24
Iesu pamo rido Godi ro ta-gowameai-ro
1 Sande saiki kowaroho duwoduwo ato saiki mea se eredumudiro pua. Taie mamio meamea ota puara na-gimade-rimo Iesu pamo durupi emadiriti na nadi goro to nou giwou-rimo.
2 Neio neido na-girarowea-rimo nadi magere gigisi edi na to gemopai-rimo ta-gorodobura-ro.
3 Kaupoti neio neido na-gou-rimo bobo to aise gorowateai-rimo, Abera Naramu Iesu pamo durupi neio ro iato owea pua.
4 Neio a-giwaweauti-rimo pamo durupi sapuwo to beda sosoro tanaro ro gororosioidiro-rimo nou gemaragoidiro-rimo. Ina iedi tau ro nato netewa teibo dubu teibo aise gorowapotai-rido neitiro keakea obotama rido benenio se gerememiouti-rimo imese gotoi-rido neio gomo ato.
5 Edi dubu teibo ro neio ro na-giwia-marimo neio auna tere ro girobai taie eputa sopu to aise giborea-rimo. Taie edi dubu teibo ro neitiro ro ibo, ‘Keremiro dubu mabu boira nio ro pamo urubia bobo ato na-osora-dumo?
6 Nu nato pua ie, abora pamo rido ta-worowameai-ro, keremiro ie! Nio ro a-imaragoidiro-dumo ra Gariri duriomoro ato keba se nou ro beda owera to gimowauti? Nou ro nio ibo ta-gimowauti,
7 “Imese Urubia Kiauri Dubu ubauba urubia aboto amadima-apoi-ri ina neio ro ota kemowotowa ato amadime-emopoguti-ri. Kaupoti nu bobo ato tuturu tau to orobu-ri pua, netewa teibo saiki teibo namado-oroporeai-ri, ina ata kowaroho nou nato amadi-owameai-ri pamo rido.” ’
8 Edio mamio ro nato gimaragoidiro-rimo ibo, ‘Nimo Iesu ro keba se nedi owera ro neito ta-nimowautiti.’
9 Nedi mamio ro bobo rido neido na-gorowameai-rimo neio ro owera iato gorowauti-rimo 11 kowasoro urubia aboto ina arua kimibiria urubia aboto, bobo ato beda tanaro ro gororosioidiro-rimo.
10-11 Kaupoti edi owera ro neibi ro na-gorowauti-birimo, Iesu kitiodorai urubia ro imibiria pua. Neio ro bagea owera to gasoro-rimo bobo ato etou tanaro ro gororosioidiro-rimo. Nu edi mamio ro neio ie Maria Magadarena, Ioana, Iemisi edi mamu ro Maria, ina amia mamio ta-garadabuai-rimo neio ibo gedei-rimo. Neio ro gimowauti-rimo Iesu kitiodorai urubia bobo ato beda tanaro gowea-rimo.
12 Iedi owera ro Pita ro se girorowai nu imese girario bobo to. Nou ro bobo na-gemetai, Iesu pamo durupi iato owea pua, pamo durupi edi obotama to na-gemoupiriamuti-rimo nou ro nou se giwia. Taie iato nu aise gorowameai-ro moto to. Nu kimaragoidiro ro gopia edi tanaro ro gororosioidiro-rimo nou sapuwo to.
Abera Naramu netewa teibo kowasoro dubu teibo aboto gorowapotai
13 Iedi atu saiki ro nato, Iesu kowasoro dubu teibo neitiro Emausi sabowa to gou-rido. Ina Emausi sabowa musomuso mere ie Ierusarema sabowa rido.
14 Neitiro na-gou-rido dese to beda tanaro ro gororosioidiro-dumo Iesu sapuwo to edi owera ro neito geremowauti-do.
15 Neitiro keremowauti keremowauti gou-rido, iato Iesu neitiro turituri to egena bo gorosuria. Taie neibi atu se imese gou-birimo.
16 Neitiro ro nu keibimai moro rido Godi ro ta-giwasiai-ma.
17 Taie nou ro neitiro nato gimodowa-ma, ‘Nitiro na-wou-dioudo etou owera to eremowagomea-do?’
Ina neitiro iato aise gotobowa-rido nitonito se girarowo-rido.
18 Ata kowasoro dubu masiro Keropasi nou ro ibo, ‘Ierusarema sabowa ato edio tanaro ro gororosioidiro-dumo oro kaupoti umoro oi pua ra?’
