2
Iesu na-goroto Maria ro
1 Roma sabowa gebari auna gabamani eputa dubu to etu ro gararasoro nou masiro Ogasiti Sisa nou ro iaurititi, ibose imese duriomoro patu Roma rido iaurititi. Iedi tau ro nato nou ro owera iato gimerio imese duriomoro urubia modobo ie neio masiro aise kiaremuti buka to.
2 (Ina Sisa ro Kuiriniasi ta-gapoi Siria duriomoro emeauri ri, ina iedi tau ro nato keba tau e urubia sirio kou masiro kiaremuti aboto.)
3 Taie imese sirio urubia etio ro gorowomidiro muso duriomoro ato, neio simara sabowa to imese aise gemowameuti masiro iato iaremuti ri.
4-5 Taie iedi tau ro Iosepa nou imidirotiti Nasareta sabowa ato, Maria ra Iosepa ra neitiro ereredea pua, osio ra irimo ra ie, gabo se gimowou-marimo. Nedi sabowa ro neitiro na-gemeserai-rido Gariri duriomoro ato na-owamo neitiro imese giodori-maro ioudo, Iudia podo duriomoro na-gemidiai-rido, womu tato Beterehema sabowa to ti-gorowateai-rido. Keba ia tau ato Deibidi Beterehema sabowa ato iato goroto mamu ro. Iosepa gu Deibidi aboudo orobu-die, neitiro nou ri gorowameai-rido Beterehema sabowa to, masiro iato iaremuti ri.
6-7 Taie iedi tau ro nato Maria niro mutu goroho. Neitiro na-gorowateai-rido Beterehema sabowa to, iato neitiro apira rubi kirobuti moto neito na-gou-rido, urubia sirio iedi moto gebari ro neio ro imese ta-gorobai-rimo. Neitiro gabo tato ie iedi moro ro iato kirobu-ma, taie sarupo kiwoubua nakomu iedi moto ato na-irowotoititi neitiro neito imese gou-rido. Ito na-gou-rido taie Maria nou mere temeteme ro nato gemowatumuti-ro, taie iato mere aise goroto.
Mere na-goroto nou ro mea mino to obotama kerekere to gemokoumiriamuti. Taie sarupo kiwoubua nakomu edi na bokose ro ohona boido ihotiti-dumo edi mere kainai ro koupiriamuti mamu ro ito aise gowotodai.
Sipisipi kimowotoi urubia Iesu sapuwo to owera girowai-rimo
8 Arua sipisipi kimowotoi urubia iedi duwo ro nato neio sabowa aupi ato sipisipi gimowotoi-rimo, tumu na aboudo giwasiouti-rimo.
9 Ina iedi tau ato na-gimowotoi-rimo Godi edi sowake urio ro nato gorowapotai-ro neio aboto, taie Godi edi auna ia woroworo ro nou ro gereredea, neio paea se imese gorowotoi. Nedi sipisipi kimowotoi urubia ro neio auna tere ro girobai.
10 Taie iedi sowake urio ro neio iato gimowapotai ibo, ‘Nio tere na ie, mo ro mea owera nimowou-die nio imowauti rie. Imese sirio urubia iedi owera ro namadimi-irowai-ri auna ia kamade ro ama-iwati-ri.
11 Abora nedi saiki ro nato nio ubauba aboudo kiapopo dubu, nou mamu ro ta-woroto Deibidi edi sabowa ro Beterehema iedi bamuai ro iato torobu. Nou Godi ro kohodowa dubu e, nu nio Abera Naramu e.
12 Nio ro namadimo-owea-ri bamuai koupiriamuti nama-orobu-ri kiwoubua nakomu ohona bokose ato, nio umoro amadimo-oi-ri ibo mo ro morobise owera naro.’
13 Tuturu to pua neibi na-girarowea-birimo sowake urio dawarea gebari iato aise garapusia-ro, keba sowake urio mutu neio atu se Godi iato gemowabu-rimo,
14 ‘Ohu ia ohu ia ato etu ro omidiro-die, modobo ie nou kemowabu. Beda urubia ra Godi kamade na-goi neio aboto, mea komidiro keremiro nou ro kimio ie.’
15 Iedi sowake urio sirio ro sipisipi kimowotoi urubia neio ro aise gimeserai-rimo, taie imese gorowameai-rimo Adiri sabowa to.
Taie iedi sipisipi kimowotoi urubia ro neio nakara se iato geremowagomea-rimo ibo, ‘Beterehema sabowa to ma-mou-rimo sowake urio ro beda sosoro nimowapotai-die, iedi tanaro ro na-wororosioidiro nou owea rie.’
16 Taie iedi sipisipi kimowotoi urubia ro neio ioudo samo to imese gou-rimo.
Neio ito na-gorowateai-rimo Maria ra Iosepa ra neitiro se giwia-marimo, ibose bamuai kainai mere ta-gowea-rimo na-gorobu kiwoubua nakomu ohona bokose goro ato.
17 Taie iedi bamuai kainai na-gowea-birimo neibi ro urubia owera iato gimowauti-birimo sowake urio ro edi na owera to gimowauti-biro iedi bamuai kainai ro nou sapuwo to.
