18
Garamu orobo koto kiauri dubu mutu
1 Iesu ro kowasoro urubia nedi totomu ro nouto gimowauti, mabu nou ubi ie neio sirio tau Godi aboto aise kararatoro. Neio kararatoro owera wisa kimowame tato, modobo pua neio pupuwo tato ro kirobowado.
2 ‘Ata sabowa ato koto kiauri dubu iato ta-imidirotiti nou ro Godi sapuwo to auna se imaragoidirotiti pua, ibose nou ro urubia sapuwo to auna se imaragoidirotiti pua.
3 Ina ibose edi atu sabowa ro nato ta-imidirotiti ata garamu orobo. Edi garamu orobo ro nu omuomu se irohotiti owera mutu koto kiauri dubu aboto, “Edi dubu ro gosioidiro ubauba mo aboto, mo dowarebai-ro mea se koto owera tuputupu se kiamo aboto!”
4 Ina koto kiauri dubu edi tau ro nato egea mere se ubi tato ta-goi edi garamu orobo ro kowarebai aboto. Kaupoti saro gabo ato nou kimaragoidiro ato ibo gereredea-rimo, “Mo ro Godi sapuwo to auna se imaragoidirotiti pua, ibose urubia sapuwo to auna se imaragoidirotiti pua.
5 Kaupoti edi garamu orobo ro mo nou ro aise nemaubere-die. Abora nu anama-owarebai-ri, mo ro tuputupu tanaro kisioidiro modobo ie nou aboto, mo nou ro masawe kemowaititi modobo pua.” ’
6 Taie Abera Naramu ro ibo, ‘Owera neito ma-dirowidiro-rimo, kaupoti sapuwo to kiwatuti koto kiauri dubu ro nio ro ma-demaragoidiro-mo nou ro beda owera to gutura.
7 Godi sirio tau umoro aise iamotiti-die duwo saiki na-irowarotiti-dumo nou ro edi urubia ro girapoi-ro nou ro tuputupu tanaro neio aboto kisioidiro ie. Ibo pua nou umodi neio kararatoro owera wisa kimowame aboto.
8 Nio mo ro ibo mimowapotai-ro neio edi kararatoro owera ro wisa Godi ro tuputupu mino to kimowame ie.
Kaupoti Imese Urubia Kiauri Dubu mo nou se ie, neito namadi-orowameai-ri, mo ro urubia kimibiria mutu sirio se anamadi-atowamo-ri ra?’
Godi aboto aupise beda sosoro kosiomai ra
9 Arua keremowabu urubia iato ta-gorowomidiro. Iedi urubia ro idaibo kimaragoidiro nou giworohuti-rimo. ‘Nimo meamea tuputupu urubia ie, ibo pua arua urubia sosoro. Neio ubauba tanaro kisioidiro urubia ie.’
Ina noudo ie Iesu ro neio totomu ibo gimowauti. Nou ro ibo,
10 ‘Ata tau ata Parasi dubu imese gidiai Tarena Moto to Godi aboto araratoro ri. Nedi tau ro nato ata takesi kimade dubu ibose to gidiai Tarena Moto to Godi aboto araratoro ri.
11 Parasi dubu aise gotobowa, taie nou simara sapuwo to Godi aboto nato garatoro. “Godi, oro aboto mo ro eso owera naro mabu mo amia urubia sosoro pua, piro tanaro kisioidiro, ubauba tanaro kisioidiro, arua mamio mutu koroho. Ina ibose iedi takesi kimade dubu ro na-otoi-die mo nou sosoro pua.
12 Kaupoti woiki maumo ato mo kiho tato komidiro ie saiki teibo to. Mo ro duriomoro namabu 10 soirio to kidabuti ato, kaupoti soirio oro aboto aise kiaiwo ie.”
13 Takesi kimade dubu nu musomuso se gotoi-ro pari mabu ato gimatarumowado-ro. Nou modobo pua Adiri to kawota tu teibo hoko ato aise geremohiai nou nakara se umoro ie ibo nou ubauba dubu e. Taie nou ro ibo, “Godi mo natonato demati-ro mo imese ubauba tanaro kisioidiro dubu e.” ’
14 Iesu ro ibo, ‘Nio mo ro a-nimowapotai nedi takesi kimade dubu ro na-gorowameai simara moto to, nou Godi ro mea tuputupu dubu to gapoi. Kaupoti nedi Parasi dubu ro Godi ro mea tuputupu dubu to apoi pua.
