudo, iato nou owera aise gutura. Iedi topira ro gorobu neio ro na-gowea-rimo nedi tanaro ro na-gororosioidiro, neio iato aborabora ro girobai.
15 Kaupoti arua urubia ro ibo garo-rimo, ‘Iesu iedi pupuwo korosa ro Beresebu ro omio-die, nu ata masiro Satani. Nu edi ubauba urio sirio ro neio auna eputa dubu e. Nou edi pupuwo korosa ro ubauba urio urubia aboudo neito imabodoidirotiti.’
16 Arua urubia neio ubi a-giamo Iesu neio ro owaibia ri, taie nu neio ro nato gararatoro-rimo ibo, ‘Nimo ubi ie kiauri ata pupuwo korosa tanaro ata ba-dosioidiro nimo umoro koi aboto ibo oro edi pupuwo korosa ro Godi aboudo ie.’
17 Kaupoti neio maumo Iesu ro keba se ta-gimowea neio beda sosoro gimaragoidiro-rimo. Taie neio Iesu ro ibo gimowapotai, ‘Kaupoti duriomoro urubia turi ato na-warapepea-dumo boso nato na-eremedea-do neio nasanasa to korowomidiro ie, neio namabu imese keremoweisiamo ie, ata nakomu ata eremeserai-ri pua. Ibose atu moto urubia turi ato na-warepepea-dumo neio imese korohoduti ie oroworohuti-ri pua.
18 Ina idaibo sosoro ie Satani urubia turi ato na-warapepea-dumo, nato na-warado-dumo, Satani urubia ro kemedio ra? E e, neio ro emedio-ri pua.
19 Nio ibo aro-dumo mo ro Beresebu edi pupuwo korosa ro ubauba urio neito nimabodoidiro. Kaupoti mo ro Beresebu edi pupuwo korosa ro ubauba urio neito kimabodoidiro rasiri ie, ina nio edi patu urubia ro ubauba urio urubia aboudo etu pupuwo korosa to kimabodoidiro ra? Nio edi woko urubia ro neio ro tiwapotaidiro-dumo ibo nio karasaubuti urubia ie.
20 Kaupoti mo ro ubauba urio Godi edi pupuwo korosa ro neito na-nimabodoidiro Godi edi kiwaboi tanaro ro nio aboto ta-gorowateai-die.
21 Ata pupuwo dubu moto kemotoi ato, nou namabu sirio modobo ato kiamo ie, ata dubu ata ro emowadaudiro-ri pua.
22 Kaupoti auna ia pupuwo dubu nato na-orowateai-die, edi dubu ro nu edi boso namabu sirio ro nou ro kowasiti ie, ibose nou moto rido namabu sirio kiwosuwoduti ie iato urubia kimio ie. Mo ro ubauba urio urubia aboudo ibo nimabodoidirotiti.
23 Etio ra mo mutu woko atu se isioidiro tato, iedi urubia ro mo woko ubauba neio ro nemowaititi-dumo. Etio ra Godi aboto urubia kiroru tato mo sosoro, nedi urubia ro neio ro Godi aboudo iburutawado-dumo.’
Ubauba urio ina korowameai ato
24 Iesu ro ibo, ‘Ubauba urio kosuruwo ato urubia dubu aboudo nou koroho kawa koroho ie obo tato moro ato, komidiro moro kosora ie. Ina nou ro komidiro moro kowea tato nu kimaragoidiro to ibo, “Mo ro edi moto ro keba se na-nemeserai modobo ie mo ina ito korowameai.”
25 Taie nou ioudo na-orowameai-die edi moto ro mea mino to kotoi ie namutuna ro kotobiti ie ina namabu mena se kimododiawado ie.
26 Taie nou borubi 7 urio iato kidabuai ie, ina neio imese ubauba ia ie, ibo pua keba se edi ubauba urio ro gomidiro nou sosoro. Taie neio atu se imese kodoro ie edi mea moto ro neito, ina edi dubu ro keba se modobo ato omidiro pua, ina abora imese ubauba ia ie, ibo pua keba se beda mino to gomidiro.’
Iesu ro morobise pupuwo korosa sapuwo to gitamudiro
27 Iesu ro nedi owera ro na-gimowauti, ina ata orobo owera mutu soirio rido nato gereihidiro-ro, nou ro Iesu nato gorumai, ‘Oro mamu korosa Godi ro ba-momia oro nou ro goroto ina nou nono gidio.’