19 Iesu ro ina iato gutura ibo, ‘Nitiro etou owera to eremowauti-do?’
Neitiro ro ibo, ‘Neitiro Iesu sapuwo to neremowauti-do nu Nasareta sabowa dubu e. Nu Godi ipusu owera dubu e, urubia nou ro pupuwo to imowautiti ibose pupuwo korosa tanaro ta-isioidirotiti Godi ubi ato ina urubia ro ta-iaurititi-mo.
20 Ina Godi ra urubia ra turituri awawo urubia, nimo eputa urubia mutu, nu neio ro aise gapoi-dumo opia ri ina ota kemowotowa ato iato gemopoguti-dumo.
21 Nedi dubu ro nimo ro ta-nimaragoidirotiti-mo Godi ro nou gohodowa nimo Iu urubia ubauba aboudo iapopo ri, nedi dubu ro Iesu nouse ie. Nedi tanaro ro na-gororosioidiro-dumo abora netewa didi saiki nou to orobai.
22 Ina nimo mamio kowaroho duwoduwo ato na-wou-dumo neio ro nedi owera ro na-orowauti-dumo nimo a-niwagogorai-dumo.
23 Mabu nu pamo durupi neio ro iato owea pua. Neio bobo aboudo na-orowameai-dioumo, nimo neio ro nimowapotai-dumo ibo Godi sowake urio teibo hiwo sosoro to kiauri-ma sosoro otoi-do. Neitiro ro ibo, “Iesu pamo pua nu keremiro ie.”
24 Ina nimo arua dubu nato ou-dumo bobo owea ri, neio ito na-orowateai-dumo Iesu iato owea pua, mamio ro beda sosoro to orowauti-dumo ibose to ororosioidiro-dumo.’
25 Taie Iesu ro ibo neitiro aboto, ‘Nitiro imese daradara ia ie! Nitiro umodi ia ie Godi ipusu owera urubia ro beda owera imowautiti-mo nou kimibiria.
26 Neio ro paease irowautiti-mo ibo Godi ro kohodowa dubu nu temeteme ama-iwia-ri ina nu ido to auna ia masiro Godi aboudo ama-omidai-ri.’
27 Taie Iesu ro mea se nato gemabuti nou ia simara sapuwo to Tarena Buka ato beda owera gisioidiro-rimo. Nedi owera ro Mose buka rido garatamuai-rimo ibose Godi ipusu owera urubia ro ta-gisioidiro-rimo.
28 Neibi Emausi sabowa aupiaupi na-gemowaititi-birimo, nedi dubu teibo ro iato aise gorodiobo-rido kaupoti Iesu aise gouwado.
29 Kaupoti nu neitiro ro aise gemediai-rido neitiro abato omidiro ri. Neitiro ro ibo, ‘Dou-ro saiki iopu ta-weretei duwo ro oi-die.’
Taie nu imese gou neitiro mutu,
30 neibi iato aise gomi-birimo, Iesu ro beredi na-gomidai-ro eso owera iato garo. Nou ro na-gesebuti neitiro iato gimio-ma
31 edi tau ro nato neitiro idomari Godi ro aise gimodobura-ma, Iesu neitiro ro aise geibimai-rido. Taie edi tau ato gowea-rido, nu ioudo aise gararaseperai-ro, egena bo gururiai-ro.
32 Taie neitiro nakara se iato geremowauti-rido ibo, ‘Neibi na-nou-diebimo gabo ato edi owera to na-nimowauti-madie, Tarena Buka owera maumo mea se nimabuti-madie, neitiro abato kamade era sosoro irarebai.’
33 Taie neitiro ioudo aise gorowameai-rido Ierusarema sabowa to, ina iato 11 kowasoro urubia, amia urubia mutu neitiro ro iato giwia-rido neio atu moro to ta-garadabuti-rimo.
34 Neio ro owera iato gorowauti-rimo ibo, ‘Morobise ie Abera Naramu ta-woubua. Nou nakara se Saimoni Pita aboto ta-orowapotai.’
35 Ina ibose Keropasi tiro ro gabo ipi ato beda tanaro ro gororosioidiro-rimo neitiro ro na-giauri-rido borubi kimibiria urubia iato gimowauti-rido, ibose Abera Naramu ro beredi na-ekekeouti neitiro umoro beda sosoro goi-rido ibo Abera Naramu nouse ie.
