23
Iesu Paireti ro gemodoruti
1 Edi awawo urubia sirio ro neio atu se aise giriribua-rimo Iesu neio ro gowaboi-rimo Roma gabamani dubu aboto masiro Paireti.
2 Neio ro Iesu Paireti abato iato gowauti-rimo. Neio ro ibo, ‘Nimo ro Iesu nou mabu ato norobai-dumo, mabu nou ro urubia ata sosoro to itamudiro, nimo urubia nou ro kakate moro to iwou. Nou ro urubia ibo imowautiti, modobo pua takesi mani kiaiwo auna ia eputa dubu Sisa nou aboto. Ina nu ia ibose nakara se ta-iarotiti ibo mo Godi ro kohodowa dubu eputa dubu nou se ie.’
3 Taie ina Paireti ro Iesu nato gemodowa, ‘Oro Iu urubia eputa dubu nou se ra?’
Ina Iesu ro Paireti ibo gemowameai, ‘Oro ro edi owera to na-utura-die io mo nou se ie.’
4 Taie Paireti aise gerewesegerai Godi ra urubia ra turituri awawo urubia aboto ina urubia sirio aboto. Nou ro ibo, ‘Nedi dubu ro Iesu mo ro ata ubauba ata emowea pua.’
5 Neio ro Paireti aboto owera ina ina aise garowado-rimo ibo, ‘Duriomoro nou ro owaudorowado. Nou ro edi bagea kitamudiro ro Gariri duriomoro rido gatamuai-ro, ina Iudia duriomoro to gou-die nimo isaubuti ri.’
Iesu Paireti ro gemeiriai Herodi aboito
6 Paireti ro na-girorowai iedi owera ro neio iato gimodowa ibo, ‘Iedi dubu ro Gariri dubu ra?’
7 Edi tau ro nato Gariri duriomoro Herodi ro giauri. Paireti ro Iesu nou ri gemeiriai Herodi aboto, Herodi edi tau ro nato Ierusarema sabowa to ta-gou-ro iato gomidiro.
8 Herodi ro na-gowea Iesu nou auna kamade ro gowati mabu nou ro Iesu sosoro iaurititi pua, owera se irowidirotiti nou sapuwo to. Herodi auna ubi ro owamotiti Iesu sosoro kowea aboto ina nou ro ata pupuwo korosa tanaro ata osioidiro ri nou sosoro gabo ato.
9 Herodi ro Iesu omuomu se gemodoruti, kaupoti Iesu ro nu wisa owera emowame pua.
10 Ina iato ta-gorowotoi Godi ra urubia ra turituri awawo urubia, ibose Mose sabi kitamudiro urubia neio ro Iesu binio to gowauti-rimo Herodi aboto.
11 Ina saro to Herodi nou simara boso urubia mutu neio ro Iesu sete to goworohuti-rimo, taie nu neio ro bagea to eputa dubu obotama iato gowoiti-rimo. Taie nu ioudo Herodi ro aise gemeiriai Paireti aboto.
12 Keba se Paireti ra Herodi ra neitiro serawo eremowomidirotiti-do. Kaupoti edi saiki ro nato neitiro iato aise garadabuai-rido.
Iesu opia ri Paireti ro gapoi
13 Paireti ro iato girumai Godi ra urubia ra turituri awawo urubia, duriomoro kiauri urubia, ina duriomoro ia urubia. Neio atu se iato garadabuti-rimo.
14 Paireti ro neio nato gimowapotai, ‘Nedi dubu ro mo aboto na-owou-dioumo, nio ro owauti-dumo ibo nimo urubia nou ro kakate moro to iwou. Kaupoti nio ro edi owera ro na-waro-diemo, nu mo ro nio sosoro gabo ato nemodoruti, ina nou abato mo ro ata ubauba ata owea pua.
15 Ina ibose nu Herodi ro na-emodoruti nou ro ata ubauba ata emowea pua. Ina nu nou mabu ato owameai-die mo aboto. Ma-diauri-mo nu morobise ie nou ro ata ubauba ata osioidiro pua, nu mo ro nou mabu ato kopia ie.
16-17 Ina noudo ie nu kebase mo owera to amadima-ado-ri taie sabowa to ido to nato anama-emeiriai-ri.’
18 Kaupoti urubia sirio ro na-girorowai-rimo nedi owera ro neio atu se nato giaiauti-rimo ibo, ‘Nedi dubu ro dopia-mo! Barabasi ro ba-morowameai sabowa to!’
19 (Barabasi ro gidabuti urubia boso nato gosioidiro-rimo auna sabowa ato, urubia kiopiauti nou ro gatamuai. Ina nu dibura to nou mabu ato gedea-rimo.)
