4
Iesu Satani ro owaibiriotiti
1 Iesu Iodeni oromo rudo na-gidiai-ro, edi tau ro nato nou Tarena Urio ro goworohuti, iato imese gewedei goto se duriomoro to, nou iato imidirotiti.
2 Nou iato na-imidirotiti goto se duriomoro ato, Satani ro nato owaibiriotiti Iesu ro ubauba tanaro isioidiro ri. Ibo owaibiriotiti ibo owaibiriotiti iboooooo 40 saiki ti-giporeai kowaibirio to. Iedi saiki sirio ro Iesu ro ohona ihotiti pua, iato nou auna sogoi ro gemeriai-ro.
3 Satani ro nou ina iato gowaibia nou ro ibo, ‘Oro Godi mere ie, nedi nadi iopu ro na-owamo oro ro demowapotai dokou to mararapoi.’
4 Iesu Satani aboto aise gerewesegerai nou ro ibo, ‘E e ibo pua, Tarena Buka ato ibo iamo, Ohona kiho ato se owamo pua keremiro.’
5-6 Iato Satani ro Iesu imese gowioro ohu to, hio ito nou ro nato gemowapotai ibo, ‘Iedi duriomoro gebari ro urubia imese namabu mutu ma-diauri! Imese mo doie, mo ubi etu aboto niedea mo ro nou aboto anama-iaiwai-ri ina nou mabu ato ie nedi duriomoro gebari ro oro tu to nama-emeseruti-ri oro ro iauri ri.
7 Oro ro mo namadi-emowabu-ri nedi duriomoro gebari ro oro do ie.’
8 Iesu ro ibo, ‘E e Tarena Buka ato ibo iamo, Oro ro Abera Naramu Godi nouse gi-emowabu-ri. Nou ubi tanaro se gi-isioidiro-ri.’
9 Taie Iesu Satani ro Ierusarema sabowa to iato gowou Tarena Moto ohu to gowioro. Nou ro nato gutura, ‘Oro Godi mere ie neido dererepeduai!
10 Mabu Tarena Buka ro taro ibo, Godi ro sowake urio ama-imeriai-ri oro neio ro amadimi-iauri-ri.
11 Oro neio ro tu to amadimo-orobidiro-ri, oro sairo nadi ato iteamoidiro-ri pua.’
12 Iesu ro ibo gemowameai, ‘E e ibose tiamo Tarena Buka ato, Oro modobo pua Abera Naramu Godi oro ro kowaibirio oro ubi tanaro kisioidiro aboto.’
13 Taie Iesu sirio kowaibirio tanaro na-giporeai Satani ro nou iato aise gemeserai-ro womu tato nou ata tau nato amadi-orowameai-ri.
Iesu woko a-gitamuai
14 Iesu nou Gariri duriomoro to na-gorowameai-ro, nou Tarena Urio ro goworohuti pupuwo korosa nou abato ta-gowamo. Ina nou sapuwo to owera nato gorobodorouti imese sabowa gabogabo to.
15 Iesu ibose Iu urubia karadabuti moto sirio sabowa gabogabo ato na-irowotoititi nou neito idoutititi, nou ro urubia iato itomudirotiti. Urubia ro na-giauri-rimo nou edi tanaro na-gisioidiro neio ro nou iato gemowabu-rimo.
