15
Sipisipi na-gararaseperai nou totomu e
1 Takesi kimade urubia amia ubauba urubia mutu neio sirio tau a-wiradabutiti-mo, Iesu owera gare emedea ri.
2 Kaupoti Parasi urubia Mose sabi kitamudiro urubia mutu, neio ro iedi tanaro ro na-iaurititi-mo, neio ro ibo, ‘Ma-diauri-mo nedi dubu ro nou ubauba urubia mutu se idabutiti ohona atu moro to neio mutu iato kiho ie.’
3-4 Taie neio Iesu ro nedi totomu ro nou gimowauti, ‘Etu umoro ra nio ata ro 100 sipisipi na-iworohuti ina kaupoti nato na-wodau, 99 sipisipi nou ro egea mere se mea moro ato kimeserai ie. Taie nu iato aise kaimai ie edi sipisipi ro osora ri. Nou ro kosora ie womu tato kowea.
5 Taie nou ro kowea ato kamade mutu aise kohiai ie, edi sipisipi ro kamitiai se
6 kowahau e sabowa to. Taie nou ro ibo namuturubi aboto, “Dou-rimo abora kamade anamadimi-iworohuti-ri, mo aboudo edi sipisipi ro na-garasoperai ta-nowea.”
7 Ina idaibo sosoro ie Godi nu sowake urio mutu auna ia kamade ro kiwati ie Adiri sabowa ato urubia mere ubauba aboudo na-erewesegerai ina orio keremiro na-omidai. Ina idaibo sosoro ie 99 mea tuputupu urubia sapuwo to kamade auna se iamo-ri pua.’
Mani iopu na-gararaseperai nou totomu e
8 Ina ata totomu Iesu ro iato gimowauti ibo, ‘Ata orobo ro auna wisa siriba mani 10 to na-iworohuti, ina ata nato na-wasoperai nu keba se erempa se keremowatea ie, nou ro erempa pina to meana se nato kosora ie edi mani iopu ro, nou ro moto goro mea mino to kotobiti ie, womu tato nou ro kowea.
9 Nou ro beda tau ato owea iato namuturubi iromai. Nou ro ibo, “Dou-rimo abora kamade namadimi-iworohuti-ri. Mabu mo ro edi mani iopu ro na-naseperai abora ta-nowea.”
10 Ina idaibo sosoro ie urubia mere ubauba aboudo na-erewesegerai ina orio keremiro na-omidai Adiri sabowa ato Godi nou sowake urio mutu auna kamade ro kiwati ie.’
Urubia mere na-gararaseperai nou totomu e
11 Ina Iesu ro ata totomu iato gimowauti ibo, ‘Ata dubu netewa teibo mere teibo mutu na-imidirotiti,
12 ina saro mere nato gou-ro abera aboto nou ro ibo, “Idau oro ido to araburai-wiri, mo do to edi namabu ro na-giapoi, abora se domia-ro!” Taie abera ro nou owera se girorowai mere teibo nou ro erere se iato gimohoduti-ma.
13 Iedi saro mere ro na-geremowoiti taie imese gasiriai ata muso duriomoro to. Taie ito na-gorowateai nu edi mani gebari ro dorogara se tanaro kisioidiro ato giporeai.
14 Taie tuturu to pua edi duriomoro ro nato auna ia sogoi tau ro gereredea. Nu ia ibose asotaina gosora nu mani ta-giporeai.
15 Taie simara ubi ato nato gou sabowa kiauri dubu aboto woko irobai ri. Nedi mere ro sabowa kiauri dubu ro giro kemeauri woko aboto gemeiriai.
16 Nu auna ia sogoi ro owatiti, giro ro edi ohona ro ihotiti-mo, nou auna ubi ro owamotiti kiho aboto. Kaupoti nou urubia aboudo ata tu ata iaurititi pua.
17 Taie nu kimaragoidiro nato giwia nou ro beda tanaro gisioidiro. Nou ro ibo, “Mo abera edi sowake urubia ro neio meamea ohona ihotiti-dumo. Kaupoti mo abora nou e sogoi ro noti nowati aupise ie karaburai aboto.
18 Mo anama-orowameai-ri Idau aboto. Ina mo ro ibo anama-utura-ri nou aboto, ‘Idau mo auna ubauba tanaro nisioidiro Godi aboto ibose oro aboto.
19 Abora mo oro mere to kararasoro modobo pua, mo oro sowake mere to nama-ararasoro-ri.’ ”
20 Taie nu abera aboto imese gorowameai-ro. Abera ro mere muso rido ioudo gowea-ro na-gou-ro nu auna nirimagare aise goi mere aboto. Abera ro aise gemarario mere nou ro aise gohiai iato gosome kamade ri.
21 Mere ro ibo, “Idau mo auna ubauba tanaro nisioidiro Godi aboto ina ibose oro aboto. Abora mo modobo pua oro mere to kararasoro.”
22 Kaupoti abera ro woko urubia aboto ioudo gutura-ro, “Mea ia orio obotama samo to dememidai-rimo, tu reini dowori-mo, sairo pata teibo sairo ato demedea-mo.
23 Ibose ata dubu ro mou burumukau dawade memopia-ro, abora soriomu e nimo kamade anamadimi-iworohuti-ri.
24 Mo mere ta-garaburai abora nu pamo rido ta-orowameai-ro, nu tau se garaseperai kaupoti nu abora ta-nowea-mo.” Taie iato neio kamade ro gereredea.
25 Nou naramu pari aboudo na-gorowameai-ro, moto aupiaupi na-gemowaititi-ro nou ro nato girorowai kamade diamo na-garo-rimo moto goro ato.
26 Nou ro ata sowake dubu nato gemodowa, “Moto goro ato etou tanaro ro ororosioidiro-die?”
27 Ina sowake dubu ro ibo, “Oro neama ta-orowameai-ro ina burumukau dawade ta-emopia oro abera ro, mabu oro neama mea se orowameai-die.”
28 Naramu auna serawo ro gorobai, nu moto to odoro pua soriomu aboto. Ina nu abera ro aise gemosuruwo-ro binio to gemediawado odoro ri.
29 Kaupoti keba mere ro ibo, “Ma-diauri! Mo sirio kisimisi ta-niporeai oro woko kemesioidiro dibura dubu sosoro, ibose sirio tau oro ubi tanaro mo ro aise nisioidirotiti. Kaupoti mo namuturubi mutu oro ro ata nakomu ata emapoi pua idaibo nanigosi dawade ata opia ri soriomu nari.
30 Kaupoti oro edio mere ro na-orowameai-die oro ro edi mani ro na-gomia era gabo mamio ato giporeai. Ina nou e oro ro burumukau dawade nou emopia.”
31 Abera ro ibo, “Mona ia oro mo ia mere ie! Oro mo mutu nato atu se nimidirotiti-do. Mo edi namabu sirio ro oro do ie.
32 Nu nimo ro soriomu kamade mutu kemesioidiro modobo ie. Mabu oro neama buro ta-garaburai, ina abora nu pamo rido ta-orowameai-ro, nu tau se garaseperai kaupoti nu abora ta-nowea-mo.” ’