20 Paireti ubi ie Iesu emeiriai ri sabowa to, ina urubia nou ro nato gimowapotai.
21 Kaupoti neio ro auna se nato giaiauti-rimo, ‘Meremopoguti ota kemowotowa ato! Meremopoguti ota kemowotowa ato!’
22 Ina Paireti ro netewa teibo tau ta-giwai owera karo mutu, ina nou owera mutu aise gorowameai-ro, nou ro netewa didi tau giwai. Nou ro ibo, ‘Mabu boira? Nou ro etou ubauba tanaro gosioidiro? Nu mo ro ata ubauba ata emowea pua nou mabu ato kopia ie, aise namadima-ado-ri taie sabowa to nato anama-otiodorai-ri.’
23 Kaupoti urubia sirio inaina aise giaiauti-rimo neio auna ubi ro giamo Iesu ota kemowotowa ato kemopoguti aboto, ina auna ia se nato giaiauti-rimo.
24 Paireti ro Iesu neio ubi ato aise gaidodorai ota kemowotowa ato emopoguti ri.
25 Taie dibura to edi dubu ro gedea-rimo Barabasi urubia ubi ato Paireti ro aise gowosuruwo-ro. Keba se Barabasi ro gidabuti urubia, boso nato gowou-rimo auna sabowa to nou urubia kiopiauti dubu e. Wisana Iesu Paireti ro aise gaidodorai nedi Iu urubia sirio ro neio simara ubi tanaro nou aboto ororosioidiro ri.
Iesu ota kemowotowa ato gemopoguti-rimo
26 Iesu neio ro ioudo na-gowosuruwo-rimo nu simara ota kemowotowa se garatidiro-ro. Taie ipi gabo ato neio ro Saimoni nato gematimai-rimo nu Sairini sabowa dubu e koroho moro rido gorowameai-ro. Nou boso urubia ro nato gemutura-rimo ibo, ‘Ei, oro ro ota kemowotowa demaratai!’ Saimoni ro Iesu aise goduria ota kemowotowa se gemaratidiro-ro.
27 Ibose Iesu imese sirio ia urubia ro gobodoro-rimo saro rido. Ina iedi topira ro nou maumo ato arua mamio ta-garadabuai-rimo Iesu neio ro idobi mutu gowaboi-rimo.
28 Kaupoti Iesu neio aboto na-gerewesegerai nou ro ibo, ‘Ierusarema mamio mo idobi nemerete-mo! Nio merebusere mutu nakara se idobi auna se deremerete-mo!
29 Mabu ata tau tou-die urubia ro ibo amadima-aro-ri, “Teri mamio nio garegare tato ama-irowomidiro-ri, nio ro merebusere sapuwo to kimaragoidiro siriosirio iworohuti-ri pua.”
30 Ibose urubia ro amadima-aro-ri ibo, Podo nio neito dosiomai-rimo nimo diahidimai-rimo! Damera nio ro ibose nimo diahidimai-rimo!
31 Mo ro nedi owera ro nutura mabu mo mea ota sosoro ie, ina urubia ro mo ubauba mino to noworohuti-dumo. Kaupoti nio pamo ota ie, era sosoro ie nio ido ubauba ia ubauba ia mino to amadimi-iworohuti-ri.’
32 Ibose netewa teibo sabi kisebo dubu teibo Iesu mutu atu se giwaboi-birimo kimopoguti-bi moro to.
33 Neibi edio moro to giwaboi-birimo masiro ararasoro ibo Eputa Soro podo. Taie boso urubia ro Iesu iato gemopoguti-rimo sabi kisebo dubu teibo mutu ata pere sapuwo ato ina ata tumodi sapuwo ato.
34 Taie Iesu ro ibo, ‘Abera neio ro nedi tanaro ro na-osioidiro-dumo ba-dimatopeamuti. Mabu neio umoro pua etou tanaro osioidiro-dumo.’
Ina Roma boso urubia ro durumai iato geremewehere-rimo, etio durumai ro giagobeidiro-rimo tuturu tau to, Iesu obotama neio ro gowamade-rimo.
35 Urubia sirio ro Iesu aupise giauri-rimo ina Iu eputa urubia ro sete to ubauba ia mino to goworohuti-rimo. Neio ro idaibo owera nou garo-rimo, ‘Nu arua urubia se iwarebidirotiti ina mabu boira nou nakara se orowarebai tato? Nu Godi ro kohodowa dubu ato modobo ie nu nakara se korowarebai.’
36 Ina boso urubia ro nu iato gemasosowado-rimo, neio
37 Iesu aboto na-goroho-rimo karakara obo omia ri. Neio ro ibo, ‘Oro Iu urubia eputa dubu ato oro modobo ie nakara se korowarebai.’
