13
Ubauba aboudo derewesegerai-mo
1 Iedi tau ro nato arua urubia na-gorowotoi Iesu abato, neio ro ibo nou aboto, ‘Amia Gariri urubia Paireti boso urubia ro ta-giopiauti-dumo. Neio Tarena Moto ato dao gimatowo-rimo Godi aboto. Ina neio edi karima ro kiwoubua namabu karima mutu goto to atu se giroruwo-rimo.’
2 Iesu ro neio ibo gimowameai, ‘Nio ro ibo a-imaragoidiro-dumo ra nedi urubia ro pamo na-gowea-dumo neio auna ubauba tanaro kisioidiro urubia ie? Ina arua Gariri urubia neio ro ubauba kisioidiro pua?
3 Marasio nou mabu rido pua. Nio mo ro a-nimowapotai, nio modobo ie morobise to kerewesegerai ubauba aboudo. Nio kerewesegerai tato, nio ro pamo ibose to amadimi-iaurititi-ri.
4 Ina ohu moto na-geresebuti, 18 Ierusarema urubia pamo ta-giwia-rimo Siroama ato. Nio ibo a-imaragoidiro-dumo ra neio auna ubauba tanaro kisioidiro urubia ie? Ina arua urubia Ierusarema sabowa ato neio ubauba kisioidiro pua?
5 Marasio! Nio ibo nimowapotai morobise to derewesegerai-mo, ina nio kerewesegerai tato nio pamo ibose amadimi-iaurititi-ri.’
Pigi ota iopu tato ie
6 Urubia Iesu ro nedi totomu ro nou gimowauti, ‘Ata pari kisioidiro dubu ro pari ato keba se pigi ota ta-garo edi ota ro auna ta-goi. Ata tau pari abera ro edi pigi ota ro nato garaturiomai, nou ubi ie pigi iopu idoho ri. Kaupoti edi pigi ota ro noudo iopu iroridiro pua.
7 Taie pari abera ro ibo pari woko dubu aboto, “Nedi pigi ota ro sirio tau to naraturio-die 3 kisimisi ta-giporeai-bi kotoi kawa kotoi, puara patupatu iopu tato. Tau se naro mo ro, abora iopu kiasesuti tau e, marasio ba-deba sogosogo se otoi. Goto bobo nou ro tima se owasiouti arua ota iopu kibouti sapuwo to.”
8 Kaupoti pari edi dubu ro emeaurititi, nou ro ibo pari abera aboto, “Auna dubu tau se eba ate buro, kaupoti kisimisi to ma-motoi tauo. Iopu hata ama-iasesuti-ri, goto anama-emowoiti-ri ibose momoso sugamuso mutu anama-emaremuti-ri iopu hio to kiasesuti sapuwo to.
9 Ota iopu ata kisimisi ato nama-iasesuti-ri, io modobo ie ba-motoi eba ri pua, kaupoti iopu kiasesuti tato marasio nato aise ba-mereba.” ’
Komidiro saiki ato Iesu ro bigi temeteme orobo meana gowai
10 Iu urubia komidiro saiki ato Iesu karadabu moto ato gitamudiro.
11 Edi moto ro nato ata orobo iato ta-gomidiro nu ubauba urio ro na-emorohotiti-ro temeteme nou ro omiotiti. Nou mea se irohotiti pua kiraposowa se irohotiti, bigi kemotuputai aboto modobo pua. Nou ro 18 kisimisi ta-giporeai edio temeteme ro nou ro kowati.
12 Taie edi orobo ro Iesu ro na-gowea, nou ro aise garamairiai-ro. Nou ro ibo, ‘Urubia orobo oro temeteme aboudo modobo ta-woi.’
13 Taie Iesu tu teibo nou abato aise giedea-ma, nou bigi iato aise geremotuputai. Iato nu na-geremasibai ibo mo meana ta-noi, taie Godi nou ro iato gemowaibiti.
14 Iu urubia karadabu moto kiauri dubu auna ia serawo goi Iesu ro edi tanaro na-gosioidiro, Iu urubia komidiro saiki ato. Iedi dubu ro urubia aboto aise gerewesegerai, nou ro ibo, ‘Nio ro modobo ie arua 6 saiki na-iamo woko nato kisioidiro idaibo temeteme urubia meana kiwaititi aboto, ibo pua komidiro saiki ato. Nio ro neito iworoho mamo komidiro saiki ato durupi meana kiwaititi sapuwo to. Mabu nu woko ie, ina komidiro saiki ato, woko modobo pua kisioidiro, sabi ie!’
15 Nedi dubu ro Abera Naramu ro ibo gemowameai, ‘Nio imese karatigi urubia ie! Nio ata ro idomari to kiauri ra burumukau o doniki obo sogoi se na-wotoi saiki tuturu komidiro saiki ato? Nirimagare oro kou e nu hodo kemopurutai ie taie aise kowaboi ie obo kidio moro to.
16 Nedi orobo ro meana nou ri nowai mo ro, mabu nu Aberaham orora ie, nu Satani ro ta-gemotohiti 18 kisimisi to imidirotiti. Ina iedi orobo ro mo ro kemopurutai modobo ra nedi komidiro saiki ro nato?’
17 Iesu ro nedi owera ro karo na-goporeai odio urubia ro gowea-rimo nu masawe neio iato siripo aise goi-rimo. Kaupoti iedi topira ro iato na-gorowomidiro neio auna ia kamade ro giwati, Iesu ro beda meamea tanaro sirio gisioidiro nou sapuwo to.