Nakara se awawo to beda urubia ro ararasoro-dumo neio saiki ata Godi ro sopu to amadi-iwororuwo-ri. Ina etio ra dorogora se urubia keremowabu tato, saiki ata neio Godi ro ohu to ama-iwioidiro-ri.’
Etio ro amadimo-odoro-ri Godi edi kiwaboi maumo ro neito
15 Arua urubia ro merebusere kainakaina Iesu aboto nato giworoho-rimo nou ro tu itomo ri korosa kimio sapuwo to. Ina nedi tanaro ro kowasoro urubia ro na-gowea-rimo, neio masawe ro giwati mamio abeamio aboto. Merebusere kainakaina neio ro aise gibeouti-rimo neio ubi tato ie Iesu aboto kiworoho.
16 Kaupoti Iesu ro kowasoro urubia neito gimowapotai, ‘Merebusere kainakaina nio ro igidiobuti-mo. Neio mo aboto mou-rimo. Mabu Godi ro kiwaboi tanaro idaibo merebusere kainakaina neio aboudo kodouti gabo modobo ato aidiro-die.
17 Ina nio morobise owera nimowapotai, etio ra Godi ro kiwaboi tanaro maumo ro neito kodoro tato, merebusere kainakaina ro beda sosoro to odouti-dumo, iedi urubia ro Godi edi kiwaboi tanaro maumo ro neito kodouti modobo pua.’
Eputa dubu karatodai owera ie
18 Ata eputa dubu ro Iesu ibo garatodai, ‘Mea kitamudiro dubu, womu tato womu tato keremiro mo ro beda sosoro anama-owea-ri?’
19 Ina Iesu ro nu ibo gemowameai, ‘Mo oro ro mea dubu to etou mabu ato napoi-die? Ata mea dubu ata omidiro pua, Godi kaupoti nou se ie imese meana ie.
20 Mose edi sabi sirio ro na-gisioidiro oro auna umoro ie, idaibo Oro modobo pua arua mamio mutu koroho. Urubia iopiauti mamo. Arua urubia nakomu piro to iwopiro mamo. Koto tau ato urubia owera kakate moro to imoworohuti mamo. Mamu ra abera ra mea mino to gi-iauri-mari.’
21 Kaupoti edi eputa dubu ro, nou ro ibo, ‘Io nedi sabi ro mo ro kainai rido naratamuai mea mino to nibodorotiti.’
22 Iesu ro na-girorowai edi owera ro nou ro ibo, ‘Kaupoti hodo oro aboudo torororidiro-die, oro ba-dorowameai sabowa to oro edi suana sirio ro na-iworohuti mani to ba-mowamade-mo. Ina edi mani ro namabu tato urubia oro ro neito ba-diwarebai. Oro ro nedi tanaro ro nama-osioidiro-ri, ido oro ro meamea wisa ama-iwia-ri Adiri sabowa ato. Ina mo nato ba-dobodoro-ro.’
23 Kaupoti iedi dubu ro nedi owera ro na-girorowai nou kamade tato aise goi, mabu nu sirio namabu aboto auna se gimaragoidiro.
24 Iesu idomari teibo nou ato se giwotobowa-ma nou ro ibo, ‘Suana sirio dubu aboudo koko ia ie Godi edi kiwaboi tanaro maumo ro neito kodoro.
25 Io idaibo sosoro ie kemoro nira goro rido kodoro ra, ina keresia ra ata sapuwo to? Modobo ia pua io! Ina idaibo sosoro ie suana sirio dubu ro kodoro koko ia ie Godi ro kiwaboi tanaro maumo ro neito.’
26 Urubia sirio ro na-girorowai-rimo nedi owera ro neio ro Iesu iato gemowameai-rimo, ‘Ina womu tato keremiro etio ro amadimo-owea-ri?’