Iesu simara kowasoro urubia aboto gorowapotai
36 Iedi tau ro nato netewa teibo kowasoro dubu teibo ro iedi owera ro na-gimowauti-rido kimibiria urubia, taie Iesu neio turituri ato egenabo gorowapotai-ro. Nou ro ibo, ‘Miro nio abato ba-mowamotiti.’
37 Kowasoro urubia ro na-gowea-rimo Iesu, neio a-giwagogorai-rimo neio tere ro giwati, neio ro Iesu bamo to gasoro-rimo.
38 Kaupoti Iesu ro ibo, ‘Mabu boira nio tere ro na-iwati? Mabu boira mo nio ro eibimai tato? Etou mabu ato ra kimaragoidiro teibo na-iamo nio abato?
39 Tauo mo tu ra sairo ra ma-demeauri-rimo. Nu mo ia ie! Mo durupi nio ro ma-demowaseidiro-rimo. Bamo neio urio ie soro durupi nou tato ie. Mo nio ro ti-niauri-dumo simara durupi to noroho.’
40 Iesu owera na-goporeai nu tu ra sairo ra neio aboto aise giwawuti.
41 Neio abato kamade ibose to giamo, ina kimaragoidiro ro giopia, ina noudo ie neio samo to imibiria tato. Ina Iesu ro neio iato gimodowa, ‘Nio abato kouho nakomu ata potoro ra?’
42-43 Taie nu neio ro nakere koura se gomia-rimo neio sosoro gabo ato nou ro komidai iato aise gouho.
44 Taie nou ro ibo, ‘Nio ro a-imaragoidiro-dumo ra keba se mo nio mutu na-nirohotiti, nedi tanaro ro nou sapuwo to nio mo ro ta-nimowautiti ibo, “Mo sapuwo to sirio owera ta-gisioidiro-rimo Tarena Buka ato. Arua owera mo sapuwo to tiamo Mose sabi sirio ato, ina arua owera mo sapuwo to Godi ipusu owera urubia ro ta-gisioidiro-rimo, ibose arua owera mo sapuwo to Tarena Ohare Buka ato tiamo.” ’
45 Ina Tarena Buka owera Iesu ro na-giwasoro neio imese kimaragoidiro patu nato gimodobura.
46 Taie Iesu ro ibo, ‘Morobise ie Tarena Buka ato owera tiamo ibo, Godi ro Kohodowa Dubu temeteme ama-iwia-ri ina netewa didi saiki ato nu pamo rido Godi ro amadi-oweameai-ri.
47 Ina nedi owera ro nio ro nou korosa to urubia amadimi-imowauti-ri ibo, “Ba-derewesegerai-mo ubauba aboudo ina nio edi ubauba ro Godi ro nato ama-imatopeamuti-ri.” Nedi owera ro amadimo-obodorouti-ri Ierusarema sabowa rido imese nato ama-orobodorouti-ri duriomoro gabo gabo to. Io Tarena Buka owera ibo tiamo idaibo tanaro nou sapuwo to.
48 Ina nedi tanaro sirio ro neio beda sosoro gororosioidiro-dumo, nio ro simara idomari to noti iauri-dumo urubia neito ba-dimowauti-mo.
49 Nio sapuwo to mo ro anamadi-emeiriai-ri Tarena Urio. Keba ia se nou urubia aboudo Abera ro hodo ta-gasaubiai-ro nou ro emeiriai ri. Kaupoti Ierusarema sabowa nio ro emeserai ate iato aise ba-dorowomidiro womu tato Tarena Urio neito namadi-ou-ri nio nou ro ama-iatimai-ri, pupuwo nou ro ama-imio-ri.’
Iesu Godi ro gowioro Adiri sabowa to
50 Iesu simara kowasoro urubia Ierusarema sabowa rido na-giwosuruwo-ro Betani sabowa to aise giwou. Nu tu teibo ohu to aise giwotobowa-ma nou ro neio meana iato gimia.
51 Nou ro meana edi kimia ro na-gimia nu iato neio aboudo egenabo goruriai, taie nu Godi ro goto rido aise gaubudiro imese gowioro neio sosoro gabo ato.
52 Nu neio ro na-gemawotidiro-rimo kowioro moro ato, Iesu iato gemowabu-rimo. Taie neio ioudo auna kamade mutu aise gorowameai-rimo Ierusarema sabowa to.
53 Neio iato sirio tau Tarena Moto ato aise iradabutititi-mo Godi neio ro iato emowabutiti-mo.