28 Kaupoti edi orobo ro Iesu ro ibo gemowameai, ‘E e idaibo gutura, etio ro irowidiro-dumo Godi edi owera ro ina nou durupi to na-isioidiro-dumo, mea korosa neio abato ama-owamo-ri.’
Urubia ubi ie Iesu ro ata pupuwo korosa tanaro kosioidiro
29 Iesu aboto urubia ina ina goroho-rimo, taie urubia nou ro paea mata se gimowapotai ibo, ‘Nio abora na-orowomidiro nio auna ubi ie imese ubauba tanaro kisioidiro. Nio ubi ie pupuwo korosa tanaro kiauri. Kaupoti mo ro ata auna pupuwo korosa tanaro ata osioidiro-ri pua nio ro kowea sapuwo to. Kaupoti Iona aboto beda tanaro ro gororosioidiro io nou se ie nio ro nou amadimo-owea-ri.
30 Iona aboto beda tanaro gororosioidiro-rimo Niniba urubia umoro na-goi-rimo, taie neio ro ibo, “Iona ro edi owera to gimowauti Godi aboudo ie!” Mo Imese Urubia Kiauri Dubu e, idaibo sosoro tanaro mo aboto amadi-ororosioidiro-ri. Ina urubia abora na-orowomidiro neio umoro amadimo-oi-ri ibo mo Godi aboudo ie.
31 Tagara tau ato eputa orobo Siba duriomoro rido gou-ro nu imese muso ia moro rido gou-ro, Soromoni edi muro owera ro irowidiro ri. Soromoni nu muro mutu imidirotiti, kaupoti mo muro ohu ato owamo. Soromoni muro sopu to owamo-die. Kaupoti nio ubi tato ie mo muro owera kirowidiro. Ina nou mabu ato ie nio abora na-orowomidiro nio atu se Siba eputa orobo mutu ama-iwoubua-ri koto saiki ato, taie nio Siba eputa orobo ro nato ama-iapoi-ri ibo, “Nio imese ubauba urubia ie.”
32 Keba ia tau ato Niniba urubia Iona ro Godi owera na-gimowauti ubauba aboudo aise gerewesegerai-rimo. Kaupoti ata dubu tomidiro nato nu Iona sosoro pua, nu imese auna ia ie. Ina nio ubi tato ie kerewesegerai ubauba aboudo. Ina nou mabu ato ie nio abora na-orowomidiro nio Niniba urubia mutu atu se ama-iwoubua-ri koto saiki ato. Taie nio neio ro nato amadimi-imowapotai-ri ibo, “Nio imese ubauba tanaro kisioidiro urubia ie.” ’
Pina kiriware modobo ie oro abato
33 Iesu ro urubia totomu ibo gimowauti, ‘Ata dubu ro erempa na-owateai nou ro ata nakomu to owasiai-ri pua, nou ro edi erempa ro kenene ato kakokai ie, urubia ro mea se kiauri aboto.
34 Oro idomari pina beda sosoro ra oro ibo ie durupi mea mino to kowaboi aboto. Oro idomari teibo mea se na-irarowo oro durupi mea mino to kowaboi ie. Kaupoti oro idomari teibo timotimo se kiamo-ma ato oro durupi duwoduwo maumo ato ibose to ama-owaboi-ri.
35 Ina noudo ie oro modobo ie mea mino to keremododiai, oro edi erempa ro na-iriware oro abato korodoia modobo pua, ina oro durupi duwoduwo nou ro kowai ie.
36 Ina ibose oro durupi ato pina sapuwosapuwo na-iriware-dumo ata duwoduwo tato ie. Oro abato pina kiriware ato, ata nakomu to emopai tato, iedi pina ro erempa sosoro mea mino to kimewiti ie.’
Iesu ro Parasi urubia serawo giwia sabi kitamudiro urubia mutu
37 Iesu ro totomu kimowauti na-goporeai, taie nu ata Parasi dubu ro nato garamairiai-ro nou moto ato iho ri. Taie Iesu neido na-godoro keta ato aise gomi,
38 Iesu nou ro ta-gowea tu kiwiouti tato na-gomi ohona iho ri, nu iato boroboro ro gorobai.
39 Taie Iesu ro ibo edi Parasi dubu ro nou aboto, ‘Nio Parasi urubia panikere ra mereki ra ohu iremowioutiti-dumo, kaupoti nio maumo imese ubauba ia ie nio namabu aboto auna ubi ie.