18 Ina sirio urubia ro nedi owera ro na-girowai-rimo neio aborabora ro girobai.
19 Taie Maria ro sipisipi kimowotoi urubia edi owera na-gorowauti-rimo nou ro na-girowai nou niro turi ato aise giedea, sirio tau nou emaragoidirotiti.
20 Nodi owera ro neibi ro korowauti na-goporeai-birimo taie neibi imese gorowameai-birimo sipisipi bato gimeserai-birimo neito. Neibi na-gorowameai-birimo Godi neibi ro auna ia se gemowabu-birimo nou masiro ohu ia to gowouburio-birimo mabu neibi ro edi tanaro na-gowea-birimo morobise to gororosioidiro sowake urio ro beda sosoro to gimowapotai-biro.
Iesu masiro gemiditi-rimo
21 Iesu 8 saiki na-giporeai nou dubu simara takamai na-gasiai-rimo iato guriai-rimo, Isiraere urubia beda sosoro isioidirotiti-dumo. Ibose nou masiro iato gemiditi-rimo Iesu to, kebase sowake urio ro ta-gutura-ro Maria aboto nedi masiro ro neito asoro ri.
Iesu Tarena Moto to gowodoro-rido
22-24 Maria ra Iosepa ra iedi tau ro ta-gorobai Mose edi sabi ro na-giaiwai Isiraere urubia aboto neio beda tanaro isioidirotiti-mo idaibo agimari orobo na-osuruwo-die moto rido, nou meana kowai sapuwo to. Dubu mere koroto ato mamu nou 40 saiki to komidiro ie agimari. Nedi sabi ro Mose ro nou gaiwai neitiro ro nou gobodoro-rido.
Mose sabi ato ibose towamo agimari orobo ro mani to kimidai-ma ie dumu teibo o gimai teibo, nou kiwou-ma ie Godi ra urubia ra turituri dubu aboto emematowo na nou agimari aboudo meana kowai sapuwo to.
Neitiro ro ibose nedi bamuai ro Abera Naramu aboto nato gaiwiai-rido mabu Mose sabi ato towamo ibo Keba koroto dubu mere Abera Naramu aboto aise gi-aiwo-ri. Maria ra Iosepa ra nou ri gou-rido Ierusarema sabowa to idaibo tanaro isioidiro ri.
Simioni ro ta-gowea Iesu
25 Ata dubu nou Ierusarema sabowa ato imidirotiti nou masiro Simioni. Nou mea dubu e, Godi ro beda owera kutura ra nou ro aise isioidirotiti mea mino to, Tarena Urio ro oworohutititi. Isiraere urubia beda tau ato Godi ro namadi-iwosuruwo-ri ubauba aboudo Simioni nou emasebidirotiti.
26 Taie nou Tarena Urio ro kebase ta-gemowapotai ibo, ‘Mo kohodowa dubu nedi duriomoro ro neito namadi-ou-ri, oro ido to ama-araburai-ri, oro ro simara idomari to ama-owea-ri.’
27 Taie iedi tau ro nato Simioni Tarena Urio ro gowaboi Tarena Moto to, edi atu tau ro nato Maria ra Iosepa ra neitiro Iesu bamuai kainai nato gowou-rido Tarena Moto to Godi aboto aiwai ri.
28 Simioni ro edi bamuai kainai ro na-gorobai-ro Godi iato gemowabu,
29 ‘Abera Naramu mo oro sowake dubu e, modobo ie mo ata ubauba tato karaburai.
30 Nimo urubia ubauba aboudo kiapopo dubu mo ro simara idomari to ta-nowea, oro ro beda sosoro to garo-ro.
31 Oro ro nou mea mino to ta-gemododiai erere duriomoro urubia patu neio sosoro gabo ato,
32 nou woroworo ie imese urubia nou ro ama-imewiti-ri. Ibose arua urubia ro Isiraere urubia masiro nou mabu ato auna amadimo-owai-ri.’
33 Iesu mamu ra abera ra neitiro auna ia kimaragoidiro gowea-rido, Simioni ro beda sosoro owera garo iedi bamuai ro nou sapuwo to.
34 Taie Simioni ro neibi atu se korosa aise gimia-ibi. Maria aboto na-gerewesegerai, nou ro ibo, ‘Nedi urubia sirio ro Isiraere duriomoro ato na-orowomidiro amia ama-iretuti-ri, amia ama-orowotoi-ri, mabu nedi mere kainai ro Godi ro garapoi-ro nedi tanaro ro isioidiro ri. Urubia sirio ro nou amadime-ebeiouti-ri,
35 ina nou do ie urubia edi maumo kimaragoidiro ro nou ro paeapaea ama-imowaititi-ri. Maria, oro auna mibo ro ama-orobai-ri idaibo iona oro durupi ato na-otobowa idaibo temeteme oro ro nou ama-owaibia-ri.’