Totomu masitadi ota iopu sapuwo to ie
18 Iesu ro a-gutura ibo urubia aboto, ‘Godi ro kiwaboi tanaro beda sosoro ra? Mo ro beda sosoro to nama-emabuti-ri?
19 Masitadi ota iopu urubia dubu ro na-waro pari ato auna beda sosoro koi ra, Godi ro kiwaboi tanaro idaibo sosoro ie. (Masitadi mirie iopu sosoro ie, kainakaina ia ie.) Iedi ota iopu ro kosuruwo ato auna ota to kararapoi ie. Nou atemo na-iheruti iato tumu pawa ro na-owea-dumo neio ota atemo ato toto aise keremari ie.’
Totomu isiti parowa sapuwo to
20 Iesu ro ina neio ibo gimowapotai, ‘Godi ro kiwaboi tanaro mo ro nio aboto beda sosoro to anama-emabuti-ri?
21 Nou idaibo sosoro kororosioidiro ie urubia orobo ro auna parowa na-emagagai iato isiti panese kainai mutu iato kowagobeidiro ie. Taie edi parawa ro kainai se aupai-ri pua, auna ia se kaupai ie.’
Magere kurukuru e Godi ro kiwaboi tanaro maumo to
22 Iesu Ierusarema sabowa to na-gidiai, ipi gabo ato edi sabowa ro na-giamo nou iato ta-gararaperewado urubia iato ta-gitamudiro.
23 Taie Iesu ata dubu ro nato gemodowa, ‘Auna dubu, Godi ro sipu tato urubia se amadi-iapopo-ri ra?’
Iesu ro nou ibo gemowameai,
24 ‘Godi ro kiwaboi maumo to magere kurukuru e. Nio pupuwo diasibai-mo ito kodouti aboto, mabu magere kurukuru e. Sirio urubia ro pupuwo amadimi-iasibawado-ri kodouti aboto, kaupoti neio modobo pua.
25 Saiki ata moto abera ro magere aise ama-opai-ri. Nio goto araradi ato beda urubia ro orowotoi magere nio ro ioudo amadimo-ohoiouti-ri ibo amadima-aro-ri, “Auna dubu, nimo magere dimodobura-ro.”
Kaupoti nio nou ro ibo ama-imowameai-ri, “Nio mo urubia pua, nio mo mutu idabutiti pua.”
26 Ina nio ro nou ibo amadime-emowameai-ri, “Oro umoro ie nimo! Ibose nimo oro mutu ohona ta-nihotiti-mo. Nimo sabowa ato oro ro mea owera ta-nitamudirotiti.”
27 Kaupoti nu ibo amadi-utura-ri, “Nio mo urubia pua, nio mo mutu idabutiti pua. Hio to neido daragare-mo! Nio auna ubauba tanaro kisioidiro urubia ie!”
28 Godi ro kiwaboi tanaro maumo ato Aberaham, Aisaki, Iakobo nio ro sosoro amadimi-iwia-ibiri. Ibose Godi ipusu owera urubia neio sosoro nio ro amadimi-iwia-ri. Kaupoti nio temeteme idobi kiriri kiriri beda buro amadime-emarotiti-ri. Mabu iedi tau ro nato Godi ro kiwaboi tanaro maumo rido nio nou ro nato amadi-iherai-ri.
29 Godi ro kiwaboi tanaro maumo ato nou ro auna soriomu ama-osioidiro-ri ina urubia erere duriomoro rido amadidimo-oroho-ri. Arua urubia saiki boido idiowado-die, arua urubia saiki beda moro to orioduti, arua urubia sie boido aro-die, arua urubia nigori boido aro-die, neio ioudo amadidimo-ou-ri nedi soriomu ro nou aboto.
30 Gare neito ma-diedea-rimo! Abora etio ra sopu ato na-orowomidiro neio Godi ro ohu to ama-iwoubua-ri. Ina etio ra abora ohu ato na-orowomidiro neio Godi ro sopu to amadi-iwororuo-ri.’
Iesu ro Ierusarema urubia gimohoio
31 Iedi atu tau ro nato arua Parasi urubia nato gou-rimo Iesu aboto neio ro ibo, ‘Oro ro nedi duriomoro ro demeserai-ro ata duriomoro to ba-dodau mabu oro Herodi ro opia ri emediawado.’
32 Iesu ro na-girorowai nedi owera ro nou ro ibo neio aboto, ‘Ba-dou-mo edi serawo tumu soka ro demowapotai-mo ibo, “Nedi saiki ro, ina kowaroho mo nedi woko ro nou nama-osioidiro-ri. Urubia aboudo ubauba urio nama-imabodoidiro-ri. Ibose ubauba temeteme ro beda urubia iwati nedi urubia ro mo ro meana nama-iwaititi-ri.”
33 Ina saiki ata mo Ierusarema sabowa to nato nama-ou-ri. Modobo pua Godi ipusu owera dubu erese moro ato kopia, nou Ierusarema ia ato kopia modobo ia ie.
34 Nirimagare babio, Ierusarema urubia nio ro iopiautiti-dumo Godi ipusu owera urubia, arua neio nio ro nadi to iopiautiti-dumo. Mo ro sirio tau nio ubi ti-nemamotiti mo asesepu maumo ato iwomidiro ri, beda sosoro ra mamu kakaba ro kainakaina na-iohidiro tamu maumo ato. Kaupoti nio ubi tato ie mo asesepu maumo ato korowomidiro.
35 Ina noudo ie ma-dowea-mo, nio arua urubia ro anamadimi-iburutai-ri, moto imedio-ri pua. Nio mo ro morobise owera nama-imowapotai-ri mo sosoro nio ro iauri-ri pua womu tato ata tau nama-ereredea-ri mo aboto nio ro nato amadimu-utura-ri, “Godi ro korosa ta-gomia, Abera Naramu pupuwo mutu. Oro nou se tou-die, korosa towamo oro abato.” ’