17
Iesu ro ubauba sapuwo to gitamudiro
1 Iesu ro ibo kowasoro urubia aboto, ‘Koko kiwaibirio tanaro amadidimo-ou-ri urubia ubauba tanaro kisioidiro aboto. Etu ro kowaboi ra ata mere kainai ubauba tanaro kosioidiro aboto, nou ro auna ia ubauba wisa kowea ie.
2 Godi nou aboto auna serawo ama-oi-ri. Beda dubu ro gowodoro mere kainai ubauba to nou aboudo modobo ie auna nadi wagoha rudo kemebuai oromo damo to keherai, nedi wisa ro kainai ie. Kaupoti Godi ro iedi wisa ro namadi-aiwai-ri nou aboto auna ia ubauba wisa nou ro ama-owea-ri.
3 Mea se deremowotoi! Oro aboto boinana kimibiria dubu ro ubauba tanaro na-wosioidiro, nu hio to demadowerai ibo, “Oro ro ubauba tanaro osioidiro. Ba-dorodiobo ido osioidiro ate.” Ina nu nama-erewesegerai-ri nu edi ubauba ro oro ro nato ba-dematopeamuti.
4 Ina ibose nedi atu dubu ro nou ro kaupoti saiki ato omuomu se na-isioidiro ubauba tanaro oro aboto, ina atu saiki ato omuomu se na-orowame-die oro aboto ibo “Nirimagare, nedi ubauba ro nou aboudo imese nerewesegerai.” Io oro ro modobo ie nu ubauba kematopeamuti.’
Iesu ro kimibiria sapuwo to gitamudiro
5 Kitiodorai urubia ro ibo Abera Naramu aboto, ‘Nimo kimibiria pupuwo dimowai-ro!’
6 Ina neio Abera Naramu ro ibo gimowameai, ‘Nio abato kimibiria mirie iopu kainakaina sosoro kiamo ato, nio ro kutura ie deimi ota aboto ibo, “Oro daraubai sipi mutu nakara se dodori oromo ito, iato nakara se ba-dararo.” Oro ro kutura owera nou ro kosioidiro ie, nu kodori ie oromo turi ato nakara se karararo ie.’
Wisa tato woko urubia sapuwo to gitamudiro
7 ‘Etu umoro ra nio ata ro wisa tato woko dubu ata na-oworohuti, ina nu pari abato koroho ie o sipisipi kimowotoi. Ina ioudo na-orowameai-die nu oro ro ibo kemowapotai ra? “Oro demobodiai ohona ta-nemaremuti aise ba-diho.” E e, oro ro idaibo owera utura-ri pua nou aboto.
8 Oro ro nu ibo kemowapotai ie, “Oro nama-eremododiai-ri mo ohona nato ba-demaremuti-ro. Mo kiho nama-oroporeai-ri, oro mo mapapati saro rido nato ama-iho-ri.”
9 Ina nedi wisa tato woko dubu ro oro owera to woko nama-oporeai-ri nou aboto oro ro eso owera kutura ra? E e, utura-ri pua.
10 Nedi owera ro nio aboto ou-die. Nio Godi ro edi woko gimapoi-ro isioidiro ri nio ro kiporeai ato, modobo ie nio ibo karo, “Nimo meamea urubia pua, dorogora se wisa tato woko urubia ie, idaibo woko nou ri nisioidirotiti-dumo.” ’
Iesu aboto eso owera mutu daimodaimo dubu ro gorowameai
11 Iesu Ierusarema sabowa to na-gou, nou ro Gariri duriomoro Samaria duriomoro neitiro edi turi mesebearo nou se gorohodorai-ro.
12 Turi mesebearo ato, ata sabowa kainai ta-gowamo, nu ito na-godoro 10 katio urubia ro nato gowea-rimo. Neio ro Iesu na-gowea-rimo
13 muso rido ioudo gutura-rimo, ‘Abera Naramu, Iesu! Nimo natonato dimati-ro, nimo oro ro kiwarebai modobo ie.’
14 Neio Iesu ro na-giwia, nou ro ibo neio aboto, ‘Nio dou-mo Godi ra urubia ra turituri urubia aboto, neio aboto durupi ba-diwapotai-mo ibo nio katio ta-ioiriai-mo.’ Taie neio Iesu owera se girorowai-rimo imese gou-rimo neio aboto. Iedi 10 katio urubia ro na-gou-rimo gabo ipi ato neio ta-geremasibai-rimo ibo nimo katio ta-ioiriai-mo.
15 Taie kaupoti dubu ro se gorowameai-ro Iesu aboto, ina Godi nou ro auna se iato gemowabu.
16 Taie ioudo na-gou-ro Iesu sairo mabu ato kauhio to aise girimusubua sosoro woidomari goto to iato giwaposowa, eso owera iato garo Iesu aboto. Nedi dubu ro gorowameai-ro nu Samaria dubu e.
17 Ina Iesu ro ibo, ‘Neio 10 urubia ie meana atu se a-woi-mo ra? Ina nu borubi boira?
18 Nedi daimodaimo dubu ro nakara se orowameai-die Godi aboto eso owera aro ri.’
19 Ina Iesu ro iato gutura nou aboto, ‘Deribua-ro! Ba-dorowameai simara sabowa to, oro simara kimibiria ro meana nou ro ta-wowai.’