Nasareti urubia ubi tato goi-rimo Iesu aboto
16 Iesu bato gororomai nou neito gorowameai Nasareti sabowa to. Taie nou beda sosoro tanaro to irohotiti, edi tau ro nou nato gou Iu urubia karadabuti moto to komidiro saiki ato. Nou iato na-gotobowa Tarena Buka ioputi ri,
17 buka kiauri dubu ro na-gemowosuruo-ro Iesu ro kimapimai iato gimoputi. Godi ipusu owera dubu Aisaia nou edi buka ro na-gisioidiro nou ro noudo gimoputi ibo,
18 Abera Naramu aboudo ie Tarena Urio mo abato tomidiro abora nu mo mutu e. Mo nou ri narapoi-ro urubia mo ro imowauti ri mea owera, etio ra namabu tato na-orowomidiro nedi owera ro neio aboto ie. Mo nou ro nemeiriai-ro nedi duriomoro neito mo ro urubia owera imowauti ri, etio ra simara ubauba maumo ato na-orowomidiro neio idaibo sosoro ie dibura to orowomidiro, neio magere imodobuti ri iwosuwoduti ri ioudo. Ibose mo a-nou-ro etio ra idomari pogo na-orowomidiro neio idomari mo ro meana imowaititi ri. Ina etio ra wagoha to na-ituti-dumo arua urubia ro mo ibose neio aboto nou-ro neio iwarebai ri kiwagare aboto.
19 Ibose mo a-nou-ro owera imowauti ri ibo, ‘Abera Naramu ro edi tau ro na-garapoi-ro urubia meana iwai-ri edi tau ro abora nou e ta-gorowateai-die.’
20 Taie iato Iesu ro buka kopai, imese gowameai buka kiauri dubu aboto, nou iato urubia kitomudiro aboto aise gomi. Urubia sirio iato na-gorowomidiro neio idomari Iesu ato se gorowotoi.
21 Iesu ro idaibo owera gimowauti, ‘Nodi owera ro mo ro na-nimoputi Godi ro kohodowa dubu nou sapuwo to abora nou e notororosioidiro-dumo!’
22 Neio aborabora ro girobai daro auna se gimaragoidiro-rimo Iesu ro beda mea owera garo neio aboto. Neio nakara se iato geremowauti-rimo ibo, ‘Nedi dubu ro auna to ararasoro ri ra? Nou Iosepa mere ie.’
23 Iesu ina aise gerewesegerai neio aboto, ‘Nedi owera ro morobise ie mo sapuwo to nio ro amadima-aro-ri ibo, “Dokota dubu, oro nakara se meana dorowai!” Nio ro ta-girowai-rimo kebase mo ro edi korosa tanaro na-nisioidiro Kapeniama sabowa ato, ina nio ubi ie mo ro atu sosoro tanaro kisioidiro mo ia simara kororomai sabowa ato nato.
24 Nio abora umoro ba-doi-mo mo ro beda owera nama-aro-ri, io morobise ia owera ie. Godi ipusu owera urubia neio simara sabowa urubia ro kibeiouti ie.
25 Eraia edi tau ato na-gomidiro netewa didi kisimisi 6 sogomi kidabuai-bi ata daroho ata iarotiti pua. Isiraere urubia sirio iato na-gorowomidiro auna ia sogoi ro giwati. Ina Isiraere duriomoro ato upi garamio sirio iato
26 ta-gorowomidiro kaupoti Eraia Godi ro neio aboto emeiriai pua, ata moro to gemeiriai sabowa masiro Sarepata Sidoni gomo ato na-gowamo. Ata daimodaimo garamu orobo iato imidirotiti nou aboto gemeiriai nou ro iato owarebai ri.
27 Godi ata ipusu owera dubu Eraisa edi tau ato na-gomidiro, Isiraere urubia sirio durupi kukupi ro ta-giopia-rimo neio mutu gorowomidiro. Iedi kukupi ramutu urubia ro neio ata meana owai pua iedi tau ro nato, kaupoti dubu masiro Namani nouse gowai meana Eraisa ro. Namani Isiraere dubu pua, nou Siria duriomoro dubu e.’
28 Iesu ro beda owera gimowauti neio iedi karadabuti moto ro nato urubia iato na-gorowomidiro neio auna serawo aise goi-rimo.
29 Neio ioudo na-giriribua-rimo Iesu neio ro korobai iato kohoiouti kohoiouti imese gowou-rimo iedi sabowa ro neido. Sabowa beda moro ato gowamo edi podo kiasiai ro nou neito gowioro-rimo neio ubi ie nou ioudo eherai ri,
30 kaupoti nou ioudo aise gururiai-ro neio dubu patu maumo rido imese gorowameai-ro.