Ana ro ta-gowea Iesu
36 Iedi tau ro nato ata abere ibose to gomidiro nou masiro Ana, Godi ipusu owera kemoworohuti orobo ie. Nou abera Panuere, Asere gu dubu e Isiraere ato owamo. Nou kebase uramu ro ta-gedea, 7 kisimisi to gomidiro-rido nou
37 mutu, taie nou uramu aise garaburai. Nou nakara ia se imidirotiti uramu tato, ina abora 84 kisimisi ta-girobai. Kaupoti nedi abere ro Godi edi Tarena moto ro nou ro kemesere pua, nou sirio tau Tarena Moto to aise irohotiti, Godi nou ro iato emowabutititi duwo saiki. Nou iato komidiro ie ohona kiho tato Godi aboto kararatoro ie nou woko isioidirotiti.
38 Iesu iedi tau ato na-gowou-rido mamu ra abera ra ro Ana neibi aboto aise garadabuai, taie eso owera iato garo Godi aboto. Iu urubia arua etio ro geremasebidiro-rimo Godi ro ubauba aboudo beda tau ato ama-iwosuruwo-ri, Ana ro idaibo urubia neio gimowauti Iesu sapuwo to.
Iosepa ra Maria ra Nasareta sabowa to gorowameai-rido
39 Iosepa ra Maria ra neitiro edio tanaro aboto na-gou-rido Ierusarema sabowa to imese na-gemopodiauti-rido nedi tanaro ro, taie neibi atu se imese gorowameai-birimo Nasareta sabowa to. Iedi sabowa ro Gariri duriomoro ato owamo.
40 Neibi iato na-imidirotiti-bimo Iesu iato ororomaititi womu tato nou kanikani ro ti-gorobai. Ibose nou pupuwo, muro mutu gororomai, ina Godi edi korosa ro nou abato ta-owamotiti.
Iesu kanikani Tarena Moto ato na-gomidiro
41 Kisimisi gabogabo Iesu mamu ra abera ra neitiro aise idiowadotiti-do Ierusarema sabowa to Kimasaudai Soriomu aboto, Isiraere urubia mutu.
42 Ina Iesu nou 12 kisimisi na-gorobai taie neibi atu se nato gidiai-birimo Ierusarema sabowa to nedi soriomu ro nou aboto.
43 Ina iedi soriomu ro kiamo na-goroporeai taie urubia sirio duriomoro gabogabo to iato aise gorowameai-rimo. Kaupoti Iesu kanikani orowameai pua nou Ierusarema ato geremeserai. Nou mamu ra abera ra umoro oi pua iedi tanaro na-gororosioidiro ibo nou ta-weremeserai Ierusarema sabowa ato.
44 Taie neitiro isana borubi mutu saiki tuturu na-gou-rimo neitiro ro adimo ato nato gowasosorai-rido, neitiro ro iato otoruti-do urubia na-gorowame-rimo, ‘Iau, neitiro mere a-wou-ro ra?’
Taie neitiro iato gosora-rido urubia kimodoruti
45 kaupoti owea pua, egea se gosora-rido. Taie neitiro iato aise gorowameai-rido Ierusarema sabowa to nou osora ri. Neitiro ro ibo gosora-rido ibo gosora-rido owea pua,
46 netewa didi saiki neitiro ro ta-giporeai-rido nou kosora.
Iesu nou isana a-gomidiro Tarena Moto ato, Mose sabi patu etio ro gitamudiro-rimo nou neio topira maumo ato gomidiro. Neio owera gimerewidiro, nou ro na-gimedea gare, taie nou ro iato gi-imodoruti-ri. Taie wisa neio ro iato gemowame-rimo, io idaibo sosoro gorowati-rimo neio.
47 Ina iedi urubia ro iato na-gorowomidiro neio imese auna ia se gimaragoidiro-rimo nou beda sosoro wisa giwame neio aboto, mabu nou umoro auna ia ie neibi mea se gibo-ibi.
48 Taie nou mamu ra abera ra nou osora-diodo, neitiro na-gorowateai-rido Tarena Moto to, nou iato gowea-rido a-gomidiro. Neitiro ibose auna kimaragoidiro ro giopia-ma, taie nou mamu ro ibo, ‘Iesu neitiro oro nosora-do oro idaibo tanaro etou ri gosioidiro? Neitiro oro ro auna kimaragoidiro nimia-madie!’
49 Ina nou ro ibo gimowameai-ma neitiro, ‘Mo nitiro ro etou nakomu ri nosora-do? Nitiro umoro kiamo modobo ie ibo Abera woko bato owamo io mo nitiro ro iato kowea ie.’
50 Maria ra Iosepa ra nou edi owera to na-garo neitiro ro mea se ememidai pua.
51 Taie nou mamu ra abera ra mutu atu se imese gorowameai-birimo Nasareta sabowa to.
Iesu ro mamu ra abera ra beda owera kutura ra nou ro eseiai-ri pua, aise kisioidiro ie. Taie edi tanaro sirio ro na-gororosioidiro-rimo Maria giropu aise geremohiai nou ro woki imati pua kimaragoidiro to aise iworohutititi.
52 Iesu na-ororomaititi nou mea muro mutu ororomaititi. Nou auna na-goi urubia nou aboto auna kamade ro iwatititi, ibose Godi kamade ro owatititi nou aboto.