14
Temeteme dubu Iesu ro sipere saiki ato gowai meana
1 Ata Iu urubia komidiro saiki ato, Iesu ata Parasi auna dubu ro garamairiai-ro ou ri nou moto ato iho ri. Iesu ro beda tanaro gisioidiro, nu urubia ro idomari to gemaipirio-rimo. Neio ubi ibo giamo nou ro ata sabi ata esebea ri, taie neio ro nu nato orobai rie.
2 Ina Iesu sosoro gabo ato, ata dubu tu ra sairo ra ta-giaupai-rimo, nou temeteme mutu gomidiro.
3 Taie Iesu ro Mose sabi kitamudiro urubia, Parasi urubia mutu, neio nou ro nato gimodowa ibo, ‘Sabi ra temeteme urubia nimo komidiro saiki ato meana kiwaititi?’
4 Iesu neio ata ro emowameai pua. Iesu ro iedi temeteme dubu ro na-gowoubuwa-ro meana aise gowai, meana na-gowai taie iato gemeiriai simara moto to.
5 Ina Iesu ro atu urubia ina nato gimodowa, ‘Oro mere boinana o burumukau obo bobo to na-eretei nimo komidiro saiki ato, oro ro idomari to kiauri ra o keihai ra ioudo? E e oro ro idomari to iauri ri pua, keihai ie.’
6 Taie neio ro na-girorowai-rimo nedi owera ro neio ata ro nou owera kemowameai modobo pua.
Oro nakara se modobo pua auna to kararasoro
7 Soriomu abera ro edi urubia girumai ohona nou mutu iho ri, nedi urubia ro Iesu ro na-giwia neio meana komidiro moro se girobai-rimo, Iesu ro nedi totomu ro nou mabu rido gimowauti.
8 ‘Ata dubu ro na-wararemai marete soriomu, ina oro nato na-worumai-die, oro modobo pua auna dubu komidiro moro ato komi. Mabu ata auna masiro dubu korumai ie soriomu abera ro, nou oro mutu atu sosoro pua.
9 Nitiro edi dubu ro girumai-ma, nou ro ibo ama-utura-ri oro aboto, “Nedi komi moro ro demeserai-ro nedi dubu ro nou ro ama-omi-ri nato, oro sopu to dororuwo. Taie oro ioudo siripo mutu amadi-eribua-ri sopu ato ama-omi-ri.
10 Oro soriomu abera ro korumai ato, dorogora urubia beda moro ato irowomidirotiti iato komi modobo ie, mea komidiro moro emarario mamo. Ina soriomu abera oro aboto kou ato oro nou ro ibo kemowapotai ie, ‘Namutuna neito dioidiro-ro nato domi-ro.’ Ina oro arua urubia ro namadimo-owea-ri soriomu abera ro mea komidiro moro ato nama-owomi-ri, oro masiro auna aise ama-oi-ri soriomu urubia sirio sosoro gabo ato.
11 Abora awawo to nakara se etio ro ararasoro-dumo neio saiki ata Godi ro sopu to ama-iwororuwo-ri. Kaupoti nedi tau ro nato etio ro ararasoro-dumo dorogora se urubia to, saiki ata neio Godi ro awawo masiro ama-imio-ri.” ’
12 Iesu edi dubu ro gorumai-ro ohona iho ri nou aboto iato gutura ibo, ‘Oro soriomu kisioidiro ato oro ro modobo pua simara urubia, oro gu urubia, oro namuturubi, ibose etio ra namabu sirio mutu neio kiroru soriomu ohona kiho aboto. Ata tau nedi urubia ro neio ata ro soriomu nama-osioidiro-ri oro wisa neio ro amadimo-orumai-ri soriomu ohona iho ri neio mutu.
13 Oro soriomu kosioidiro ato namabu tato urubia, sairo ubauba urubia, temeteme urubia, idomari pogo urubia, idaibo sosoro urubia neio gi-iroru-ri.
14 Ina oro Godi ro korosa neio sapuwo to amadi-owai-ri. Mabu idaibo sosoro urubia ro modobo pua soriomu kosioidiro aboto, oro wisa neio ro emowameai-ri pua. Kaupoti, saiki ata neio kirumai sapuwo to soriomu aboto, oro wisa Godi ro ama-emowameai-ri. Mea tuputupu urubia keba se etio ro gorowaburo-rimo neio Godi ro pamo rido beda tau ato namadi-iwameai-ri, oro ro beda urubia giwarebai neio sapuwo to oro wisa nou ro nato ama-emowameai-ri.’
Totomu auna soriomu sapuwo to ie
15 Iesu ro edi totomu ro na-gorowauti ata dubu ro na-girowidiro nou ro ibo Iesu aboto, ‘Godi ro edi soriomu nama-osioidiro-ri Godi ro kiwaboi tanaro maumo ato edi urubia ro namadimi-iho-ri edi ohona ro neio auna kamade ro ama-iwati-ri.’
16 Ina edi dubu ro Iesu ro ibo gemowameai, ‘Totomu ibo owamo. Ata dubu ro auna soriomu nato gemeriai nou ro sirio urubia nato giroru ou ri iedi soriomu ro nou aboto.
17 Soriomu kosioidiro tau na-gorobai soriomu abera ro sowake dubu nato gemeiriai nou ro kirapoi urubia ou ri nedi soriomu ro nou aboto. Sowake dubu ro ibo, “Awawo urubia, nio dou-rimo ohona ta-imododiai auna dubu ro.”