Iesu ro ubauba urio a-gemabodorai
31 Iesu nou Nasareta sabowa rido aise godori-ro Kapeniama sabowa to Gariri duriomoro ato na-owamo. Taie nou komidiro saiki ro iato na-gorobai urubia nou ro iato gitomudiro.
32 Urubia ro na-giauri-rimo nou kitomudiro muro neio iato aborabora ro girobai mabu nou iedi kitomudiro ro na-itamudirotiti pupuwo kosora mutu itomudirotiti.
33 Iedi Iu urubia karadabuti moto ro nato urubia dubu ubauba urio ro na-goworohuti nou iato ibose ti-gomidiro, nou ioudo auna ia se nato giaia-ro.
34 ‘Ei! Iesu! Nasareti dubu! Oro etou tanaro amadi-osioidiro-ri nimo aboto? Oro neito na-wou-die nimo ubauba iwai ri ra? Mo umoro ie oro Godi ro kohodowa dubu e.’
35 Iesu ro nou aise gemadohodai ibo, ‘Oro deremasiai, oro ro abora edi dubu ro demeserai, ioudo dosuruwo-ro!’
Iedi dubu ro ubauba urio ro iato aise geteamoidiro urubia sosoro gabo ato, ata ubauba ata osioidiro pua nou aboto, taie aise gemeserai.
36 Urubia ro na-gowea-rimo edi tanaro ro na-gororosioidiro neio kimaragoidiro ro giopia. Neio ro ibo, ‘Ee! Nou ata pupuwo korosa mutu iarotiti owera ubauba urio kimabodoidiro aboto!’
37 Iedi duriomoro nato edi tanaro ro na-gisioidiro, Iesu urubia ro na-giauri-rimo, owera duriomoro gabogabo to aise gorobodorouti.
Temeteme urubia sirio Iesu ro meana giwaititi
38 Iesu Iu urubia karadabuti moto rido ioudo na-gosuruwo-ro nou aise gemobodiai Saimoni moto to. Saimoni moto ato isa na nou emapura abere a-gorobu auna kabena ro gowati, taie neio ro Iesu nato gemowapotai-rimo nou sapuwo to.
39 Ina Iesu aise gosiomai nou korobu moro to, iato edi kabena ro nou ro nato gemadowerai nou aboudo aragare ri. Tuturu to pua nou kabena ro aise gemeseruti. Nou ioudo na-geribua-ro neibi ohona iato gimio-ibi.
40 Saiki ta-goriodoi urubia sirio temeteme urubia nato giwou-rimo Iesu aboto, neio ro erere temeteme urubia giwou-rimo nou aboto. Taie Iesu ro neio nato giwaseidiro kaokao se iato imese urubia nou ro meana aise giwaititi.
41 Ibose ubauba urio Iesu ro ta-gimabodoidiro urubia aboudo neio ro ibo gi-imiaiauti-ri, ‘Oro Godi mere ie!’
Taie Iesu ro neio auna se iato gi-imadowerai-ri ibo, ‘Deremasiai orowauti ate!’
Ubauba urio umoro ta-goi-rimo Iesu nou Godi ro kohodowa dubu e.
Iesu Iu urubia karadabu moto ato itamudirotiti
42 Ata kowaroho Iesu urubia koroho tato moro to neito imese gou. Urubia ro na-gowasosorai-rimo nou neio ro iato gosora-rimo. Neio ro na-gowea-rimo nou iato egea se godiobo-rimo.
43 Iesu ro neio neito gimowameai, ‘Modobo ie arua sabowa urubia mo ro kimowauti mea owera Godi ro kiwaboi tanaro beda sosoro ra nou sapuwo to. Mo neito nou mabu ato nemeiriai-ro.’
44 Ina Iesu Iu urubia duriomoro gebari ato neio karadabuti moto sirio ato, nou iato ibose ta-itamudirotiti.