Godi ro kiwaboi tanaro beda tau ato amadi-orowateai-ri
20 Arua Parasi urubia ro Iesu ibo gemodowa-rimo, ‘Godi ro kiwaboi tanaro beda tau ato amadi-orowateai-ri nimo aboto?’
Taie neio Iesu ro ibo gimowameai, ‘Godi ro kiwaboi tanaro beda tau ato namadi-orowateai-ri, nu urubia ro kiauri mino to orowateai-ri pua.
21 Nio amia urubia ro igediouti-ri pua, ibo “Godi ro kiwaboi tanaro nou e neito dou-rimo!” Ina arua ro ibo aro-ri pua, “E e ito mamo nou pua neito dou-rimo, Godi ro kiwaboi tanaro nato towamo.” Mabu Godi ro kiwaboi tanaro ata moro ato owamo pua nio ia abato towamo.’
Iesu edi tau ato namadi-orowameai-ri
22 Taie Iesu aise gerewesegerai nou simara kowasoro urubia aboto, ‘Ata koko tau tou-die Imese Urubia Kiauri Dubu mo kou aboto nio auna ubi ro ama-iamo-ri mo kowea aboto. Kaupoti iedi tau ro nato mo nato orowameai-ri pua.
23 Arua urubia ro ioudo amadidimu-utura-ri, “Ei neito dirarowea-rimo urubia dubu nou e, neito dou-rimo!” Ina arua urubia ro amadimu-utura-ri, “E e ito mamo neito dou-rimo nu nou e. Imese Urubia Kiauri Dubu nu nato tomidiro!” Kaupoti nio keba se bato gotobowa-rimo iato aise dorowotoi, nio ro modobo pua arua urubia kibodoidiro mo osora ri.
24 Imese Urubia Kiauri Dubu edio tau ato namadi-orowameai-ri nedi duriomoro ro neito, beda sosoro ra penenio na-erememiai toboro ato sapuwo rido sapuwo to.
25 Kebase nedi dubu ro urubia ro amadimo-ohoio-ri, ibose edi tau ro nato nu temeteme ama-iwia-ri.
26 Noa tau ato urubia beda sosoro gorowomidiro urubia idaibo mino to ibose to ama-orowomidiro-ri Imese Urubia Kiauri Dubu namadi-orowameai-ri.
27 Urubia ro nedi tanaro ro nou isioidirotiti-mo, kiho kidio kararemo edi tau ro nato, womu tato Noa ti-godoro ota bokose pe to, taie imese urubia sirio obo ro aise giopia.
28 Ina ibose, urubia beda sosoro gorowomidiro Roti tau ato, urubia idaibo mino to ibose ama-orowomidiro-ri Imese Urubia Kiauri Dubu nato amadi-orowameai-ri. Neio kiho, kidio, namabu korowamamade, namabu keremahudirio, pari kisioidiro, moto keremari idaibo tanaro nou isioidirotiti-mo Roti tau ato.
29 Kaupoti Roti Sodom sabowa kowaroho duwoduwo ato na-gemeserai-ro, iato era mio daroho iopu sosoro ubauba nibo mutu toboro rido Godi ro nato gemeiriai-ro edi tau ro nato imese urubia aise gipisiamuti.
30 Imese Urubia Kiauri Dubu namadi-orowameai-ri nou idaibo tanaro neio ro amadimo-ororosioidiro-ri.
31 Iedi saiki ro nato ata dubu moto maumo ato nama-oroho-ri, nou modobo pua karatea moto goro to namabu imidai ri. Ibose ata dubu pari abato nama-oroho-ri nedi tanaro ro nato nama-owea-ri, nou modobo pua korowameai sabowa to.
32 Ina nio ro a-imaragoidiro-dumo ra etou tanaro ro gororosioidiro Roti orobo aboto?
33 Ina etio ra simara durupi sapuwo to na-eremaragoidiro-dumo, neio edi keremiro ro saiki ata amadimi-iasoperai-ri. Etio ra keremiro na-iasepere-dumo mo sapuwo to, nedi urubia ro orio keremiro amadimi-iauri-ri.
34 Nio mo ro ibo a-nimowapotai, iedi duwo ro nato netewa teibo dubu teibo kaupoti moto ato nama-irobu-mari, Godi ro ata se ama-orobai-ri ata amadi-emeserai-ri.
35-36 Ibose netewa teibo orobo teibo neitiro ohona kisioidiro moro ato namadi-iwia-mari Godi ro ata se ama-orobai-ri ata imese amadi-emeserai-ri.’
37 Ina Iesu kowasoro urubia ro nato gemodowa-rimo, ‘Abera Naramu nedi tanaro sirio ro beda moro ato amadimo-ororosioidiro-ri?’
Ina Iesu ro neio ibo gimowameai, ‘Pamo durupi beda moro ato irobu ina banawario sirio neio nibo aboto ito ama-iroruwoidiro-ri.’