27 Ina neio Iesu ro ibo gimowameai, ‘Urubia ro kisioidiro tato tanaro io Godi aboudo modobo ie.’
28 Pita ro iato gutura Iesu aboto, ‘Imese beda mutu nakomu sirio ra nimo ro ta-nimeserai-rimo. Oro nimo ro saro rido ti-nowasoro-dumo.’
29 Iesu ro ibo, ‘Nio mo ro morobise owera mimowapotai-ro. Etio ro imesere-dumo neio simara sabowa, upi, naminiramio, mamio abeamio, merebusere Godi edi kiwaboi tanaro ro nou sapuwo to,
30 neio ro sirio se nedi duriomoro nato amadimi-iwia-ri. Ina ibose ido, womu tato womu tato keremiro neio ro nou amadimi-imidai-ri.’
Iesu ina geremabowa simara pamo sapuwo to
31 Iesu ro 12 kowasoro urubia soirio maumo rido aise giwatateai-ro nakara moro to, iato nou ro ibo gimowapotai, ‘Nimo Ierusarema sabowa to nidiai-dumo. Imese Urubia Kiauri Dubu sapuwo to owera Godi ipusu owera urubia ro keba se ta-gisioidiro-rimo. Nu beda sosoro amadimo-oworohuti-ri morobise to iato amadimo-ororosioidiro-ri Ierusarema sabowa ato.
32 Nu neio ro Iu owera karo tato urubia aboto amadima-apoi-ri. Ina amadime-emasosowado-ri, marato owera to amadime-emaro-ri, gase to amadima-amoruti-ri. Ibose nou kerei to ubauba mino to amadime-epesuti-ri. Saro to nu iato amadimo-opia-ri.
33 Kaupoti nu bobo ato netewa teibo saiki to ama-orobu-ri netewa didi saiki nama-orobai-ri nu pamo rido amadi-orowameai-ri keremiro to.’
34 Iesu kowasoro urubia ro nu edi owera ro maumo mea se ememidai pua, owera maumo Godi ro a-gowopirua neio aboudo. Neio eremasibai pua Iesu ro beda tanaro sapuwo to gimowauti.
Iesu ro pogo dubu idomari teibo meana gemowai
35 Iesu Ieriko sabowa to aupi se gowamo korowateai, iato ata idomari pogo dubu gabo kakate ato gomidiro, nou ro koroho urubia namabu ri giwaro.
36 Nou ro urubia sirio sairo diamo gare gimedea na-goroho-rimo, nou ro urubia iato gimodowa, ‘Io etou tanaro ro ororosioidiro-dioumo?’
37 Ina aupi urubia ro ibo, ‘Nasareta sabowa dubu Iesu io nou ro ou-die.’
38 Ina edi pogo dubu ro nato giaea-ro, ‘Iesu oro Godi ro Kohodowa Dubu e, mo natonato demati-ro!’
39 Iedi urubia ro gou-rimo kebase nu neio ro owera aise gemadohuti-rimo. Kaupoti nu idaibo neio ro pupuwo bo gemowai-rimo. Ina nou ro auna ia se iato giaea, ‘Iesu oro Godi ro Kohodowa Dubu e, mo natonato demati-ro!’
40 Iesu ro na-girorowai edi owera ro nu aise gotobowa gabo kakate ato. Taie nou ro ibo, ‘Iedi dubu ro mo aboto neito dowou-rimo.’
Taie iedi idomari pogo dubu ro Iesu aboto na-gorowateai-ro, nou ro nato gemodowa,
41 ‘Mo ro etou tanaro nama-osioidiro-ri oro aboto?’
Ina idomari pogo dubu ro ibo, ‘Abera Naramu, mo ubi ie mea se kirarowo aboto.’
42 Taie Iesu ro ibo, ‘Oro abora ma-dirarowea. Mabu oro edi kimibiria ro mo abato na-owamo oro nou ro meana ta-owai.’
43 Iesu ro iedi tau ato gutura iedi owera ro iedi pogo dubu ro namabu sirio nato mea se giwia. Taie nu auna kamade goi, iato Iesu aboto aise garadabuai, kamade ri Godi nou ro iato gemowabu. Iesu ro edi tanaro ro na-gosioidiro urubia sirio ro na-gowea-rimo neio ro Godi nato aise gemowabu-rimo.