38 Neio ro eputa abato idaibo titi nou gematiti-rimo ibo, Nou Iu urubia eputa dubu e.
39 Ata sabi kisebo dubu na-gororidiro nou ro Iesu iato gemasosowado, ‘Oro Godi ro kohodowa dubu nou se ra, a? Dorowarebai nakara se, ibose mo dowarebai-ro!’
40 Ina ata sabi kisebo dubu ro nu aise gemadohodai nou ro ibo, ‘Idaibo garo, oro ro modobo ie Godi tere kemati. Nou ro beda wisa owea oro ro idaibo wisa nou owea.
41 Modobo ie neitiro ro kiwia nedi ubauba wisa ro, mabu neitiro simara ubauba tanaro sapuwo to niwia-do. Kaupoti nedi dubu ro nou ro ata ubauba ata osioidiro pua nu didi poro to iwia temeteme.’
42 Taie nou ro ibo, ‘Iesu, oro eputa dubu to nama-omi-ri, mo ba-demaragoidiro-ro.’
43 Ina nou ro ibo gemowameai, ‘Oro morobise owera nemowapotai, abora nedio tau ro nato oro mo mutu ama-imidirotiti-ri kamade duriomoro ato.’
Iesu a-garaburai
44-45 Saiki turi ato gotoi edi tau ro nato, duriomoro gebari imese duwoduwo ro ta-gatimuti, mabu saiki mea se imewia pua womu tato adimo saiki ti-gorobai. Ina Tarena Moto goro ato auna obotama ta-wororidirotiti, nu turi ato aise garapepea. Ibi gugu imese tarena ia ie iedi obotama ro Godi sosoro nou ro ta-owaseidirotiti.
46 Taie Iesu ro Abera auna se nato garahuomai, ‘Idau mo urio oro aboto naiwai.’ Iedi owera ro nou ro karo na-goporeai iato nu aise garaburai.
47 Nu edi boso eputa dubu ro gemotoi edi tanaro ro na-gororosioidiro-rimo nou ro Godi iato gemowabu. Nou ro ibo, ‘Morobise ie nou ata ubauba tato ie mea tuputupu dubu e.’
48 Iedi urubia sirio ro na-gou-rimo kemopoguti tanaro iauri ri, neio eputa se giweisorawado-rimo idobi mutu gorowame-rimo, mabu neio ro mea tuputupu dubu dorogora se mabu ato gemopoguti-rimo.
49 Kaupoti Iesu edi urubia mutu irohotiti, neio muso rido gorowotoi-ro ioudo girarowo-rimo. Ibose Iesu edi mamio ro gobodoro-rimo Gariri duriomoro rido neio ro ibose muso rido giauri-rimo.
Iesu pamo durupi nadi goro to gibiria-rimo
50-51 Ata dubu masiro Iosepa nou Aramatea sabowa dubu e. Nu mea tuputupu dubu e, nou ro a-masebidirotiti Godi edi kiwaboi tanaro ro neito orowateai ri. Nu ata Iu kanisere dubu e, kaupoti eputa urubia edi tau ato na-geremowauti-rimo Iesu kopia sapuwo to, nu ubi oi pua.
52 Taie Iosepa na-gou Paireti nou ro iato gemodowa Iesu pamo durupi ota kemowotowa rido owororuo ri. Paireti iato ubi aise goi.
53 Taie Iesu pamo durupi Iosepa ro na-gebedai-ro ota kemowotowa rido taie obotama to mea se iato gemokomuti. Taie nou ro aise gowou nadi goro to ito gibiria. Edi nadi goro ro ata pamo durupi ata iato owotodai pua, momuo goro ie.
54 Iu urubia komidiro saiki Paraide saiki koriodoi ato neido karatamuai ie. Nedi tau ro nato komidiro saiki aupise gowamo karatamuai. Ina noudo ie nedi durupi keremododiai woko ro nou ro koporeai modobo pua nedi tau ro nato.
55 Ina Iesu mutu edi mamio ro gou-rimo Gariri duriomoro rido, neio ro Iosepa aise gobodoro-rimo Iesu pamo durupi nou ro beda bobo to gibiria neio ro aise giauri-rimo.
56 Taie neio ioudo na-gorowameai-rimo, meamea nibonibo ota puara dehoro mutu iato gidabuti-birimo Iesu pamo durupi emadiriti na. Ata saiki Iu urubia komidiro saiki ro gowaroho, iedi mamio ro aise gorowomidiro mabu Mose sabi ro ibo aro komidiro saiki ato woko isioidiro mamo.