40 Nio imese meana pua, kawakawa urubia ie. Nio umoro a-iamo ra ibo, Godi ro gisioidiro-ma ohu ra maumo ra?
41 Nio edi namabu ro na-iworohuti-dumo, nio ro namadimi-imio-ri namabu tato urubia, iedi tau ro nato nio marea tato amadimo-oi-ri.’
42 Iesu ro ibo nedi Parasi dubu ro nou aboto, ‘Parasi urubia auna ia ubauba nio aboto ama-ereredea-ri. Mabu nio auna se imaragoidirotiti-dumo Godi sapuwo kere komio idaibo koromeamata kainakaina ibose pari namabu mutu. Nio ro arua urubia aboto tuputupu tanaro kisioidiro pua. Ibose Godi nio ro nirimagare kemati pua. Kainakaina tanaro nio ro tisioidiro-dumo, kaupoti awawo tanaro imesere mamo, aise gi-isioidiro-ri!
43 Parasi urubia nio ubauba maumo to iraumo-dumo nio auna ubi ie keba moro kimaberawado karadabu moto ato. Nio auna ubi ie urubia nio mutu kidabuti maketo moro ato.
44 Kaupoti nio pamo urubia bobo sosoro ie, urubia kotoburio moro ieibimo pua, neio nakara se marea neito irowaititi-dumo.’
45 Mose sabi kitamudiro dubu ro Iesu ibo gemowameai, ‘Kitamudiro dubu, nimo ibose oro ro ubauba ta-niwai-ro.’
46 Iesu ro ibo, ‘Mose sabi kitamudiro urubia, auna ia ubauba nio aboto ama-ereredea-ri. Urubia nio ro auna mibo imotomo-dumo, kaupoti nio ro ata tu ata iaiwo pua neio toutou kiwai sapuwo to.
47 Auna ubauba nio aboto ama-ereredea-ri. Godi edi ipusu owera urubia ro neio bobo ato nio ro keremasoro nakomu iwotoburio-dumo. Keba tau ato Godi edi ipusu owera urubia ro nio nasaio ro giesu-rimo.
48 Ina abora nio ro nou iwotoburio-dumo nio eremasoro na nio nasaio ro beda tanaro gisioidiro-rimo. Neio ro mea tanaro kisioidiro rasiri ie, Godi owera nato ba-gimibiria-rimo. Kaupoti neio ro Godi owera imibiria pua.
49 Godi ia nu simara muro owera nakara se gowapotai-ro, “Nio aboto anama-imeirio-ri mo ipusu owera urubia. Nedi urubia ro arua Iu urubia ro amadimi-iopiauti-ri, ina arua neio ro ubauba mino to amadimi-iworohuti-ri.”
50 Ina abora nou e, nio etio ro orowomidiro nedi tau ro nato, auna ubauba nio aboto amadimo-ororosioidiro-ri, nio ro auna ia ubauba wisa amadimi-imidai-ri. Keba tau ato Godi ipusu owera urubia ta-giesu-rimo owera neio sapuwo to ibo ie,
51 Eiboro keba se gesuai ioudo mororuwo-ro womu tato Sekaraia ti-gesuai-rimo. Sekaraia Tarena Moto, kiwoubua nakomu patapata, neitiro turituri ato gopia-rimo. Io morobise ie nio abora etio ro orowomidiro nedi urubia ro na-giopiauti-rimo neio sapuwo to nio ubauba ia wisa amadimi-iwia-ri.
52 Mose sabi kitamudiro urubia, auna ia ubauba nio abato ama-ereredea-ri. Gabo nio ro ta-gopai-rimo urubia ro Godi mea se kowea aboto, kaupoti nio neito odouti-ri pua ibose arua urubia mea karatamudiro moro rido gabo nio ro neito imoputi-dumo.’
53 Iesu ro nedi owera karo na-goporeai nou ou rie, Mose sabi kitamudiro urubia Parasi urubia mutu neio serawo mutu koko ta-goi-rimo, serawo to gemodoruti-rimo.
54 Neio ubi ie Iesu ro ata ubauba owera ata utura ri taie nato owou rie koto aboto.