18 Kaupoti nedi kiromai urubia ro owera siriosirio garo-rimo. Keba dubu ro ibo gutura, “Nirimagare mo goto kere dese to nomidai ina nou nama-owaseidiro-ri. Nirimagare auna dubu ba-demowapotai ibo mo ou-ri pua.”
19 Ina ata dubu ro ibo, “Mo 10 burumukau dese to nimidai ina neio nama-iwaibirio-ri. Nirimagare auna dubu ba-demowapotai mo ou-ri pua.”
20 Ina ata dubu ro ibo, “Mo orobo dutu ata nedea, nirimagare auna dubu ba-demowapotai mo ou-ri pua iedi soriomu ro nou aboto.”
21 Taie iedi sowake dubu ro imese gorowameai iedi urubia ro beda sosoro owera garo-rimo nou ro auna dubu iato gemowauti. Auna dubu ro na-girorowai nedi owera ro nu auna ia serawo ro gorobai. Taie nou ro ibo, “Ba-dorowameai ina gabo bara ato dorogora se urubia na-orowomidiro neio ioudo ba-dirobo-ro. Namabu tato urubia, sairo ubauba urubia, temeteme urubia, idomari pogo urubia, neio se ba-dirobo-ro.”
Taie edi sowake dubu ro aise gaimai auna dubu owera gabo modobo, nou ro iato girobo-ro edi urubia ro imese giwodoro nou moto goro to.
22 Tau egea mere se gororoporeai sowake dubu ro ibo, “Auna dubu oro owera gabo modobo urubia mo ro ta-niwou-ro torowomidiro moto goro ato, kaupoti moto bobo momuo se towamo urubia sipu tato ie moto irotomuai pua.”
23 Taie auna dubu ro ibo, “Ba-dedei sabowa tirobu-die tumu ato urubia iato torowomidiro neio ba-didabuai-ro mo moto kirotomuai sapuwo to.
24 Nio mo ro ibo mimowapotai-ro keba se mo ro beda urubia nirumai neio ata ro iedi soriomu ohona ro otopai-ri pua.” ’
Iesu ubi tanaro disioidiro, simara ubi tanaro huru dimowou
25 Iesu saro rido sirio urubia ro gowasoro-rimo, taie nou ioudo na-girimeterai-ro nou ro ibo neio aboto,
26 ‘Nio ubi na-iamo mo kowasoro aboto, nio modobo pua auna se kimaragoidiro simara abeamio aboto, mamio aboto, upi aboto, merebusere aboto, naramio, mabiamio aboto. Ina nio ia simara keremiro na-eremaragoidiro-dumo mo aboto imaragoidiro tato, io nio modobo pua mo kowasoro urubia to kararasoro.
27 Modobo ie saiki gabogabo ato Godi ubi tanaro se kemesioidiro, ina karaburai nou sapuwo to, io modobo ia ie. Iedi tanaro ro nio ro kisioidiro tato, io nio modobo pua mo kowasoro urubia to kararasoro.
28 Ina nio ubi na-iamo koikoi moto kididi aboto nio ro keba se kimaragoidiro to kididi ie beda mutu ota amadimi-iaremuti-ri edi moto ro koporeai aboto. Nio ro idaibo tanaro kisioidiro tato etu umoro ra nio ro posi kawakawa amadimi-iahuti-ri, edi moto ro kididi to nio ro oporeai-ri pua.
29 Ina urubia ro namadimi-iauri-ri edi moto ro posi kawakawa nama-orowotoi-ri nio neio ro gaga amadimi-imororouti-ri.
30 Neio ro ibo amadima-aro-ri, “Nedi urubia ro ota modobo iwai pua, moto katamuai kawa gatamuai-rimo, modobo pua koporeai aboto.” ’
31 ‘Ata eputa dubu boso gowou-ro ata eputa dubu aboto. Boso edi eputa dubu ro gowou-ro nu 20,000 boso koroho urubia mutu e. Boso edi eputa dubu aboto na-gowou-ro, nou boso koroho urubia 10,000 kawakawa ie. Nou umoro ta-goi ibo nu nou ro ubauba ama-owai-ri. Taie nedi dubu ro aise gomi urubia mutu owera mea mino to imodobowa ri.
32 Nou ro ibo, “Nu mo ro kemowameai modobo ra? Iedi eputa dubu ro 20,000 boso urubia mutu e. E e, modobo pua mo ro kemowameai.” Taie iedi eputa dubu ro isana ipi ato gou-ro, nou ro urubia nato gimeiriai iedi eputa dubu ro miro owera gemowou-rimo.
33 Ina noudo ie, etu ubi ra mo kowasoro aboto, nu beda namabu sirio iworohuti modobo ie imese kimeseruti.’
Mea topo nio ro aseperai mamo
34 ‘Damena mea topo ie, kaupoti nu simara topo na-iasoperai nio aboudo modobo ra ina topo kowameai aboto?
35 Iedi damena ro ubauba to imese arapoi, goto meana nou ro owai-ri pua. Urubia aboudo modobo ato owamo edi damena gohi ro keherai aboto.
Etu ra mo owera modobo ato kirowidiro aboto, nu mo owera gare se ba-memedea-ro.’